ಬೆಂಗಳೂರು: ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಹೊಸ ಅಲೆಯೊಂದು ಶುರುವಾಗುತ್ತಿದ್ದು, ಭಾರತೀಯ ಆಟಗಾರರು ವಿದೇಶಿ ಟಿ20 ಲೀಗ್‌ಗಳಲ್ಲಿ ಆಡಲು ಪ್ರಾರಂಭಿಸುತ್ತಿದ್ದಾರೆ. ಕಳೆದ ವರ್ಷ ಮೊದಲ ಬಾರಿ ಎಂಬಂತೆ ಅನುಮತಿಯೊಂದಿಗೆ ಯುವರಾಜ್‌ ಸಿಂಗ್ ಮತ್ತು ಮನ್‌ಪ್ರೀತ್‌ ಗೂನಿ ಕೆನಡಾ ಗ್ಲೋಬಲ್‌ ಟಿ20 ಲೀಗ್‌ನಲ್ಲಿ ಪಾಲ್ಗೊಂಡಿದ್ದರು. ಇದರೊಂದಿಗೆ ಭಾರತೀಯ ಕ್ರಿಕೆಟಿಗರಿಗೆ ವಿದೇಶಿ ಲೀಗ್‌ಗಳ ಬಾಗಿಲು ತೆರದಂತಾಗಿದೆ. ಅಂದಹಾಗೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ)ಯ ಕೇಂದ್ರ ಒಪ್ಪಂದ ಪಡೆದಿರುವ ಆಟಗಾರರು ವಿದೇಶಿ ಲೀಗ್‌ಗಳಲ್ಲಿ ಆಡುವುದಕ್ಕೆ ನಿಷೇಧವಿದೆ. ಆದರೆ, ಅಂತಾರಾಷ್ಟ್ರೀಯ ಕ್ರಿಕೆಟ್ ವೃತ್ತಿ ಬದುಕಿಗೆ ವಿದಾಯ ಹೇಳಿರುವ ಆಟಗಾರರು ಇದೀಗ ಈ ವಿದೇಶಿ ಲೀಗ್‌ಗಳಲ್ಲಿ ಆಡಲು ಮುಂದಾಗುತ್ತಿದ್ದಾರೆ. ಇತ್ತೀಚೆಗಷ್ಟೇ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಹಠಾತ್‌ ನಿವೃತ್ತಿ ಘೋಷಿಸಿದ 33 ವರ್ಷದ ಸ್ಫೋಟಕ ಎಡಗೈ ಬ್ಯಾಟ್ಸ್‌ಮನ್‌ ಸುರೇಶ್‌ ರೈನಾ ಮತ್ತು ಮಾಜಿ ಆಲ್‌ ರೌಂಡರ್‌ ಇರ್ಫಾನ್‌ ಪಠಾಣ್‌, ಭಾರತೀಯ ಆಟಗಾರರಿಗೆ ವಿದೇಶಿ ಲೀಗ್‌ಗಳಲ್ಲಿ ಆಡುವ ಅವಕಾಶವನ್ನು ಬಿಸಿಸಿಐ ಮಾಡಿಕೊಡಬೇಕು ಎಂದು ಹೇಳಿಕೊಂಡಿದ್ದರು. ಅದರಲ್ಲೂ ರೈನಾ ಬಿಗ್‌ ಬ್ಯಾಷ್‌ ಲೀ ಮತ್ತು ಕೆರಿಬಿಯನ್ ಪ್ರೀಮಿಯರ್‌ ಲೀಗ್‌ (ಸಿಪಿಎಲ್) ಟೂರ್ನಿಗಳಲ್ಲಿ ಆಡುವ ಬಯಕೆ ಹೊರಹಾಕಿದ್ದರು. ಇತ್ತೀಚಿನ ಬೆಳವಣಿಗೆ ಎಂಬಂತೆ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ರಾಜಸ್ಥಾನ್‌ ರಾಯಲ್ಸ್‌ ಮತ್ತು ಸನ್‌ ರೈಸರ್ಸ್‌ ಹೈದರಾಬಾದ್‌ ತಂಡಗಳ ಪರ ಆಡಿದ್ದ ಅನುಭವಿ ಲೆಗ್‌ ಸ್ಪಿನ್ನರ್‌ ಕೆರಿಬಿಯನ್ ಪ್ರೀಮಿಯರ್‌ ಲೀಗ್‌ಗೆ ಪದಾರ್ಪಣೆ ಮಾಡಿದ್ದರು. ಸಿಪಿಎಲ್ 2020 ಟೂರ್ನಿಯಲ್ಲಿ ಆಡುವ ಮೂಲಕ ಕೆರಿಬಿಯನ್ ನಾಡಿನ ಟಿ20 ಲೀಗ್‌ನಲ್ಲಿ ಆಡಿದ ಮೊದಲ ಭಾರತೀಯ ಕ್ರಿಕೆಟರ್ ಎಂಬ ದಾಖಲೆ ತಮ್ಮದಾಗಿಸಿಕೊಂಡಿದ್ದರು. ವಯಸ್ಸು 48 ಆದರೂ ತಾಂಬೆ ಅವರ ಲೆಗ್‌ ಸ್ಪಿನ್ ಬೌಲಿಂಗ್‌ನ ಖದರ್‌ ಕಿಂಚಿತ್ತೂ ಕಡಿಮೆಯಾಗಿಲ್ಲ. ಕಳೆದ ವರ್ಷ ಟಿ10 ಲೀಗ್‌ ಟೂರ್ನಿಯಲ್ಲಿ ಹ್ಯಾಟ್ರಿಕ್‌ ವಿಕೆಟ್‌ ಪಡೆದ ಸಾಧನೆ ಮಾಡಿದ್ದರು. ಅವರ ಈ ಪ್ರತಿಭೆಯನ್ನು ಗುರುತಿಸಿದ್ದ ಟ್ರಿನ್‌ಬಾಗೊ ನೈಟ್‌ ರೈಡರ್ಸ್‌ ತಂಡ (ಶಾರುಖ್‌ ಖಾನ್‌ ಮಾಲೀಕತ್ವದ) ಕಳೆದ ವರ್ಷ ಡಿಸೆಂಬರ್‌ನಲ್ಲಿ ನಡೆದ ಸಿಪಿಎಲ್ ಆಟಗಾರರ ಹರಾಜಿನಲ್ಲಿ ಖರೀದಿ ಮಾಡಿತ್ತು. ಇದೀಗ ಸೇಂಟ್‌ ಲೂಸಿಯಾ ಝೂಕ್ಸ್‌ ವಿರುದ್ಧ ಗುರುವಾರ ನಡೆದ ಪಂದ್ಯದಲ್ಲಿ ಅಫಘಾನಿಸ್ತಾನದ ಆಟಗಾರ ನಜೀಬುಲ್ಲಾ ಝದ್ರಾನ್ (21) ಅವರನ್ನು ಔಟ್‌ ಮಾಡುವ ಮೂಲಕ ತಾಂಬೆ ಟೂರ್ನಿಯಲ್ಲಿ ತಮ್ಮ ವಿಕೆಟ್‌ಗಳ ಖಾತೆ ತೆರೆದಿದ್ದಾರೆ. 21 ಎಸೆತಗಳಲ್ಲಿ ಅಷ್ಟೇ ರನ್‌ ಗಳಿಸಿ ಆಡುತ್ತಿದ್ದ ಝದ್ರಾನ್ ಕೊನೆಯ ಓವರ್‌ಗಳಲ್ಲಿ ಸ್ಫೋಟಕ ಬ್ಯಾಟಿಂಗ್‌ ಮಾಡುವ ಲೆಕ್ಕಾಚಾರದಲ್ಲಿದ್ದರು. ಆದರೆ, ಗೂಗ್ಲಿ ಎಸೆತದ ಮೂಲಕ ಚಳ್ಳೆ ಹಣ್ಣು ತಿನ್ನಿಸಿದ ತಾಂಬೆ ಸುಲಭ ರೀತಿಯಲ್ಲಿ ವಿಕೆಟ್‌ ತಮ್ಮದಾಗಿಸಿಕೊಂಡರು. ತಾಂಬೆ ಎಸೆದ ಗೂಗ್ಲಿ ಎಸೆತವನ್ನು ಅರಿಯುವಲ್ಲಿ ವಿಫಲರಾಗಿ ಮಿಡ್‌ ವಿಕೆಟ್‌ ಕಡೆಗೆ ಫ್ಲಿಕ್‌ ಮಾಡಲು ಯತ್ನಿಸಿದ ಝದ್ರಾನ್ ಎಡ್ಜ್ ಮಾಡುವ ಮೂಲಕ ಚೆಂಡನ್ನು ಕವರ್ಸ್‌ನಲ್ಲಿದ್ದ ಫೀಲ್ಡರ್‌ ಕೈಗೆ ಸೇರಿಸಿದ್ದರು. ಅಂದಹಾಗೆ ತಾಂಬೆ ವಿದೇಶಿ ಲೀಗ್‌ನಲ್ಲಿ ಬಿಸಿಸಿಐ ಅನುಮತಿ ಇಲ್ಲದೇ ಆಡಿದ್ದ ಕಾರಣ ಅವರು ಐಪಿಎಲ್‌ ಒಳಗೊಂಡಂತೆ ಬಿಸಿಸಿಐನ ಯಾವುದೇ ಟೂರ್ನಿಗಳಲ್ಲಿ ಆಡಲು ಅನರ್ಹರು ಎಂದು ಬಿಸಿಸಿಐ ಘೋಷಿಸಿದೆ. ಕೆರಿಬಿಯನ್ ಪ್ರೀಮಿಯರ್‌ ಲೀಗ್‌ನಲ್ಲಿ ತಾಂಬೆ ತೆಗೆದ ಮೊದಲ ವಿಕೆಟ್‌ನ ವಿಡಿಯೋವನ್ನು ಈ ಟ್ವೀಟ್‌ನಲ್ಲಿ ವೀಕ್ಷಿಸಬಹುದಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/31Gzovf
