ಹೊಸದಿಲ್ಲಿ: ಏಕದಿನ ಕ್ರಿಕೆಟ್ ಮತ್ತು ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಟೀಮ್‌ ಇಂಡಿಯಾ ಕಂಡ ಶ್ರೇಷ್ಠ ಬ್ಯಾಟ್ಸ್‌ಮನ್‌ಗಳಲ್ಲಿ ಮಾಜಿ ನಾಯಕ ಸೌರವ್‌ ಗಂಗೂಲಿ ಕೂಡ ಒಬ್ಬರು. 2008ರಲ್ಲಿ ಸೌರವ್‌ ತಮ್ಮ ಅಂತಾರಾಷ್ಟ್ರೀಯ ಕ್ರಿಕೆಟ್ ವೃತ್ತಿ ಬದುಕಿಗೆ ನಿವೃತ್ತಿ ನೀಡಿದ ಸಂದರ್ಭದಲ್ಲಿ ಟೀಮ್‌ ಇಂಡಿಯಾದ ಸಾರ್ವಕಾಲಿಕ ಅತ್ಯಂತ ಯಶಸ್ವಿ ನಾಯಕನಾಗಿದ್ದರು. ಇನ್ಜು 2008ರಲ್ಲಿ ಶುರುವಾರ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ದಾದಾ ಖ್ಯಾತಿಯ ಬಂಗಾಳದ ಸ್ಟಾರ್‌ ಕ್ರಿಕೆಟಿಗನನ್ನು ಕೋಲ್ಕತಾ ನೈಟ್‌ ರೈಡರ್ಸ್ ತಂಡ ತನ್ನ ತೆಕ್ಕೆಗೆ ತೆಗೆದುಕೊಂಡಿತ್ತು. ಆದರೆ, ದುರದೃಷ್ಟವಶಾತ್ ನೈಟ್‌ ರೈಡರ್ಸ್ ತಂಡ ಉತ್ತಮ ಪ್ರದರ್ಶನ ನೀಡುವಲ್ಲಿ ವಿಫಲವಾಗಿತ್ತು. ಸೌರವ್‌ ಸಾರಥ್ಯದಲ್ಲಿ ನೈಟ್‌ ರೈಡರ್ಸ್ ತಂಡ ಚೊಚ್ಚಲ ಆವೃತ್ತಿಯ ಐಪಿಎಲ್‌ನಲ್ಲಿ 6ನೇ ಸ್ಥಾನ ಪಡೆದಿತ್ತು. ಹೀಗಾಗಿ ತಂಡದ ಅಂದಿನ ಕೋಚ್ ಜಾನ್‌ ಬುಕಾನನ್ 2009ರ ಐಪಿಎಲ್‌ ಟೂರ್ನಿಗೆ ನಾಯಕತ್ವದ ಹಂಚಿಕೆ ಮಾಡಿ ಗಂಗೂಲಿ ಜೊತಗೆ ಬ್ರೆಂಡನ್‌ ಮೆಕಲಮ್‌ಗೆ ನಾಯಕತ್ವ ನೀಡಿದ್ದರು. ಆಟೂರ್ನಿಯಲ್ಲಿ ಬ್ಯಾಟಿಂಗ್‌ನಲ್ಲಿ ಹೇಳಿಕೊಳ್ಳುವಂತ ಪ್ರದರ್ಶನವನ್ನೇನೂ ನೀಡದ ಗಂಗೂಲಿಗೆ ನಾಯಕತ್ವದ ಹಂಚಿಕೆ ನಿರ್ಧಾರದ ಬಗ್ಗೆ ಅಸಮಾಧಾನ ಹೊರಹಾಕಿದ್ದರು. ಈ ಬಗ್ಗೆ ಇತ್ತೀಚಿನ ಸಂದರ್ಶನದಲ್ಲಿ ಮಾತನಾಡಿರುವ ಕೆಕೆಆರ್‌ ತಂಡದ ಮಾಜಿ ಕೋಚ್ ಜಾನ್‌ ಬುಕಾನನ್, ಸೌರವ್‌ ಗಂಗೂಲಿ ಟಿ20 ಕ್ರಿಕೆಟ್‌ಗೆ ಲಾಯಕ್ಕಾದ ಆಟಗಾರನಲ್ಲ ಎಂದಿದ್ದಾರೆ. ಅಂದಹಾಗೆ 2010ರ ಆವೃತ್ತಿಯ ಐಪಿಎಲ್‌ ಟೂರ್ನಿಗೆ ಬುಕಾನನ್ ಅವರನ್ನು ಕೆಕೆಆರ್‌ ತಂಡದ ಕೋಚ್ ಸ್ಥಾನದಿಂದ ಕಿತ್ತೊಗೆಯಲಾಗಿತ್ತು. "ಆಗ ನನ್ನ ಆಲೋಚನೆ ಇದ್ದಿದ್ದೇನೆಂದರೆ ಒಬ್ಬ ನಾಯಕನಾಗಗಿ ನೀವು ತ್ವರಿತವಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳಬೇಕು ಎಂಬುದು. ಈ ಮೂಲಕ ಚುಟುಕು ಮಾದರಿಯ ಕ್ರಿಕೆಟ್‌ಗೆ ನಿಮ್ಮ ಆಟ ಹೊಂದಿಸಿಕೊಳ್ಳಲು ಸಾಧ್ಯವಾಗುತ್ತದೆ. ಈ ನಿಟ್ಟಿನಲ್ಲಿ ನಾನು ಸೌರವ್‌ ಜೊತೆಗೆ ಬಹಳ ಚರ್ಚಿಸಿದ್ದೆ," ಎಂದು ಸ್ಪೋರ್ಟ್ಸ್‌ ಸ್ಟಾರ್‌ಗೆ ನೀಡಿರುವ ಸಂದರ್ಶನದಲ್ಲಿ ಬುಕಾನನ್ ಹೇಳಿದ್ದಾರೆ. "ಸೌರವ್‌ ಟಿ20 ಕ್ರಿಕೆಟ್ ಮಾದರಿಗೆ ಸೂಕ್ತವಾಗಿದ್ದಾರೆ ಎಂಬುದನ್ನು ನನ್ನಿಂದ ನಂಬಲೂ ಸಾಧ್ಯವಾಗಿರಲಿಲ್ಲ. ಅದರಲ್ಲೂ ಈ ಮಾದರಿಯ ಕ್ರಿಕೆಟ್‌ನಲ್ಲಿ ಕ್ಯಾಪ್ಟನ್‌ ಆಗಲು ಅವರು ಲಾಯಕ್ಕಾದ ಆಟಗಾರ ಆಗಿರಲಿಲ್ಲ. ಸ್ವರಿತ ನಿರ್ಧಾರಗಳನ್ನು ಅವರು ತೆಗೆದುಕೊಳ್ಳುತ್ತಿರಲಿಲ್ಲ. ಅಂದಹಾಗೆ ಟಿ20 ಕ್ರಿಕೆಟ್‌ನಲ್ಲಿ ಒಬ್ಬರಿಂದ ಎಲ್ಲವನ್ನೂ ಮಾಡಲು ಸಾಧ್ಯವಿಲ್ಲ. ಪ್ರತಿ ನಿರ್ಧಾರವನ್ನು ಶೀಘ್ರವೇ ತೆಗೆದುಕೊಳ್ಳಬೇಕು. ನಾಯಕನಾದವನು ಇದನ್ನು ಅರ್ಥ ಮಾಡಿಕೊಳ್ಳಬೇಕು. ಐಪಿಎಲ್‌ನಂತಹ ದೊಡ್ಡ ಟೂರ್ನಿಗೆ ಇಬ್ಬರು ನಾಯಕರ ಅಗತ್ಯವಿರುತ್ತದೆ," ಎಂದಿದ್ದಾರೆ. "ಸರಳವಾಗಿ ಹೇಳುವುದಾದರೆ ನಾಯಕತ್ವದ ಹಂಚಿಕೆ ಆಗಬೇಕು. ಆನ್‌ ಫೀಲ್ಡ್‌ನಲ್ಲಿ ಪ್ರತಿಯೊಬ್ಬರು ಕೂಡ ನಾಯಕನ ರೀತಿ ಇರಬೇಕು. ಉದಾಹರಣೆಗೆ ಈಗಿನ ಕಾಲದಲ್ಲಿ ಬೌಲರ್‌ಗಳು ಪ್ರತಿ ಎಸೆತಕ್ಕೂ ಮುನ್ನ ಫೀಲ್ಡಿಂಗ್‌ ಮೇಲಿನ ನಿಯಂತ್ರಣವನ್ನು ತಾವು ತೆಗೆದುಕೊಂಡಿರುತ್ತಾರೆ. ಅಂತೆಯೇ ಕ್ಯಾಪ್ಟನ್‌ ಮತ್ತು ಕೋಚ್‌ಗಳಿಗಿಂತಲೂ ಬ್ಯಾಟ್ಸ್‌ಮನ್‌ಗಳು ಆನ್‌ಫೀಲ್ಡ್‌ ನಿರ್ಧಾರ ತೆಗೆದುಕೊಂಡಿರುತ್ತಾರೆ. ಒಂದು ತಂಡದ ಸಾಮರ್ಥ್ಯ ಅಡಗಿರುವುದೇ ಇಲ್ಲಿ," ಎಂದಿದ್ದಾರೆ. ಸೆಪ್ಟೆಂಬರ್‌ 19ರಿಂದ ನವೆಂಬರ್‌ 10ರವರೆಗೆ ಟೂರ್ನಿಯ ಸಂಪೂರ್ಣ 60 ಪಂದ್ಯಗಳನ್ನು ಯುನೈಟೆಡ್‌ ಅರಬ್‌ ಎಮಿರೇಟ್ಸ್‌ನಲ್ಲಿ ಬಯೋ ಸೆಕ್ಯೂರ್‌ ವಾತಾವರಣ ಇರುವ ದುಬೈ, ಶರ್ಜಾ ಮತ್ತು ಅಬುದಾಭಿ ಕ್ರೀಡಾಂಗಣಗಳಲ್ಲಿ ಆಯೋಜಿಸಲು ಬಿಸಿಸಿಐ ಯೋಜನೆ ರೂಪಿಸಿದ್ದು, ಕೆಕೆಆರ್‌ ತಂಡ ಈಗಾಗಲೇ ದುಬೈನಲ್ಲಿ 3 ವಾರಗಳ ಅಭ್ಯಾಸ ಶಿಬಿರ ಆರಂಭಿಸಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3hIEgoS
