ಹೊಸದಿಲ್ಲಿ: ತವರು ತಂಡ (ಆರ್‌ಸಿಬಿ) ಪರ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ (ಐಪಿಎಲ್)ಗೆ ಪದಾರ್ಪಣೆ ಮಾಡುವ ನಿರೀಕ್ಷೆಯಲ್ಲಿರುವ ಕರ್ನಾಟಕದ ಸ್ಟಾರ್‌ ಬ್ಯಾಟ್ಸ್‌ಮನ್‌ ಅವರನ್ನು ಆರ್‌ಸಿಬಿ ಮುಖ್ಯ ಕೋಚ್‌ ಮುಕ್ತ ಕಂಠದಿಂದ ಶ್ಲಾಘಿಸಿದ್ದಾರೆ. ಕಳೆದ ದೇಶಿಯ ಟೂರ್ನಿಗಳಲ್ಲಿ ಕರ್ನಾಟಕದ ಎಡಗೈ ಬ್ಯಾಟ್ಸ್‌ಮನ್‌ ಆಕರ್ಷಕ ಪ್ರದರ್ಶನ ತೋರಿದ್ದಾರೆ. ಸೈಯದ್‌ ಮುಷ್ತಾಕ್‌ ಅಲಿ ಟಿ20 ಟೂರ್ನಿಯಲ್ಲಿ ಅವರು 12 ಪಂದ್ಯಗಳಿಂದ 64.44ರ ಸರಾಸರಿ ಹಾಗೂ 175.75 ಸ್ಟ್ರೈಕ್‌ ರೇಟ್‌ನೊಂದಿಗೆ 580 ರನ್‌ಗಳನ್ನು ಗಳಿಸಿದ್ದಾರೆ. ಅಲ್ಲದೆ, ವಿಜಯ್‌ ಹಜಾರೆ ಏಕದಿನ ಟೂರ್ನಿಯಲ್ಲೂ ಅವರು 11 ಪಂದ್ಯಗಳಿಂದ 609 ರನ್‌ಗಳನ್ನು ಗಳಿಸಿದ್ದರು. ಇದರಲ್ಲಿ ಮೂರು ಶತಕಗಳು ಸೇರಿದಂತೆ ಐದು ಅರ್ಧಶತಕಗಳು ಒಳಗೊಂಡಿವೆ. ಈ ಕಾರಣದಿಂದಾಗಿ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ಫ್ರಾಂಚೈಸಿಯು ಪ್ರತಿಭಾವಂತ ಎಡಗೈ ಬ್ಯಾಟ್ಸ್‌ಮನ್‌ ಅನ್ನು 13ನೇ ಆವೃತ್ತಿಗೆ ಉಳಿಸಿಕೊಂಡಿದೆ. ದೇಶಿ ಕ್ರಿಕೆಟ್‌ನಲ್ಲಿನ ಅದ್ಭುತ ಪ್ರದರ್ಶನದಿಂದ ಪಡಿಕ್ಕಲ್‌ ಅವರನ್ನು ತಂಡದಲ್ಲಿ ಉಳಿಸಿಕೊಳ್ಳಲಾಯಿತು ಎಂಬುದನ್ನು ಸೈಮನ್‌ ಕ್ಯಾಟಿಚ್ ಬಹಿರಂಗಪಡಿಸಿದರು. " ದೇಶಿ ಆವೃತ್ತಿಯಲ್ಲಿನ ಪ್ರದರ್ಶನದಿಂದ ದೇವದತ್‌ ಪಡಿಕ್ಕಲ್‌ ಅವರನ್ನು ಉಳಿಸಿಕೊಳ್ಳುವ ನಿರ್ಧಾರ ತೆಗೆದುಕೊಳ್ಳಲಾಯಿತು. 20ರ ಪ್ರಾಯದ ಆಟಗಾರ, ವಿಶೇಷವಾಗಿ ಎಡಗೈ ಬ್ಯಾಟ್ಸ್‌ಮನ್‌ ಆಗಿರುವುದರಿಂದ ಅವರ ಮೇಲೆ ಹೆಚ್ಚಿನ ಒಲವು ಫ್ರಾಂಚೈಸಿಗೆ ಇದೆ," ಎಂದು ಸೈಮನ್‌ ಕ್ಯಾಟಿಚ್ ಸ್ಪೋರ್ಟ್ಸ್‌ಕೀಡಾಗೆ ತಿಳಿಸಿದರು. "ತಂಡದಲ್ಲಿ ಬ್ಯಾಟಿಂಗ್‌ ಸಮತೋಲನ ಬಂದಾಗ ನೀವು ಎಡಗೈ ಬ್ಯಾಟ್ಸ್‌ಮನ್‌ ಹಾಗೂ ಬಲಗೈ ಬ್ಯಾಟ್ಸ್‌ಮನ್‌ಗಳನ್ನು ಸಂಯೋಜನೆ ಮಾಡಬಹುದು. ಈ ಕಾರಣದಿಂದಲೇ ದೇವದತ್‌ ಪಡಿಕ್ಕಲ್‌ ಅವರನ್ನು ಈ ಬಾರಿ ಐಪಿಎಲ್ ಪದಾರ್ಪಣೆ ಮಾಡಿಸುವ ಅವಕಾಶಗಳು ದಟ್ಟವಾಗಿವೆ," ಎಂದು ಹೇಳಿದರು. ಆರೋನ್‌ ಫಿಂಚ್‌ ಹಾಗೂ ಪಾರ್ಥಿವ್‌ ಪಟೇಲ್‌ ಆರಂಭಿಕರ ಸ್ಥಾನದಲ್ಲಿದ್ದರೂ, ಈ ಆವೃತ್ತಿಯಲ್ಲಿ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ಪರ ದೇವದತ್‌ ಪಡಿಕ್ಕಲ್‌ ಇನಿಂಗ್ಸ್‌ ಆರಂಭಿಸುವ ಸಾಧ್ಯತೆಗಳು ದಟ್ಟವಾಗಿವೆ. "ಟೂರ್ನಿ ಆರಂಭಕ್ಕೂ ಮುನ್ನ ನಾವು ಕೆಲ ಅಭ್ಯಾಸ ಪಂದ್ಯಗಳನ್ನು ಏರ್ಪಡಿಸುತ್ತೇವೆ, ಇಲ್ಲಿ ಅವರು ಅತ್ಯುತ್ತಮ ಪ್ರದರ್ಶನ ತೋರಿದ್ದೆ ಆದಲ್ಲಿ ಖಂಡಿತಾ ಪಡಿಕ್ಕಲ್‌ಗೆ ಐಪಿಎಲ್ ಬಾಗಿಲು ತೆರೆಯುತ್ತೇವೆ. ಅವರು ಅತ್ಯಾಕರ್ಷಕ ಯುವ ಪ್ರತಿಭೆ. ಈ ಲಾಕ್‌ಡೌನ್ ಅವಧಿಯಲ್ಲಿ ನಮ್ಮ ಕ್ರೀಡಾ ಮನಶ್ಶಾಸ್ತ್ರಜ್ಞರೊಂದಿಗೆ ಅವರು ಸ್ವಲ್ಪ ಕಾರ್ಯನಿರ್ವಹಿಸಿದ್ದಾರೆ ಮತ್ತು ಖಂಡಿತವಾಗಿಯೂ ಅವರು ಮುಂದೆ ಉಜ್ವಲ ಭವಿಷ್ಯವನ್ನು ಹೊಂದಿದ್ದಾರೆ." "ಕ್ರಿಕೆಟ್ ಮೈದಾನದಲ್ಲಿ ಮಾತ್ರವಲ್ಲದೆ ದೇವದತ್‌ ಪಡಿಕ್ಕಲ್‌ ಇಲ್ಲಿಯವರೆಗೆ ಆಟದ ಬಗ್ಗೆ ಮಾನಸಿಕ ಕೌಶಲ್ಯದ ಹಂತದಿಂದ ಹೇಗೆ ಯೋಚಿಸುತ್ತಾರೆ ಎಂಬುದು ಮುಖ್ಯ. ಅವರನ್ನು ನಮ್ಮ ತಂಡದಲ್ಲಿ ಸೇರಿಸಿಕೊಳ್ಳುವುದು ಅದ್ಭುತವಾಗಿದೆ ಮತ್ತು ಅವರು ಏನು ಮಾಡಬಹುದೆಂಬುದರ ಬಗ್ಗೆಯೂ ನಾವು ಖಂಡಿತವಾಗಿ ಉತ್ಸುಕರಾಗಿದ್ದೇವೆ," ಎಂದು ಕ್ಯಾಟಿಚ್ ಕನ್ನಡಿಗನ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನು ಆಡಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3gBPmei
