ಮಂಗಳೂರು: ಮಗಳ ಹುಟ್ಟುಹಬ್ಬಕ್ಕೆ ಉಡುಗೊರೆ ಕಳುಹಿಸಿಕೊಟ್ಟಿರುವುದಾಗಿ ಹೇಳಿ ಮಹಿಳೆಯೊಬ್ಬರ ಖಾತೆಯಿಂದ 13.35 ಲಕ್ಷ ರೂ. ಪಡೆದು ವಂಚಿಸಿದ ಬಗ್ಗೆ ಸೈಬರ್‌ ಪೊಲೀಸ್‌ ಠಾಣೆಯಲ್ಲಿ ಕೇಸು ದಾಖಲಾಗಿದೆ. ಜುಲಿಯಾ ಎಂಬವರ ಫೇಸ್‌ಬುಕ್‌ ಖಾತೆಗೆ ಡಾ. ಜಿಮ್‌ ಕಿಯಾ ಎಂಬ ವ್ಯಕ್ತಿ ಫ್ರೆಂಡ್ಸ್‌ ರಿಕ್ವೆಸ್ಟ್‌ ಕಳುಹಿಸಿದ್ದ. ಜುಲಿಯಾ ಅದನ್ನು ಸ್ವೀಕರಿಸಿದ್ದು, ಬಳಿಕ ಜಿಮ್‌ ಕಿಯಾ ಜೊತೆ ಪರಿಚಯವಾಗಿ ನಂತರ ಇದು ವಾಟ್ಸ್ ಆ್ಯಪ್ ಚಾಟ್‌ವರೆಗೆ ತಲುಪಿದೆ. ಹೀಗೆ ವಾಟ್ಸ್ ಆ್ಯಪ್ ಸಂದೇಶವನ್ನು ಕಿಯಾ, ಜುಲಿಯಾಗೆ ಕಳುಹಿಸುತ್ತಿದ್ದ. ಇತ್ತೀಚೆಗೆ ಜುಲಿಯಾ ಮಗಳ ಹುಟ್ಟುಹಬ್ಬಕ್ಕೆ ಜಿಮ್‌ ಕಿಯಾ ಉಡುಗೊರೆ ಕಳುಹಿಸುವುದಾಗಿ ಸಂದೇಶ ಮುಖಾಂತರ ತಿಳಿಸಿದ್ದ. ತಾನೇ ಒಂದು ಪ್ಲಾನ್‌ ರೂಪಿಸಿಕೊಂಡು ಕಸ್ಟಮ್ಸ್‌ ಅಧಿಕಾರಿಗಳು ಬಂದು ನೀಡುತ್ತಾರೆ. ಆದರೆ ಅದನ್ನು ಬಿಡಿಸಿಕೊಳ್ಳಲು ಈಗ 13.35ಲಕ್ಷ ರೂ. ನೀಡಬೇಕಿದೆ. ನನ್ನ ಅಕೌಂಟ್‌ ಸದ್ಯಕ್ಕೆ ತಾಂತ್ರಿಕ ಸಮಸ್ಯೆ ಎದುರಿಸುತ್ತಿದೆ ಎಂದು ಪುಂಗಿ ಊದಿದ್ದಾನೆ. ಇದನ್ನು ನಂಬಿ ಜುಲಿಯಾ 13.35ಲಕ್ಷ ನೀಡಿ ಫೇಕ್‌ ಕಸ್ಟಮ್ಸ್‌ ಅಧಿಕಾರಿಯಿಂದ ಗಿಫ್ಟ್ ಬಿಡಿಸಿಕೊಂಡಿದ್ದಾಳೆ. ನಂತರ ತಾನು ಮೋಸ ಹೋಗಿರುವುದು ಜುಲಿಯಾಗೆ ತಿಳಿದಿದೆ. ಜಿಮ್‌ ಕಿಯಾ ತಾನು ವಿದೇಶದಲ್ಲಿರುವುದಾಗಿ ನಂಬಿಸಿ ಚಾಟ್‌ ಮಾಡಿದ್ದ. ಇಂತಹ ಸೈಬರ್‌ ಪ್ರಕರಣಗಳು ಮಹಾನಗರಗಳಲ್ಲಿ ನಡೆಯುತ್ತಿರುವಾಗಲೇ ಮತ್ತೊಂದು ಪ್ರಕರಣ ಬೆಳಕಿಗೆ ಬಂದಿದೆ.
from India & World News in Kannada | VK Polls https://ift.tt/3rzWzCb
