ವಾಷಿಂಗ್ಟನ್: ಅಮೆರಿಕದಲ್ಲಿ ನವೆಂಬರ್ನಲ್ಲಿ ನಡೆಯಲಿರುವ ಅಧ್ಯಕ್ಷೀಯ ಕಣ ರಂಗೇರಿದ್ದು, ಅಮೆರಿಕದಲ್ಲಿರುವ 2 ದಶಲಕ್ಷ ಭಾರತೀಯರನ್ನು ಸೆಳೆಯುವ ಪ್ರಯತ್ನ ಎರಡು ಪಕ್ಷಗಳಿಂದ ಜೋರಾಗಿ ನಡೆಯುತ್ತಿದೆ. ಈ ಹಿನ್ನೆಲೆ ಭಾರತೀಯರ ಮೇಲೆ ಪ್ರಭಾವ ಬೀರಲು ರಿಪಬ್ಲಿಕ್ ಪಕ್ಷ ಭಾರತದ ಪ್ರಧಾನಿ ಅವರನ್ನೇ ಟ್ರಂಪ್ ಕಾರ್ಡ್ ಮಾಡಿಕೊಂಡಿದ್ದು, ಆರಂಭಿಕ ಪ್ರಚಾರದ ಭಾಗವಾಗಿ ಮೋದಿ-ಟ್ರಂಪ್ ಇರುವ ಕಿರು ವಿಡಿಯೋ ಒಂದನ್ನು ಭಾನುವಾರ ಬಿಡುಗಡೆ ಮಾಡಿದೆ. ಪ್ರಚಾರದ ಭಾಗವಾಗಿ ಬಿಡುಗಡೆ ಮಾಡಿದ ವಿಡಿಯೋದಲ್ಲಿ ಭಾರತದ ಅಹಮದಾಬಾದ್ನಲ್ಲಿ ಫೆಬ್ರವರಿಯಲ್ಲಿ ನಡೆದ ಐತಿಹಾಸಿಕ ನಮಸ್ತೆ ಟ್ರಂಪ್ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಅಧ್ಯಕ್ಷ ಅವರ ಭಾಷಣದ ಆಯ್ದ ಭಾಗಗಳನ್ನು ನೀಡಲಾಗಿದೆ. ಭಾರತ ಪ್ರವಾಸಕ್ಕೆ ಟ್ರಂಪ್ ಜೊತೆ ಅವರ ಪತ್ನಿ ಮೆಲಾನಿಯಾ ಟ್ರಂಪ್, ಪುತ್ರಿ ಇವಾಂಕಾ ಹಾಗೂ ಅವರ ಅಳಿಯ ಜರೇದ್ ಕುಸ್ನೇರ್ ಮತ್ತು ಅಮೆರಿಕದ ಉನ್ನತ ಅಧಿಕಾರಿಗಳು ಬಂದಿದ್ದರು. ವಿಡಿಯೋವನ್ನು ಟ್ವೀಟ್ ಮಾಡಿರುವ ಟ್ರಂಪ್ ವಿಕ್ಟರಿ ಹಣಕಾಸು ಸಮಿತಿಯ ರಾಷ್ಟ್ರೀಯ ಮುಖ್ಯಸ್ಥೆ ಕಿಂಬರ್ಲಿ ಗ್ಯುಲ್ಫೋಯಲ್, ಭಾರತದೊಂದಿಗೆ ಅಮೆರಿಕ ಅತ್ಯಂತ ಉತ್ತಮ ಸಂಬಂಧವನ್ನು ಹೊಂದಿದೆ. ಅದರಂತೆಯೇ ನಮ್ಮ ಪ್ರಚಾರಕ್ಕೂ ಭಾರತೀಯ ಅಮೆರಿಕನ್ನರಿಂದ ಭಾರೀ ಬೆಂಬಲ ವ್ಯಕ್ತವಾಗುತ್ತಿದೆ ಎಂದು ಬರೆದುಕೊಂಡಿದ್ದಾರೆ. ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪ್ರಚಾರದ ಕಾರ್ಯಗಳನ್ನು ನೋಡಿಕೊಳ್ಳುತ್ತಿರುವ ಹಾಗೂ ಅಮೆರಿಕದಲ್ಲಿನ ಭಾರತೀಯರೊಂದಿಗೆ ಉತ್ತಮ ಸಂಬಂಧ ಹೊಂದಿರುವ ಟ್ರಂಪ್ ಪುತ್ರ ಡೊನಾಲ್ಡ್ ಟ್ರಂಪ್ ಜೂನಿಯರ್ ಈ ವಿಡಿಯೋವನ್ನು ರಿಟ್ವೀಟ್ ಮಾಡಿದ್ದಾರೆ. ವಿಡಿಯೋ ಟ್ವೀಟ್ ಆದ ಮೊದಲ ಕೆಲವೇ ಗಂಟೆಗಳಲ್ಲಿ 70 ಸಾವಿರಕ್ಕೂ ಹೆಚ್ಚು ಜನ ನೋಡಿದ್ದರೆ, ಸಾವಿರಾರು ಜನ ಲೈಕ್ ಹಾಗೂ ರಿಟ್ವೀಟ್ ಮಾಡಿದ್ದು, ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. 107 ಸೆಕೆಂಡ್ ಅವಧಿ ಹೊಂದಿರುವ ವಿಡಿಯೋ ಮತ್ತೆ ನಾಲ್ಕು ವರ್ಷಗಳು ಎಂಬ ಶೀರ್ಷಿಕೆಯನ್ನು ಹೊಂದಿದ್ದು, ಹ್ಯೂಸ್ಟನ್ ಹೌಡಿ ಮೋದಿ ಕಾರ್ಯಕ್ರಮದಲ್ಲಿ ಮೋದಿ - ಟ್ರಂಪ್ ಕೈ ಕೈ ಹಿಡಿದು ನಡೆಯುತ್ತಿರುವ ದೃಶ್ಯಗಳೊಂದಿಗೆ ವಿಡಿಯೋ ಪ್ರಾರಂಭವಾಗಿ, ಅಹಮದಾಬಾದ್ನಲ್ಲಿ ನಡೆದ ನಮಸ್ತೆ ಟ್ರಂಪ್ ಕಾರ್ಯಕ್ರಮದ ಮೂಲಕ ಮುಗಿಯುತ್ತದೆ. ಇನ್ನು, ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಭಾರತೀಯರು ಪ್ರಮುಖ ಪಾತ್ರ ವಹಿಸಲಿದ್ದಾರೆ ಎಂಬುದು ಎರಡು ಪಕ್ಷಗಳಿಗೂ ಗೊತ್ತಿರುವುದರಿಂದ ಎರಡು ಪಕ್ಷಗಳಿಂದ ಅನಿವಾಸಿ ಭಾರತೀಯರ ಓಲೈಕೆ ಜೋರಾಗಿದೆ. ಈಗಾಗಲೇ ಭಾರತೀಯ ಮತದಾರರನ್ನು ಗಮನದಲ್ಲಿಟ್ಟುಕೊಂಡು ಬಿಡೆನ್ ನೇತೃತ್ವದ ಡೆಮಾಕ್ರಟಿಕ್ ಪಾರ್ಟಿ ಉಪಾಧ್ಯಕ್ಷ ಅಭ್ಯರ್ಥಿಯನ್ನಾಗಿ ಕಮಲಾ ಹ್ಯಾರಿಸ್ ಅವರನ್ನು ಘೋಷಿಸಿದ್ದರೆ, ಡೊನಾಲ್ಡ್ ಟ್ರಂಪ್ ಮೋದಿ ಹಿಂದೆ ಬಿದ್ದಿದ್ದಾರೆ.
from India & World News in Kannada | VK Polls https://ift.tt/2CQ7H9p
