ಸೂರತ್‌: ಸ್ಮಶಾನದ ಸಮಿತಿ ಹೆಣ ಸುಡಲು ಶುಲ್ಕ ಹೆಚ್ಚಿಸಿದ್ದರಿಂದ ಕುಟುಂಬವೊಂದು ತಮ್ಮ ಯಜಮಾನನ ಮೃತ ದೇಹವನ್ನ ರಸ್ತೆ ಬದಿಯಲ್ಲಿ ಸುಟ್ಟ ಘಟನೆ ನಡೆದಿದೆ. ಈ ಹೃದಯ ವಿದ್ರಾವಕ ಘಟನೆ ಗುಜರಾತ್‌ನ ಸೂರತ್‌ ಜಿಲ್ಲೆಯ ಎನ್‌ಆರ್‌ಐ ಗ್ರಾಮದ ಎಂಬಲ್ಲಿ ನಡೆದಿದೆ. ಇಲ್ಲಿನ ಮೋಹನ್‌ ರಾಥೋಡ್‌ ಎಂಬವರು ಕೂಲಿ ಕೆಲಸ ಮಾಡಿ ಜೀವನ ಸಾಗಿಸುತ್ತಿದ್ದು, ಮಂಗಳವಾರ ರಾತ್ರಿ ಅನಾರೋಗ್ಯದಿಂದ ಅಸುನೀಗಿದ್ದಾರೆ. ಈ ಹಿನ್ನೆಲೆ ಈ ಊರಿನ ಜನರು ಅವರ ಮೃತ ದೇಹವನ್ನ ಬುಧವಾರ ಸುಮಾರು ಏಳು ಗಂಟೆಗೆ ಇನಾದ ಸ್ಮಶಾನಕ್ಕೆ ತಂದಿದ್ದಾರೆ. ಆದರೆ ಶುಲ್ಕ ಹೆಚ್ಚಾಗಿರುವ ಬಗ್ಗೆ ತಿಳಿಸಿದ ಚಿತಗಾರದ ಮಂಡಳಿಯವರು 2500 ಪಾವತಿಸಿದರೆ ಮಾತ್ರ ಹೆಣ ಸುಡಬಹುದು ಎಂದು ಹೇಳಿದೆ. ಆದರೆ ಕೊರೊನಾ ಹಾಗೂ ಲಾಕ್‌ಡೌನ್‌ನಿಂದಾಗಿ ಕುಟುಂಬದವರಾಗಲಿ, ಗ್ರಾಮಸ್ಥರ ಬಳಿಯಾಗಲಿ ಹಣವಿರಲಿಲ್ಲ. ಹೀಗಾಗಿ ಊರಿನವರು ರಸ್ತೆ ಬದಿ ಹೆಣ ಸುಡಲು ಯೋಚಿಸಿದ್ದಾರೆ. ಅದಕ್ಕಾಗಿ ಎಲ್ಲರೂ ತಮ್ಮ ತಮ್ಮ ಮನೆಯಿಂದ ಒಂದೊಂದು ಕಟ್ಟಿಗೆ ನೀಡಲು ಮುಂದಾಗಿದ್ದಾರೆ. ಹೀಗೆ ಗ್ರಾಮಸ್ಥರ ಸಹಾಯದಿಂದ ಕುಟುಂಬ ರಸ್ತೆ ಬದಿಯಲ್ಲಿ ಅಂತ್ಯಸಂಸ್ಕಾರ ಮಾಡಿದೆ. ಇನ್ನು ಈ ಬಗ್ಗೆ ಮಾಹಿತಿ ನೀಡಿರುವ ಸ್ಥಳೀಯ ಭರತ್‌ ಎಂಬುವವರು, ಮೋಹನ್‌ ಕುಟುಂಬ ಕಡು ಬಡತನದ ಜೀವನ ನಡೆಸುತ್ತಿದೆ. ಕೊರೊನಾದಿಂದಾಗಿ ಭಾರೀ ಸಮಸ್ಯೆ ಎದುರಿಸುತ್ತಿದ್ದರು. ಇದೀಗ ಸ್ಮಶಾನಗೆ ನೀಡಲು ನಾವೇ ಹಣ ಹೊಂದಿಸಿದ್ದೆವು. ಆದರೆ ಏಕಾಏಕಿ ಸ್ಮಶಾನದ ಸಮಿತಿ ಶುಲ್ಕವನ್ನ 1200 ರಿಂದ 2500ಕ್ಕೆ ಏರಿಸಿದೆ. ಅಲ್ಲದೇ ಈ ಬಗ್ಗೆ ಯಾವುದೇ ಮಾಹಿತಿ ಕೂಡ ಜನರಿಗೆ ನೀಡಿಲ್ಲ ಎಂದು ಆರೋಪಿಸಿದ್ದಾರೆ. ಇನ್ನು ಮೋಹನ್‌ ಅವರಿಗೆ 60 ವರ್ಷದ ತಾಯಿ, 17 ಹಾಗೂ 12 ವರ್ಷದ ಇಬ್ಬರು ಮಕ್ಕಳಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಸ್ಮಶಾನ ಸಮಿತಿ, ಸದ್ಯ ಚಿತಗಾರದ ಎಲ್ಲಾ ಖರ್ಚುಗಳು ಹೆಚ್ಚುತ್ತಿವೆ. ಅಲ್ಲದೆ ಫಂಡ್‌ ಕೂಡ ಸಿಗುತ್ತಿಲ್ಲ. ಹೀಗಾಗಿ ಸ್ಮಶಾನದ ಶುಲ್ಕವನ್ನ ಹೆಚ್ಚಿಸಿರುವುದಾಗಿ ಸ್ಪಷ್ಟನೆ ನೀಡಿದೆ.
from India & World News in Kannada | VK Polls https://ift.tt/3hpuyI1
