ಬೆಂಗಳೂರು: ವಿಧಾನಪರಿಷತ್‌ ಉಪಸಭಾಪತಿ ಎಸ್‌.ಎಲ್ ಧರ್ಮೇಗೌಡ ರೈಲಿಗೆ ತಲೆಕೊಟ್ಟು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಉಪಸಭಾಪತಿ ಸ್ಥಾನದಲ್ಲಿದ್ದ ಎಸ್‌ ಎಲ್ ಧರ್ಮೇಗೌಡ ಅವರ ಆತ್ಮಹತ್ಯೆ ಘಟನೆ ರಾಜ್ಯಕ್ಕೆ ಶಾಕ್‌ ನೀಡಿದೆ. ಆತ್ಮಹತ್ಯೆಗೆ ನಿಖರವಾದ ಕಾರಣ ಏನು ಎಂದು ಇನ್ನು ತಿಳಿದುಬರದಿದ್ದರೂ ಡಿಸೆಂಬರ್‌ 15 ರಂದು ವಿಧಾನಪರಿಷತ್‌ನಲ್ಲಿ ನಡೆದ ಕೋಲಾಹಲ ಘಟನೆ ಸೌಮ್ಯ ಸ್ವಭಾವದ ಎಸ್ಎಲ್ ಧರ್ಮೇಗೌಡರನ್ನು ಕಾಡಿತ್ತೆ ಎಂಬ ಪ್ರಶ್ನೆಯೂ ಇದೀಗ ಉದ್ಭವವಾಗುತ್ತಿದೆ. ಎಸ್‌.ಎಲ್ ಧರ್ಮೇಗೌಡ ದೇವೇಗೌಡರ ಕುಟುಂಬಕ್ಕೆ ಬಹಳ ಆತ್ಮೀಯರಾಗಿದ್ದವರು. ವಿಧಾನಪರಿಷತ್‌ ಸದಸ್ಯರಾಗಿದ್ದರೂ ಬಹಳ ಸೌಮ್ಯ ಸ್ವಭಾವದ ವ್ಯಕ್ತಿ. ಇತ್ತೀಚೆಗೆ ಹೃದಯದ ಶಸ್ತ್ರಚಿಕಿತ್ಸೆಗೂ ಒಳಗಾಗಿದ್ದರು. ಈ ಸೌಮ್ಯ ಸ್ವಭಾವದ ರಾಜಕಾರಣಿಯನ್ನು ಡಿಸೆಂಬರ್‌ 15 ರಂದು ವಿಧಾನಪರಿಷತ್‌ನಲ್ಲಿ ನಡೆದ ಘಟನೆ ರಾಜ್ಯಕ್ಕೆ ಮಾತ್ರವಲ್ಲ ದೇಶಕ್ಕೆ ಪರಿಚಯಿಸಿತ್ತು. ಪರಿಷತ್‌ನಲ್ಲಿ ಸಭಾಪತಿ ಪ್ರತಾಪಚಂದ್ರ ಶೆಟ್ಟಿ ವಿರುದ್ಧ ಅವಿಶ್ವಾನ ನಿರ್ಣಯ ಮಂಡಿಸಿದ್ದ ಬಿಜೆಪಿಗೆ ಜೆಡಿಎಸ್‌ ಬೆಂಬಲ ನೀಡಿತ್ತು. ಹೇಗಾದರೂ ಮಾಡಿ ಸಭಾಪತಿಯನ್ನು ಬದಲಾವಣೆ ಮಾಡಬೇಕು ಎಂದು ಎರಡು ಪಕ್ಷಗಳು ರಣತಂತ್ರ ರೂಪಿಸಿದ್ದವು. ಇದರಂತೆ ನಡೆದ ಪ್ರಹಸನದಲ್ಲಿ ಪರಿಷತ್ ಬೆಲ್‌ ಆಗುತ್ತಿದ್ದಂತೆ ದಿಢೀರ್‌ ಆಗಿ ಸಭಾಪತಿ ಸ್ಥಾನದಲ್ಲಿ ಉಪಸಭಾಪತಿ ಕುಳಿತುಕೊಂಡಿದ್ದರು. ಅಲ್ಲದೆ ಸಭಾಪತಿ ಸದನಕ್ಕೆ ಹಾಜರಾಗದಂತೆ ಮುಖ್ಯಧ್ವಾರವನ್ನು ಮುಚ್ಚಲು ಬಿಜೆಪಿ ಸದಸ್ಯರು ಪ್ರಯತ್ನಿಸಿದ್ದರು. ಇದ್ದಕ್ಕಿದ್ದಂತೆ ನಡೆದ ಘಟನೆ ಎಲ್ಲರಲ್ಲೂ ಅಚ್ಚರಿ ಮೂಡಿಸಿತ್ತು. ಆದರೆ ಈ ಸಂದರ್ಭದಲ್ಲಿ ಕೆರಳಿದ ಕಾಂಗ್ರೆಸ್ ಸದಸ್ಯರು ಸಭಾಪತಿ ಪೀಠದಲ್ಲಿ ಕುಳಿತುಕೊಂಡಿದ್ದ ಉಪಸಭಾಪತಿ ಎಸ್ಎಲ್ ಧರ್ಮೇಗೌಡರನ್ನು ಅಕ್ಷರಶಃ ಪೀಠದಿಂದ ಎಳೆದು ಹಾಕಿದರು. ಮತ್ತೊಂದು ಕಡೆ ಬಿಜೆಪಿ ಸದಸ್ಯರು ಇವವನ್ನು ಪೀಠದಲ್ಲಿ ಕುಳ್ಳಿಸುವ ಪ್ರಯತ್ನ ನಡೆಸುತ್ತಿದ್ದರು. ಎರಡು ಪಕ್ಷಗಳ ಸದಸ್ಯರ ನಡುವಿನ ಜಟಾಪಟಿಯಲ್ಲಿ ಧರ್ಮೇಗೌಡರು ಬಲಿಪಶುವಂತೆ ಕಂಡುಬರುತ್ತಿದ್ದರು. ಈ ಘಟನೆ ರಾಜ್ಯಾದ್ಯಂತ ವ್ಯಾಪಕ ಆಕ್ರೋಶಕ್ಕೂ ಕಾರಣವಾಗಿತ್ತು. ಒಂದು ಹಂತದಲ್ಲಿ ಘಟನೆಯಿಂದ ಎಸ್ಎಲ್ ಧರ್ಮೇಗೌಡರು ನೊಂದುಕೊಂಡಿದ್ದರು. ನೂಕಾಟ ತಳ್ಳಾಟದ ಸಂದರ್ಭದಲ್ಲಿ ಅವರು ತಮ್ಮ ದುಬಾರಿ ಕನ್ನಡಕವನ್ನು ಕಳೆದುಕೊಂಡಿದ್ದರು. ಯಾರದ್ದು ತಪ್ಪು ಯಾರದ್ದು ಸರಿ ಎಂಬ ಚರ್ಚೆಗಿಂತ ಉಪಸಭಾಪತಿ ಜೊತೆಗೆ ನಡೆದುಕೊಂಡ ರೀತಿ ಟೀಕೆಗೆ ಗುರಿಯಾಗಿತ್ತು. ಹೀಗಿದ್ದರೂ ಯಾವುದೇ ಆವೇಶಕ್ಕೆ ಒಳಗಾಗದೆ ಧರ್ಮೇಗೌಡರು ಶಾಂತಚಿತ್ತದಲ್ಲಿ ಸದನದಿಂದ ಹೊರಬಂದು ಮಾಧ್ಯಮಗಳಿಗೆ ಹೇಳಿಕೆ ನೀಡಿ ಸುಮ್ಮನಾದರು. ಆದರೆ ಇದೀಗ ಎಸ್ಎಲ್ ಧರ್ಮೇಗೌಡರು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಇದಕ್ಕೆ ನಿಜವಾದ ಕಾರಣ ಏನು ಎಂಬುವುದು ಇನ್ನು ತಿಳಿದುಬಂದಿಲ್ಲ. ಆತ್ಮಹತ್ಯೆಗೂ ಮುನ್ನ ಅವರು ಬರೆದಿದ್ದ ಡೆತ್ ನೋಟ್‌ ಸಿಕ್ಕಿದೆ ಎಂಬ ಮಾಹಿತಿಯೂ ಇದೆ. ಆತ್ಮಹತ್ಯೆ ಮಾಡಿಕೊಳ್ಳುವ ಅವರ ಈ ನಿರ್ಧಾರಕ್ಕೆ ಏನು ಕಾರಣ ಎಂಬುವುದು ಪೊಲೀಸ್ ತನಿಖೆಯಿಂದಲೇ ತಿಳಿದುಬರಬೇಕಿದೆ.
from India & World News in Kannada | VK Polls https://ift.tt/37X46D6
