ಬೆಂಗಳೂರು: ಕಳೆದ ವರ್ಷ ನಡೆದ ಅತ್ಯಂತ ರೋಚಕ ಫೈನಲ್‌ ಪಂದ್ಯದಲ್ಲಿ ಬಲಿಷ್ಠ ತಂಡವನ್ನು ಕೇವಲ 1 ರನ್‌ ಅಂತರದಲ್ಲಿ ಮಣಿಸುವಲ್ಲಿ ಯಶಸ್ವಿಯಾದ ಇಂಡಿಯನ್ ಪ್ರೀಮಿಯರ್ ಲೀಗ್‌ ಇತಿಹಾಸದಲ್ಲಿ ನಾಲ್ಕು ಬಾರಿ ಚಾಂಪಿಯನ್ಸ್‌ ಪಟ್ಟ ಅಲಂಕರಿಸಿದ ಮೊತ್ತ ಮೊದಲ ತಂಡವೆಂಬ ದಾಖಲೆ ಬರೆಯಿತು. ಫೈನಲ್‌ನ ಕೊನೆಯ ಓವರ್‌ನಲ್ಲಿ ಅಂತಿಮ ಎಸೆತದಲ್ಲಿ ಚೆನ್ನೈ ತಂಡದ ಗೆಲುವಿಗೆ ಕೇವಲ 2 ರನ್‌ಗಳ ಅಗತ್ಯವಿತ್ತು ಸ್ಟ್ರೈಕ್‌ನಲ್ಲಿ ಇದ್ದ ಪಿಂಚ್‌ ಹಿಟ್ಟರ್ ಶಾರ್ದುಲ್‌ ಠಾಕೂರ್‌ ಸಿಎಸ್‌ಕೆ ಪಡೆಯನ್ನು ಸುಲಭವಾಗಿ ಗುರಿ ಮುಟ್ಟಿಸುತ್ತಾರೆ ಎಂಬುದೇ ಬಹುತೇಕರ ಲೆಕ್ಕಾಚಾರವಾಗಿತ್ತು. ಆದರೆ, ಬೌಲಿಂಗ್ ಮಾಡುತ್ತಿದ ಐಪಿಎಲ್‌ನ ಅತಿ ಹೆಚ್ಚು ವಿಕೆಟ್‌ ಪಡೆದ ಬೌಲರ್‌ ಲಸಿತ್‌ ಮಾಲಿಂಗ ತಮ್ಮ ಡೆಡ್ಲಿ ಯಾರ್ಕರ್‌ ಮೂಲಕ ಠಾಕೂರ್‌ ಅವರನ್ನು ಎಲ್‌ಬಿಡಬ್ಲ್ಯು ಖೆಡ್ಡಕ್ಕೆ ಬೀಳಿಸಿ ಮುಂಬೈಗೆ 1 ರನ್‌ಗಳ ರೋಚಕ ಜಯ ತಂದುಕೊಟ್ಟರು. ಈ ಜಯದೊಂದಿಗೆ ಐಪಿಎಲ್ ಟೂರ್ನಿಯಲ್ಲಿ ಮುಂಬೈ ತಂಡ ರೋಹಿತ್‌ ಶರ್ಮಾ ನಾಯಕತ್ವದ ಅಡಿಯಲ್ಲಿ 2013, 2015, 2017 ಮತ್ತು 2019ರ ಆವೃತ್ತಿಗಳಲ್ಲಿ ಪ್ರಶಸ್ತಿ ಗೆದ್ದಂತಾಗಿದೆ. ಒಂದು ವರ್ಷ ಬಿಟ್ಟು ಒಂದು ವರ್ಷ ಚಾಂಪಿಯನ್ಸ್‌ ತಂಡವಾಗಿ ಹೊರಹೊಮ್ಮಿರುವ ಮುಂಬೈ ತಂಡಕ್ಕೆ ಈ ಬಾರಿ ಟೂರ್ನಿಯಲ್ಲಿ ಪ್ರಶಸ್ತಿ ಗೆಲ್ಲಲು ಸಾಧ್ಯವಾಗದೇ ಇರಲು ಮೂರು ಬಲವಾದ ಕಾರಣಗಳನ್ನು ಇಲ್ಲಿ ವಿವರಿಸಲಾಗಿದೆ. ಮೊದಲ ಕಾರಣ: ಯುಎಇನಲ್ಲಿ ಬ್ಯಾಡ್‌ ಲಕ್! ಮುಂಬೈ ತಂಡ ಗೆಲುವಿನ ಸರಾಸರಿ ನಿಟ್ಟಿನಲ್ಲಿ ಐಪಿಎಲ್ ಇತಿಹಾಸದ ಎರಡನೇ ಅತ್ಯುತ್ತಮ ತಂಡವಾಗಿದೆ. ಬ್ಯಾಟಿಂಗ್‌, ಬೌಲಿಂಗ್ ಮತ್ತು ಫೀಲ್ಡಿಂಗ್‌ನಲ್ಲಿ ಸಮತೋಲನ ಹೊಂದಿರುವ ತಂಡ ಕೂಡ. ಆದರೆ, ಯುಎಇನಲ್ಲಿ ಮುಂಬೈ ತಂಡಕ್ಕೆ ಅದೃಷ್ಟ ಕೈ ಹಿಡಿಯುವ ಲಕ್ಷಣಗಳಿಲ್ಲ. ಏಕೆಂದರೆ ಭಾರತದಲ್ಲಿನ ಸಾರ್ವತ್ರಿಕ ಚುನಾವಣೆ ಹಿನ್ನೆಲೆಯಲ್ಲಿ 2014ರಲ್ಲಿ ಐಪಿಎಲ್‌ನ ಅರ್ಧದಷ್ಟು ಲೀಗ್‌ ಪಂದ್ಯಗಳನ್ನು ಯುಎಇನಲ್ಲಿ ಆಯೋಜಿಸಲಾಗಿತ್ತು. ಅಂದು ಮುಂಬೈ ತಂಡ ಯುಎಇನಲ್ಲಿ ಸತತ 5 ಪಂದ್ಯಗಳಲ್ಲಿ ಸೋತು ಸುಣ್ಣವಾಗಿತ್ತು. ಆದರೂ ಉಳಿದ ಪಂದ್ಯಗಳಲ್ಲಿ ಭರ್ಜರಿ ಕಮ್‌ಬ್ಯಾಕ್‌ ಮಾಡಿ ಅಂಕಪಟ್ಟಿಯಲ್ಲಿ 4ನೇ ಸ್ಥಾನದೊಂದಿಗೆ ನಾಕ್‌ಔಟ್‌ ಹಂತಕ್ಕೇರಿದರೂ ಎಲಿಮಿನೇಟರ್‌ ಪಂದ್ಯದಲ್ಲಿ ಚೆನ್ನೈ ಸೂಪರ್‌ ಕಿಂಗ್ಸ್‌ ಎದುರು ನಿರಾಸೆ ಎದುರಿಸಿತ್ತು. ಹೀಗಾಗಿ ಈ ಬಾರಿಯೂ ಯುಎಇ ನೆಲದಲ್ಲಿ ಮುಂಬೈ ಪಡೆ ತಿಣುಕಾಡಿದರೆ ಅಚ್ಚರಿ ಪಡುವಹಾಗಿಲ್ಲ. ಎರಡನೇ ಕಾರಣ: 2ನೇ ಪರಿಣತ ಸ್ಪಿನ್ನರ್‌ನ ಕೊರತೆಈ ಬಾರಿ ಐಪಿಎಲ್ ಕೊಂಚ ವಿಭಿನ್ನವಾಗಿರಲಿದೆ ಎಂಬುದಕ್ಕೆ ಬಹುಮುಖ್ಯ ಕಾರಣ ಯುಎಇನಲ್ಲಿ ಇರುವ ದೊಡ್ಡ ಕ್ರೀಡಾಂಗಣಗಳು. ಇಲ್ಲಿ ಸ್ಪಿನ್ನರ್‌ಗಳು ಹೆಚ್ಚು ಪರಿಣಾಮಕಾರಿ ಆಗಬಲ್ಲರು. ಅಂದಹಾಗೆ ಐಪಿಎಲ್‌ನ ಉಳಿದೆಲ್ಲಾ ತಂಡಗಳಲ್ಲಿ ಸ್ಟಾರ್‌ ಸ್ಪಿನ್ನರ್‌ಗಳ ದಂಡೇ ಇದೆ. ಆದರೆ ಮುಂಬೈ ತಂಡಕ್ಕೆ ಈ ಸೌಭಾಗ್ಯವಿಲ್ಲ. ಬದಲಾಗಿ ವಿಕೆಟ್‌ಗಳನ್ನು ಪಡೆಯಲು ವೇಗದ ಬೌಲರ್‌ಗಳನ್ನು ಹೆಚ್ಚು ಅವಲಂಬಿಸಿದೆ. ಹೀಗಾಗಿ 2ನೇ ಪರಿಣತ ಸ್ಪಿನ್ನರ್‌ನ ಕೊರತೆ ತಂಡಕ್ಕೆ ಕಾಡುವ ಸಾಧ್ಯತೆ ಹೆಚ್ಚಿದೆ. ಅದೇ ಸಿಎಸ್‌ಕೆ ತಂಡದಲ್ಲಿ ಪಿಯೂಶ್‌ ಚಾವ್ಲಾ, ಹರ್ಭಜನ್‌ ಸಿಂಗ್, ಇಮ್ರಾನ್‌ ತಾಹಿರ್ ಮತ್ತು ರವೀಂದ್ರ ಜಡೇಜಾ ಅವರಂತಹ ಸ್ಪಿನ್ನರ್‌ಗಳಿದ್ದಾರೆ. ಕೆಕೆಆರ್‌ ತಂಡದಲ್ಲಿ ಕುಲ್ದೀಪ್‌ ಯಾದವ್ ಮತ್ತು ಸುನಿಲ್‌ ನರೇನ್‌ ಇದ್ದಾರೆ. ಡೆಲ್ಲಿ ತಂಡದಲ್ಲಿ ಆರ್‌ ಅಶ್ವಿನ್, ಅಕ್ಷರ್ ಪಟೇಲ್ ಮತ್ತು ಅಮಿತ್‌ ಮಿಶ್ರಾ, ಆರ್‌ಸಿಬಿ ತಂಡದಲ್ಲಿ ವಾಷಿಂಗ್ಟನ್‌ ಸುಂದರ್, ಮೊಯೀನ್‌ ಅಲಿ ಮತ್ತು ಯುಜ್ವೇಂದ್ರ ಚಹಲ್ ಹಾಗೂ ಸನ್‌ರೈಸರ್ಸ್‌ ತಂಡದಲ್ಲಿ ರಶೀದ್‌ ಖಾನ್‌ ಮತ್ತು ಮೊಹಮ್ಮದ್‌ ನಬಿ ಇದ್ದಾರೆ. ಆದರೆ ಮಂಬೈ ತಂಡ ಕೃಣಾಲ್‌ ಪಾಂಡ್ಯ ಜೊತೆಗೆ ಅನನುಭವಿ ರಾಹುಲ್‌ ಚಹರ್‌ ಅವರ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ಮೂರನೇ ಕಾರಣ: ಜಸ್‌ಪ್ರೀತ್‌ ಬುಮ್ರಾ ಮೇಲೆ ಹೆಚ್ಚು ಅವಲಂಬನೆತಂದೆಯ ಆರೋಗ್ಯ ಹದಗೆಟ್ಟಿರುವ ಹಿನ್ನೆಲೆಯಲ್ಲಿ ಅವರ ಜೊತೆಗೆ ಇರಲು ನಿರ್ಧರಿಸಿರುವ ಮುಂಬೈ ಇಂಡಿಯನ್ಸ್‌ ತಂಡದ ಅನುಭವಿ ವೇಗಿ ಲಸಿತ್‌ ಮಾಲಿಂಗ ಈ ಬಾರಿಯ ಐಪಿಎಲ್‌ನಲ್ಲಿ ಪಾಲ್ಗೊಳ್ಳುವುದು ಅನುಮಾನವಾಗಿದೆ. ಇದರೊಂದಿಗೆ ಮುಂಬೈ ತಂಡದ ಬೌಲಿಂಗ್ ವಿಭಾಗ ವಿಕೆಟ್‌ ಪಡೆಯುವ ಸಲುವಾಗಿ ಜಸ್‌ಪ್ರೀತ್‌ ಬುಮ್ರಾ ಅವರನ್ನು ಅತಿಯಾಗಿ ಅವಲಂಬಿಸುವ ಸಾಧ್ಯತೆ ಎದುರಾಗಿದೆ. ಜೊತೆಗೆ ಟ್ರೆಂಟ್‌ ಬೌಲ್ಟ್‌ ಸೇವೆಯನ್ನೂ ಮುಂಬೈ ಕಳೆದುಕೊಂಡಿದೆ. ಹೀಗಾಗಿ ಬುಬ್ರಾಗೆ ಹಾರ್ದಿಕ್‌ ಪಾಂಡ್ಯ, ಕೈರೊನ್‌ ಪೊಲಾರ್ಡ್ ಮತ್ತು ಮಿಚೆಲ್‌ ಮೆಕ್ಲೆನೆಗನ್ ಸಾಥ್‌ ನೀಡಬೇಕಿದೆ. ಆದರೂ ಮುಂಬೈ ತಂಡದ ಬೌಲಿಂಗ್ ವಿಭಾಗ ಈ ಬಾರಿ ಬೌಲ್ಟ್‌ ಮತ್ತು ಮಾಲಿಂಗ ಸೇವೆ ಇಲ್ಲದೆ ಕೊಂಚ ಬಲಹೀನವಾಗಿ ಕಾಣುತ್ತಿದೆ ಎಂದೇ ಹೇಳಬಹುದು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2D6IjfS
