ಹೊಸದಿಲ್ಲಿ: ಆತಿಥೇಯ ಇಂಗ್ಲೆಂಡ್ ವಿರುದ್ಧದ ಮೂರು ಪಂದ್ಯಗಳ ಟಿ20 ಕ್ರಿಕೆಟ್ ಸರಣಿಯ 2ನೇ ಹಣಾಹಣಿಯಲ್ಲಿ ಪ್ರವಾಸಿ ತಂಡ 5 ವಿಕೆಟ್‌ಗಳ ಹೀನಾಯ ಸೋಲುಂಡಿತು. ಇದರ ಬೆನ್ನಲ್ಲೇ ಕ್ಯಾಪ್ಟನ್‌ ಬಾಬರ್ ಆಝಮ್‌ ವಿರುದ್ಧ ಮಾಜಿ ವೇಗದ ಬೌಲರ್‌ ಶೊಯೇಬ್‌ ಅಖ್ತರ್ ಟೀಕಾಸ್ತ್ರ ಪ್ರಹಾರ ಮಾಡಿದ್ದಾರೆ. ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ ಪಾಕ್‌ ತಂಡದ ಪರ ಅನುಭವಿ ಬ್ಯಾಟ್ಸ್‌ಮನ್‌ ಮೊಹಮ್ಮದ್‌ ಹಫೀಝ್ ಮತ್ತು ಕ್ಯಾಪ್ಟನ್‌ ಬಾಬರ್ ಸ್ಫೋಟಕ ಅರ್ಧಶತಕಗಳನ್ನು ದಾಖಲಿಸುವ ಮೂಲಕ 20 ಓವರ್‌ಗಳಲ್ಲಿ 195 ರನ್‌ಗಳ ಬೃಹತ್‌ ಮೊತ್ತವನ್ನೇ ತಂದುಕೊಟ್ಟರು. ಆದರೆ, ಬೌಲಿಂಗ್‌ನಲ್ಲಿ ವೈಫಲ್ಯ ಅನುಭವಿಸಿದ ಪರಿಣಾಮ ಐಯಾನ್‌ ಮಾರ್ಗನ್ ಸಾರಥ್ಯದ ತಂಡ ಸಿಡಿಲಬ್ಬರದ ಬ್ಯಾಟಿಂಗ್‌ ನಡೆಸಿ ಇನ್ನು 5 ಎಸೆತಗಳು ಬಾಕಿ ಇರುವಾಗಲೇ ಗೆಲುವಿನ ಕೇಕೆ ಹಾಕಿತ್ತು. ಸಿಡಿಲಬ್ಬರದ ಬ್ಯಾಟಿಂಗ್‌ ನಡೆಸಿದ್ದ ಮಾರ್ಗನ್ 33 ಎಸೆತಗಳಲ್ಲಿ 5 ಸಿಕ್ಸರ್‌ ಒಳಗೊಂಡ 66 ರನ್‌ ಚಚ್ಚಿ ಜಯದ ರೂವಾರಿ ಎನಿಸಿದರು. ಈ ಬಗ್ಗೆ ಮಾತನಾಡಿರುವ ರಾವಲಪಿಂಡಿ ಎಕ್ಸ್‌ಪ್ರೆಸ್‌ ಖ್ಯಾತಿಯ ಮಾಜಿ ವೇಗಿ, ಬಾಬರ್ ಆಝಮ್‌ ಅವರ ನಾಯಕತ್ವವನ್ನು ಕಟುವಾಗಿ ಟೀಕಿಸಿದ್ದಾರೆ. ಪಂದ್ಯದ ನಿರ್ಣಾಯಕ ಘಟ್ಟಗಳಲ್ಲಿ ಬಾಬರ್ ಸೂಕ್ತ ನಿರ್ಧಾರ ತೆಗೆದುಕೊಳ್ಳುವಲ್ಲಿ ವಿಫಲರಾದರು. ಏನು ಮಾಡಬೇಕೆಂಬುದೇ ಅವರಿಗೆ ಗೊತ್ತಿರಲಿಲ್ಲ ಎಂದು ಅಖ್ತರ್ ಟೀಕಾಸ್ತ್ರ ಪ್ರಯೋಗ ಮಾಡಿದ್ದಾರೆ. "ಬಾಬರ್ ಒಂದು ರೀತಿ ದಾರಿ ತಪ್ಪಿದ ದನದಂತೆ ಕಾಣುತ್ತಿದ್ದರು. ಅವರು ಫೀಲ್ಡ್‌ನಲ್ಲಿ ಇದ್ದಾರೆ. ಆದರೆ ಏನು ಮಾಡಬೇಕೆಂಬುದು ಅವರಿಗೆ ಗೊತ್ತಿಲ್ಲ. ತಮ್ಮ ನಿರ್ಧಾರಗಳನ್ನು ತಾವೇ ತೆಗೆದುಕೊಳ್ಳುವುದನ್ನು ಅವರು ಮೊದಲು ಕಲಿಯಬೇಕು. ಹೀಗಾದರೆ ಮಾತ್ರ ಅವರು ಮುಂದಿನ ದಿನಗಳಲ್ಲಿ ಉತ್ತಮ ನಾಯಕನಾಗಿ ಬೆಳೆಯಲು ಸಾಧ್ಯ," ಎಂದು ಅಖ್ತರ್ ತಮ್ಮ ಯೂಟ್ಯೂಬ್‌ ಕಾರ್ಯಕ್ರಮದಲ್ಲಿ ಹೇಳಿದ್ದಾರೆ. "ಡ್ರೆಸಿಂಗ್‌ ರೂಮ್‌ನಿಂದ ಅವರಿಗೆ ಸಲಹೆಗಳು ಬರುತ್ತಿದ್ದವು. ಫೀಲ್ಡ್‌ನಲ್ಲಿ ಮೂರು ಮಂದಿ ಅವರಿಗೆ ನೆವಾಗುತ್ತಿದ್ದರು. ಯಶಸ್ವಿ ನಾಯಕನಾಗಲು ಮೊದಲು ತಮ್ಮದೇ ನಿರ್ಧಾರ ತೆಗೆದುಕೊಳ್ಳುವಂತೆ ಅವರು ಆಗಬೇಕು. ಅವರ ಬಳಿ ನಾಯಕತ್ವದ ಅವಕಾಶ ಹುಡುಕಿಕೊಂಡು ಬಂದಿದೆ ಎಂಬುದನ್ನು ಬಾಬರ್ ಮೊದಲು ತಿಳಿದುಕೊಳ್ಳಬೇಕು. ಅವರ ಜೀವನದುದ್ದಕ್ಕೂ ಇಂತಹ ಅವಕಾಶ ಸಿಗದು. ಹೀಗಾಗಿ ಸಿಕ್ಕಿರುವ ಅವಕಾಶದ ಸಂಪೂರ್ಣ ಲಾಭ ಪಡೆದು ತಮ್ಮದೇ ಛಾಪು ಮೂಡಿದಬೇಕಿದೆ," ಎಂದಿದ್ದಾರೆ. ಇದೇ ವೇಳೆ ಬಾಬರ್ ಕೊಂಚ ಮಂದಗತಿಯಲ್ಲಿ ಬ್ಯಾಟ್‌ ಮಾಡುತ್ತಿದ್ದಾರೆ ಎಂದು ಅಖ್ತರ್ ಗುಡುಗಿದ್ದಾರೆ. "ಸ್ಟ್ರೈಕ್‌ರೇಟ್‌ ಬಗ್ಗೆ ಮಾತನಾಡುವುದಾದರೆ 130-135ರ ಆಸುಪಾಸಿನಲ್ಲಿ ಬಾಬರ್ ಬ್ಯಾಟ್‌ ಬೀಸುತ್ತಿದ್ದಾರೆ. ಫಖರ್‌ ಝಮಾನ್‌ ಬಿರುಸಾಗಿ ಬ್ಯಾಟ್‌ ಮಾಡುತ್ತಿದ್ದಾಗ ಬಾಬರ್ ಆಕ್ರಮಣಕಾರಿ ಆಟವಾಡುವ ಅಗತ್ಯ ಇರಲಿಲ್ಲ. ಆದರೆ, ಫಖರ್‌ ನಿರ್ಗಮನದ ನಂತರ ತಂಡದ ರನ್‌ ಗಳಿಕೆಯ ವೇಗವನ್ನು ಹೆಚ್ಚಿಸುವ ಜವಾಬ್ದಾರಿ ಇದದ್ದು ಬಾಬರ್ ಮೇಲೆ. ಇಂಗ್ಲೆಂಡ್ ಪರ ಐಯಾನ್‌ ಮಾರ್ಗನ್, ಡಾವಿಡ್‌ ಮಾಲನ್ ಮತ್ತು ಜಾನಿ ಬೈರ್‌ಸ್ಟೋವ್ ಮಾಡುವುದು ಇದನ್ನೇ. ಅವರನ್ನು ನೋಡಿ ಬಾಬರ್ ಕಲಿಯಬೇಕು," ಎಂದು ಸಲಹೆ ನೀಡಿದ್ದಾರೆ. ಫಝರ್‌ ಝಮಾನ್‌ ಜೊತೆಗೆ ಇನಿಂಗ್ಸ್‌ ಆರಂಭಿಸಿದ ಬಾಬರ್ ಮೊದಲ ವಿಕೆಟ್‌ಗೆ ಬಿರುಸಿನ ಬ್ಯಾಟಿಂಗ್‌ ಮಾಡಿ 8.2 ಓವರ್‌ಗಳಲ್ಲಿ 72 ರನ್‌ ಜೋಡಿಸಿದ್ದರು. ಆದರೆ ಫಖರ್‌ 22 ಎಸೆತಗಳಲ್ಲಿ 36 ರನ್‌ ಗಳಿಸಿ ಔಟಾದ ಬಳಿಕ, ಹಫೀಜ್‌ ಬ್ಯಾಟಿಂಗ್‌ಗೆ ಬಂದು 36 ಎಸೆತಗಳಲ್ಲಿ 69 ರನ್‌ ಚಚ್ಚಿದರು. ಆದರೆ, ಬಾಬರ್ 127.27ರ ಸ್ಟ್ರೈಕ್‌ರೇಟ್‌ನಲ್ಲಿ 44 ಎಸೆತಗಳಲ್ಲಿ 56 ರನ್‌ಗಳಿಸಿ ವಿಕೆಟ್‌ ಒಪ್ಪಿಸಿದರು. ಹೀಗಾಗಿ ಬಾಬರ್ ಬಿರುಸಾಗಿ ಬ್ಯಾಟ್‌ ಮಾಡಬೇಕೆಂದು ಅಖ್ತರ್ ಹೇಳಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3beTAXT
