ಹೊಸದಿಲ್ಲಿ: ದಾಖಲೆಯ ನಾಲ್ಕು ಬಾರಿ ಚಾಂಪಿಯನ್ಸ್‌ ತಂಡ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯ 13ನೇ ಆವೃತ್ತಿಯಲ್ಲಿ ಐದನೇ ಪ್ರಶಸ್ತಿ ಮುಡಿಗೇರಿಸಿಕೊಳ್ಳುವ ಲೆಕ್ಕಾಚಾರದಲ್ಲಿದ್ದು, ಈ ಸಲುವಾಗಿ ಹೊಸ ಹುರುಪು ಕಂಡುಕೊಳ್ಳಲು ನೂತನ ಸಮವಸ್ತ್ರ (ಜರ್ಸಿ) ಆಯ್ಕೆ ಮಾಡಿಕೊಂಡಿದೆ. ಐಪಿಎಲ್ 2020 ಟೂರ್ನಿ ಸಲುವಾಗಿ ಮುಂಬೈ ಇಂಡಿಯನ್ಸ್‌ ತಂಡದ ನೂತನ ಜರ್ಸಿಯನ್ನು ತನ್ನ ಅಧಿಕೃತ ಟ್ವಿಟರ್‌ ಖಾತೆಯ ಮೂಲಕ ಫ್ರಾಂಚೈಸಿಯು ಅಭಿಮಾನಿಗಳೊಟ್ಟಿಗೆ ಹಂಚಿಕೊಂಡಿದೆ. ಈ ಸಲುವಾಗಿ ವಿಶೇಷ ವಿಡಿಯೋ ಒಂದನ್ನೂ ಸಿದ್ಧಪಡಿಸಿ ಅಭಿಮಾನಿಗಳ ಮುಂದಿಟ್ಟಿದೆ. ಭಾರತದ ಮೊತ್ತ ಮೊದಲ ಅಂಡರ್‌ ವಾಟರ್‌ ಡ್ಯಾನ್ಸರ್‌ 'ಹೈಡ್ರೋ ಮ್ಯಾನ್' ಎಂದೇ ಖ್ಯಾತಿ ಪಡೆದಿರುವ ಗುಜರಾತ್‌ ಮೂಲದವರಾದದ ಜಯದೀಪ್‌ ಗೋಹಿಲ್, ಮುಂಬೈ ಇಂಡಿಯನ್ಸ್‌ ತಂಡ ಅಧಿಕೃತ ಹಾಡು 'ಆಲಾ ರೆ'ಗೆ ನೀರಿನ ಒಳಗೆ ಸದ್ಭುತ ಸ್ಟೆಪ್‌ಗಳನ್ನು ಹಾಕಿದ್ದಾರೆ. ಈ ವಿಡಿಯೋ ಬಳಿಕ ತಂಡದ ನೂತನ ಸಮವಸ್ತ್ರವನ್ನು ಅನಾವರಣ ಪಡಿಸಲಾಗಿದೆ. ಇದಕ್ಕೆ ಕೂಡಲೇ ಪ್ರತಿಕ್ರಿಯೆ ನೀಡಿರುವ ಮುಂಬೈ ತಂಡದ ಕ್ಯಾಪ್ಟನ್‌ ರೋಹಿತ್‌ ಶರ್ಮಾ, "ಈಗಷ್ಟೇ ಹೈಡ್ರೋ ಮ್ಯಾನ್ ಏನು ಮಾಡಬಲ್ಲರು ಎಂಬುದನ್ನು ಕಣ್ಣಾರೆ ಕಂಡಿದ್ದೇನೆ. ನಿಜಕ್ಕೂ ಅದ್ಭುತ. ಮುಂಬೈ ಇಂಡಿಯನ್ಸ್‌ ಐಡಿಯಾ ಅದ್ಭುತವಾಗಿದೆ," ಎಂದು ಹಿಟ್‌ಮ್ಯಾನ್‌ ಟ್ವೀಟ್‌ ಮಾಡಿದ್ದಾರೆ. ನೂತನ ಸಮವಸ್ತ್ರ ಎಂದಿನಂತೆ ನೀಲಿ ಬಣ್ಣದಿಂದಲೇ ಕೂಡಿದ್ದು ಎರಡೂ ಬದಿಗಳಲ್ಲಿ ತಂಡದ ಲೋಗೋದಲ್ಲಿ ಇರುವ ಚಕ್ರದ ವಿನ್ಯಾಸವನ್ನು ಚಿನ್ನದ ಬಣ್ಣದಲ್ಲಿ ಮುದ್ರಿಸಲಾಗಿದೆ. ಒಟ್ಟಾರೆ ಇಂಡಿಯನ್ಸ್‌ ತಂಡದ ನೂತನ ಸಮವಸ್ತ್ರ ಅದ್ಭುತವಾಗಿ ಕಾಣಿಸುತ್ತದೆ ಎಂದೇ ಹೇಳಬಹುದು. "ಬ್ಲೂ... ಗೋಲ್ಡ್‌... ಆಲಾ ರೇ!!! ಕಾತುರ ಕೊನೆಗೂ ಅಂತ್ಯಗೊಂಡಿದೆ. ಡ್ರೀಮ್‌11 ಐಪಿಎಲ್‌ಗೆ ಪಲ್ಟನ್ಸ್‌ ತಂಡದ ನೂತನ ಸಮವಸ್ತ್ರ," ಎಂದು ಟ್ವೀಟ್‌ ಮಾಡಿರುವ ಮುಂಬೈ ಇಂಡಿಯನ್ಸ್‌ ನೂತನ ಸಮವಸ್ತ್ರದ ಝಲಕ್‌ ನೀಡಿದೆ. ನಿಗದಿಯಂತೆ ಮಾರ್ಚ್‌ 29ರಿಂದ ಮೇ 24ರವರೆಗೆ ನಡೆಯಬೇಕಿದ್ದ ಟೂರ್ನಿಯನ್ನು ಕೊರೊನಾ ವೈರಸ್‌ ಭೀತಿ ಹಿನ್ನೆಲೆಯಲ್ಲಿ ತನ್ನ ಮುಂದಿನ ಆದೇಶದವರೆಗೆ ಬಿಸಿಸಿಐ ರದ್ದು ಪಡಿಸಿತ್ತು. ಇದೀಗ ಅಕ್ಟೋಬರ-ನವೆಂಬರ್‌ ಅವಧಿಯಲ್ಲಿ ನಡೆಯಬೇಕಿದ್ದ ವಿಶ್ವಕಪ್ ಟೂರ್ನಿಯನ್ನು ಐಸಿಸಿ ಮುಂದೂಡಿದ ಬೆನ್ನಲ್ಲೇ ಆ ಅವಧಿಯಲ್ಲಿ ಐಪಿಎಲ್ ಆಯೋಜಿಸಲು ಬಿಸಿಸಿಐ ಮುಂದಾಗಿದೆ. ಅಂತೆಯೇ ಈ ವರ್ಷ ಐಪಿಎಲ್ ಆಯೋಜನೆಗೆ ಯುನೈಟೆಡ್‌ ಅರಬ್‌ ಎಮಿರೇಟ್ಸ್‌ ಅಂಗಣವನ್ನು ಆಯ್ಕೆ ಮಾಡಿಕೊಂಡಿದ್ದು, ಬಯೋ ಸೆಕ್ಯೂರ್‌ ವಾತಾವರಣ ಇರುವ ಶಾರ್ಜಾ, ದುಬೈ ಮತ್ತು ಅಬುದಾಭಿ ಕ್ರೀಡಾಂಗಣಗಳಲ್ಲಿ ಸಂಪೂರ್ಣ 60 ಪಂದ್ಯಗಳನ್ನು ನಡೆಸಲು ಬಿಸಿಸಿಐ ಯೋಜನೆ ರೂಪಿಸಿದೆ. ಈಗಾಗಲೇ ಟೂರ್ನಿ ಸಲುವಾಗಿ ಎಲ್ಲಾ ತಂಡಗಳು ದುಬೈನಲ್ಲಿ ಬೀಡುಬಿಟ್ಟಿದ್ದು, ಮೂರು ವಾರಗಳ ಕಠಿಣ ಅಭ್ಯಾಸ ಶಿಬಿರ ಕೈಗೊಂಡಿವೆ. ಟೂರ್ನಿಯ ಅಧಿಕೃತ ವೇಳಾಪಟ್ಟಿ ಬಿಡುಗಡೆ ಆಗಬೇಕಿದ್ದು ಉದ್ಘಾಟನಾ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್‌ ಮತ್ತು ತಂಡಗಳು ಮುಖಾಮುಖಿ ಆಗುವ ಸಾಧ್ಯತೆ ಇದೆ. ಕಳೆದ ವರ್ಷ ಐಪಿಎಲ್ ಟೂರ್ನಿಯ ಫೈನಲ್‌ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್‌ ಕೇವಲ 1 ರನ್‌ ಅಂತರದಲ್ಲಿ ಚೆನ್ನೈ ಸೂಪರ್‌ ಕಿಂಗ್ಸ್‌ಗೆ ಸೋಲುಣಿಸಿ ನಾಲ್ಕನೇ ಪ್ರಶಸ್ತಿ ಎತ್ತಿ ಹಿಡಿದಿತ್ತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/31E9WGz
