ಹೊಸದಿಲ್ಲಿ: ದಕ್ಷಿಣ ಆಫ್ರಿಕಾದ ಸ್ಟಾರ್‌ ಆಟಗಾರರಾದ ಎಬಿ ಡಿವಿಲಿಯರ್ಸ್, ಹಾಗೂ ಕ್ರಿಸ್‌ ಮೋರಿಸ್‌ ಕಳೆದ ವಾರ ದುಬೈಗೆ ಆಗಮಿಸಿ ರಾಯಲ್‌ ಚಾಲೆಂಜರ್ಸ್‌ ತಂಡ ಸೇರ್ಪಡೆಯಾಗಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಡೈರೆಕ್ಟರ್‌ , ಎಬಿ ಡಿವಿಲಿಯರ್ಸ್ ಹಾಗೂ ಡೇಲ್‌ ಸ್ಟೇನ್ ತುಂಬಾ ಅವಕಾಶಗಳಿವೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. 2018ರ ಮೇನಲ್ಲಿ ಎಬಿ ಡಿವಿಲಿಯರ್ಸ್ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಘೋಷಿಸಿದ್ದರು. ಆದಾಗ್ಯೂ ವಿಶ್ವದಾದ್ಯಂತ ಫ್ರಾಂಚೈಸಿ ಲೀಗ್‌ಗಳನ್ನು ಆಡಲು ಅವರು ನಿರ್ಧರಿಸಿದ್ದರು ಹಾಗೂ ಅದರಂತೆ ಮುಂದುವರಿಸಿದ್ದಾರೆ. ದಕ್ಷಿಣ ಆಫ್ರಿಕಾ ತಂಡದ ಮಾಜಿ ನಾಯಕ ಇತ್ತೀಚೆಗೆ ತಮ್ಮ ದೇಶದಲ್ಲಿ ನಡೆದಿದ್ದ 3 ಟಿಸಿ ಮಾದರಿಯ ಸ್ಪರ್ಧೆಯಲ್ಲಿ ಆಡಿದ್ದರು. ಇನ್ನೂ ವಿಶ್ವದ ಶ್ರೇಷ್ಠ ವೇಗದ ಬೌಲರ್‌ ಡೇಲ್‌ ಸ್ಟೇನ್ ಅವರು ಸತತ ಗಾಯದಿಂದ ಸಾಕಷ್ಟು ಕುಗ್ಗಿದ್ದರು ಹಾಗೂ ಕಳೆದ ವರ್ಷ ಅಂತಾರಾಷ್ಟ್ರೀಯ ಟೆಸ್ಟ್ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದರು. ಕಳೆದ ಮಾರ್ಚ್‌ನಲ್ಲಿ ಅವರು ಆಸ್ಟ್ರೇಲಿಯಾ ವಿರುದ್ಧ ಜೋಹನ್ಸ್‌ಬರ್ಗ್‌ನಲ್ಲಿ ಕೊನೆಯ ಟಿ20 ಪಂದ್ಯವಾಡಿದ್ದರು. ಎಬಿ ಡಿವಿಲಿಯರ್ಸ್ ದಕ್ಷಿಣ ಆಫ್ರಿಕಾದಲ್ಲಿ ನಡೆದಿದ್ದ 3 ಟಿಸಿ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ತೋರಿದ್ದರು. ಕೊರೊನಾ ವೈರಸ್‌ ನಿಂದ ಹಲವು ತಿಂಗಳುಗಳಿಂದ ಕ್ರಿಕೆಟ್ ಆಡದೆ ಮನೆಯಲ್ಲಿದ್ದರೂ ಎಬಿಡಿ, 3ಟಿಸಿ ಪಂದ್ಯದಲ್ಲಿ ಸ್ಫೋಟಕ ಅರ್ಧಶತಕ ಸಿಡಿಸಿ ತಾವಿನ್ನೂ ಲಯದಲ್ಲಿರುವುದಾಗಿ ಸಾಬೀತುಪಡಿಸಿದ್ದರು. ಅಲ್ಲದೆ, ಕಳೆದ ವರ್ಷ ಫ್ರಾಂಚೈಸಿ ಲೀಗ್‌ಗಳಲ್ಲಿ ಎಬಿಡಿ ತೋರಿದ್ದ ಪ್ರದರ್ಶನದಿಂದಾಗಿ ಮೈಕ್‌ ಹೆಸ್ಸನ್‌, ಬಲಗೈ ಬ್ಯಾಟ್ಸ್‌ಮನ್‌ ಸಾಮರ್ಥ್ಯ ಹಾಗೂ ಫಿಟ್ನೆಸ್‌ ಬಗ್ಗೆ ಶ್ಲಾಘಿಸಿದರು. "ಕಳೆದ ಒಂದು ವಾರದ ಹಿಂದೆ ದಕ್ಷಿಣ ಆಫ್ರಿಕಾದಲ್ಲಿನಡೆದಿದ್ದ 3ಟಿಸಿ ಪಂದ್ಯದಲ್ಲಿ ಎಬಿಡಿ ಅದ್ಭುತ ಪ್ರದರ್ಶನ ತೋರಿರುವುದು ನಮಗೆ ಅತ್ಯಂತ ಮುಖ್ಯವಾಗಿದೆ. ಆ ಮೂಲಕ ನಾಲ್ಕು ಗೋಡೆಗಳ ನಡುವಿನಿಂದ ಬಲಗೈ ಬ್ಯಾಟ್ಸ್‌ಮನ್‌ ಹೊರ ಬಂದಿದ್ದರು. ಇದು ಆಫ್ರಿಕಾದ ಸ್ಟಾರ ಆಟಗಾರನ ಸಾಮರ್ಥ್ಯವನ್ನು ಸಾಬೀತುಪಡಿಸುತ್ತದೆ," ಎಂದು ಅವರು ಶ್ಲಾಘಿಸಿದರು. "ಕಳೆದ 12 ತಿಂಗಳಿನಿಂದ ಅವರು ವಿಶ್ವದಾದ್ಯಂತ ಫ್ರಾಂಚೈಸಿ ಲೀಗ್‌ಗಳಲ್ಲಿ ಅತ್ಯುತ್ತಮ ಪ್ರದರ್ಶನ ತೋರಿದ್ದಾರೆ ಹಾಗೂ ಕ್ರಿಕೆಟ್ ಜತೆ ಇನ್ನೂ ಉತ್ತಮ ಸಂಪರ್ಕದಲ್ಲಿದ್ದಾರೆ. ಅವರ ದೈಹಿಕ ಸ್ಥಿತಿ ಇನ್ನೂ ಹೊಸತನದಿಂದ ಕೂಡಿದೆ," ಎಂದು ಹೇಳಿದರು. ಕಳೆದ ಆರು ತಿಂಗಳಿಂದ ಡೇಲ್‌ ಸ್ಟೇನ್ ಬೌಲಿಂಗ್‌ನಲ್ಲಿ ಅತ್ಯುತ್ತಮ ಬೆಳವಣಿಗೆಯನ್ನು ಸಾಧಿಸಿದ್ದಾರೆ. 45ರ ಪ್ರಾಯದ ವೇಗಿ ಕ್ರಿಕೆಟ್ ವೃತ್ತಿ ಜೀವನದ ವಿದಾಯದ ಹಂಚಿನಲ್ಲಿದ್ದಾರೆ ಹಾಗೂ ಈ ಬಾರಿ ಐಪಿಎಲ್‌ನಲ್ಲಿ ತನ್ನದೇ ಆದ ಛಾಪು ಮೂಡಿಸಲಿದ್ದಾರೆಂಬ ನಂಬಿಕೆ ಇದೆ ಎಂದು ಹೆಸ್ಸನ್‌ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/32CbHU6
