ಬೆಂಗಳೂರು: ಬೆಂಗಳೂರಿನಲ್ಲಿ ಸೋಂಕು ಹರಡುವ ಎಲ್ಲ ಲಕ್ಷಣಗಳು ಎದ್ದು ಕಾಣುತ್ತಿದೆ. ಈಗಾಗಲೇ ಮೂರು ಮಂದಿಗೆ ಬ್ರಿಟನ್‌ ಸೋಂಕು ದೃಢಪಟ್ಟಿತ್ತು, ಇದೀಗ ಈ ಸೋಂಕಿತರ ಸಂಖ್ಯೆ ಏಳಕ್ಕೆ ತಲುಪಿದೆ. ರಾಜ್ಯ ರಾಜಧಾನಿಯಲ್ಲಿ ಬ್ರಿಟನ್‌ನಿಂದ ಬಂದ 7 ಮಂದಿಯಲ್ಲಿ ಯುಕೆ ವೈರಸ್‌ ಸೋಂಕು ಪತ್ತೆಯಾಗಿದೆ. ಸಂಜಯ್‌ ನಗರದ ನಿವಾಸಿಯೊಬ್ಬರು ಬ್ರಿಟನ್‌ನಿಂದ ಆಗಮಿಸಿದ್ದರು ಪರೀಕ್ಷೆ ನಡೆಸಿದ ಇವರ ವರದಿ ಇದೀಗ ಹೊರಬಂದಿದ್ದು ಪಾಸಿಟಿವ್‌ ಎಂದಾಗಿದೆ. ಹೀಗಾಗಿ ಇವರ ಸಂಪರ್ಕದಲ್ಲಿ ಎಲ್ಲರನ್ನೂ ಬಿಬಿಎಂಪಿ ಕ್ವಾರಂಟೈನ್‌ನಲ್ಲಿ ಇಟ್ಟಿದೆ. ಇನ್ನು ಮೂವರ ಬಗ್ಗೆ ಮಾಹಿತಿ ಲಭ್ಯವಾಗಬೇಕಿದೆ. ಡಿಸೆಂಬರ್‌ 18ರಂದು ಇಂಗ್ಲೆಂಡ್‌ನಿಂದ ನಗರಕ್ಕೆ ಬಂದಿದ್ದ 34 ವರ್ಷದ ಮಹಿಳೆ ಮತ್ತು ಅವರ ಮಗು ಸೇರಿ ಮೂವರಿಗೆ ಬ್ರಿಟನ್‌ ರೂಪಾಂತರಿತ ಸೋಂಕು ತಗಲಿರುವುದು ಮಂಗಳವಾರ ದೃಢಪಟ್ಟಿತ್ತು. ಈ ಹಿನ್ನೆಲೆಯಲ್ಲಿ ತಾಯಿ ಮತ್ತು ಮಗು ನೆಲೆಸಿದ್ದ ವಸಂತಪುರ ವಾರ್ಡ್‌ನ ವಿಠ್ಠಲನಗರದಲ್ಲಿನ ಅಪಾರ್ಟ್‌ಮೆಂಟನ್ನು ಬಿಬಿಎಂಪಿ ಸೀಲ್‌ಡೌನ್‌ ಮಾಡಿದೆ. ನಗರದ ಮೂವರಿಗೆ ಹೊಸ ಸೋಂಕು ತಗಲಿರುವುದು ನಿಮ್ಹಾನ್ಸ್‌ನಲ್ಲಿ ನಡೆದ ವಂಶವಾಹಿ ಪರೀಕ್ಷೆ ವೇಳೆ ಗೊತ್ತಾಗಿದೆ. ಇವರನ್ನು ಆಸ್ಪತ್ರೆಯ ಐಸೋಲೇಷನ್‌ ವಾರ್ಡ್‌ನಲ್ಲಿಟ್ಟು ಚಿಕಿತ್ಸೆ ನೀಡಲಾಗುತ್ತಿದೆ. ಸೋಂಕಿತರೊಂದಿಗೆ ಪ್ರಾಥಮಿಕ ಮತ್ತು ದ್ವಿತೀಯ ಸಂಪರ್ಕಕ್ಕೆ ಬಂದವರನ್ನು ಕ್ವಾರಂಟೈನ್‌ಗೆ ಒಳಪಡಿಸಲಾಗಿದೆ. ಬ್ರಿಟನ್‌ ರೂಪಾಂತರಿತ ಸೋಂಕು ತಗಲಿದ ತಾಯಿ ಮತ್ತು ಮಗನೊಂದಿಗೆ ಪ್ರಾಥಮಿಕ ಸಂಪರ್ಕದಲ್ಲಿದ್ದ ಇಬ್ಬರು, ದ್ವಿತೀಯ ಸಂಪರ್ಕ ಹೊಂದಿದ್ದ 35 ಮಂದಿ ವಾಸವಿದ್ದ ಅಪಾರ್ಟ್‌ಮೆಂಟ್‌ ಅನ್ನು ಸೀಲ್‌ಡೌನ್‌ ಮಾಡಲಾಗಿದೆ. ಇಲ್ಲಿನ ನಿವಾಸಿಗಳು ಸಾಂಸ್ಥಿಕ ಕ್ವಾರಂಟೈನ್‌ ಕೇಂದ್ರಗಳಿಗೆ ತೆರಳಲು ನಿರಾಕರಿಸಿದ್ದರಿಂದಾಗಿ ಪಾಲಿಕೆಯು ಈ ಕ್ರಮ ಕೈಗೊಂಡಿದೆ. ಎಲ್ಲ ನಿವಾಸಿಗಳ ಗಂಟಲು ದ್ರವದ ಮಾದರಿ ಸಂಗ್ರಹಿಸಿ ಆರ್‌ಟಿಪಿಸಿಆರ್‌ ಪರೀಕ್ಷೆಗೆ ಕಳುಹಿಸಲಾಗಿದೆ. ಸದ್ಯ ಕೊರೊನಾ ಲಸಿಕೆ ಸಿಗಲಿದೆ ಎನ್ನುವ ಸಮಯದಲ್ಲೇ ಬ್ರಿಟನ್‌ ವೈರಸ್‌ ಸೋಂಕು ಜನರಲ್ಲಿ ಆತಂಕ ಮನೆ ಮಾಡಿದೆ.
from India & World News in Kannada | VK Polls https://ift.tt/3aTmSgE
