ಹವಾಮಾನ ವೈಪರೀತ್ಯವನ್ನು ನಿಗ್ರಹಿಸುವ ಅಭಿಯಾನದ ಮೂಲಕ ಜಾಗತಿಕವಾಗಿ ಪ್ರಸಿದ್ದಿ ಹೊಂದಿದ ಗ್ರೆಟಾ ಥನ್‌ಬರ್ಗ್ ಇದೀಗ ಮತ್ತೆ ಬ್ಯಾಗ್‌ ಹಾಕಿಕೊಂಡು ಶಾಲೆಗೆ ತೆರಳಿದ್ದಾರೆ. ಶಾಲೆ ಬಿಟ್ಟು ಪರಿಸರ ಉಳಿಸಲು ಹೊರಟ ಸ್ವಿಡನ್‌ನ ಪರಿಸರ ಹೋರಾಟಗಾರ್ತಿ ಗ್ರೆಟಾ, ಇದೀಗ ಒಂದು ವರ್ಷದ ನಂತರ ತಾನು ಶಾಲೆಗೆ ಮರಳಿದ್ದೇನೆ ಎಂದು ಹೇಳಿಕೊಂಡಿದ್ದಾರೆ. ಟ್ವಿಟರ್‌ನಲ್ಲಿ ಈ ಬಗ್ಗೆ ಮಾಹಿತಿ ನೀಡಿದ ಅವರು, ಶಾಲೆಯಿಂದ ಒಂದು ವರ್ಷದ ನನ್ನ ಅಂತರ ಮುಗಿದಿದೆ, ಇದೀಗ ಅಂತಿಮವಾಗಿ ಮತ್ತೆ ಶಾಲೆಗೆ ಮರಳಲು ತುಂಬಾ ಸಂತೋಷವಾಗಿದೆ ಎಂದು ಹೇಳಿದ್ದಾರೆ. ಅಲ್ಲದೇ ಬ್ಯಾಗ್‌ ಹಾಕಿಕೊಂಡು ಸೈಕಲ್‌ ಹಿಡಿದುಕೊಂಡಿರುವ ಫೋಟೊವೊಂದನ್ನ ಗ್ರೆಟಾ ಹಾಕಿಕೊಂಡಿದ್ದಾರೆ. ಆದರೆ ಯಾವ ಶಾಲೆ? ಯಾವ ನಗರ ಎಂಬುದರ ಬಗ್ಗೆ ಅವರು ಮಾಹಿತಿ ನೀಡಿಲ್ಲ. 2019ರ ಶಾಲೆ ಅಂತಿಮವಾದ ನಂತರ ಪ್ರೌಢ ಶಿಕ್ಷಣದ ಅಂತಿಮ ವರ್ಷಕ್ಕೆ ತೆರಳದ ಥನ್‌ ಬರ್ಗ್, ಹವಾಮಾನ ವೈಪರೀತ್ಯದಿಂದಾಗುವ ಪರಿಣಾಮವನ್ನ ಜಾಗತಿಕ ನಾಯಕರಿಗೆ ತೋರಿಸಿ ಕೊಡುವ ನಿಟ್ಟಿನಲ್ಲಿ ಜಗತ್ತಿನಾದ್ಯಂತ ಪ್ರಯಾಣ ಆರಂಭಿಸಿದ್ದರು. ಅಟ್ಲಾಂಟಿಕದಲ್ಲಿ ದೋಣಿಯ ಮೂಲಕ ಪ್ರಯಾಣಿಸಿ ಸಂಚಲನ ಸೃಷ್ಟಿಸಿದ್ದರು. ವಿಶ್ವಸಂಸ್ಥೆಯಲ್ಲಿ ಹವಾಮಾನ ಸಮ್ಮೆಳನದಲ್ಲಿ ಪಾಲ್ಗೊಂಡು ಇಡೀ ಜಗತ್ತಿನ ಗಮನ ಸೆಳೆದಿದ್ದರು. 17 ವರ್ಷ ವಯಸ್ಸಿನಲ್ಲಿ ಗ್ರೆಟಾ ಮಾಡಿರುವ ಸಾಧನೆಗೆ ಭಾರೀ ಪ್ರಶಂಸೆ ವ್ಯಕ್ತವಾಗಿತ್ತು.
from India & World News in Kannada | VK Polls https://ift.tt/3lf9oPc
