ಹೊಸದಿಲ್ಲಿ: ಇಂಗ್ಲೆಂಡ್ ತಂಡದ ಆರಂಭಿಕ ಬ್ಯಾಟ್ಸ್ಮನ್ ಮುಂಬರುವ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ನಿಂದ ಹೊರ ಬಿದ್ದಿದ್ದಾರೆ. ಆ ಮೂಲಕ ಟೂರ್ನಿ ಆರಂಭವಾಗುವ ಒಂದು ತಿಂಗಳು ಮೊದಲೇ ತಂಡಕ್ಕೆ ಹಿನ್ನಡೆಯಾಗಿದೆ. 13ನೇ ಆವೃತ್ತಿಯ ಐಪಿಎಲ್‌ ಟೂರ್ನಿ ಸೆಪ್ಟೆಂಬರ್‌ 19 ರಿಂದ ಯುಎಇಯಲ್ಲಿ ಆರಂಭವಾಗುತ್ತಿದ್ದು, ನವೆಂಬರ್‌ 10ಕ್ಕೆ ಫೈನಲ್‌ ಹಣಾಹಣಿಯೊಂದಿಗೆ ಅಂತ್ಯ ಕಾಣಲಿದೆ. ಭಾರತದಲ್ಲಿ ಕೊರೊನಾ ವೈರಸ್‌ ಸನ್ನಿವೇಶ ಕ್ಲಿಷ್ಟವಾಗಿದೆ, ಈ ಹಿನ್ನೆಲೆಯಲ್ಲಿ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಡಳಿ ಯುಎಇಗೆ ಶ್ರೀಮಂತ ಫ್ರಾಂಚೈಸಿ ಲೀಗ್‌ ಅನ್ನು ಸ್ಥಳಾಂತರ ಮಾಡಿದೆ. ಗಾಯದಿಂದಾಗಿ ಜೇಸನ್ ರಾಯ್ ಅವರ ಕುರಿತಾದ ವರದಿಯನ್ನು ಇಸಿಬಿ ಗುರುವಾರ ಘೋಷಿಸಿದ ಹಿನ್ನೆಲೆಯಲ್ಲಿ, ಈ ವಾರದಿಂದ ಆರಂಭವಾಗುವ ಪಾಕಿಸ್ತಾನ ವಿರುದ್ಧದ ಟಿ 20 ಐ ಸರಣಿಯಿಂದಲೂ ಸ್ಟಾರ್ ಬ್ಯಾಟ್ಸ್ಮನ್ ಹೊರ ನಡೆದಿದ್ದಾರೆ. ಮ್ಯಾಂಚೆಸ್ಟರ್‌ನಲ್ಲಿ ಸೀಮಿತ ಓವರ್‌ಗಳ ಸರಣಿಗಾಗಿ ತಂಡದ ಜತೆ ಅಭ್ಯಾಸ ಮಾಡುವ ವೇಳೆ ಜೇಸನ್ ರಾಯ್ ಗಾಯಕ್ಕೆ ತುತ್ತಾಗಿದ್ದರು. ಗಾಯದ ಸ್ವರೂಪ ತಿಳಿಯಲು ಸ್ಕ್ಯಾನ್‌ ಮಾಡಲಾಗಿದೆ. ಜೇಸನ್ ರಾಯ್ ಆಸ್ಟ್ರೇಲಿಯಾ ವಿರುದ್ಧ ಮುಂದಿನ ಸೀಮಿತ ಓವರ್‌ಗಳ ನಿಯೋಜನೆಗಿಂತ ಮುಂಚಿತವಾಗಿ ಪೂರ್ಣ ಫಿಟ್‌ನೆಸ್ ಮರಳಿ ಪಡೆಯಲು ಇಂಗ್ಲೆಂಡ್ ತಂಡದಲ್ಲಿ ಉಳಿಯುತ್ತಾರೆ ಮತ್ತು ಪುನಶ್ಚೇತನ ಕಾರ್ಯಕ್ಕೆ ಒಳಗಾಗಲಿದ್ದಾರೆ ಎಂದು ಇಸಿಬಿ ದೃಢಪಡಿಸಿದೆ ಎಂದು ಇಎಸ್‌ಪಿಎನ್‌ಕ್ರಿಕ್‌ಇನ್ಫೋ ವರದಿ ಮಾಡಿದೆ. ಮೂಲ ಆಟಗಾರರ ಹರಾಜಿನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ 1.5 ಕೋಟಿ ರೂ.ಗಳಿಗೆ ಜೇಸನ್ ರಾಯ್ ಅವರನ್ನು ತಂಡದಲ್ಲಿ ಉಳಿಸಿಕೊಂಡಿತ್ತು. ಇಂಗ್ಲೆಂಡ್ ವಿಶ್ವಕಪ್‌ ವಿಜೇತ ಆಟಗಾರನಿಗೆ ಐಪಿಎಲ್‌ ಈ ಬಾರಿ ಹೊಸತೇನಲ್ಲ. 2017ರಲ್ಲಿ ಗುಜರಾತ್‌ ಲಯನ್ಸ್‌ ಪರ ಆಡಿದ್ದರು. ನಂತರ ದಿಲ್ಲಿ ತಂಡಕ್ಕೆ 2018ರಲ್ಲಿ ಕಾಣಿಸಿಕೊಂಡಿದ್ದರು. ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ವಿಶ್ವದ ಅತ್ಯುತ್ತಮ ಆಟಗಾರರಲ್ಲಿ ಜೇಸನ್ ರಾಯ್ ಕೂಡ ಒಬ್ಬರು. ಐಪಿಎಲ್‌ ಇತಿಹಾಸದಲ್ಲಿ ಇದುವರೆಗೂ 8 ಪಂದ್ಯಗಳಿಂದ 179 ರನ್‌ಗಳನ್ನು ಗಳಿಸಿದ್ದಾರೆ ಹಾಗೂ 91 ರನ್‌ಗಳು ಅವರ ವೈಯಕ್ತಿಕ ಗರಿಷ್ಠ ಮೊತ್ತವಾಗಿದೆ. ಜೇಸನ್ ರಾಯ್ ಅವರ ಜತೆಗೆ ಕ್ರಿಸ್‌ ವೋಕ್ಸ್‌ ಕೂಡ 13ನೇ ಆವೃತ್ತಿಯ ಐಪಿಎಲ್‌ನಿಂದ ಹೊರ ಬಿದ್ದಿದ್ದಾರೆ. ಕ್ರಿಸ್‌ ವೋಕ್ಸ್‌ ಕೂಡ ಡೆಲ್ಲಿ ಕ್ಯಾಪಿಟಲ್ಸ್ ಪರ ಆಡಬೇಕಾಗಿತ್ತು. 13ನೇ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯನ್ನು ಕಳೆದ ಮಾರ್ಚ್‌ 29 ರಿಂದಲೇ ಆರಂಭಿಸಬೇಕಾಗಿತ್ತು. ಆದರೆ, ಇಡೀ ವಿಶ್ವದಾದ್ಯಂತ ಕೊರೊನಾ ವೈರಸ್‌ ವ್ಯಾಪಕವಾಗಿ ಹರಡುತ್ತಿದ್ದರಿಂದ ಟೂರ್ನಿಯನ್ನು ಎರಡು ಬಾರಿ ಮುಂದೂಡಲಾಗಿತ್ತು. ಅಂತಿಮವಾಗಿ ಆಸ್ಟ್ರೇಲಿಯಾದಲ್ಲಿ ನಡೆಯಬೇಕಿದ್ದ ಟಿ20 ವಿಶ್ವಕಪ್‌ ಮುಂದೂಡಿದ್ದರಿಂದ 2020ರ ಐಪಿಎಲ್‌ ಹಾದಿ ಸುಗಮವಾಯಿತು. ಸೆಪ್ಟೆಂಬರ್‌ 19ಕ್ಕೆ ಯುಎಇಯಲ್ಲಿ ಐಪಿಎಲ್‌ ಆರಂಭವಾಗಲಿದೆ. ಈಗಾಗಲೇ ಎಲ್ಲಾ ಫ್ರಾಂಚೈಸಿಗಳು ಯುಎಇಗೆ ತೆರಳಿ ಪೂರ್ವ ತಯಾರಿಯಲ್ಲಿ ತೊಡಗಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/31AoYgC
