ಬೆಂಗಳೂರು: ಕಳೆದ ಡಿಸೆಂಬರ್‌ನಲ್ಲಿ ಹದಿಮೂರನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿ ಸಲುವಾಗಿ ನಡೆದ ಆಟಗಾರರ ಹಾರಜಿನಲ್ಲಿ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡ ಕೆಲ ಆಕರ್ಷಕ ಬಿಟ್ಟಿಂಗ್‌ಗಳನ್ನು ನಡೆಸಿ ಸುದ್ದಿಯಾಗಿತ್ತು. ಹರಾಜಿನಲ್ಲಿ ಹಣದ ಹೊಳೆಯನ್ನೇ ಹರಿಸಿದ್ದ ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ಆಸ್ಟ್ರೇಲಿಯಾ ತಂಡದ ನಾಯಕನಾಗಿರುವ ಆರೊನ್‌ ಫಿಂಚ್‌ ಅವರನ್ನು ಬರೋಬ್ಬರಿ 4.4 ಕೋಟಿ ರೂ. ಹಣ ನೀಡಿ ಖರೀದಿ ಮಾಡಿತ್ತು. ಜೊತೆಗೆ ತಂಡದ ಬೌಲಿಂಗ್‌ ವಿಭಾಗವನ್ನೂ ಗಮನದಲ್ಲಿಟ್ಟು ಕ್ರಿಸ್‌ ಮಾರಿಸ್‌, ಕೇನ್‌ ರಿಚರ್ಡ್ಸನ್ ಮತ್ತು ಶ್ರೀಲಂಕಾದ ಎಡಗೈ ವೇಗಿ ಇಸುರು ಉದನಾ ಅವರನ್ನು ತಂಡಕ್ಕೆ ಸೇರಿಸಿಕೊಂಡಿತ್ತು. ಈ ಬಗ್ಗೆ ಮಾತನಾಡಿರುವ ಚಾಲೆಂಜರ್ಸ್‌ ತಂಡದ ಮುಖ್ಯ ಕೋಚ್ ಸೈಮನ್‌ ಕ್ಯಾಟಿಚ್‌, ಸ್ಫೋಟಕ ಆರಂಭಿಕ ಬ್ಯಾಟ್ಸ್‌ಮನ್‌ ಫಿಂಚ್‌ ಅವರನ್ನು ಖರೀದಿಸುವ ಸಲುವಾಗಿ ಫ್ರಾಂಚೈಸಿ 4.4 ಕೋಟಿ ರೂ. ಖರೀದಿ ಮಾಡಿದ್ದೇಕೆ ಎಂಬುದನ್ನು ವಿವರಿಸಿದ್ದಾರೆ. "ನಮ್ಮ ತಂಡಕ್ಕೆ ಆಟಗಾರರನ್ನು ಕರೆತರಲು ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡಿದ ಅನುಭವಿಗಳತ್ತ ಕಣ್ಣಿಟ್ಟಿದ್ದೆವು. ಸಣ್ಣ ಪ್ರಮಾಣದ ಹರಾಜು ಪ್ರಕ್ರಿಯೆ ಆದ್ದರಿಂದ ಕೆಲ ನಿರ್ದಿಷ್ಟ ಆಟಗಾರರ ಕಡೆಗಷ್ಟೇ ನಾವು ಗಮನ ನೀಡಿದ್ದೆವು. ಅಂತೆಯೇ ಕೆಲ ಅದ್ಭುತ ಆಯ್ಕೆಗಳು ಕೂಡ ನಮ್ಮೆದುರಿತ್ತು," ಎಂದು ಕ್ಯಾಟಿಚ್‌ ಇಂಡಿಯಾ ಟುಡೇಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಹೇಳಿದ್ದಾರೆ. "ಆರೋನ್‌ ಫೀಂಚ್ ನಮ್ಮ ಖರೀದಿ ಪಟ್ಟಿಯಲ್ಲಿ ಅಗ್ರಗಣ್ಯರಾಗಿದ್ದರು. ಏಕೆಂದರೆ ಹಲವು ವರ್ಷಗಳಿಂದ ಆಸ್ಟ್ರೇಲಿಯಾ ತಂಡದ ಪರ ಆಟಗಾರನಾಗಿ ಬಳಿಕ ಕ್ಯಾಪ್ಟನ್‌ ಆಗಿ ಅಮೋಘ ಪ್ರದರ್ಶನವನ್ನೇ ನೀಡಿದ್ದಾರೆ. ಟಿ20 ಕ್ರಿಕೆಟ್‌ನಲ್ಲಿ ವಿಶ್ವದ ಟಾಪ್‌ ಕ್ಲಾಸ್‌ ಬ್ಯಾಟ್ಸ್‌ಮನ್‌ಗಳಲ್ಲಿ ಅವರೂ ಒಬ್ಬರು. ಜೊತೆಗೆ ಸ್ಪಿನ್‌ ಬೌಲಿಂಗ್‌ ಎದುರು ಅದ್ಭುತವಾಗಿ ಆಡುತ್ತಾರೆ. ಮುಖ್ಯವಾಗಿ ತಂಡದ ನಾಯಕತ್ವದ ಗುಂಪಿಗೆ ನೆರವಾಗಲೆಂದೇ ಅವರನ್ನು ಅಷ್ಟು ಹಣ ನೀಡಿ ಖರೀದಿ ಮಾಡಿದೆವು," ಎಂದಿದ್ದಾರೆ. ವಿರಾಟ್‌ ಕೊಹ್ಲಿ ಸಾರಥ್ಯದ ಆರ್‌ಸಿಬಿ ಸದಾ ಬ್ಯಾಟಿಂಗ್‌ ಬಲಿಷ್ಠ ತಂಡವಾಗಿ ಕಾಣಿಸಿಕೊಂಡ ಪರಿಣಾಮ ಈವರೆಗೆ ಒಮ್ಮೆಯೂ ಪ್ರಶಸ್ತಿ ಗೆಲ್ಲಲು ಸಾಧ್ಯವಾಗಿಲ್ಲ. ಕೊಹ್ಲಿ ಮುಂದಾಳತ್ವದಲ್ಲಿ ಚಾಲೆಂಜರ್ಸ್‌ 2016ರ ಆವೃತ್ತಿಯಲ್ಲಿ ಫೈನಲ್‌ ತಲುಪಿತ್ತಾದರೂ ಸನ್‌ರೈಸರ್ಸ್‌ ಎದುರು ಸೋತು ಚೊಚ್ಚಲ ಪ್ರಶಸ್ತಿ ಗೆಲುವಿನ ಅವಕಾಶವನ್ನು ಕೈಚೆಲ್ಲಿತ್ತು. ಇದೀಗ ಆರ್‌ಸಿಬಿಗೆ ನಾಯಕತ್ವದ ವಿಚಾರದಲ್ಲಿ ದಕ್ಷಿಣ ಆಫ್ರಿಕಾ ತಂಡದ ಮಾಜಿ ನಾಯಕ ಎಬಿ ಡಿ'ವಿಲಿಯರ್ಸ್‌ ಮತ್ತು ಫಿಂಚ್‌ ನೆರವಾಗಲಿದ್ದಾರೆ ಎಂದು ಮುಖ್ಯ ಕೋಚ್ ಹೇಳಿದ್ದಾರೆ. "ಕೇವಲ ಆರೊನ್‌ ಫಿಂಚ್‌ ಮಾತ್ರವಲ್ಲ. ನಮ್ಮ ತಂಡದಲ್ಲಿ ಹಿರಿಯ ಆಟಗಾರರಿದ್ದಾರೆ. ಖಂಡಿತಾ ಎಬಿ ಡಿ'ವಿಲಿಯರ್ಸ್‌ ಹಲವು ವರ್ಷಗಳಿಂದ ಆರ್‌ಸಿಬಿ ತಂಡದ ಯಶಸ್ಸಿಗೆ ಕೊಡುಗೆ ಸಲ್ಲಿಸಿದ್ದಾರೆ. ಹೀಗಾಗಿ ವಿರಾಟ್‌ ಕೊಹ್ಲಿಗೆ ನಾಯಕತ್ವದ ವಿಚಾರದಲ್ಲಿ ಅವರೂ ಕೂಡ ನೆರವಾಗಲಿದ್ದಾರೆ," ಎಂದಿದ್ದಾರೆ. "ಅಂದಹಾಗೆ ಕೊಹ್ಲಿ ಕೂಡ ನಾಯಕತ್ವದ ವಿಚಾರದಲ್ಲಿ ಅಪಾರ ಅನುಭವ ಪಡೆದಿದ್ದಾರೆ. ಟೀಮ್‌ ಇಂಡಿಯಾ ಮತ್ತು ಆರ್‌ಸಿಬಿ ತಂಡಗಳನ್ನು ಹಲವು ವರ್ಷಗಳಿಂದ ಮುನ್ನಡೆಸುತ್ತಿದ್ದಾರೆ. ಇದೀಗ ತಂಡದ ತಂಡದ ಸ್ಟಾರ್‌ ಆಟಗಾರರು ಅವರಿಗೆ ನೆರವಾದರೆ ಪ್ರಶಸ್ತಿ ಗೆಲುವು ಕಂಡಿತಾ ಸಾಧ್ಯವಾಗಲಿದೆ," ಎಂದು ಕ್ಯಾಟಿಚ್‌ ಭವಿಷ್ಯ ನುಡಿದಿದ್ದಾರೆ. ಟೂರ್ನಿಯು ಸೆಪ್ಟೆಂಬರ್‌ 19ರಿಂದ ನವೆಂಬರ್‌ 10ರವರೆಗೆ ಯುಎಇನಲ್ಲಿ ನಡೆಯಲಿದ್ದು, ಬಯೋ ಸೆಕ್ಯೂರ್‌ ವಾತಾವರಣ ಇರುವ ದುಬೈ , ಶರ್ಜಾ ಮತ್ತು ಅಬುದಾಭಿ ಕ್ರೀಡಾಂಗಣಗಳಲ್ಲಿ ಸಂಪೂರ್ಣ 60 ಪಂದ್ಯಗಳನ್ನು ಆಯೋಜಿಸಲು ಬಿಸಿಸಿಐ ಯೋಜನೆ ರೂಪಿಸಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3hDF4eX
