ಹೊಸದಿಲ್ಲಿ: ನಾಯಕ ಇಯಾನ್‌ ಮಾರ್ಗನ್‌( 66 ರನ್‌) ಹಾಗೂ ಡೇವಿಡ್‌ ಮಲನ್‌ (ಅಜೇಯ 54 ರನ್‌) ಅವರ ಸ್ಫೋಟಕ ಅರ್ಧಶತಕಗಳ ನೆರವಿನಿಂದ ಇಂಗ್ಲೆಂಡ್ ತಂಡ ಎರಡನೇ ಟಿ20 ಪಂದ್ಯದಲ್ಲಿ ಪಾಕಿಸ್ತಾನದ ವಿರುದ್ಧ ದಾಖಲೆಯ ಗುರಿ ಮುಟ್ಟುವ ಮೂಲಕ ಐದು ವಿಕೆಟ್‌ಗಳ ಜಯ ಸಾಧಿಸಿತು. ಪ್ಲ್ಯಾಟ್‌ ವಿಕೆಟ್‌ನಲ್ಲಿ ಮೊದಲ ಬ್ಯಾಟಿಂಗ್‌ ಮಾಡಿದ ಪಾಕಿಸ್ತಾನ, ನಿಗದಿತ 20 ಓವರ್‌ಗಳಲ್ಲಿ 4 ವಿಕೆಟ್‌ ಕಳೆದುಕೊಂಡು 195 ರನ್‌ಗಳನ್ನು ಗಳಿಸಿತು. ಆದರೆ, ಗುರಿ ಹಿಂಬಾಲಿಸಿದ ಇಂಗ್ಲೆಂಡ್ ಇನ್ನೂ ಐದು ಎಸೆತಗಳು ಬಾಕಿ ಇರುವಾಗಲೇ ಗೆಲುವು ಪಡೆಯಿತು. ಇದರೊಂದಿಗೆ ಮೂರು ಪಂದ್ಯಗಳ ಚುಟುಕು ಸರಣಿಯಲ್ಲಿ ಆತಿಥೇಯರು 1-0 ಮುನ್ನಡೆ ಪಡೆದರು. ಟಿ20 ಕ್ರಿಕೆಟ್ ಇತಿಹಾಸದಲ್ಲಿಯೇ ಓಲ್ಡ್‌ ಟ್ರಾಫರ್ಡ್ ಕ್ರೀಡಾಂಗಣದಲ್ಲಿ ದಾಖಲೆಯ ಗರಿ ಮುಟ್ಟುವಲ್ಲಿ ಇಂಗ್ಲೆಂಡ್ ತಂಡಕ್ಕೆ ನೆರವಾದ ನಾಯಕ ಕೇವಲ 33 ಎಸೆತಗಳಲ್ಲಿ 66 ರನ್‌ಗಳನ್ನು ಸ್ಫೋಟಿಸಿದರು. ನಾಯಕ ಇಯಾನ್‌ ಮಾರ್ಗನ್‌ಗೂ ಮುನ್ನ ಇನಿಂಗ್ಸ್ ಆರಂಭಿಸಿದ ಜಾನಿ ಬೈರ್‌ಸ್ಟೋವ್ 24 ಎಸೆತಗಳಲ್ಲಿ 44 ರನ್‌ ಗಳಿಸಿದರೆ, ಟಾಮ್‌ ಬ್ಯಾಂಟನ್‌ 16 ಎಸೆತಗಳಲ್ಲಿ 20 ರನ್‌ ಗಳಿಸಿದರು. ಈ ಜೋಡಿ ಮುರಿಯದ ಮೊದಲನೇ ವಿಕೆಟ್‌ಗೆ 38 ಎಸೆತಗಳಲ್ಲಿ 66 ರನ್‌ ಗಳಿಸಿ ತಂಡಕ್ಕೆ ಭರ್ಜರಿ ಆರಂಭ ನೀಡಿತು. ನಂತರ, ಸ್ಪಿನ್ನರ್‌ ಶದಾಬ್‌ ಖಾನ್‌ಗೆ (34ಕ್ಕೆ 3) ಸತತ ಎರಡು ಎಸೆತಗಳಲ್ಲಿ ಇವರಿಬ್ಬರು ವಿಕೆಟ್‌ ಒಪ್ಪಿಸಿದರು. ನಂತರ ಜತೆಯಾದ ಇಯಾನ್‌ ಮಾರ್ಗನ್‌ ಹಾಗೂ (ಅಜೇಯ 54 ರನ್‌, 36 ಎಸೆತಗಳು) ಜೋಡಿ ಮೂರನೇ ವಿಕೆಟ್‌ ಜತೆಯಾಟದಲ್ಲಿ 62 ಎಸೆತಗಳಲ್ಲಿ 112 ರನ್‌ಗಳನ್ನು ಗಳಿಸಿ ಇಂಗ್ಲೆಂಡ್ ಗೆಲುವಿನ ಸಮೀಪ ತಲುಪಿಸಿತು. 18 ರನ್‌ಗಳ ಅಗತ್ಯವಿದ್ದಾಗ ನಾಯಕ ಮಾರ್ಗನ್‌ ದೊಡ್ಡ ಹೊಡೆತಕ್ಕೆ ಕೈ ಹಾಕಿ ಬೌಂಡರಿ ಲೈನ್‌ ಸಮೀಪ ಕ್ಯಾಚ್ ನೀಡಿದರು. ಮೊದಲು ಬ್ಯಾಟಿಂಗ್‌ ಮಾಡಿದ್ದ ಪಾಕಿಸ್ತಾನ ಕೂಡ ಅತ್ಯುತ್ತಮ ಬ್ಯಾಟಿಂಗ್‌ ಮಾಡಿತ್ತು. ಆರಂಭಿಕರಾಗಿ ಕಣಕ್ಕೆ ಇಳಿದಿದ್ದ ಬಾಬರ್‌ ಅಝಮ್ (56 ರನ್‌, 44 ಎಸೆತಗಳು) ಹಾಗೂ ಫಖಾರ್ ಝಮನ್‌ ( 36 ರನ್‌, 22 ಎಸೆತಗಳು) ಜೋಡಿ ಮುರಿಯದ ಮೊದಲನೇ ವಿಕೆಟ್‌ಗೆ 72 ರನ್‌ ದಾಖಲಿಸಿ ತಂಡಕ್ಕೆ ಉತ್ತಮ ಅಡಿಪಾಯ ಹಾಕಿತ್ತು. ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ ಮಾಡಿದ ಮೊಹಮ್ಮದ್ ಹಫೀಜ್‌ ತವರು ಬೌಲರ್‌ಗಳನ್ನು ಬೆಂಡೆತ್ತಿದರು. ಕೇವಲ 36 ಎಸೆತಗಳಲ್ಲಿ 69 ರನ್‌ಗಳನ್ನು ಗಳಿಸಿ ತಂಡದ ಏರಿಕೆಗೆ ಕಾರಣರಾದರು. ಅತ್ಯುತ್ತಮವಾಗಿ ಬ್ಯಾಟಿಂಗ್‌ ಮಾಡುತ್ತಿದ್ದ ಹಫೀಜ್‌ ಕವರ್ಸ್‌ನಲ್ಲಿ ನಾಯಕ ಮಾರ್ಗನ್‌ಗೆ ಕ್ಯಾಚ್ ನೀಡಿ ಔಟ್‌ ಆದರು. ಇಂಗ್ಲೆಂಡ್ ಪರ ಆದಿಲ್‌ ರಶೀದ್‌ (32ಕ್ಕೆ 2) ಪಾಕಿಸ್ತಾನದ ಆರಂಭಿಕರನ್ನು ಪೆವಿಲಿನ್‌ಗೆ ಕಳುಹಿಸಿದರು. ಮೂರನೇ ಹಾಗೂ ಅಂತಿಮ ಟಿ20 ಪಂದ್ಯ ಇದೇ ಅಂಗಣದಲ್ಲಿ ಮಂಗಳವಾರ ಜರುಗಲಿದೆ. ಮೊದಲನೇ ಪಂದ್ಯ ಮಳೆಯಿಂದಾಗಿ ರದ್ದಾಗಿತ್ತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/31MEbLH
