ಹೊಸದಿಲ್ಲಿ: ಹದಿಮೂರನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಿಂದ ಹೊರಗುಳಿದಿದ್ದು, ಈ ಸಂದರ್ಭದಲ್ಲಿ ತಂಡದ ಪರ ಮೂರನೇ ಕ್ರಮಾಂಕದಲ್ಲಿ ಬ್ಯಾಟ್‌ ಮಾಡುವ ಉತ್ತಮ ಅವಕಾಶ ಕ್ಯಾಪ್ಟನ್‌ ಎಂಎಸ್‌ ಧೋನಿಗೆ ಲಭ್ಯವಾಗಿದೆ ಎಂದು ಮಾಜಿ ಕ್ರಿಕೆಟಿಗ ಗೌತಮ್‌ ಗಂಭೀರ್ ಹೇಳಿದ್ದಾರೆ. ಸಿಎಸ್‌ಕೆ ತಂಡಕ್ಕೆ ಮೂರು ಬಾರಿ ಪ್ರಶಸ್ತಿ ಗೆದ್ದುಕೊಟ್ಟು, ಎಲ್ಲಾ ಆವೃತ್ತಿಗಳಲ್ಲೂ ನಾಕ್‌ಔಟ್‌ ಹಂತಕ್ಕೆ ಮುನ್ನಡೆಸಿರುವ ಕ್ಯಾಪ್ಟನ್‌ ಸಾಮಾನ್ಯವಾಗಿ 5ನೇ ಅಥವಾ 6ನೇ ಕ್ರಮಾಂಕದಲ್ಲಿ ಬ್ಯಾಟ್‌ ಮಾಡುತ್ತಾರೆ. ಆದರೆ, ಧೋನಿ ಅಗ್ರ ಕ್ರಮಾಂಕದಲ್ಲಿ ಬ್ಯಾಟ್‌ ಮಾಡಿದಾಗಲೆಲ್ಲಾ ಯಶಸ್ಸು ಕಂಡಿದ್ದು, ಈಗ ಮತ್ತೊಮ್ಮೆ ಅದೇ ಅವಕಾಶ ಅವರನ್ನು ಹುಡುಕಿಕೊಂಡು ಬಂದಿದೆ ಎಂದು ಕೆಕೆಆರ್‌ ತಂಡದ ಮಾಜಿ ನಾಯಕ ಗಂಭೀರ್ ಅಭಿಪ್ರಾಯ ಪಟ್ಟಿದ್ದಾರೆ. "ಮೂರನೇ ಕ್ರಮಾಂಕದಲ್ಲಿ ಬ್ಯಾಟ್‌ ಮಾಡಲು ಎಂಎಸ್‌ ಧೋನಿಗೆ ಉತ್ತಮ ಅವಕಾಶ ಲಭ್ಯವಾಗಿದೆ. ಅವರು ಕ್ರಿಕೆಟ್‌ನಿಂದ ದೂರ ಉಳಿದು ಒಂದು ವರ್ಷವೇ ಕಳೆದಿದೆ. ಹೀಗಾಗಿ ಅಗ್ರ ಕ್ರಮಾಂಕದಲ್ಲಿ ಆಡಿದರೆ ಅವರಿಗೆ ತಂಡಕ್ಕೆ ಆಸರೆಯಾಗುವಂತಹ ಇನಿಂಗ್ಸ್‌ ಆಡಲು ಹೆಚ್ಚು ಎಸೆತಗಳು ಲಭ್ಯವಾಗುತ್ತದೆ," ಎಂದು ಸ್ಟಾರ್‌ ಸ್ಪೋರ್ಟ್ಸ್‌ನ ಕ್ರಿಕೆಟ್ ಕನೆಕ್ಟೆಡ್‌ ಕಾರ್ಯಕ್ರಮದಲ್ಲಿ ಗಂಭೀರ್ ಹೇಳಿದ್ದಾರೆ. ಅಂದಹಾಗೆ ಧೋನಿ ಯಾವ ಯಾವ ಕ್ರಮಾಂಕದಲ್ಲಿ ಆಡಿ ಎಷ್ಟೆಲ್ಲಾ ರನ್ ಗಳಿಸಿದ್ದಾರೆ ಎಂಬುದರ ವಿವರ ಇಲ್ಲಿದೆ. ಟಿ20 ಕ್ರಿಕೆಟ್‌ನಲ್ಲಿ ಒಟ್ಟು 16 ಇನಿಂಗ್ಸ್‌ಗಳಲ್ಲಿ 3ನೇ ಕ್ರಮಾಂಕದಲ್ಲಿ ಬ್ಯಾಟ್‌ ಬೀಸಿರುವ ಧೋನಿ 82.75ರ ಸರಾಸರಿಯಲ್ಲಿ 993 ರನ್‌ಗಳನ್ನು ಬಾರಿಸಿದ್ದಾರೆ. 4ನೇ ಕ್ರಮಾಂಕದಲ್ಲಿ 30 ಇನಿಂಗ್ಸ್‌ಗಳನ್ನು ಆಡಿದ್ದು 56.58ರ ಸರಾಸರಿಯಲ್ಲಿ 1368 ರನ್, 5ನೇ ಕ್ರಮಾಂಕದಲ್ಲಿ 50.30ರ ಸರಾಸರಿಯಲ್ಲಿ 3169 ರನ್, 6ನೇ ಕ್ರಮಾಂಕದಲ್ಲಿ 129 ಇನಿಂಗ್ಸ್‌ಗಳಿಂದ 4164 ರನ್‌ಗಳನ್ನು ಬಾರಿಸಿದ್ದಾರೆ. ಸಿಎಸ್‌ಕೆ ತಂಡದ ಸಾರ್ವಕಾಲಿಕ ಗರಿಷ್ಠ ರನ್ ಸ್ಕೋರರ್‌ ಸುರೇಶ್‌ ರೈನಾ ಈ ವರ್ಷ ಆಡದೇ ಇರುವ ಕಾರಣ 3ನೇ ಕ್ರಮಾಂಕದ ಬ್ಯಾಟಿಂಗ್‌ ಅತ್ಯಂತ ಮಹತ್ವದ್ದಾಗಲಿದೆ. ಹೀಗಾಗಿ ಈ ಜವಾಬ್ದಾರಿಯನ್ನು ಧೋನಿಯಿಂದ ನಿಭಾಯಿಸಲು ಮಾತ್ರ ಸಾಧ್ಯ ಎಂದು ಗಂಭೀರ್ ವಿಶ್ವಾಸ ಹೊರಹಾಕಿದ್ದಾರೆ. "ಧೋನಿ ಮೂರನೇ ಕ್ರಮಾಂಕದಲ್ಲಿ ಆಡಿದರೂ ತಂಡದ ಬ್ಯಾಟಿಂಗ್‌ ಕೆಳ ಕ್ರಮಾಂಕದವರೆಗೂ ಬಲಿಷ್ಠವಾಗಿಯೇ ಇರಲಿದೆ. ಕೇದಾರ್‌ ಜಾಧವ್, ಡ್ವೇಯ್ನ್ ಬ್ರಾವೋ ಮತ್ತು ಸ್ಯಾಮ್ ಕರ್ರನ್ ಮಧ್ಯಮ ಕ್ರಮಾಂಕದಲ್ಲಿ ಆಡಲಿದ್ದಾರೆ. ಹೀಗಾಗಿ ಖಂಡಿತಾ ಧೋನಿಗೆ 3ನೇ ಕ್ರಮಾಂಕದ ಜವಾಬ್ದಾರಿ ನಿಭಾಯಿಸುವ ಸಾಮರ್ಥ್ಯವಿದೆ. ಆ ಕ್ರಮಾಂಕಕ್ಕೆ ರೈನಾ ಅವರಷ್ಟೇ ಅನುಭವಿ ಆಟಗಾರನ ಅಗತ್ಯವಿದ್ದು, ಎಂಎಸ್‌ ಉತ್ತಮ ಆಯ್ಕೆ," ಎಂದಿದ್ದಾರೆ. ಐಪಿಎಲ್‌ 2020 ಟೂರ್ನಿಯು ಈ ವರ್ಷ ಯುಎಇ ಆತಿಥ್ಯದಲ್ಲಿ ನಡೆಯಲಿದ್ದು, ಸೆಪ್ಟೆಂಬರ್‌ 19ರಿಂದ ನವೆಂಬರ್‌ 10ರವರೆಗೆ ಬಯೋ ಸೆಕ್ಯೂರ್ ವಾತಾವರಣ ಇರುವ ದುಬೈ, ಶರ್ಜಾ ಮತ್ತು ಅಬುದಾಭಿ ಕ್ರೀಡಾಂಗಣಗಳಲ್ಲಿ ಟೂರ್ನಿಯ ಸಂಪೂರ್ಣ 60 ಪಂದ್ಯಗಳನ್ನು ಬಿಸಿಸಿಐ ಆಯೋಜಿಸಲಿದೆ. ಇನ್ನು ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡದ ಇಬ್ಬರು ಆಟಗಾರರು ಮತ್ತು 11 ಮಂದಿ ಸಹಾಯಕ ಸಿಬ್ಬಂದಿ ವರ್ಗದಲ್ಲಿ ಕೊರೊನಾ ವೈರಸ್‌ ಸೋಂಕು ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ಹೆಚ್ಚುವರಿ ಕ್ವಾರಂಟೈನ್‌ಗೆ ಒಳಪಟ್ಟಿದೆ. 6 ದಿನಗಳ ಕ್ವಾರಂಟೈನ್ ನಂತರ ಅಭ್ಯಾಸಕ್ಕೆ ಮರಳಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3gH0xSN
