ಹೊಸದಿಲ್ಲಿ: ಅಫಘಾನಿಸ್ತಾನ ತಂಡದ ಮಾಜಿ ನಾಯಕ ಹಾಗೂ ಸ್ಟಾರ್‌ ಆಲ್ರೌಂಡರ್ ಪ್ರಸಕ್ತ ಕೆರಿಬಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ಐದು ವಿಕೆಟ್ ಪಡೆದ ಸಾಧನೆ ಮಾಡಿದ ಮೊದಲ ಬೌಲರ್‌ ಎನಿಸಿಕೊಂಡಿದ್ದಾರೆ. ಸಿಪಿಎಲ್ 2020 ಟೂರ್ನಿಯಲ್ಲಿ ಸೇಂಟ್‌ ಲೂಸಿಯಾ ಝೂಕ್ಸ್‌ ತಂಡದ ಪರ ಆಡುತ್ತಿರುವ 35 ವರ್ಷದ ಅನುಭವಿ ಆಲ್ರೌಂಡರ್ ಗುರುವಾರ ನಡೆದ ಸೇಂಟ್‌ ಕಿಟ್ಸ್‌ ಅಂಡ್‌ ನೆವೀಸ್‌ ಪೇಟ್ರಿಯಟ್ಸ್‌ ತಂಡದ ವಿರುದ್ಧ ತಮ್ಮ ನಾಲ್ಕು ಓವರ್‌ಗಳಲ್ಲಿ 14 ರನ್‌ ನೀಡಿ 5 ವಿಕೆಟ್‌ಗಳನ್ನು ಸಂಪಾದಿಸಿದರು. ತಮ್ಮ ಆಫ್‌ ಸ್ಪಿನ್‌ ಬೌಲಿಂಗ್‌ ಮೂಲಕ ಪೇಟ್ರಿಯಟ್ಸ್‌ ತಂಡದ ಬ್ಯಾಟಿಂಗ್‌ ಬೆನ್ನೆಲುಬನ್ನು ಮುರಿದ ನಬಿ, ಸ್ಟಾರ್‌ ಬ್ಯಾಟ್ಸ್‌ಮನ್‌ಗಳಾದ ಕ್ರಿಸ್‌ ಲಿನ್, ಎವಿನ್‌ ಲೂಯಿಸ್‌, ನಿಕ್‌ ಕೆಲ್ಲಿ ಮತ್ತು ದಿನೇಶ್‌ ರಾಮ್ದಿನ್‌ ಅವರನ್ನು ಔಟ್‌ ಮಾಡುವ ಮೂಲಕ ಝೂಕ್ಸ್‌ ತಂಡದ ಗೆಲುವಿನ ರೂವಾರಿ ಎನಿಸಿದರು. ಇದು ಟಿ20 ಕ್ರಿಕೆಟ್ ವೃತ್ತಿ ಬದುಕಿನಲ್ಲಿ ನಬಿ ಅವರ ಶ್ರೇಷ್ಠ ಬೌಲಿಂಗ್‌ ಪ್ರದರ್ಶನ ಕೂಡ. ನಬಿ ಈ ಅಮೋಘ ಬೌಲಿಂಗ್‌ ಪ್ರದರ್ಶನದ ಮೂಲಕ ಟಿ20 ಕ್ರಿಕೆಟ್ ಮಾದರಿಯಲ್ಲಿ ವಿಶೇಷ ದಾಖಲೆಯೊಂದನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಪಾಕಿಸ್ತಾನದ ಮಾಜಿ ವೇಗಿ ಸೊಹೇಲ್‌ ತನ್ವೀರ್‌ ಬಳಿಕ ವಿಶ್ವದ ವಿವಿಧ ಭಾಗಗಳಲ್ಲಿ ನಡೆಯುವ ಐದು ಪ್ರಮುಖ ಟಿ20 ಲೀಗ್ ಟೂರ್ನಿಗಳಲ್ಲಿ (ಬಾಂಗ್ಲಾದೇಶ ಪ್ರೀಮಿಯರ್ ಲೀಗ್, ಅಫಘಾನಿಸ್ತಾನ ಪ್ರೀಮಿಯರ್ ಲೀಗ್, ಬಿಗ್‌ ಬ್ಯಾಷ್‌ ಲೀಗ್, ಮತ್ತು ಇಂಡಿಯನ್ ಪ್ರೀಮಿಯರ್ ಲೀಗ್) ಇನಿಂಗ್ಸ್‌ ಒಂದರಲ್ಲಿ 4ಕ್ಕೂ ಹೆಚ್ಚು ವಿಕೆಟ್ ಪಡೆದ ಸಾಧನೆ ಮಾಡಿದ ಮೊದಲ ಬೌಲರ್‌ ಎನಿಸಿಕೊಂಡಿದ್ದಾರೆ. ನಬಿ, ಕೆರಿಬಿಯನ್ ಅಂಗಣದಲ್ಲಿ ಭರ್ಜರಿ ಪ್ರದರ್ಶನ ನೀಡುತ್ತಿದ್ದು ಬ್ಯಾಟ್‌ ಮತ್ತು ಬಾಲ್‌ ಎರಡರಲ್ಲೂ ತಂಡಕ್ಕೆ ಮ್ಯಾಚ್‌ ವಿನ್ನರ್‌ ಆಗಿ ಪರಿಣಮಿಸಿದ್ದಾರೆ. 40ರ ಸರಾಸರಿಯಲ್ಲಿ ಈಗಾಗಲೇ ಒಟ್ಟು 120 ರನ್‌ಗಳನ್ನು ಬಾರಿಸಿರುವ ನಬಿ, ಬೌಲಿಂಗ್‌ನಲ್ಲಿ ಒಟ್ಟು 9 ವಿಕೆಟ್ ಪಡೆದಿದ್ದಾರೆ. ಇನ್ನು ಪೇಟ್ರಿಯಟ್ಸ್‌ ವಿರುದ್ಧದ ಪಂದ್ಯದಲ್ಲಿ 110 ರನ್‌ಗಳ ಗುರಿ ಪಡೆದಿದ್ದ ಝೂಕ್ಸ್‌ ತಂಡ 5 ಓವರ್‌ಗಳು ಬಾಕಿ ಇರುವಾಗಲೇ ಜಯ ದಕ್ಕಿಸಿಕೊಂಡಿತು. ರಾಸ್ಟನ್‌ ಚೇಸ್‌ (27*) ಮತ್ತು ನಜಿಬುಲ್ಲಾ ಝದ್ರಾನ್‌ (33) ಬ್ಯಾಟಿಂಗ್‌ನಲ್ಲಿ ಉಪಯುಕ್ತ ಕಾಣಿಕೆ ನೀಡಿದರು. ಪೇಟ್ರಿಯಟ್ಸ್‌ ತಂಡ ಈವರೆಗೆ ಆಡಿದ 5 ಪಂದ್ಯಗಳಲ್ಲಿ ಒಟ್ಟು ನಾಲ್ಕರಲ್ಲಿ ಸೋಲನುಭವಿಸಿ ಕೇವಲ ಅಂಕಪಟ್ಟಿಯ ಪಾತಾಳದಲ್ಲಿದೆ. ಮತ್ತೊಂದೆಡೆ 2ನೇ ಸ್ಥಾನದಲ್ಲಿರುವ ಡರೆನ್‌ ಸಾಮಿ ಸಾರಥ್ಯದ ಝೂಕ್ಸ್‌ ತಂಡಕ್ಕೆ ಪ್ಲೇ-ಆಫ್ಸ್‌ ಸ್ಥಾನ ಬಹುತೇಕ ಖಾತ್ರಿಯಾಗಿದೆ. ಈ ಮಧ್ಯ ಸಿಪಿಎಲ್ ಟಿ20 ಕ್ರಿಕೆಟ್ ಟೂರ್ನಿ ಬಳಿಕ ನಬಿ ನೇರವಾಗಿ ಯುಎಇಗೆ ತೆರಳಲಿದ್ದು ಐಪಿಎಲ್‌ 2020 ಟೂರ್ನಿಯಲ್ಲಿ ಸನ್‌ರೈಸರ್ಸ್‌ ಹೈದರಾಬಾದ್‌ ತಂಡವನ್ನು ಸೇರಿಕೊಳ್ಳಲಿದ್ದಾರೆ. 5 ವಿಭಿನ್ನ ಲೀಗ್‌ಗಳಲ್ಲಿ ನಬಿ 4ಕ್ಕೂ ಹೆಚ್ಚು ವಿಕೆಟ್ ಪಡೆದ ಸಾಧನೆಯ ವಿವರ
- ಬಾಂಗ್ಲಾ ಪ್ರೀಮಿಯರ್ ಲೀಗ್ (2016): 24ಕ್ಕೆ 4
- ಅಫಘಾನಿಸ್ತಾನ ಪ್ರೀಮಿಯರ್ ಲೀಗ್ (2018): 12ಕ್ಕೆ 4
- ಬಿಗ್‌ ಬ್ಯಾಷ್‌ ಲೀಗ್ (2018-19): 25ಕ್ಕೆ 4
- ಇಂಡಿಯನ್ ಪ್ರೀಮಿಯರ್ ಲೀಗ್ (2019): 11ಕ್ಕೆ 4
- ಕೆರಿಬಿಯನ್ ಪ್ರೀಮಿಯರ್ ಲೀಗ್ (2020): 14ಕ್ಕೆ 4
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3hI0DLi
