ಕಳಸ: ಮಲೆನಾಡಿನಲ್ಲಿ ಅಡಕೆ ಮರಗಳಿಗೆ ವಿಚಿತ್ರ ರೋಗ ಬಂದು ಮರಗಳು ನಾಶವಾಗುತ್ತಿರುವುದರ ನಡುವೆಯೇ ಕಾಡು ಪ್ರಾಣಿಗಳ ಹಾವಳಿಯಿಂದ ಅಡಕೆ ಗಿಡಗಳು ಸೇರಿದಂತೆ ಮಿಶ್ರ ಬೆಳೆಗಳಾದ ತೆಂಗು, ಬಾಳೆ, ಕಾಳುಮೆಣಸು, ಏಲಕ್ಕಿ, ತರಕಾರಿಗಳು ನಾಶವಾಗುತ್ತಿವೆ. ಇದರಿಂದ ರೈತರು ಪ್ರತಿವರ್ಷ ಲಕ್ಷಾಂತರ ರೂಪಾಯಿ ನಷ್ಟ ಅನುಭವಿಸುತ್ತಿದ್ದಾರೆ. ಕಳಸ ತಾಲೂಕಿನ ಬಹುತೇಕ ಕಡೆಗಳಲ್ಲಿ ಅದರಲ್ಲೂ ಕಳಕ್ಕೋಡು, ಮುಜೆಕಾನ್‌, ಕಾರ್ಲೆ, ಎಸ್‌.ಕೆ.ಮೇಗಲ್‌, ಸಂಸೆ, ನೆಲ್ಲಿಬೀಡು, ಕೆಂಗನಕೊಂಡ, ಮರಸಣಿಗೆ, ಕೆಳಗೂರು, ಹಿರೇಬೈಲು, ಹಳುವಳ್ಳಿ, ಬಾಳೆಹೊಳೆ, ತನೂಡಿ ಮುಂತಾದ ಪ್ರದೇಶಗಳಲ್ಲಿ ಕಾಡು ಪ್ರಾಣಿಗಳ ಹಾವಳಿ ಮಿತಿ ಮೀರಿದೆ. ಕಳಸ ಭಾಗದ ಕೃಷಿಕರು ಒಂದಲ್ಲ ಒಂದು ತೊಂದರೆಯಿಂದ ನಲುಗುತ್ತಲೇ ಇದ್ದಾರೆ. ಕೃಷಿಗೆ ತಗುಲಿದ ರೋಗಗಳನ್ನು ಹತೋಟಿಗೆ ತರುವುದು ಒಂದೆಡೆಯಾದರೆ, ಬಹುತೇಕ ರೈತರ ಬೆಳೆಗಳು ಕಳೆದ ಎರಡು ವರ್ಷಗಳಿಂದ ಅತ್ಯಧಿಕ ಮಳೆ ಸುರಿದು ನಾಶವಾಗುತ್ತಿದೆ. ಬೆಳೆ ಇದ್ರೆ ಬೆಲೆ ಇರಲ್ಲ. ಬೆಲೆ ಇದ್ರೆ ಬೆಳೆ ಇರಲ್ಲ ಇಂತಹ ಪಾಡಿನ ನಡುವೆ ಕಷ್ಟ ಪಟ್ಟು ಮಾಡಿದ ಕೃಷಿ ಬೆಳೆ ಪ್ರಾಣಿಗಳ ಪಾಲಾಗುತ್ತಿದೆ. ಪ್ರಾಣಿಗಳ ಬಾಯಿಂದ ಕೃಷಿಯನ್ನು ಉಳಿಸಿಕೊಳ್ಳಲು ರೈತರು ಪರದಾಡುವ ಪರಿಸ್ಥಿತಿ ಬಂದೊದಗಿದೆ. ಮಳೆಗಾಲ ಕಡಿಮೆಯಾಗುತ್ತಿದ್ದಂತೆ ತೋಟಗಳಿಗೆ ಕಾಡು ಪ್ರಾಣಿಗಳು ಲಗ್ಗೆ ಇಡಲು ಪ್ರಾರಂಭಿಸುತ್ತವೆ. ಹಗಲಿಡೀ ಹಿಂಡುಗಟ್ಟಲೆ ಕೋತಿಗಳು ತೋಟಗಳಿಗೆ ಲಗ್ಗೆ ಇಟ್ಟು ಅಡಕೆ ಗಿಡಗಳನ್ನು ನಾಶ ಪಡಿಸುತ್ತವೆ. ಕೋತಿಗಳು ಒಮ್ಮೆ ತೋಟಕ್ಕೆ ನುಗ್ಗಿದರೆ ಎಳನೀರು ಹಾಗೂ ಬಲಿತ ತೆಂಗಿನ ಕಾಯಿಗಳನ್ನು ಎಳೆದು ಕೆಡವುತ್ತವೆ. ಬಾಳೆ ಕಾಯಿ, ತರಕಾರಿ ಯಾವುದನ್ನು ಬಿಡುತ್ತಿಲ್ಲ. ರಾತ್ರಿಯಾಗುತ್ತಿದ್ದಂತೆ ಹಂದಿಗಳು, ಕಾಡುಕೋಣಗಳು, ಜಿಂಕೆಗಳು ಲಗ್ಗೆ ಇಡುತ್ತವೆ. ಹಿಂಡುಗಟ್ಟಲೆ ಹಂದಿಗಳು ತೋಟಕ್ಕೆ ನುಗ್ಗಿ ಅಡಕೆ ಮರದ ಬುಡ ಸಹಿತ ಕಿತ್ತು ಹಾಕುತ್ತವೆ. ಗೆಡ್ಡೆ ಗೆಣಸುಗಳನ್ನು ತಿಂದು ಸಂಪೂರ್ಣ ನಾಶ ಮಾಡುತ್ತವೆ. ಕೋವಿ ಇಲ್ಲದೆ ರೈತರಿಗೆ ತೊಂದರೆ..! ‘ರೈತರು ಫಸಲನ್ನು ತೆಗೆಯುವ ಸಂದರ್ಭದಲ್ಲಿ ಚುನಾವಣೆಗಳು ಬೇಕಿತ್ತೆ? ಪ್ರಾಣಿಗಳನ್ನು ತೋಟದಿಂದ ಓಡಿಸಲೆಂದು ನಾವು ಪರವಣಿಗೆಯ ಕೋವಿಯನ್ನು ಇಟ್ಟುಕೊಂಡಿದ್ದೇವು. ಆದರೆ ಈಗ ಚುನಾವಣೆಯ ಸಂದರ್ಭ ಎಂದು ಪೊಲೀಸ್‌ ಠಾಣೆಯಲ್ಲಿಇಟ್ಟಿದ್ದೇವೆ. ಅನುಮತಿ ಪಡೆದುಕೊಂಡು ಕೋವಿ ಬಳಸಿಕೊಳ್ಳಬಹುದು ಎಂದು ಹೇಳುತ್ತಾರೆ. ಆದರೆ ನಾವು ಕೋವಿ ಕೊಟ್ಟು ಅರ್ಜಿ ಹಾಕಿ ಅನುಮತಿ ಸಿಗುವಾಗ ಇಲ್ಲಿಎಲ್ಲ ಮುಗಿದಿರುತ್ತದೆ. ಇಲ್ಲಿ ಯಾವ ರೀತಿ ಬೆಳೆಗಳನ್ನು ಉಳಿಸಿಕೊಳ್ಳುವುದು. ಪ್ರಾಣಿಗಳ ಉಪಟಳ ಹೇಳತೀರದು. ಇಲ್ಲಿ ರೈತನ ಪರಿಸ್ಥಿತಿಯನ್ನು ಯಾರೂ ಕೇಳೋರೆ ಇಲ್ಲಂತಾಗಿದೆ’ ಎಂದು ಮುಜೆಕಾನ್‌ ಭಾಗದ ರೈತರು ತಮ್ಮ ಅಳಲನ್ನು ಹೇಳುತ್ತಿದ್ದಾರೆ. ಕಾಡು ಪ್ರಾಣಿಗಳು ಯಾವಾಗ ಬೇಕಾದರೂ ದಾಳಿ ಮಾಡಿ ರೈತನ ಬೆಳೆಗಳನ್ನು ನಾಶ ಮಾಡುತ್ತವೆ. ಆದರೆ, ಈ ನಷ್ಟಕ್ಕೆ ಸರಕಾರದಿಂದ ಸೂಕ್ತ ಪರಿಹಾರ ಸಿಗುತ್ತಿಲ್ಲ. ರೈತರು ಕೃಷಿಗೆ ಬಳಸುವ ಉಪಕರಣಗಳು, ಗೊಬ್ಬರ, ಔಷಧಗಳನ್ನು ಖರೀದಿಸಿದಾಗ ಸರಕಾರ ತೆರಿಗೆ ವಿಧಿಸುತ್ತವೆ. ಇಷ್ಟಿದ್ದರೂ ನಷ್ಟ ಪರಿಹಾರದ ವಿಷಯದಲ್ಲಿ ಸರಕಾರಗಳು ವಂಚಿಸುತ್ತಿವೆ ಎಂಬ ಅಸಮಾಧಾನ ರೈತ ವಲಯದಲ್ಲಿ ವ್ಯಾಪಕವಾಗಿದೆ.
from India & World News in Kannada | VK Polls https://ift.tt/2L3lMUC
