ಪೆರು: ಲ್ಯಾಟಿನ್ ಅಮೆರಿಕದ ದೇಶದ ರಾಜಧಾನಿ ಲಿಮಾದಲ್ಲಿ ಪೊಲೀಸ್ ಕಾರ್ಯಾಚರಣೆ ವೇಳೆ ದೊಡ್ಡದೊಂದು ಅನಾಹುತವೇ ಸಂಭವಿಸಿದೆ. ಕ್ಲಬ್ ಒಂದರಲ್ಲಿ ಅಕ್ರಮವಾಗಿ ಪಾರ್ಟಿ ಮಾಡುತ್ತಿದ್ದ ಕುಡುಕರ ಅಡ್ಡೆ ಮೇಲೆ ಪೊಲೀಸರು ದಾಳಿ ನಡೆಸಿದ ವೇಳೆ 13 ಮಂದಿ ಸಾವಿಗೀಡಾಗಿದ್ದಾರೆ..! ಲಿಮಾ ನಗರದ ಪಾಸ್ ಓಲಿವೋಸ್ ಪ್ರದೇಶದಲ್ಲಿ ಥಾಮಸ್ ರೆಸ್ಟೋಬಾರ್ ಕ್ಲಬ್ ಎಂಬ ಜನಪ್ರಿಯ ತಾಣವೊಂದಿದೆ. ಇದು, ಕುಡುಕರಿಗೆ ಅಚ್ಚುಮೆಚ್ಚಿನ ತಾಣ. ಆದರೆ, ಕೊರೊನಾ ವೈರಸ್ ಹಿನ್ನೆಲೆಯಲ್ಲಿ ಕಳೆದ ಮಾರ್ಚ್ನಿಂದ ಈ ಕ್ಲಬ್ ಮುಚ್ಚಿತ್ತು. ಆದ್ರೆ, ಪೊಲೀಸರಿಗೆ ಗೊತ್ತಾಗದಂತೆ ಕ್ಲಬ್ನಲ್ಲಿ ಪಾರ್ಟಿ ಆಯೋಜಿಸಲು ನಿರ್ಧರಿಸಲಾಗಿತ್ತು. ನೂರಾರು ಜನರು ಈ ಕಟ್ಟಡದಲ್ಲಿ ಸೇರಿದ್ದರು. ಕಟ್ಟಡದಿಂದ ಜೋರು ದನಿಯಲ್ಲಿ ಮ್ಯೂಸಿಕ್ ಕೇಳಿ ಬರುತ್ತಿದ್ದ ಕಾರಣ, ನೆರೆ ಹೊರೆಯವರು ಸಂಶಯಗೊಂಡು ಪೊಲೀಸರಿಗೆ ಕರೆ ಮಾಡಿದ್ದಾರೆ. ಈ ವೇಳೆ ಪೊಲೀಸರು ಕೂಡಲೇ ಸ್ಥಳಕ್ಕೆ ಧಾವಿಸಿದ್ದಾರೆ. ಪೊಲೀಸರು ಸೆರೆಹಿಡಿಯಬಹುದು ಎಂಬ ಭೀತಿಯಲ್ಲಿ ಕುಡುಕರು ತಪ್ಪಿಸಿಕೊಳ್ಳುವಾಗ ಈ ದುರಂತ ಸಂಭವಿಸಿದೆ. 2ನೇ ಮಹಡಿಯಲ್ಲಿ ಈ ಕ್ಲಬ್ ಇತ್ತು. ಕ್ಲಬ್ನಿಂದ ಹೊರಗೆ ಬರಲು ಕಿರಿದಾದ ಒಂದೇ ಒಂದು ಮಾರ್ಗವಿತ್ತು. ಈ ವೇಳೆ ಮೆಟ್ಟಿಲಿನಿಂದ ಕೆಳಗಿಳಿದು ಬರುವಾಗ ಕಾಲ್ತುಳಿದ ಉಂಟಾಗಿದೆ. ಒಬ್ಬರ ಮೇಲೆ ಒಬ್ಬರು ಬಿದ್ದ ಪರಿಣಾಮ, ಉಸಿರುಗಟ್ಟಿ ಹಲವರು ಮೃತಪಟ್ಟಿದ್ದಾರೆ. ಈ ಜಟಾಪಟಿ ವೇಳೆ ಮೂವರು ಪೊಲೀಸರೂ ತೀವ್ರವಾಗಿ ಗಾಯಗೊಂಡಿದ್ದಾರೆ. ಪೊಲೀಸರ ಹಿಡಿತದಿಂದ ತಪ್ಪಿಸಿಕೊಳ್ಳಲು ಕೆಲವರು ಗುದ್ದಾಟವನ್ನೂ ನಡೆಸಿದ್ದಾರೆ. ಕುಡಿದ ಅಮಲಿನಲ್ಲಿ ದೊಡ್ಡ ಪ್ರಮಾಣದ ದಾಂಧಲೆಯೂ ನಡೆದಿದೆ. ಕ್ಲಬ್ನಿಂದ ಹೊರಬರಲು ಒಂದೇ ಒಂದು ಬಾಗಿಲು ಇದ್ದ ಕಾರಣ, ಬಾಗಿಲು ಹಾಗೂ ಮೆಟ್ಟಿಲುಗಳ ಮಧ್ಯೆ ಸಿಲುಕಿಯೇ ಹಲವರು ಜೀವಬಿಟ್ಟಿದ್ದಾರೆ. ಈ ನಡುವೆ, 23 ಜನರನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ಧಾರೆ. ಲ್ಯಾಟಿನ್ ಅಮೆರಿಕ ದೇಶಗಳ ಪೈಕಿ ಪೆರು ದೇಶದಲ್ಲಿ ಕೊರೊನಾ ವೈರಸ್ ತಾಂಡವವಾಡುತ್ತಿದೆ. ಹೀಗಾಗಿ, ನೈಟ್ ಕರ್ಫ್ಯೂ, ಭಾನುವಾರದ ಲಾಕ್ಡೌನ್ ಎಲ್ಲವೂ ಜಾರಿಯಲ್ಲಿದೆ. ಬಾರ್, ಕ್ಲಬ್ಗಳನ್ನು ತೆರೆಯಲು ಇನ್ನೂ ಅನುಮತಿಯನ್ನೇ ನೀಡಿಲ್ಲ. ಪೆರು ದೇಶದಲ್ಲಿ ಸರಿಸುಮಾರು 6 ಲಕ್ಷ ಕೊರೊನಾ ವೈರಸ್ ಪ್ರಕರಣಗಳಿದ್ದು, 27 ಸಾವಿರಕ್ಕೂ ಹೆಚ್ಚು ಮಂದಿ ಈವರೆಗೆ ಜೀವಬಿಟ್ಟಿದ್ದಾರೆ.
from India & World News in Kannada | VK Polls https://ift.tt/3hyHX0g
