ಇಂದು(ಭಾನುವಾರ) ಭಾರತ-ಚೀನಾ ಸೈನ್ಯದ ಉನ್ನತ ಸೇನಾಧಿಕಾರಿಗಳ ನಡುವೆ ಐದನೇ ಸುತ್ತಿನ ಮಿಲಿಟರಿ ಮಾತುಕತೆ ನಡೆಯಲಿದೆ. ಕಳೆದ ನಾಲ್ಕು ಸುತ್ತಿನ ಮಾತುಕತೆಯಲ್ಲಿ ಹಂತ ಹಂತವಾಗಿ ಸೈನ್ಯವನ್ನು ಹಿಂಪಡೆಯುವ ಕುರಿತು ಚರ್ಚಿಸಲಾಗಿತ್ತು. ಆದರೆಈ ಬಾರಿ ಸಂಪೂರ್ಣ ಸೈನ್ಯ ಹಿಂಪಡೆತಕ್ಕೆ ಭಾರತ ಪಟ್ಟು ಹಿಡಿಯಲಿದೆ ಎಂದು ಸೇನಾ ಮೂಲಗಳು ತಿಳಿಸಿವೆ. ಭಾರತ-ಚೀನಾ ಲಡಾಖ್ ಗಡಿಯ ಮೊಲ್ಡೋದಲ್ಲಿ ಉಭಯ ಸೇನೆಗಳ ಕಮಾಂಡರ್ ಮಟ್ಟದ ಅಧಿಕಾರಿಗಳು ಸಭೆ ನಡೆಸಲಿದ್ದು, ಈ ಸಭೆಯ ಮೇಲೆ ಇಡೀ ದೇಶ ಗಮನವಿಟ್ಟಿದೆ. ಗಡಿಯಲ್ಲಿ ಚೀನಾ ಸೇನೆಯ ಚಲನವಲಗಳ ಮೇಲೆ ನಿಗಾ ಇಟ್ಟಿರುವ ಭಾರತೀಯ ಸೇನೆ, ಈ ಬಾರಿ ಸಂಪೂರ್ಣವಾಗಿ ಗಡಿ ಖಾಲಿ ಮಾಡಿಸಲು ಪಣ ತೊಟ್ಟಿದೆ. ಚೀನಾ ಸೇನೆ ಗಡಿಯಿಂದ ಕಾಲ್ಕಿಳುವವರೆಗೂ ಚಳಿಗಾಲವಾದರೂ ಸರಿ ಲಡಾಖ್ ಗಡಿಯಲ್ಲಿ ಸೈನ್ಯ ಜಮಾವಣೆಗೊಳಿಸಲು ಭಾರತೀಯ ಸೇನೆ ನಿರ್ಧರಿಸಿದೆ. ಅಗತ್ಯ ಸಂಖ್ಯೆಯ ಸೈನಿಕರು, ಶಸ್ತ್ರಾಸ್ತ್ರಗಳನ್ನು ಲಡಾಖ್ ಗಡಿಯಲ್ಲಿ ನಿಯೋಜಿಸುವ ಕಾರ್ಯಕ್ಕೆ ಚಾಲನೆ ನೀಡಲಾಗಿದೆ. ಹಾಗಾದರೆ ಇಂದಿನ ಭಾರತ-ಚೀನಾ ನಡುವಿನ ಐದನೇ ಹಾಗೂ ಪ್ರಮುಖ ಸುತ್ತಿನ ಮಿಲಿಟರಿ ಮಾತುಕತೆಯತ್ತ ಗಮನಹರಿಸುವುದಾದರೆ...ಹೌದು, ಲಡಾಖ್ ಗಡಿ ಮಾಲ್ಡಾ ಪ್ರದೇಶದಲ್ಲಿ ಇಂದು ಭಾರತ-ಚೀನಾ ಸೈನ್ಯದ ಉನ್ನತ ಕಮಾಂಡರ್ ಮಟ್ಟದ ಮಿಲಿಟರಿ ಮಾತುಕತೆ ನಡೆಯುತ್ತಿದೆ. ಈ ಬಾರಿ ಭಾರತ ಗಡಿಯಿಂದ ಸಂಪೂರ್ಣವಾಗಿ ಸೈನ್ಯವನ್ನು ಹಿಂಪಡೆಯಲೇಬೇಕು ಎಂದು ಚೀನಾದ ಮೇಲೆ ಒತ್ತಡ ಹೇರುವುದು ಖಚಿತ.
ಭಾರತ-ಚೀನಾ 5ನೇ ಸುತ್ತಿನ ಮಿಲಿಟರಿ ಮಾತುಕತೆ: ಸಂಪೂರ್ಣ ಸೈನ್ಯ ತೆರವಿಗೆ ಒತ್ತಾಯಿಸಲಿದೆ ಭಾರತ!
ಕಳೆದ ನಾಲ್ಕು ಸುತ್ತಿನ ಮಾತುಕತೆಗಳಲ್ಲ ಇಸೈನ್ಯ ಹಿಂಪಡೆಯುವ ಕುರಿತು ನಾಟಕವಾಡುತ್ತಲೇ ಬಂದಿರುವ ಚೀನಾ, ಈ ಬಾರಿ ಭಾರತೀಯ ಸೇನೆಯ ಒತ್ತಡವನ್ನು ಎದುರಿಸಬೇಕಾಗಿ ಬಂದಿದೆ. ಸಂಪೂರ್ಣ ಸೈನ್ಯ ತೆರವು ಇದೊಂದೇ ಗಡಿಯಲ್ಲಿ ಶಾಂತಿ ಮರುಸ್ಥಾಪನೆಗೆ ಇರುವ ಮಾರ್ಗ ಎಂದು ಭಾರತೀಯ ಸೇನೆ ಮಾತುಕತೆಗೂ ಮುನ್ನ ಹೇಳಿರುವುದನ್ನು ಇಲ್ಲಿ ಗಮನಿಸಬಹುದು.
ಅದರಂತೆ ಈ ಬಾರಿಯ ಚಳಿಗಾಲದಲ್ಲೂ ಲಡಾಖ್ ಗಡಿಯಲ್ಲಿ ಸೈನ್ಯ ಜಮಾವಣೆ ಮಾಡುವ ನಿರ್ಧಾರವನ್ನು ಭಾರತೀಯ ಸೇನೆ ಕೈಗೊಂಡಿದೆ. ಚೀನಾ ಗಡಿಯಿಂದ ಕಾಲ್ಕಿಳುತ್ತಿಲ್ಲವಾದ್ದರಿಂದ ಚಳಿಗಾಲದಲ್ಲೂ ಸೈನಿಕರು ಹಾಗೂ ಶಸ್ತ್ರಾಸ್ತ್ರಗಳನ್ನು ಗಡಿಯಲ್ಲಿ ನಿಯೋಜಿಸಲು ಸೇನೆ ಮುಂದಾಗಿದೆ.
ಚಳಿಗಾಲದಲ್ಲೂ ಲಡಾಖ್ ಗಡಿಯಲ್ಲಿ ಇದೇ ಸೈನ್ಯ ಸಾಮರ್ಥ್ಯ ಹೊಂದಲಿರುವ ಭಾರತೀಯ ಸೇನೆ: ಯಾಕೆ?
ಸಾಮಾನ್ಯವಾಗಿ ಚಳಿಗಾಲದಲ್ಲಿ ಲಡಾಖ್ ಗಡಿಯಿಂದ ಉಭಯ ಸೇನೆಗಳೂ ಹಿಂದೆ ಸರಿಯುವುದು ವಾಡಿಕೆ. ಆದರೆ ಈ ಬಾರಿ ಚೀನಾದ ವರ್ತನೆಯಿಂದ ಅನುಮಾನಗೊಂಡಿರುವ ಭಾರತೀಯ ಸೇನೆ, ಚಳಿಗಾಲದಲ್ಲೂ ಸೈನ್ಯ ಜಮಾವಣೆಗೊಳಿಸಲು ನಿರ್ಧರಿಸಿದೆ.
ಈಗಾಗಲೇ ಲಡಾಖ್ ಗಡಿಯಗೆ ಚಳಿಗಾಲಕ್ಕೆ ಬೇಕಾಗುವ ಸಮವಸ್ತ್ರಗಳು ಹಾಗೂ ಅಗತ್ಯ ಸಾಮಾನು ಸರಂಜಾಮುಗಳನ್ನು ರವಾನಿಸುವ ಕಾರ್ಯಕ್ಕೆ ಸೇನೆ ಚಾಲನೆ ನೀಡಿದೆ.
ಗಡಿ ಕಾಯುವ ಸೈನಿಕರಿಗೆ ಚಳಿಗಾಲಕ್ಕೆ ಬೇಕಾಗಿರುವ ಸಮವಸ್ತ್ರಗಳು ಹಾಗೂ ಶಸ್ತ್ರಾಸ್ತ್ರಗಳನ್ನು ಪೂರೈಕೆ ಮಾಡಲಾಗುತ್ತಿದೆ. ಭಾರೀ ಪ್ರಮಾಣದಲ್ಲಿ ಲಡಾಖ್ ಗಡಿಗೆ ಸಾಗುತ್ತಿರುವ ಸೇನಾ ಟ್ರಕ್ಗಳು, ಈ ಸಾಮಾನು ಸರಂಜಾಮುಗಳನ್ನು ಹೊತ್ತು ಸಾಗುತ್ತಿವೆ.
ಚೀನಾಗೆ ತಿರುಗೇಟು ನೀಡಲು ಭಾರತ ಸಜ್ಜು..! ಗಡಿಯಲ್ಲಿ 35 ಸಾವಿರ ಹೆಚ್ಚುವರಿ ಸೈನಿಕರ ನಿಯೋಜನೆಗೆ ಸಿದ್ಧತೆ
ಅಗತ್ಯ ಆಹಾರ ಸಾಮಗ್ರಿಗಳನ್ನೂ ಸಾಗಿಸಲಾಗುತ್ತಿದ್ದು, ಈ ಬಾರಿಯ ಚಳಿಗಾಲದಲ್ಲಿ ಲಡಾಖ್ ಗಡಿಯಲ್ಲಿ ಭಾರತೀಯ ಸೇನೆ ಕಾವಲು ಅತ್ಯಂತ ಚುರುಕಾಗಿರಲಿದೆ.
ಹೌದು, ಲಡಾಖ್ ಗಡಿಯಿಂದ ಈ ಬಾರಿ ಸಂಪೂರ್ಣವಾಗಿ ಸೈನ್ಯವನ್ನು ಹಿಂಪಡೆಯದೇ ಚೀನಾಗೆ ಬೇರೆ ದಾರಿಯಿಲ್ಲ ಎನ್ನಲಾಗಿದೆ. ಕಳೆದ ನಾಲ್ಕು ಮಿಲಿಟರಿ ಮಾತುಕತೆಗಳಲ್ಲಿ ಕೇವಲ ಬಾಯಿ ಮಾತಿನಲ್ಲಿ ಸೈನ್ಯ ಹಿಂಪಡೆಯುವುದಾಗಿ ಹೇಳುತ್ತಿದ್ದ ಚೀನಾ, ಈ ಬಾರಿ ಸಂಪೂರ್ಣವಾಗಿ ಸೈನ್ಯವನ್ನು ಹಿಂಪಡೆಯಲೇಬೇಕಿದೆ.
ಭಾರತೀಯ ಸೇನೆಯ ಚಳಿಗಾಲದ ಸಿದ್ಧತೆ ಕಂಡು ಬೆದರಿರುವ ಚೀನಾ, ಸೈಬ್ಯ ಹಿಂಪಡೆದು ಮುಖ ಉಳಿಸಿಕೊಳ್ಳುವ ಯೋಜನೆಯಲ್ಲಿದ್ದಂತಿದೆ. ಇದೇ ಕಾರಣಕ್ಕೆ ಚೀನಾದ ರಾಜತಾಂತ್ರಿಕ ಅಧಿಕಾರಿಗಳು ಸಂಪೂರ್ಣ ಸೈನ್ಯ ತೆರವು ಎಂಬ ಮಾತುಗಳನ್ನಾಡುತ್ತಿದ್ದಾರೆ.
ಲಡಾಖ್ ಗಡಿಯಿಂದ ಬಹುತೇಕ ಹಿಂದೆ ಸರಿದಿದ್ದೇವೆ: ಚೀನಾ ಮಾತು ನಂಬೋದಾ?
ಒಟ್ಟಿನಲ್ಲಿ ಭಾರತ-ಚೀನಾ ನಡುವಿನ ಐದನೇ ಸುತ್ತಿನ ಮಾತುಕತೆ ಅತ್ಯಂತ ಮಹತ್ವ ಪಡೆದುಕೊಂಡಿದ್ದು, ಈ ಸಭೆಯಿಂದ ಏನು ನಿರ್ಣಯಗಳು ಹೊರ ಬೀಳಲಿವೆ ಕಾದು ನೋಡಬೇಕಿದೆ.
from India & World News in Kannada | VK Polls https://vijaykarnataka.com/news/india/armies-of-india-and-china-to-hold-corps-commander-level-talks-at-moldo-today/articleshow/77313825.cms
