ಹೊಸದಿಲ್ಲಿ: ಕಳೆದ ಮಾರ್ಚ್‌ ತಿಂಗಳಿನಿಂದ ಬರೋಬ್ಬರಿ ಆರು ತಿಂಗಳು ಕಾಲ ಕ್ರಿಕೆಟ್ ಆಡದೆ ಇದ್ದ ಕ್ರಿಕೆಟಿಗರ ಸಾಲಿನಲ್ಲಿ ತಂಡದ ನಾಯಕ ವಿರಾಟ್‌ ಕೊಹ್ಲಿಯೂ ಒಬ್ಬರು. 13ನೇ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಸಲುವಾಗಿ ಬಲಗೈ ಬ್ಯಾಟ್ಸ್‌ಮನ್‌ ಶನಿವಾರ ಐಸಿಸಿ ಕ್ರಿಕೆಟ್ ಅಕಾಡೆಮಿಯ ನೆಟ್ಸ್‌ನಲ್ಲಿ ಬ್ಯಾಟಿಂಗ್‌ ಅಭ್ಯಾಸ ನಡೆಸಿದರು. ಕೊರೊನಾ ವೈರಸ್‌ ಇಡೀ ವಿಶ್ವದಾದ್ಯಂತ ವ್ಯಾಪಕವಾಗಿ ಹರಡುತ್ತಿದ್ದರಿಂದ ಸೇರಿದಂತೆ ಕ್ರಿಕೆಟಿಗರು ಮನೆಯಲ್ಲಿಯೇ ಸಮಯ ಕಳೆದಿದ್ದರು. ಸತತ ಆರು ತಿಂಗಳ ಕಾಲ ಕ್ರಿಕೆಟ್ ಆಡದೆ, ದಿಢೀರನೇ ಬ್ಯಾಟಿಂಗ್‌ ಮಾಡುವುದು ಕೊಂಚ ಕಷ್ಟವಾಗಲಿದೆ. ಚೆಂಡಿನ ಜತೆ ಬ್ಯಾಟ್‌ನ ಸಮಯ, ಎಸೆತವನ್ನು ಗ್ರಹಿಸುವಿಕೆ ಸೇರಿದಂತೆ ಬ್ಯಾಟಿಂಗ್‌ ಕೌಶಲಗಳಿಗೆ ಕೊಂಚ ಹಿನ್ನಡೆಯಾಗಬಹುದು. "ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ನಿರೀಕ್ಷೆ ಮಾಡಿದಕ್ಕಿಂತ ಉತ್ತಮವಾಗಿ ಬ್ಯಾಟಿಂಗ್‌ ಮಾಡಿದ್ದೇನೆ. ತುಂಬಾ ದಿನಗಳ ನಂತರ ಬ್ಯಾಟಿಂಗ್‌ ಮಾಡಿದ ನನಗೆ ನೆಟ್ಸ್‌ನಲ್ಲಿ ಸ್ವಲ್ಪ ಭಯವಾಗಿತ್ತು. ಕಳೆದ ಐದು ತಿಂಗಳಿನಿಂದ ನಾನು ಬ್ಯಾಟ್‌ ಮುಟ್ಟಿರಲಿಲ್ಲ, ಆದರೆ ಇದೀಗ ನಿರೀಕ್ಷೆ ಮಾಡಿದಕ್ಕಿಂತ ಉತ್ತಮ ಬ್ಯಾಟಿಂಗ್‌ ಮಾಡಿದ್ದೇನೆ. ಲಾಕ್‌ಡೌನ್‌ ಅವಧಿಯಲ್ಲಿ ಸ್ವಲ್ಪ ತರಬೇತಿಯನ್ನು ಪಡೆದಿದ್ದೆ ಹಾಗಾಗಿ, ಸ್ವಲ್ಪ ಫಿಟ್‌ ಇದ್ದೇನೆ. ಇದು ಬ್ಯಾಟಿಂಗ್‌ ಮಾಡಲು ನೆರವಾಗಿದೆ," ಎಂದು ವಿರಾಟ್‌ ಕೊಹ್ಲಿ ಹೇಳಿರುವುದನ್ನು ಫ್ರಾಂಚೈಸಿ ವೆಬ್‌ಸೈಟ್‌ ಪ್ರಕಟಿಸಿದೆ. "ಏಕೆಂದರೆ ದೇಹ ಲೈಟಾಗಿದ್ದರೆ, ನೀವು ಚೆಂಡಿಗೆ ಪ್ರತಿಕ್ರಿಯಿಸಲು ಹೆಚ್ಚು ಸಮಯ ಸಿಗುತ್ತದೆ. ಇದು ಬಿಗ್‌ ಪ್ಲಸ್‌ ಪಾಯಿಂಟ್‌. ಒಂದು ವೇಳೆ ಹೆಚ್ಚಿನ ತೂಕದೊಂದಿಗೆ ಬ್ಯಾಟಿಂಗ್‌ ಮಾಡಿದರೆ, ದೇಹ ಆಡಲು ಸರಿಯಾಗಿ ಪ್ರತಿಕ್ರಿಯಿಸುವುದಿಲ್ಲ. ನನ್ನ ಮನಸಿನೊಂದಿಗೆ ಆಡಿದ್ದು, ನಿರೀಕ್ಷೆ ಮಾಡಿದ್ದಕ್ಕಿಂತ ಉತ್ತಮವಾಗಿ ಬ್ಯಾಟಿಂಗ್‌ ಮಾಡಿದ್ದೇನೆ," ಎಂದು ಕೊಹ್ಲಿ ಹೇಳಿದರು. 2009 ಹಾಗೂ 2016ರಲ್ಲಿ ರನ್ನರ್‌ ಅಪ್‌ ಆಗಿದ್ದ ಆರ್‌ಸಿಬಿ ಇನ್ನುಳಿದ ಎಲ್ಲಾ ಆವೃತ್ತಿಗಳಲ್ಲಿ ಚೆನ್ನಾಗಿ ಆಡಿರಲಿಲ್ಲ. ಆದರೆ 2020ರ ಆವೃತ್ತಿಯ ಐಪಿಎಲ್‌ಗೆ ಕಳೆದ ವರ್ಷ ಡಿಸೆಂಬರ್‌ನಲ್ಲಿ ನಡೆದಿದ್ದ ಹರಾಜಿನಲ್ಲಿ ತಂಡ ಉತ್ತಮ ಆಟಗಾರರನ್ನು ಖರೀದಿಸಿತ್ತು. ಆಸ್ಟ್ರೇಲಿಯಾದ ಸೀಮಿತ ಓವರ್‌ಗಳ ನಾಯಕ ಆರೋನ್‌ ಫಿಂಚ್‌ ಅವರನ್ನು 4.4 ಕೋಟಿ ರೂ.ಗಳಿಗೆ ಖರೀದಿಸಲಾಗಿತ್ತು. ಆ ಮೂಲಕ ಆರಂಭಿಕ ಒಂದು ಸ್ಥಾನ ಭರ್ತಿಯಾಯಿತು. ಡೇಲ್‌ ಸ್ಟೇನ್‌, ಕ್ರಿಸ್‌ ಮೋರಿಸ್‌, ಇಸುರು ಉದನಾ ಅವರನ್ನು ಪಡೆಯುವ ಮೂಲಕ ಡೆತ್ ಬೌಲಿಂಗ್‌ ವಿಭಾಗವನ್ನೂ ಬಲಿಷ್ಠಗೊಳಿಸಿಕೊಳ್ಳಲಾಗಿದೆ. ಆರ್‌ಸಿಬಿ ತಂಡದ ಸ್ಪಿನ್ನರ್‌ ಯಜ್ವೇಂದ್ರ ಚಹಲ್‌, ವಾಷಿಂಗ್ಟನ್‌ ಸುಂದರ್‌ ಹಾಗೂ ಶಹಬಾಜ್‌ ನದೀಮ್ ನಾಯಕ ವಿರಾಟ್‌ ಕೊಹ್ಲಿಗೆ ನೆಟ್ಸ್‌ನಲ್ಲಿ ಬೌಲಿಂಗ್‌ ಮಾಡಿದ್ದರು. ಈ ಮೂವರು ಸ್ಪಿನ್ನರ್‌ಗಳು ಭಾರತ ಪ್ರತಿನಿಧಿಸಿದ್ದಾರೆ. "ಮೊದಲನೇ ದಿನ ಸ್ಪಿನ್ನರ್‌ಗಳು ಅತ್ಯುತ್ತಮವಾಗಿ ಬೌಲಿಂಗ್‌ ಮಾಡಿದ್ದಾರೆ ಹಾಗೂ ಸ್ಥಿರ ಪ್ರದೇಶಗಳಲ್ಲಿ ಚೆಂಡನ್ನು ಪಿಚ್‌ ಮಾಡಿದ್ದಾರೆ," ಎಂದ ವಿರಾಟ್‌ ಕೊಹ್ಲಿ, "ಶಹಬಾಜ್‌ ಬೌಲಿಂಗ್‌ ಉತ್ತಮ, ವಾಷಿ ಎಸೆತಗಳು ಕೂಡ ಅದ್ಭುತ ಹಾಗೂ ಚಹಲ್‌ ಬೌಲಿಂಗ್‌ ಸಹ ಚೆನ್ನಾಗಿಯೇ ಇತ್ತು. ಆದರೆ ವೇಗಿಗಳು ಸ್ವಲ್ಪ ಹೊಂದಾಣಿಕೆ ಸಾಧಿಸಬೇಕು, ಒಟ್ಟಾರೆ ಶಿಬಿರ ಉತ್ತಮ ಆರಂಭ ಕಂಡಿದೆ," ಎಂದು ಆರ್‌ಸಿಬಿ ನಾಯಕ ಶ್ಲಾಘಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3ly6C7A
