ಎನ್.ಮೂರ್ತಿ ತುಮಕೂರು: ಸಾಮಾನ್ಯ ಕ್ಷೇತ್ರದ ಅಭ್ಯರ್ಥಿಯು ಪಡೆದ ಮತಕ್ಕಿಂತ ಮೀಸಲು ಸ್ಥಾನದಲ್ಲಿ ಸೋತ ಅಭ್ಯರ್ಥಿಗಳು 1 ಮತ ಹೆಚ್ಚು ಪಡೆದರೇ ಗ್ರಾಪಂ ಸದಸ್ಯನಾಗಿ ಆಯ್ಕೆಯಾಗಲು ಅವಕಾಶ ಇರುವುದರಿಂದ ಸಾಮಾನ್ಯ ಕ್ಷೇತ್ರದ 7452 ಜನ ಅಭ್ಯರ್ಥಿಗಳ ಎದೆಯಲ್ಲಿ ಢವಢವ ಶುರುವಾಗಿದೆ. ಮತ್ತೊಂದು ಕಡೆ ಜಿಲ್ಲೆಯ ಬಹುತೇಕ ಕಡೆಗಳಲ್ಲಿ ಸಾಮಾನ್ಯ ಕ್ಷೇತ್ರಗಳಿಗೆ ಪರಿಶಿಷ್ಟ ಜಾತಿ ಮತ್ತು ಪಂಗಡದ ಅಭ್ಯರ್ಥಿಗಳು ಲಗ್ಗೆ ಇಟ್ಟಿರುವ ಪರಿಣಾಮ ಸಾಮಾನ್ಯ ಕ್ಷೇತ್ರದ ಗೆಲುವಿಗೆ ಇನ್ನಿಲ್ಲದ ಪೈಪೋಟಿ ನಡೆಯಲಿದೆ. ಕರ್ನಾಟಕ ಪಂಚಾಯತ್‍ರಾಜ್ ಇಲಾಖೆಯ 1993ರ ನಿಯಮ 74ರ ಉಪನಿಯಮ(2)ಎ ಪ್ರಕಾರ ಸಾಮಾನ್ಯ ಸ್ಥಾನಗಳು ಇರುವ ಕಡೆಯಲ್ಲಿ ಅವರೋಹಣ ಕ್ರಮದಲ್ಲಿ ಅತಿ ಹೆಚ್ಚಿನ ಮತ ಪಡೆದವರು ಸಮೀಕರಣಕ್ಕೆ ಅವಕಾಶವಿಲ್ಲದಂತೆ ಜಯ ಗಳಿಸುತ್ತಾರೆ. 74ರ ಉಪನಿಯಮ(2)ಬಿ ಪ್ರಕಾರ ಎಸ್‍ಸಿ, ಎಸ್‍ಟಿ, ಬಿಸಿಎಂ-ಎ, ಬಿಸಿಎಂ-ಬಿ ಮೀಸಲು ಸ್ಥಾನದಲ್ಲಿ ಸ್ಪರ್ಧಿಸಿ ಸೋತ ಅಭ್ಯರ್ಥಿಗಳು ಸಾಮಾನ್ಯ ಸ್ಥಾನದ ಸ್ಪರ್ಧೆಗಳಿಗೆ ನೇರವಾಗಿ ಪರಿಗಣನೆ ಆಗಲಿರುವ ಪರಿಣಾಮ 1 ಮತವು ಸಹ ಬಹುಮುಖ್ಯ ಪಾತ್ರ ವಹಿಸಲಿದೆ. ಗ್ರಾಪಂಯ ನಿಗದಿತ ಮತಗಟ್ಟಿ ಅಥವಾ ವಾರ್ಡ್‍ನಲ್ಲಿ ಎಸ್‍ಸಿ ಮಹಿಳೆ, ಎಸ್‍ಸಿ, ಎಸ್‍ಟಿ, ಬಿಸಿಎಂ-ಅ, ಬಿಸಿಎಂ-ಬ, ಸಾಮಾನ್ಯ ಮೀಸಲು ಹೀಗೆ 6 ಕ್ಷೇತ್ರಗಳಿವೆ ಎಂದುಕೊಳ್ಳೋಣ. ಮೀಸಲು ಕ್ಷೇತ್ರದಲ್ಲಿ ಸೋತ ಎಲ್ಲರನ್ನು ಸಾಮಾನ್ಯ ಕ್ಷೇತ್ರದ ಸ್ಪರ್ಧಿಗಳೆಂದು ಪರಿಗಣಿಸಲಾಗುತ್ತದೆ. ಬಿಸಿಎಂ-ಎ, ಬಿಸಿಎಂ-ಬಿ ಮೀಸಲು ಕ್ಷೇತ್ರದವರಿಗೆ ಇಂಥ ಸವಾಲು ಇಲ್ಲ. ಆದರೆ ಸಾಮಾನ್ಯ ಕ್ಷೇತ್ರದ ಅಭ್ಯರ್ಥಿಗಳಿಗೆ ಗ್ರಾಪಂಯ ಚುನಾವಣೆಯ ಗೆಲುವು ಮಾತ್ರ ನುಂಗಲಾರದ ತುತ್ತಾಗಿದೆ. ಮೀಸಲು ಕ್ಷೇತ್ರದಲ್ಲಿ ಹೆಚ್ಚು ಮತ ಪಡೆದವರು ಮಾತ್ರ ಜಯ ಗಳಿಸುತ್ತಾರೆ. ಮೀಸಲು ಕ್ಷೇತ್ರದಲ್ಲಿ ಸೋತವರು ನೇರವಾಗಿ ಸಾಮಾನ್ಯ ಕ್ಷೇತ್ರದ ಅಭ್ಯರ್ಥಿಗಳಿಗೆ ಮತ್ತೆ ಸ್ಪರ್ಧಿಗಳಾಗಲು ಅವಕಾಶವಿದೆ. ಆದರೆ ಸಾಮಾನ್ಯ ಕ್ಷೇತ್ರದಲ್ಲಿ ಹೆಚ್ಚು ಪೈಪೋಟಿ ನಡೆಸಿ ಅಧಿಕ ಮತ ಪಡೆದ ಮಾತ್ರಕ್ಕೆ ಗೆಲುವು ಸಾಧ್ಯವಿಲ್ಲ. ಮೀಸಲು ಕ್ಷೇತ್ರದ ಅಭ್ಯರ್ಥಿಗಿಂತ 1 ಮತ ಜಾಸ್ತಿ ಇದ್ದರಷ್ಟೇ ವಿಜಯಿಯಾಗಲು ಸಾಧ್ಯ. ಇದರ ಜೊತೆಯಲ್ಲಿ ಸಾಮಾನ್ಯ ಕ್ಷೇತ್ರಗಳಿಗೂ ಪರಿಶಿಷ್ಟರ ಸ್ಪರ್ಧೆಯಿಂದ ಸಾಮಾನ್ಯ ಕ್ಷೇತ್ರದ ಅಭ್ಯರ್ಥಿಗಳಿಗೆ ನಡುಕ ಹುಟ್ಟಿಸಿದೆ. 7452 ಜನ ಸಾಮಾನ್ಯ ಅಭ್ಯರ್ಥಿಗಳಿಗೆ ನಡುಕ..!ತುಮಕೂರು ಜಿಲ್ಲೆಯ 10 ತಾಲೂಕಿನ 329 ಗ್ರಾಪಂಯ 5329 ಸ್ಥಾನಗಳಿಗೆ ಎರಡು ಹಂತದ ಗ್ರಾಪಂ ಚುನಾವಣೆಯಲ್ಲಿ 267 ಜನ ಅಭ್ಯರ್ಥಿಗಳು ಅವಿರೋಧ ಆಯ್ಕೆ ಆಗಿದ್ದಾರೆ. 68 ಸ್ಥಾನಗಳಿಗೆ ನಾಮಪತ್ರ ಸಲ್ಲಿಸದೆ ಖಾಲಿ ಉಳಿದಿವೆ. ಇನ್ನುಳಿದ 4994 ಸ್ಥಾನಗಳಿಗೆ 14171 ಜನ ಅಭ್ಯರ್ಥಿಗಳು ಸ್ಪರ್ಧಿಸಿದ್ದಾರೆ. ಸಾಮಾನ್ಯ ಕ್ಷೇತ್ರದ 2734 ಸ್ಥಾನಗಳಿಗೆ 7452 ಜನ ಅಭ್ಯರ್ಥಿಗಳು ನಾಮಪತ್ರ ಸಲ್ಲಿಸಿದ್ದಾರೆ. ಸಾಮಾನ್ಯ ಕ್ಷೇತ್ರದ ಅಷ್ಟು ಸ್ಥಾನಗಳ ಮೇಲೆ ಮೀಸಲು ಕ್ಷೇತ್ರದಲ್ಲಿ ಸೋತ ಅಭ್ಯರ್ಥಿಗಳು ಸಹ 1 ಮತದ ಗೆಲುವಿಗೆ ಪೈಪೋಟಿ ನಡೆಸಲಿದ್ದಾರೆ. ಸಾಮಾನ್ಯ ಸ್ಥಾನದ ಆಯ್ಕೆ ಪ್ರಕ್ರಿಯೆ ಹೇಗೆ?ಗ್ರಾಪಂ ಚುನಾವಣೆ ಫಲಿತಾಂಶ ಘೋಷಿಸುವಾಗ ಸಾಮಾನ್ಯ ಅಭ್ಯರ್ಥಿ ಫಲಿತಾಂಶ ಕೊನೆಯಲ್ಲಿ ಘೋಷಣೆ ಆಗಲಿದೆ. ಕ್ರಮವಾಗಿ ಎಸ್‍ಸಿ(ಮ), ಎಸ್‍ಸಿ, ಎಸ್‍ಟಿ(ಮ), ಎಸ್‍ಟಿ, ಬಿಸಿಎಂ-ಎ,(ಮ), ಬಿಸಿಎಂ-ಬಿ,(ಮ), ಸಾಮಾನ್ಯ,(ಮ) ಸ್ಥಾನದ ಘೋಷಣೆ ಆಗುತ್ತದೆ. ಸಾಮಾನ್ಯ ಕ್ಷೇತ್ರದ ವಿಜೇತರ ಘೋಷಣೆ ಪ್ರಕ್ರಿಯೆ ಶುರುವಾದಾಗ ಮೀಸಲು ಸ್ಥಾನದಿಂದ ಸ್ಪರ್ಧಿಸಿ ಸೋತಿರುವ ಅಭ್ಯರ್ಥಿಯನ್ನು ಸಾಮಾನ್ಯ ಕ್ಷೇತ್ರಕ್ಕೆ ಸ್ಪರ್ಧಿಯೆಂದು ಪರಿಗಣಿಸಲಾಗುತ್ತದೆ. ಆಗ ಸಾಮಾನ್ಯ ಕ್ಷೇತ್ರದಲ್ಲಿ ಹೆಚ್ಚು ಮತ ಪಡೆದಿರುವ ಅಭ್ಯರ್ಥಿ ಗೆದ್ದರೂ ಸಹ ಮೀಸಲು ಸ್ಥಾನದ ಸೋತ ಅಭ್ಯರ್ಥಿಗಿಂತ 1 ಮತ ಕಡಿಮೆ ಇದ್ದರೂ ಸಾಮಾನ್ಯ ಅಭ್ಯರ್ಥಿ ಸೋಲುತ್ತಾನೆ.
from India & World News in Kannada | VK Polls https://ift.tt/34UcRfs
