ಬೆಂಗಳೂರು: ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿಗೆ(ಎಪಿಎಂಸಿ) ನೀಡುವ ಸೆಸ್‌ ಪ್ರಮಾಣವನ್ನು ಶೇ.1 ರಿಂದ ಶೇ.0.60ಕ್ಕೆ ಇಳಿಸಲು ಸಚಿವ ಸಂಪುಟ ಸಭೆ ತೀರ್ಮಾನಿಸಿದೆ. ಈ ಮೊದಲು ಎಪಿಎಂಸಿಗಳಲ್ಲಿ ಒಟ್ಟಾರೆ ಶೇ.2ರಷ್ಟು ಸೆಸ್‌ ವಿಧಿಸಲಾಗುತ್ತಿತ್ತು. ಈ ಪೈಕಿ ಶೇ.1ರಷ್ಟು ಸೆಸ್‌ ಅನ್ನು ವರ್ತಕರಿಗೆ ಮತ್ತು ಶೇ.1ರಷ್ಟು ಸೆಸ್‌ ಅನ್ನು ಎಪಿಎಂಸಿಗಳಿಗೆ ಹಂಚಿಕೆ ಮಾಡಲಾಗುತ್ತಿತ್ತು. ಇದೀಗ ವರ್ತಕರ ಬೇಡಿಕೆ ಮೇರೆಗೆ ಎಪಿಎಂಸಿಗೆ ನೀಡುವ ಸೆಸ್‌ ಪ್ರಮಾಣವನ್ನು ಶೇ.1ರಿಂದ ಶೇ.0.60ಕ್ಕೆ ಕಡಿತಗೊಳಿಸಲಾಗುವುದು ಎಂದು ಸಂಪುಟ ಸಭೆ ಬಳಿಕ ಸಚಿವ ತಿಳಿಸಿದರು. 'ವಿಕ'ದೊಂದಿಗೆ ಮಾತನಾಡಿರುವ ಸಹಕಾರ ಸಚಿವ ಎಸ್‌.ಟಿ.ಸೋಮಶೇಖರ್‌, ''ಈ ಮೊದಲು ಎಪಿಎಂಸಿಗಳಿಗೆ ಶೇ.35ರಷ್ಟು ಸೆಸ್‌ ನೀಡುವ ತೀರ್ಮಾನವಾಗಿತ್ತು. ಇದರಿಂದ ಎಪಿಎಂಸಿಗಳಿಗೆ ನಷ್ಟವಾಗಲಿದೆ ಎಂಬ ಕಾರಣದಿಂದ ಈ ಪ್ರಮಾಣವನ್ನು ಶೇ.1ಕ್ಕೆ ಹೆಚ್ಚಿಸಲಾಗಿತ್ತು. ಈಗ ಇದರಲ್ಲಿ ಬದಲಾವಣೆ ಮಾಡಲು ಸಂಪುಟ ಸಭೆಯಲ್ಲಿ ನಿರ್ಧಾರ ಕೈಗೊಳ್ಳಲಾಗಿದೆ,'' ಎಂದು ಹೇಳಿದರು. ಜಂಟಿ ಅಧಿವೇಶನ ಜ.18ರಂದು ಜಂಟಿ ಅಧಿವೇಶನ ಕರೆಯುವ ಆಲೋಚನೆಯಿದೆ. ಈ ಬಗ್ಗೆ ಮುಂದಿನ ಸಂಪುಟದಲ್ಲಿ ಅಂತಿಮ ತೀರ್ಮಾನ ಕೈಗೊಳ್ಳಲಾಗುತ್ತದೆ. ಆಸ್ತಿ ತೆರಿಗೆ ಹೆಚ್ಚಳ ಪ್ರಸ್ತಾವ ಮುಂದೂಡಿಕೆ ಮಹಾನಗರ ಪಾಲಿಕೆಗಳು ಸೇರಿದಂತೆ ನಗರಸಭೆ, ಪುರಸಭೆ ವ್ಯಾಪ್ತಿಯ ಆಸ್ತಿ ತೆರಿಗೆ ಪ್ರಮಾಣವನ್ನು ಶೇ.15 ರಿಂದ ಶೇ.30ಕ್ಕೆ ಹೆಚ್ಚಿಸುವ ಪ್ರಸ್ತಾಪವನ್ನು ಮುಂದೂಡಲಾಗಿದೆ. ಮುಂದಿನ ಅಧಿವೇಶನದಲ್ಲಿ ಈ ಸಂಬಂಧ ವಿಧೇಯಕ ಮಂಡಿಸಲಾಗುವುದು. ಎಟಿಎಂಗೆ ಭದ್ರತೆ ಕೇಂದ್ರದ ಕಾಯಿದೆ ಅನುಸಾರ ಕರ್ನಾಟಕ ಖಾಸಗಿ ಭದ್ರತಾ ಏಜೆನ್ಸಿ(ಖಾಸಗಿ ಏಜೆನ್ಸಿ ಹಣ ಸಾಗಾಣಿಕೆ) ನಿಯಮ-2020ಕ್ಕೆ ಅನುಮೋದಿಸಲಾಗಿದೆ. ಎಟಿಎಂಗಳಿಗೆ ಹಣ ಸಾಗಿಸುವಾಗ ಯಾವ ಭದ್ರತೆ ಅಳವಡಿಸಬೇಕು, ಒಂದು ಬಾರಿಗೆ ಎಷ್ಟು ಮೊತ್ತ ಸಾಗಿಸಬೇಕು ಎಂಬಿತ್ಯಾದಿ ಅಂಶ ಇದರಲ್ಲಿ ಅಡಕವಾಗಿದೆ. ಆರ್‌ಎಎಫ್‌ಗೆ 50 ಎಕರೆ ಭದ್ರಾವತಿ ಬಳಿ ಕ್ಷಿಪ್ರ ಕಾರ್ಯಪಡೆ(ಆರ್‌ಎಎಫ್‌) ಬೆಟಾಲಿಯನ್‌ ಪ್ರಾರಂಭಿಸಲು 50.29 ಎಕರೆ ನೀಡಲು ಸಂಪುಟ ಒಪ್ಪಿಗೆ ನೀಡಿದೆ. ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಅವರು ಜನವರಿ 17ರಂದು ಬೆಟಾಲಿಯನ್‌ಗೆ ಶಂಕು ಸ್ಥಾಪನೆ ಮಾಡಲಿದ್ದಾರೆ.
from India & World News in Kannada | VK Polls https://ift.tt/37VkHYd
