ಬೆಂಗಳೂರು: ಜ.3ರಿಂದ ಆರಂಭವಾಗಲಿರುವ ಕರ್ನಾಟಕ ಚಿತ್ರಕಲಾ ಪರಿಷತ್‌ನ 18ನೇ ಚಿತ್ರಸಂತೆಗೆ ಇಡೀ ವಿಶ್ವವೇ ಸಾಕ್ಷಿಯಾಗಲಿದೆ. ಕೋವಿಡ್‌ ಹಿನ್ನೆಲೆಯಲ್ಲಿ ಈ ವರ್ಷ ಚಿತ್ರಸಂತೆಯನ್ನು ಭೌತಿಕವಾಗಿ ನಡೆಸುತ್ತಿಲ್ಲ. ಹೀಗಾಗಿ, ಚಿತ್ರಸಂತೆಯಾಗಿರುವುದರಿಂದ ಕೇವಲ ಭಾರತೀಯರು ಮಾತ್ರವಲ್ಲದೆ, ಜಗತ್ತಿನಾದ್ಯಂತ ಕಲಾಪ್ರೇಮಿಗಳು ವೀಕ್ಷಣೆ ಮಾಡಲಿದ್ದಾರೆ. ಜಗತ್ತಿನ 22 ರಾಷ್ಟ್ರಗಳ ಹತ್ತಾರು ಚಿತ್ರಸಂತೆಯಲ್ಲಿ ತಮ್ಮ ಕಲೆ ಪ್ರದರ್ಶಿಸುತ್ತಿದ್ದಾರೆ. ಆನ್‌ಲೈನ್‌ ಪ್ರದರ್ಶನವಾದ್ದರಿಂದ ಒಂದು ತಿಂಗಳ ಕಾಲ ನಡೆಯುವುದು ಮತ್ತೊಂದು ವಿಶೇಷವಾಗಿದೆ. 'ಕೊರೊನಾ ಹಿನ್ನೆಲೆಯಲ್ಲಿ ಕರ್ನಾಟಕ ಚಿತ್ರಕಲಾ ಪರಿಷತ್‌ ಆಯೋಜಿಸುತ್ತಿರುವ 18ನೇ ಚಿತ್ರಸಂತೆ ಆನ್‌ಲೈನ್‌ ಮೂಲಕ ನಡೆಯುತ್ತಿದ್ದು, ಹಲವು ವಿಶೇಷಗಳಿಂದ ಕೂಡಿದೆ. ಅಲ್ಲದೆ ಚಿತ್ರಕಲಾ ಪರಿಷತ್ತು 60 ವರ್ಷಗಳನ್ನು ಪೂರೈಸಿದ್ದು, ವಜ್ರಮಹೋತ್ಸವದ ವರ್ಷಾಚರಣೆ ಅಂಗವಾಗಿ ನಾನಾ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದೆ. ಈವರೆಗೆ 1,223 ಕಲಾವಿದರಿಂದ ಅರ್ಜಿಗಳು ಬಂದಿವೆ. ಕಳೆದ ಚಿತ್ರಸಂತೆಯಲ್ಲಿ ಭಾಗವಹಿಸಲು ಅವಕಾಶ ಸಿಗದ 513 ಮಂದಿ ಕಲಾವಿದರಿದ್ದಾರೆ. ಈ ಪೈಕಿ ಒಂದು ಸಾವಿರಕ್ಕೂ ಹೆಚ್ಚು ಕಲಾವಿದರಿಗೆ ಅವಕಾಶ ನೀಡಲಾಗುವುದು,'' ಎಂದು ಕರ್ನಾಟಕ ಚಿತ್ರಕಲಾ ಪರಿಷತ್ತಿನ ಅಧ್ಯಕ್ಷ ಡಾ. ಬಿ.ಎಲ್‌.ಶಂಕರ್‌ ತಿಳಿಸಿದರು. ಈ ಬಾರಿ ಪ್ರಸಿದ್ಧ 250 ಕಲಾವಿದರ 400 ಕಲಾಕೃತಿಗಳನ್ನು ಕಲಾಪರಿಷತ್ತಿನ 12 ಗ್ಯಾಲರಿಗಳಲ್ಲಿ ಪ್ರದರ್ಶನ ಏರ್ಪಡಿಸಲಾಗಿದೆ. ಪ್ರಥಮ ಬಾರಿಗೆ 22 ದೇಶಗಳ ಕಲಾವಿದರು ಆನ್‌ಲೈನ್‌ ಮೂಲಕ ಭಾಗವಹಿಸುತ್ತಿದ್ದಾರೆ. ಜತೆಗೆ ಭಾರತದ 20 ರಾಜ್ಯಗಳ ಕಲಾವಿದರು ಭಾಗವಹಿಸುತ್ತಿರುವುದು ದಾಖಲೆಯಾಗಿದೆ ಎಂದರು. ಈ ಬಾರಿಯ ಆನ್‌ಲೈನ್‌ ಚಿತ್ರಸಂತೆಯನ್ನು ಇನ್‌ಫೋಸಿಸ್‌ ಫೌಂಡೇಷನ್‌ ಅಧ್ಯಕ್ಷೆ ಸುಧಾ ಮೂರ್ತಿ ಉದ್ಘಾಟಿಸಲಿದ್ದಾರೆ. ವಜ್ರಮಹೋತ್ಸವ ಕಾರ್ಯಕ್ರಮಗಳನ್ನು ಸಚಿವ ಎಸ್‌.ಟಿ.ಸೋಮಶೇಖರ್‌ ಅನಾವರಣಗೊಳಿಸುವರು. ಆಹ್ವಾನಿತ ಪ್ರಸಿದ್ಧ ಕಲಾವಿದರ ಚಿತ್ರಕಲಾ ಪ್ರದರ್ಶನವನ್ನು ಜಯದೇವ ಆಸ್ಪತ್ರೆಯ ಹೃದ್ರೋಗ ತಜ್ಞ ಡಾ. ಸಿ.ಎನ್‌.ಮಂಜುನಾಥ್‌ ಉದ್ಘಾಟಿಸಲಿದ್ದಾರೆ ಎಂದರು. ಗೋಷ್ಠಿಯಲ್ಲಿ ಚಿತ್ರಕಲಾ ಪರಿಷತ್‌ನ ವಜ್ರ ಮಹೋತ್ಸವದ ಕುರಿತಾದ ಲೋಗೊ ಮತ್ತು ಕೆಲವು ಪೇಂಟಿಂಗ್‌ಗಳ ಚಿತ್ರಗಳನ್ನು ಬಿಡುಗಡೆ ಮಾಡಲಾಯಿತು. ಚಿತ್ರಸಂತೆ ವೀಕ್ಷಣೆ ಹೇಗೆ? ಚಿತ್ರಸಂತೆ ಹಾಗೂ ಇತರ ಕಾರ್ಯಕ್ರಮಗಳನ್ನು ಫೇಸ್‌ಬುಕ್‌, ಇನ್‌ಸ್ಟಾಗ್ರಾಂ, ಯೂಟ್ಯೂಬ್‌ ಮೂಲಕ ವೀಕ್ಷಿಸಬಹುದು. ಖರೀದಿ ಹೇಗೆ? ಚಿತ್ರಸಂತೆಗೆ ಆಯ್ಕೆಯಾದ ಪ್ರತಿ ಕಲಾವಿದರಿಗೆ ಒಂದೊಂದು ಪ್ರತ್ಯೇಕ ಪೇಜ್‌ಗಳನ್ನು ನಿರ್ಮಿಸಲಾಗಿದೆ. ಈ ಪೇಜ್‌ನಲ್ಲಿ ಕಲಾವಿದರ ಹೆಸರು, ಚಿತ್ರ, ಅವರ ಊರು, ವಿಳಾಸ, ಇ-ಮೇಲ್‌ ವಿಳಾಸ, ಮೊಬೈಲ್‌ ಸಂಖ್ಯೆ, ಅವರು ಯಾವ ಮಾಧ್ಯಮದ ಚಿತ್ರ ಬಿಡಿಸುತ್ತಾರೆ ಎಂಬುದರ ಬಗ್ಗೆ ಮಾಹಿತಿಯಿರುತ್ತದೆ. ಜತೆಗೆ ಅವರ ಸುಮಾರು 10 ಪೇಟಿಂಗ್‌ಗಳನ್ನು ಈ ಪೇಜ್‌ನಲ್ಲಿ ಪ್ರದರ್ಶಿಸಲಾಗುವುದು. ಕಲಾಸಕ್ತರು ಈ ಪೇಜ್‌ಗಳನ್ನು ಆನ್‌ಲೈನ್‌ ಮೂಲಕ ನೋಡಿ ತಮಗೆ ಬೇಕಾದ ಕಲಾವಿದರ ಚಿತ್ರವನ್ನು ದೂರವಾಣಿ ಮೂಲಕ ಸಂಪರ್ಕಿಸಬಹುದು. ಇಲ್ಲವೇ ಇ-ಮೇಲ್‌ ಮೂಲಕವೂ ಸಂಪರ್ಕಿಸಬಹುದು. ಅಂಚೆ, ಕೊರಿಯರ್‌ ಮೂಲಕ ಗ್ರಾಹಕರ ಮನೆ ಬಾಗಿಲಿಗೆ ಪೇಟಿಂಗ್‌ ತಲುಪಲಿದೆ ಎನ್ನುತ್ತಾರೆ ಚಿತ್ರಕಲಾ ಪರಿಷತ್‌ನ ಪ್ರಧಾನ ಕಾರ್ಯದರ್ಶಿ ಕೆ.ಎಸ್‌. ಅಪ್ಪಾಜಯ್ಯ. ಕೊರೊನಾ ಕುರಿತು ಅಲಂಕಾರ ಚಿತ್ರಕಲಾ ಪರಿಷತ್‌ನ ಪ್ರವೇಶ ದ್ವಾರ ಹಾಗೂ ಒಳ ಮತ್ತು ಹೊರಗನ್ನು ಕೊರೊನಾ ಕುರಿತಂತೆ ಅಲಂಕರಿಸುತ್ತಿರುವುದು ವಿಶೇಷವಾಗಿದೆ. ಪ್ರಶಸ್ತಿ ಪ್ರದಾನ ಬರೋಡಾ ಕಲಾವಿದೆ ನೀಲಿಮಾ ಶೇಖ್‌ ಅವರಿಗೆ 'ಪ್ರೊ. ಎಂ.ಎಸ್‌.ನಂಜುಂಡರಾವ್‌ ರಾಷ್ಟ್ರೀಯ ಪ್ರಶಸ್ತಿ', ಪಿ.ಎಸ್‌.ಕುಮಾರ್‌ಗೆ 'ಡಿ.ದೇವರಾಜ ಅರಸು ಪ್ರಶಸ್ತಿ', ವಿಜಯ್‌ ಬಾಗೋಡಿ ಅವರಿಗೆ 'ವೈ.ಸುಬ್ರಹ್ಮಣ್ಯರಾಜು ಪ್ರಶಸ್ತಿ', ಆರ್‌.ರಾಜು ಅವರಿಗೆ 'ಎಂ.ಆರ್ಯಮೂರ್ತಿ ಪ್ರಶಸ್ತಿ', ಡಾ. ಚೂಡಾಮಣಿ ನಂದಗೋಪಾಲ್‌ ಅವರಿಗೆ 'ಎಚ್‌.ಕೆ.ಕೇಜ್ರಿವಾಲ್‌ ಪ್ರಶಸ್ತಿ' ಪ್ರದಾನ ಮಾಡಲಾಗುತ್ತಿದೆ.
from India & World News in Kannada | VK Polls https://ift.tt/37YfC19
