ಮೆಲ್ಬೋರ್ನ್‌: ಭಾರತ ತಂಡದ ಶಿಸ್ತುಬದ್ಧ ದಾಳಿಗೆ ನಲುಗಿದ ತಂಡ ಬಾರ್ಡರ್‌ ಗವಾಸ್ಕರ್‌ ಟ್ರೋಫಿ ಟೆಸ್ಟ್ ಸರಣಿಯ ದ್ವಿತೀಯ ಇನಿಂಗ್ಸ್‌ನಲ್ಲಿ ಸಾಧಾರಣ ಮೊತ್ತಕ್ಕೆ ಕುಸಿದು ಪ್ರವಾಸಿ ಟೀಮ್‌ ಇಂಡಿಯಾಗೆ ಸುಲಭ ಗುರಿ ನೀಡಿದೆ. ಇತಿಹಾಸ ಪ್ರಸಿದ್ದ ಮೆಲ್ಬೋರ್ನ್‌ ಕ್ರಿಕೆಟ್ ಗ್ರೌಂಡ್‌ನಲ್ಲಿ ನಾಲ್ಕನೇ ದಿನವಾದ ಮಂಗಳವಾರ ಬೆಳಗ್ಗೆ ಆರು ವಿಕೆಟ್‌ ಕಳೆದುಕೊಂಡು 133 ರನ್‌ಗಳಿಂದ ದ್ವಿತೀಯ ಇನಿಂಗ್ಸ್ ಮುಂದುವರಿಸಿದ ಆಸ್ಟ್ರೇಲಿಯಾ, 103.1 ಓವರ್‌ಗಳಿಗೆ 200 ರನ್‌ಗಳಿಗೆ ಆಲೌಟ್‌ ಆಯಿತು. ಇದರೊಂದಿಗೆ ಭಾರತ ತಂಡಕ್ಕೆ 70 ರನ್‌ಗಳ ಸಾಧಾರಣ ಗುರಿ ನೀಡಿತು. ನಾಲ್ಕನೇ ದಿನ ಬ್ಯಾಟಿಂಗ್‌ಗೆ ಇಳಿದ ಕ್ಯಾಮೆರಾನ್‌ ಗ್ರೀನ್‌ ಹಾಗೂ ಪ್ಯಾಟ್‌ ಕಮಿನ್ಸ್ ಕೆಲ ಕಾಲ ಭಾರತದ ದಾಳಿಯನ್ನು ಮೆಟ್ಟಿನಿಂತರು. ಅದರಂತೆ ಈ ಜೋಡಿ ಮುರಿಯದ 7ನೇ ವಿಕೆಟ್‌ಗೆ 57 ರನ್‌ ಜತೆಯಾಟವಾಡುವ ಮೂಲಕ ತಂಡದ ಮೊತ್ತವನ್ನು 150ರ ಗಡಿ ದಾಟಿಸಿತು. ಒಂದು ತುದಿಯಲ್ಲಿ ತಾಳ್ಮೆಯ ಬ್ಯಾಟಿಂಗ್‌ ಮಾಡುತ್ತಿದ್ದ ಪ್ಯಾಟ್‌ ಕಮಿನ್ಸ್ 22 ರನ್‌ ಗಳಿಸಿ ಎದುರಾಳಿ ಬೌಲರ್‌ಗಳಿಗೆ ಉತ್ತಮ ಪ್ರತಿರೋಧ ತೋರುತ್ತಿದ್ದರು. ಆದರೆ, ಜಸ್‌ಪ್ರಿತ್‌ ಬುಮ್ರಾ ಎಸೆತದಲ್ಲಿ ಕಮಿನ್ಸ್, ಮಯಾಂಕ್‌ ಅಗರ್ವಾಲ್‌ಗೆ ಕ್ಯಾಚ್‌ ನೀಡಿ ನಿರ್ಗಮಿಸಿದರು. ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಇಳಿದಿದ್ದ ಕ್ಯಾಮೆರಾನ್‌ ಗ್ರೀನ್‌, ಒಂದು ತುದಿಯಲ್ಲಿ ಗಟ್ಟಿಯಾಗಿ ನೆಲೆಯೂರಿದ್ದರು. ಅತ್ಯುತ್ತಮ ಬ್ಯಾಟಿಂಗ್‌ ಮಾಡಿದ ಯುವ ಬ್ಯಾಟ್ಸ್‌ಮನ್‌, 146 ಎಸೆತಗಳಲ್ಲಿ ಐದು ಬೌಂಡರಿ ಸಹಿತ 45 ರನ್‌ ಗಳಿಸಿದರು. ಆ ಮೂಲಕ ತಂಡಕ್ಕೆ ಭರವಸೆ ಮೂಡಿಸಿದ್ದರು. ಆದರೆ, ಮೊಹಮ್ಮದ್ ಸಿರಾಜ್ ಎಸೆತದಲ್ಲಿ ರವೀಂದ್ರ ಜಡೇಜಾಗೆ ಕ್ಯಾಚ್‌ ನೀಡಿ ಕೇವಲ 5 ರನ್‌ಗಳಿಂದ ಅರ್ಧಶತಕ ವಂಚಿತರಾಗಿ ಪೆವಿಲಿಯನ್‌ಗೆ ಹೆಜ್ಜೆ ಹಾಕಿದರು. ನಂತರ ನೇಥನ್ ಲಯಾನ್(4) ಹಾಗೂ ಜಾಶ್ ಹೇಝಲ್‌ವುಡ್‌(10) ಅವರನ್ನು ಕ್ರಮವಾಗಿ ಮೊಹಮ್ಮದ್ ಸಿರಾಜ್ ಹಾಗೂ ಆರ್ ಅಶ್ವಿನ್ ಔಟ್‌ ಮಾಡಿದರು. 56 ಎಸೆತಗಳಲ್ಲಿ 14 ರನ್‌ ಗಳಿಸಿದ ಮಿಚೆಲ್‌ ಸ್ಟಾರ್ಕ್ ಅಜೇಯರಾಗಿ ಉಳಿದರು. ಭಾರತದ ಪರ ದ್ವಿತೀಯ ಇನಿಂಗ್ಸ್‌ನಲ್ಲಿ ಅತ್ಯುತ್ತಮ ಬೌಲಿಂಗ್‌ ಮಾಡಿದ ಮೊಹಮ್ಮದ್ ಸಿರಾಜ್ 37 ರನ್‌ ನೀಡಿ ಮೂರು ವಿಕೆಟ್‌ ಕಬಳಿಸಿದರು. ಜಸ್‌ಪ್ರಿತ್‌ ಬುಮ್ರಾ, ರವೀಂದ್ರ ಜಡೇಜಾ ಹಾಗೂ ಆರ್ ಅಶ್ವಿನ್ ತಲಾ ಎರಡೆರಡು ವಿಕೆಟ್‌ಗಳನ್ನು ಪಡೆದರೆ, ಉಮೇಶ್‌ ಯಾದವ್‌ ಏಕೈಕ ವಿಕೆಟ್‌ ಪಡೆದರು. ಇದಕ್ಕೂ ಮುನ್ನ ಪ್ರಥಮ ಇನಿಂಗ್ಸ್‌ನಲ್ಲಿ ಆಸ್ಟ್ರೇಲಿಯಾ ಆರಂಭಿಕ ದಿನವೇ 195 ರನ್‌ಗೆ ಆಲೌಟ್‌ ಆಗಿತ್ತು. ಇದಕ್ಕೆ ಪ್ರತ್ಯುತ್ತರವಾಗಿ ಪ್ರಥಮ ಇನಿಂಗ್ಸ್ ಮಾಡಿದ್ದ ಭಾರತ ತಂಡ, 326 ರನ್‌ಗಳಿಗೆ ಆಲೌಟಾದರೂ 131 ರನ್‌ಗಳ ಮಹತ್ವದ ಮುನ್ನಡೆ ಸಾಧಿಸಿತ್ತು. ಇದು ಪಂದ್ಯಕ್ಕೆ ತಿರುವು ನೀಡಿತ್ತು. ಹಂಗಾಮಿ ನಾಯಕ ಅಜಿಂಕ್ಯ ರಹಾನೆ ವೃತ್ತಿ ಜೀವನದ 12ನೇ ಶತಕ ಸಿಡಿಸಿದ್ದು ಪ್ರಥಮ ಇನಿಂಗ್ಸ್‌ನಲ್ಲಿ ಆಕರ್ಷಣೆಯಾಗಿತ್ತು. ಸಂಕ್ಷಿಪ್ತ ಸ್ಕೋರ್‌ (4ನೇ ದಿನ ಭೋಜನ ವಿರಾಮದ ಸಮಯಕ್ಕೆ) ಆಸ್ಟ್ರೇಲಿಯಾ: ಮೊದಲ ಇನಿಂಗ್ಸ್ 72.3 ಓವರ್‌ಗಳಲ್ಲಿ 195 ಆಲ್‌ಔಟ್ (ಮ್ಯಾಥ್ಯೂ ವೇಡ್‌ 30, ಮಾರ್ನಸ್‌ ಲಾಬುಶೇನ್ 48, ಟ್ರಾವಿಸ್‌ ಹೆಡ್‌ 38, ನೇಥನ್ ಲಯಾನ್ 20; ಜಸ್‌ಪ್ರೀತ್‌ ಬುಮ್ರಾ 56ಕ್ಕೆ 4, ಆರ್ ಅಶ್ವಿನ್ 35ಕ್ಕೆ 3, ಮೊಹಮ್ಮದ್ ಸಿರಾಜ್ 40ಕ್ಕೆ 2). ದ್ವಿತೀಯ ಇನಿಂಗ್ಸ್ 103.1 ಓವರ್‌ಗಳಿಗೆ 200 (ಮ್ಯಾಥ್ಯೂ ವೇಡ್‌ 40, ಮಾರ್ನಸ್‌ ಲಾಬುಶೇನ್ 28, ಟ್ರಾವಿಸ್‌ ಹೆಡ್‌ 17, ಕ್ಯಾಮೆರಾನ್‌ ಗ್ರೀನ್‌ 45, ಪ್ಯಾಟ್‌ ಕಮಿನ್ಸ್ 22, ಮಿಚೆಲ್‌ ಸ್ಟಾರ್ಕ್ 14*; ರವೀಂದ್ರ ಜಡೇಜಾ 28ಕ್ಕೆ 2, ಉಮೇಶ್‌ ಯಾದವ್‌ 5 ಕ್ಕೆ 1, ಜಸ್‌ಪ್ರಿತ್‌ ಬುಮ್ರಾ 54ಕ್ಕೆ 1, ಮೊಹಮ್ಮದ್ ಸಿರಾಜ್ 37ಕ್ಕೆ 3, ಆರ್ ಅಶ್ವಿನ್ 71ಕ್ಕೆ 2) ಭಾರತ: ಮೊದಲ ಇನಿಂಗ್ಸ್ 115.1 ಓವರ್‌ಗಳಿಗೆ 326 ಆಲೌಟ್‌ (ಶುಭಮನ್ ಗಿಲ್ 45, ಚೇತೇಶ್ವರ್ ಪೂಜಾರ 17, ಅಜಿಂಕ್ಯ ರಹಾನೆ 112, ಹನುಮ ವಿಹಾರಿ 21, ರಿಷಭ್ ಪಂತ್ 29, ರವೀಂದ್ರ ಜಡೇಜಾ 57; ಮಿಚೆಲ್‌ ಸ್ಟಾರ್ಕ್ 78ಕ್ಕೆ 3, ಪ್ಯಾಟ್‌ ಕಮಿನ್ಸ್ 80ಕ್ಕೆ 2, ನೇಥನ್ ಲಯಾನ್ 72ಕ್ಕೆ 3, ಜಾಶ್ ಹೇಝಲ್‌ವುಡ್‌ 47ಕ್ಕೆ 1).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2L2X4E8
