ಮೆಲ್ಬೋರ್ನ್‌: ಟೀಮ್‌ ಇಂಡಿಯಾ ನಾಯಕ ವಿರಾಟ್‌ ಕೊಹ್ಲಿಯನ್ನು ಅಡಿಲೇಡ್‌ ಟೆಸ್ಟ್ ಪಂದ್ಯದ ಪ್ರಥಮ ಇನಿಂಗ್ಸ್‌ನಲ್ಲಿ ರನೌಟ್‌ ಮಾಡಿಸಿದ್ದ ಸಾಕಷ್ಟು ಟೀಕೆಗಳಿಗೆ ಒಳಗಾಗಿದ್ದರು. ಆದರೆ, ಬಾಕ್ಸಿಂಗ್‌ ಡೇ ಟೆಸ್ಟ್‌ನಲ್ಲಿ ಕೂದಲೆಳೆಯ ಅಂತರದಲ್ಲಿ ತಾನೇ ರನೌಟ್‌ ಆದರೂ ಅವರ ಬಳಿ ತೆರಳಿ ಸನ್ನೆ ಮಾಡುವ ಮೂಲಕ ಬೆಂಬಲಿಸಿ ಅಭಿಮಾನಿಗಳ ಹೃದಯ ಗೆದ್ದಿದ್ದಾರೆ. ಮೊದಲನೇ ಟೆಸ್ಟ್ ಪಂದ್ಯದಲ್ಲಿ ನೀರಸ ಪ್ರದರ್ಶನ ತೋರಿದ್ದ ಅಜಿಂಕ್ಯ ರಹಾನೆಗೆ, ಪಂದ್ಯದಲ್ಲಿ ಕೊಹ್ಲಿ ಅನುಪಸ್ಥಿತಿಯಲ್ಲಿ ಸಾಕಷ್ಟು ಒತ್ತಡ ಇತ್ತು. ಅದರಂತೆ ಅದ್ಭುತವಾಗಿ ತಂಡವನ್ನು ಮುನ್ನಡೆಸಿದ್ದ ರಹಾನೆ, ಬ್ಯಾಟಿಂಗ್‌ನಲ್ಲಿಯೂ ಮಿಂಚಿದರು. ಟೆಸ್ಟ್ ವೃತ್ತಿ ಬದುಕಿನ 12ನೇ ಶತಕ ಪೂರೈಸಿದರು. 223 ಎಸೆತಗಳನ್ನು ಎದುರಿಸಿದ್ದ ಅವರು, 112 ರನ್‌ ಗಳಿಸಿ ರನೌಟ್‌ ಆದರು. ಅಜೇಯ 104 ರನ್‌ಗಳೊಂದಿಗೆ ಮೂರನೇ ದಿನ ಬ್ಯಾಟಿಂಗ್‌ಗೆ ಇಳಿದ ಅಜಿಂಕ್ಯಾ ರಹಾನೆ ಎರಡನೇ ದಿನದ ಲಯವನ್ನು ಮುಂದುವರಿಸಿದ್ದರು. ಆದರೆ, 49 ರನ್‌ ಗಳಿಸಿ ಆಡುತ್ತಿದ್ದ ರವೀಂದ್ರ ಜಡೇಜಾ, ನೇಥನ್‌ ಲಯಾನ್‌ ಎಸೆತದಲ್ಲಿ ಆಫ್‌ ಸೈಡ್‌ಗೆ ಚೆಂಡನ್ನು ಹೊಡೆದರು. ಈ ವೇಳೆ ತ್ವರಿತವಾಗಿ ಸಿಂಗಲ್‌ ಪಡೆದು ಅರ್ಧಶತಕ ಪೂರೈಸುವಂತೆ ಜಡೇಜಾಗೆ ರಹಾನೆ ಪ್ರೇರೇಪಿಸಿದರು. ಆದರೆ ತಾನು ಕ್ರೀಸ್‌ಗೆ ತಲುಪದೆ ಕೂದಲೆಳೆಯ ಅಂತರದಲ್ಲಿ ರನೌಟ್‌ ಆದರು. ಈ ವೇಳೆ ಜಡೇಜಾ ಕೂಡ ಕಷ್ಟದ ರನ್‌ಗೆ ಓಡಲು ನಿರಾಕರಿಸಲಿಲ್ಲ. ಆದರೂ, ಅಜಿಂಕ್ಯ ರಹಾನೆ ಎಡಗೈ ಬ್ಯಾಟ್ಸ್‌ಮನ್‌ ರವೀಂದ್ರ ಜಡೇಜಾ ಅವರನ್ನು ಬೆಂಬಲಿಸಿದರು. ಹಂಗಾಮಿ ನಾಯಕನ ಕ್ರೀಡಾ ಸ್ಪೂರ್ತಿಗೆ ಅಭಿಮಾನಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಈ ಪೋಟೊ ಟ್ವಿಟರ್‌ನಲ್ಲಿ ವೈರಲ್‌ ಆಗಿದೆ. ರನ್‌ ಓಡುವ ವೇಳೆ ಅಜಿಂಕ್ಯ ರಹಾನೆ ಬ್ಯಾಟ್‌ ಕ್ರೀಸ್‌ ಲೈನ್‌ ಮೇಲಿತ್ತು. ಈ ಕಾರಣದಿಂದಾಗಿ ಬೇಲ್ಸ್ ಕೆಳಗೆ ತಳ್ಳಿದ್ದ ಟಿಮ್‌ ಪೇಯ್ನ್‌ಗೂ ರನೌಟ್‌ ಬಗ್ಗೆ ವಿಶ್ವಾಸವಿರಲಿಲ್ಲ. ಹಾಗಾಗಿ, ರಹಾನೆ ಸುರಕ್ಷಿತರಾಗಿದ್ದಾರೆಂದೇ ಎಲ್ಲರೂ ಭಾವಿಸಿದ್ದರು. ಆದರೆ, ಥರ್ಡ್ ಅಂಪೈರ್‌ ಮೂಲಕ ರೀಪ್ಲೇನಲ್ಲಿ ರಹಾನೆ ಬ್ಯಾಟ್‌ ಲೈನ್‌ ಮೇಲಿರುವುದು ಸ್ಪಷ್ಟವಾಗಿತ್ತು. ಆದರೂ ಬಲಗೈ ಬ್ಯಾಟ್ಸ್‌ಮನ್‌ ಔಟ್‌ ಎಂದು ಘೋಷಿಸಲಾಯಿತು. ಅಂಗಳದ ದೊಡ್ಡ ಪರದೆಯಲ್ಲಿ ರನೌಟ್‌ ಎಂದು ಘೋಷಣೆಯಾಗುತ್ತಿದ್ದಂತೆ ರಹಾನೆ, ಜಡೇಜಾ ಬಳಿ ತೆರಳಿ ಅವರನ್ನು ಸ್ಪರ್ಶಿಸಿ ಬೆಂಬಲಿಸಿ ಪೆವಿಲಿಯನ್‌ಗೆ ಹೆಜ್ಜೆ ಹಾಕಿದರು. ರಹಾನೆ ಈ ಮನೋಭಾವಕ್ಕೆ ಅಭಿಮಾನಿಗಳು ಟ್ವಿಟರ್‌ನಲ್ಲಿ ಮೆಚ್ಚುಗೆ ವ್ಯಕ್ತಪಡಿಸಿದರು. ಜನವರಿ ಆರಂಭದಲ್ಲಿ ಮೊದಲನೇ ಮಗುವಿನ ನಿರೀಕ್ಷೆಯಲ್ಲಿರುವ ವಿರಾಟ್‌ ಕೊಹ್ಲಿ, ಅಡಿಲೇಡ್‌ ಟೆಸ್ಟ್ ಮುಗಿಸಿಕೊಂಡು ಪಿತೃತ್ವ ರಜೆಯ ಮೇಲೆ ತವರಿಗೆ ಮರಳಿದ್ದಾರೆ. ಈ ಹಿನ್ನೆಲೆಯಲ್ಲಿ ಇನ್ನುಳಿದ ಮೂರು ಪಂದ್ಯಗಳಲ್ಲಿ ಅಜಿಂಕ್ಯ ರಹಾನೆ ಭಾರತ ತಂಡವನ್ನು ಮುನ್ನಡೆಸುತ್ತಿದ್ದಾರೆ. ಮೊದಲನೇ ಟೆಸ್ಟ್ ಪಂದ್ಯದಲ್ಲಿ ಅಜಿಂಕ್ಯ ರಹಾನೆ ಮಾಡಿದ್ದ ತಪ್ಪಿನಿಂದ ವಿರಾಟ್‌ ಕೊಹ್ಲಿ ರನೌಟ್‌ ಆಗಿದ್ದರು. ಈ ಕಾರಣದಿಂದ ರಹಾನೆಯನ್ನು ಸಾಕಷ್ಟು ಮಂದಿ ಟೀಕಿಸಿದ್ದರು. ಇದು ಪಂದ್ಯಕ್ಕೆ ಟರ್ನಿಂಗ್‌ ಪಾಯಿಂಟ್‌ ಆಗಿತ್ತು. ಈ ಬಗ್ಗೆ ಇತ್ತೀಚೆಗೆ ಪ್ರತಿಕ್ರಿಯಿಸಿದ್ದ ಅಜಿಂಕ್ಯ ರಹಾನೆ, ಅಂದು ವಿರಾಟ್‌ ಕೊಹ್ಲಿ ಬಳಿಕ ತೆರಳಿ ಕ್ಷಮೆ ಕೇಳಿದ್ದೆ ಎಂದು ಹೇಳಿದ್ದರು. ಒಟ್ಟಾರೆ ಭಾರತ ತಂಡ ಪ್ರಥಮ ಇನಿಂಗ್ಸ್‌ನಲ್ಲಿ ತನ್ನೆಲ್ಲಾ ವಿಕೆಟ್‌ಗಳನ್ನು ಕಳೆದುಕೊಂಡು 326 ರನ್‌ ಗಳಿಸಿತು ಹಾಗೂ 131 ರನ್‌ ಮುನ್ನಡೆ ಸಾಧಿಸಿತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3hkqr0K
