ವಿಜಯಪುರ: ಕಳೆದ 10 ತಿಂಗಳಿಂದಲೂ ಕೋವಿಡ್‌-19 ಪ್ರಕರಣಗಳು ಹೆಚ್ಚಾದ ಕಾರಣ ಮುಚ್ಚಿದ್ದ ಚಿತ್ರಮಂದಿರಗಳು ಈಗ ಪುನಾರಂಭವಾಗಿವೆ. ಇಲ್ಲಿನ ಗೌರಿಶಂಕರ ಚಿತ್ರಮಂದಿರದಲ್ಲಿಇದೀಗ ತೆಲುಗು ಚಲನಚಿತ್ರ ಬಿಡುಗಡೆ ಆಗಿದ್ದು, ಪ್ರೇಕ್ಷಕರು ಚಿತ್ರ ಮಂದಿರದತ್ತ ಮುಖ ಮಾಡಿದ್ದಾರೆ. ಚಿತ್ರಮಂದಿರದ ಮಾಲಿಕ ಎಂ. ಸತೀಶ್‌ ಕುಮಾರ್‌ ಮಾತನಾಡಿ, ಚಿತ್ರ ಮಂದಿರ ಪುನಾರಂಭಿಸಲು ಸರಕಾರ 3 ತಿಂಗಳ ಹಿಂದೆಯೇ ಅನುಮತಿ ನೀಡಿದ್ದರೂ ಯಾವುದೇ ಹೊಸ ಚಲನ ಚಿತ್ರಗಳು ಬಿಡುಗಡೆ ಕಂಡಿರಲಿಲ್ಲ. ಹಳೆ ಚಿತ್ರಗಳನ್ನು ಮರುಪ್ರದರ್ಶನಕ್ಕೆ ಹಾಕಿದರೆ, ಪ್ರೇಕ್ಷಕರು ಬಾರದೆ, ಕನಿಷ್ಠ ನಿರ್ವಹಣಾ ವೆಚ್ಚ ಸಿಗಲ್ಲ ಎಂಬ ಕಾರಣದಿಂದ ಪ್ರಾರಂಭಿಸುವ ಧೈರ್ಯ ಮಾಡಲಿಲ್ಲ ಎಂದು ತಿಳಿಸಿದರು. ನವೀಕರಣಗೊಂಡ ಚಿತ್ರಮಂದಿರಕೋವಿಡ್‌-19 ಸಂದರ್ಭದಲ್ಲಿ ಗೌರಿ ಶಂಕರ ಚಲನಚಿತ್ರ ಮಂದಿರದ ನವೀಕರಣ ಮಾಡಲಾಗಿದೆ. ಲಕ್ಷಾಂತರ ರೂ. ವೆಚ್ಚದಲ್ಲಿ ಸಂಪೂರ್ಣ ಪುಷ್‌ಬ್ಯಾಕ್‌ ಕುಷನ್‌ ಸೀಟುಗಳನ್ನು ಅಳವಡಿಸಲಾಗಿದೆ. 4ಕೆ ಸಿಲ್ವರ್‌ ಸ್ಕ್ರೀನ್‌ನೊಂದಿಗೆ ಡಿಟಿಎಚ್‌ ಶಬ್ದ ವ್ಯವಸ್ಥೆ ಅಳವಡಿಸಲಾಗಿದೆ. ಪ್ರೇಕ್ಷಕರು ಮತ್ತೆ ಚಿತ್ರಮಂದಿರಕ್ಕೆ ಬರುತ್ತಿರುವುದು ಸಂತಸದ ವಿಷಯ ಎಂದು ತಿಳಿಸಿದರು. ಸರಕಾರದ ಕೋವಿಡ್‌-19 ನಿಯಮಾವಳಿಯಂತೆ ಪ್ರತಿ ಪ್ರೇಕ್ಷಕ ಮಾಸ್ಕ್‌ ಧರಿಸಿ ಬರಬೇಕು. ಪ್ರತಿಯೊಬ್ಬರಿಗೂ ಸ್ಯಾನಿಟೈಸೇಶನ್‌ ಹಾಗೂ ಥರ್ಮಲ್‌ ಸ್ಕ್ರೀನಿಂಗ್‌ ಮುಖಾಂತರ ಚಿತ್ರಮಂದಿರಕ್ಕೆ ಪ್ರವೇಶ ನೀಡಲಾಗುತ್ತಿದೆ. ಚಿತ್ರಮಂದಿರದಲ್ಲಿ ಆಸನಗಳ ನಡುವೆ ಸಾಮಾಜಿಕ ಅಂತರ ಕಾಪಾಡಲಾಗುತ್ತಿದೆ. ಇದಕ್ಕಾಗಿ ಹೆಚ್ಚುವರಿ ಸಿಬ್ಬಂದಿ ನೇಮಿಸಲಾಗಿದೆ ಎಂದು ತಿಳಿಸಿದರು. ಮನವಿಸರಕಾರ ಕೋವಿಡ್‌-19 ಪರಿಸ್ಥಿತಿಯಲ್ಲಿ ಸಾಕಷ್ಟು ಉದ್ದಿಮೆಗಳಿಗೆ ಹಣ ಕಾಸಿನ ಪ್ಯಾಕೇಜ್‌ ನೀಡಿತು. ಆದರೆ ಚಿತ್ರಮಂದಿರಗಳಿಗೆ ಇದು ಸಿಗದಿರುವುದು ಖೇದಕರ ವಿಷಯ. ಕನಿಷ್ಠ ಚಲನ ಚಿತ್ರ ಮಂದಿರಗಳ 2 ವರ್ಷದ ಕಂದಾಯ, ಮನರಂಜನಾ ತೆರಿಗೆ, ವಿದ್ಯುತ್‌ ಶುಲ್ಕಗಳಿಗೆ ವಿನಾಯಿತಿ ನೀಡಿ, ಚಲನ ಚಿತ್ರ ವಾಣಿಜ್ಯ ಮಂಡಳಿ ವಾರ್ಷಿಕ ಶುಲ್ಕ ಮನ್ನಾ ಮಾಡಬೇಕೆಂದು ಅವರು ಒತ್ತಾಯಿಸಿದರು. ಪ್ರಾರಂಭವಾಗದ ಚಿತ್ರಮಂದಿರಪಟ್ಟಣದ ಮತ್ತೊಂದು ಚಲನಚಿತ್ರ ಮಂದಿರ 'ಸಂಗಮೇಶ್ವರ' ಇನ್ನೂ ಪ್ರಾರಂಭವಾಗಿಲ್ಲ. ಅದರ ಪ್ರಾರಂಭಕ್ಕೆ ಸ್ಥಳೀಯ ಪ್ರೇಕ್ಷಕರು ಕಾದು ಕುಳಿತಿರುವರು. ಉತ್ತಮ ಮತ್ತು ಸದಭಿರುಚಿಯ ಕನ್ನಡ ಚಲನಚಿತ್ರಗಳು ಬಿಡುಗಡೆಯಾಗಿ ಮತ್ತೆ ಎರಡೂ ಚಿತ್ರಮಂದಿರಗಳಿಗೆ ಅಪಾರ ಪ್ರೇಕ್ಷಕರು ಬರುವಂತಾಗಬೇಕು ಎಂಬುದು ಸ್ಥಳೀಯರು ಮತ್ತು ತಾಲೂಕಿನ ಜನತೆಯ ಒತ್ತಾಸೆಯಾಗಿದೆ.
from India & World News in Kannada | VK Polls https://ift.tt/3nUF1hQ
