ಹೊಸದಿಲ್ಲಿ: ಸ್ನಾಯು ಸೆಳೆತದ ಸಮಸ್ಯೆಗೆ ತುತ್ತಾಗಿರುವ ಇಂಗ್ಲೆಂಡ್‌ ತಂಡದ ಸ್ಟಾರ್‌ ಓಪನರ್‌ , ಪ್ರವಾಸಿ ಪಾಕಿಸ್ತಾನ ತಂಡದ ವಿರುದ್ಧ ಮುಂಬರುವ 3 ಪಂದ್ಯಗಳ ಟಿ20 ಕ್ರಿಕೆಟ್ ಸರಣಿಯಿಂದ ಹೊರಗುಳಿದಿದ್ದಾರೆ. ಅಷ್ಟೇ ಅಲ್ಲದೆ ಇದೇ ಸಮಸ್ಯೆ ಕಾರಣ 13ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಪಾಲ್ಗೊಳ್ಳದೇ ಇರಲು ನಿರ್ಧರಿಸಿದ್ದಾರೆ. ಇದರೊಂದಿಗೆ ಐಪಿಎಲ್ 2020 ಟೂರ್ನಿ ಆರಂಭಕ್ಕೂ ಮೊದಲೇ ತಂಡ ಭಾರಿ ಆಘಾತ ಅನುಭವಿಸುವಂತಾಗಿದೆ. ಆದರೆ, ಕೂಡಲೇ ಎಚ್ಚೆತ್ತುಕೊಂಡಿರುವ ಕ್ಯಾಪಿಟಲ್ಸ್‌ ಪಡೆ ಜೇಸನ್‌ ರಾಯ್‌ ಸ್ಥಾನದಲ್ಲಿ ತಂಡ ಸೇರಿಕೊಳ್ಳಲಿರುವ ಬದಲಿ ಆಟಗಾರನನ್ನು ಹೆಸರಿಸಿದೆ. ಆಸ್ಟ್ರೇಲಿಯಾ ತಂಡಕ್ಕೆ ಇನ್ನೂ ಪದಾರ್ಪಣೆ ಮಾಡದೇ ಇರುವ ಕಾಂಗರೂ ನಾಡಿನ ಯುವ ಎಡಗೈ ವೇಗದ ಬೌಲರ್‌ ಡೇನಿಯೆಲ್‌ ಸ್ಯಾಮ್ಸ್‌ ಶೀಘ್ರವೇ ತಂಡ ಸೇರಿಕೊಳ್ಳಲಿದ್ದಾರೆ ಎಂದು ಡೆಲ್ಲಿ ಕ್ಯಾಪಿಟಲ್ಸ್‌ ಗುರುವಾರ ತನ್ನ ಅಧಿಕೃತ ಹೇಳಿಕೆಯಲ್ಲಿ ತಿಳಿಸಿದೆ. ಸ್ಯಾಮ್ಸ್‌ ಕಳೆದ ಆವೃತ್ತಿಯ ಬಿಗ್‌ ಬ್ಯಾಷ್‌ ಟಿ20 ಲೀಗ್‌ನಲ್ಲಿ ಅತಿ ಹೆಚ್ಚು ವಿಕೆಟ್‌ ಪಡೆದ ಬೌಲರ್‌ ಆಗಿದ್ದಾರೆ. ಇನ್ನು ಐಪಿಎಲ್‌ಗೆ ಪದಾರ್ಪಣೆ ಮಾಡುವುದನ್ನು ಎದುರು ನೋಡುತ್ತಿರುವ ಡೇನಿಯೆಲ್‌ ಸ್ಯಾಮ್ಸ್‌, "ಯಾವುದೇ ಕ್ರಿಕೆಟಿಗನಿಗೆ ಐಪಿಎಲ್ ಟೂರ್ನಿ ಬಹುದೊಡ್ಡ ವೇದಿಕೆ. ಆಸ್ಟ್ರೇಲಿಯಾದಲ್ಲಿ ನಾವೆಲ್ಲರೂ ಪ್ರತಿ ವರ್ಷ ಈ ಟೂರ್ನಿಯನ್ನು ಬಹಳ ಹಿಂಬಾಲಿಸುತ್ತೇವೆ. ಈ ವರ್ಷ ಟೂರ್ನಿಯಲ್ಲಿ ಆಡುವ ಅವಕಾಶ ಸಿಕ್ಕಿರುವುದು ನನ್ನ ಅದೃಷ್ಟವೇ ಸರಿ. ನನಗೆ ಈ ಅವಕಾಶ ನೀಡಿದ ಡೆಲ್ಲಿ ಕ್ಯಾಪಿಟಲ್ಸ್‌ ತಂಡಕ್ಕೆ ನಾನು ಆಭಾರಿ. ಯುಎಇನಲ್ಲಿ ತಂಡದ ಉಳಿದ ಆಟಗಾರರನ್ನು ಸೇರಿಕೊಳ್ಳಲು ಬಹಳ ಕಾತುರದಿಂದ ಎದುರು ನೋಡುತ್ತಿದ್ದೇನೆ," ಎಂದಿದ್ದಾರೆ. ಸ್ಯಾಮ್ಸ್‌ ಸೇರ್ಪಡೆಯೊಂದಿಗೆ ಡೆಲ್ಲಿ ತಂಡದ ಬೌಲಿಂಗ್‌ಲ್ಲಿ ವೈವಿದ್ಯತೆ ಬಂದಂತಾಗಿದೆ. ಕಗಿಸೊ ರಬಾಡ, ಇಶಾಂತ್‌ ಶರ್ಮಾ ಮತ್ತು ಎನ್ರಿಚ್‌ ನಾರ್ಟ್ಜ್‌ ಸೇರಿದಂತೆ ಕೇವಲ ಬಲಗೈ ವೇಗಿಗಳನ್ನೇ ಹೊಂದಿದ್ದ ತಂಡಕ್ಕೆ ಈಗ ಎಡಗೈ ವೇಗದ ಬೌಲರ್‌ನ ಸೇವೆ ಲಭ್ಯವಾಗಲಿದೆ. ಡೆಲ್ಲಿ ತಂಡದಲ್ಲಿ ಆಸ್ಟ್ರೇಲಿಯಾ ಆಟಗಾರರಾದ ಮಾರ್ಕಸ್‌ ಸ್ಟೋಯ್ನಿಸ್ ಮತ್ತು ಅಲೆಕ್ಸ್‌ ಕೇರಿ ಕೂಡ ಇದ್ದಾರೆ. ಕಳೆದ ಆವೃತ್ತಿಯ ಬಿಗ್‌ ಬ್ಯಾಷ್‌ ಲೀಗ್‌ನಲ್ಲಿ ಸ್ಯಾಮ್ಸ್‌ ಸಿಡ್ನಿ ಥಂಡರ್ಸ್‌ ಪರ ಆಡಿ, 17 ಪಂದ್ಯಗಳಿಂದ ಒಟ್ಟು 30 ವಿಕೆಟ್‌ಗಳನ್ನು ಪಡೆದ ಸಾಧನೆ ಮಾಡಿದ್ದರು. ಇನ್ನು ಐಪಿಎಲ್ 2020 ಟೂರ್ನಿ ಈ ವರ್ಷ ಕೊರೊನಾ ವೃರಸ್‌ ಭೀತಿ ಹಿನ್ನೆಲೆಯಲ್ಲಿ ಯುಎಇ ಅಂಗಣದಲ್ಲಿ ನಡೆಯಲಿದೆ. ಸೆಪ್ಟೆಂಬರ್‌ 19ರಿಂದ ನವೆಂಬರ್‌ 10ರವರೆಗೆ ಟೂರ್ನಿಯ ಸಂಪೂರ್ಣ 60 ಪಂದ್ಯಗಳನ್ನು ಬಯೋ ಸೆಕ್ಯೂರ್‌ ವಾತಾವರಣ ಇರುವ ದುಬೈ, ಶಾರ್ಜಾ ಮತ್ತು ಅಬುದಾಭಿ ಕ್ರೀಡಾಂಗಣಗಳಲ್ಲಿ ಆಯೋಜಿಸಲು ಬಿಸಿಸಿಐ ಯೋಜನೆ ರೂಪಿಸಿದೆ. ಡೆಲ್ಲಿ ಕ್ಯಾಪಿಟಲ್ಸ್‌ ತಂಡ ಈಗಾಗಲೇ ದುಬೈನಲ್ಲಿ ಬೀಡು ಬಿಟ್ಟಿದ್ದು ಟೂರ್ನಿ ಆರಂಭಕ್ಕೂ ಮುನ್ನ 3 ವಾರಗಳ ಅಭ್ಯಾಸ ಶಿಬಿರ ಕೈಗೊಂಡಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3jhLhxq
