ಆದರ್ಶ ಕೋಡಿ ದೊಡ್ಡಬಳ್ಳಾಪುರ ದೊಡ್ಡಬಳ್ಳಾಪುರ: ಚೀನಾ, ಜಪಾನ್‌ನಿಂದ ಆಮದಾಗುತ್ತಿದ್ದ ಮುತ್ತು ಕೃಷಿಯ ಕೃತಕ ಮುತ್ತುಗಳಿಗೆ ಸದ್ಯ ಸ್ವದೇಶಿ ಬೇಡಿಕೆ ಸೃಷ್ಟಿಯಾಗಿದೆ. ಕೊರೊನಾದಿಂದಾಗಿ ವಿದೇಶಿ ಮುತ್ತುಗಳ ಆಮದು ಸ್ಥಗಿತಗೊಂಡಿದ್ದು, ದೇಶದ ಕರಾವಳಿ ಪ್ರದೇಶಗಳಲ್ಲಿ 'ಮುತ್ತು ಕೃಷಿ'ಯತ್ತ ಯುವಕರು ಹೆಚ್ಚು ಆಸಕ್ತಿ ತೋರುತ್ತಿದ್ದಾರೆ. ಸಮುದ್ರಾಳದಲ್ಲಿ ಉಪ್ಪುನೀರಿನ ಮುತ್ತು ನೈಸರ್ಗಿಕವಾಗಿ ಸಿಗುತ್ತಿದ್ದು, ಕೃತಕವಾಗಿ ಕೃಷಿಕರು ಸಿಹಿನೀರಿನಲ್ಲಿ ಮುತ್ತು ತಯಾರಿಸಿ ಆದಾಯ ಗಿಟ್ಟಿಸಿಕೊಳ್ಳುತ್ತಿದ್ದಾರೆ. ಮುತ್ತು ಕೃಷಿ ಕೇವಲ ಕರಾವಳಿಗೆ ಸೀಮಿತವಾಗದೆ, ಒಳನಾಡಿಗೂ ಎಂಟ್ರಿ ಕೊಟ್ಟಿದ್ದು ಯುವಕರು ಹೆಚ್ಚು ಆಸಕ್ತರಾಗುತ್ತಿದ್ದಾರೆ. ತಮ್ಮ ಮುತ್ತಿನ ಕೃಷಿಗೆ ಸರಿಹೊಂದುವ ಕೊಳ ನಿರ್ಮಿಸಿ ಸಿಮೆಂಟ್‌ ಮೇಲ್ಮೈನ ಕೊಳದಲ್ಲಿ ಸುಣ್ಣದಪುಡಿ, ಸಗಣಿ, ಕಡಲೇಕಾಯಿ ಹಿಂಡಿ ಪುಡಿ ಮಿಶ್ರಿತ ನೀರಿನಲ್ಲಿ ದಿನಗಳಿಗನುಸಾರವಾಗಿ ಕಪ್ಪೆ ಚಿಪ್ಪುಗಳನ್ನು ಹಾಕಬೇಕು. ಪ್ರತಿ 10 ಲೀ. ನೀರಿಗೆ 1 ಕಪ್ಪೆ ಚಿಪ್ಪನ್ನು ಬಿಟ್ಟು, ಆಹಾರವಾದ ಪ್ಲಾಂಕ್ಟನ್‌ ಸಸ್ಯವನ್ನು ಕೊಳದಲ್ಲಿ ಬೆಳೆಯುವಂತೆ ಮಾಡಬೇಕು. ಕೆಲ ದಿನಗಳ ಬಳಿಕ ಈ ನೀರಿಗೆ ಮೆಂಥಾಲ್‌ ಪುಡಿ ಬೆರೆಸಿದಾಗ ಕಪ್ಪೆಚಿಪ್ಪುಗಳು ಅರೆಪ್ರಜ್ಞಾವಸ್ಥೆಗೆ ಸೇರುತ್ತವೆ. ಆಗ ದಂತ ಚಿಕಿತ್ಸೆಗೆ ಬಳಸುವ ಕೋಲ್ಡ್‌ಕ್ಯೂರಿಂಗ್‌ ಅಕ್ರೈಲಿಕ್‌ ಪುಡಿಯನ್ನು ಅಗತ್ಯ ವಿನ್ಯಾಸ ರೂಪದಲ್ಲಿ ಕಪ್ಪೆಚಿಪ್ಪಿನ ಒಳಭಾಗಕ್ಕೆ ಇಡಬೇಕು. ನಂತರ, ಆ ಕಪ್ಪೆ ಚಿಪ್ಪನ್ನು ನೀರಿನ ಅಕ್ವೇರಿಯಂ ಒಳಕ್ಕೆ ಬಿಟ್ಟು, ಆಂಟಿಬಯೋಟಿಕ್‌ ದ್ರಾವಣ ಸೇರಿಸಬೇಕು. ಈ ಹಂತಗಳಲ್ಲಿ ಕೆಲ ಕಪ್ಪೆ ಚಿಪ್ಪುಗಳು ಸಾಯುವ ಸಂಭವವಿದ್ದು, ಸತ್ತ ಕಪ್ಪೆ ಚಿಪ್ಪುಗಳನ್ನು ಕಾಲಕಾಲಕ್ಕೆ ತೆಗೆದು ಅಕ್ವೇರಿಯಂ ಶುದ್ಧಗೊಳಿಸಬೇಕು. ಜತೆಗೆ, ಕೆಲ ಕಪ್ಪೆ ಚಿಪ್ಪುಗಳು ಒಳಗಿರುವ ಅಕ್ರೈಲಿಕ್‌ ವಿನ್ಯಾಸವನ್ನು ಹೊರಹಾಕುವ ಸಾಧ್ಯತೆಗಳಿದ್ದು, ನಿರಂತರವಾಗಿ ಗಮನಿಸುತ್ತಿರಬೇಕು. 9 ತಿಂಗಳ ಕಾಲ ಈ ರೀತಿ ಕಪ್ಪೆ ಚಿಪ್ಪುಗಳನ್ನು ಪೋಷಿಸಿದ ಬಳಿಕ ಅಗತ್ಯ ವಿನ್ಯಾಸದ ಆಕೃತಿಗಳನ್ನು ಕೃಷಿಕರು ಪಡೆಯಬಹುದಾಗಿದೆ.
from India & World News in Kannada | VK Polls https://ift.tt/3aR5fOu
