ಲಂಡನ್‌: ತಮ್ಮ ತಂದೆಗೆ ಬ್ರೈನ್‌ ಕ್ಯಾನ್ಸರ್ ಇರುವುದು ಗೊತ್ತಾಗಿ ಇತ್ತೀಚೆಗೆ ಮುಕ್ತಾಯದ ಪಾಕಿಸ್ತಾನ ವಿರುದ್ಧ ಟೆಸ್ಟ್ ಸರಣಿಯಲ್ಲಿ ತಮ್ಮ ಮನಸ್ಸು ಸರಿ ಇರಲಿಲ್ಲವೆಂದು ಇಂಗ್ಲೆಂಡ್ ತಂಡದ ಸ್ಟಾರ್‌ ಆಲ್‌ರೌಂಡರ್‌ ಬಹಿರಂಗಪಡಿಸಿದ್ದಾರೆ. ಮೂರು ಪಂದ್ಯಗಳ ಟೆಸ್ಟ್ ಸರಣಿಯ ಮೊದಲನೇ ಪಂದ್ಯದ ಬಳಿಕ ಸ್ಟೋಕ್ಸ್ ತಮ್ಮ ತಂದೆ-ತಾಯಿ ನೆಲೆಸಿರುವ ನ್ಯೂಜಿಲೆಂಡ್‌ಗೆ ತೆರಳಿದ್ದರು. ಪಾಕಿಸ್ತಾನ ವಿರುದ್ಧದ ಟೆಸ್ಟ್ ಸರಣಿ ವೇಳೆ ಬೆನ್ ಸ್ಟೋಕ್ಸ್ ನಿರ್ಗಮನಕ್ಕೆ ಕಾರಣ ಸಾರ್ವಜನಿಕವಾಗಿ ಬಹಿರಂಗವಾಗಿರಲಿಲ್ಲ. ಆದರೆ, ಮೊದಲನೇ ಪಂದ್ಯದ ಬಳಿಕ ಸ್ಟಾರ್‌ ಆಲ್‌ರೌಂಡರ್‌ ಕೌಟುಂಬಿಕ ಕಾರಣಗಳಿಂದ ಸರಣಿಯ ಇನ್ನುಳಿದ ಭಾಗದಿಂದ ಹೊರ ನಡೆಯುತ್ತಿದ್ದಾರೆಂದು ಇಂಗ್ಲೆಂಡ್ ಹಾಗೂ ವೇಲ್ಸ್ ಕ್ರಿಕೆಟ್ ಮಂಡಳಿ ತಿಳಿಸಿತ್ತು. ಇದೀಗ ಅವರು ತಮ್ಮ ತಂದೆಗೆ ಬ್ರೈನ್‌ ಕ್ಯಾನ್ಸರ್ ಇರುವ ವಿಷಯವನ್ನು ಬಹಿರಂಗಪಡಿಸಿದ್ದಾರೆ. ನ್ಯೂಜಿಲೆಂಡ್ ಹೆರಾಲ್ಡ್ ಜೊತೆ ಮಾತನಾಡಿದ ಬೆನ್ ಸ್ಟೋಕ್ಸ್ ತಂದೆ ಗೆಡ್‌, ಜನವರಿಯಲ್ಲಿ ತಮಗೆ ಮೆದುಳಿನ ಕ್ಯಾನ್ಸರ್ ಇರುವುದು ಪತ್ತೆಯಾಗಿತ್ತು. ಕಳೆದ ವರ್ಷದ ಅಂತ್ಯದದಲ್ಲಿ ತನ್ನ ಮಗ ಸ್ಟೋಕ್ಸ್ ಅವರನ್ನು ಬೆಂಬಲಿಸಲು ದಕ್ಷಿಣ ಆಫ್ರಿಕಾಕ್ಕೆ ಪ್ರಯಾಣ ಬೆಳೆಸಿರುವ ಬಗ್ಗೆ ತಿಳಿಸಿದ್ದಾರೆ. "ಕಳೆದ ವರ್ಷ ನನ್ನ ಮಗನನ್ನು ಬೆಂಬಲಿಸಲು ದಕ್ಷಿಣ ಆಫ್ರಿಕಾಗೆ ತೆರಳಿದ್ದೆ ಹಾಗೂ ಆ ವೇಳೆ ನನ್ನ ಮೆದಳಿನಲ್ಲಿ ಹಲವು ಗಡ್ಡೆಗಳಿರುವುದು ಮನವರಿಕೆಯಾಯಿತು. ಇದು ಸಾಮಾನ್ಯವಾಗಿ ಬ್ರೈನ್‌ ಕ್ಯಾನ್ಸರ್ ಎಂದು ಕರೆಯುತ್ತಾರೆ. ಇದು ಹೇಗೆ ನನಗೆ ಬಂದಿದೆ ಎಂಬುವುದು ಯಾರಿಗೂ ಗೊತ್ತಿಲ್ಲ," ಎಂದು ಬೆನ್ ಸ್ಟೋಕ್ಸ್ ತಂದೆ ಗೆಡ್‌ ತಿಳಿಸಿದ್ದಾರೆ. ಬ್ರೈನ್‌ ಕ್ಯಾನ್ಸರ್ ಇರುವ ಬಗ್ಗೆ ನಮ್ಮ ತಂದೆ ಬಹಿರಂಗಪಡಿಸಿದ ಬಳಿಕ ತನ್ನಲ್ಲಿ ಉಂಟಾದ ಕಠಿಣ ಭಾವನೆಗಳನ್ನು ಬೆನ್ ಸ್ಟೋಕ್ಸ್ ವ್ಯಕ್ತಪಡಿಸಿದರು. ತಮ್ಮ ತಂದೆಯ ಅನಾರೋಗ್ಯದಿಂದ ತಂಬಾ ಬೇಸರವಾಗಿ ಒಂದು ವಾರ ಸರಿಯಾಗಿ ನಿದ್ರೆ ಮಾಡಲಿಲ್ಲ ಎಂಬ ವಿಷಯವನ್ನು ವಿಶ್ವಕಪ್ ಚಾಂಪಿಯನ್‌ ಬಹಿರಂಗಪಡಿಸಿದ್ದಾರೆ. "ತಮ್ಮ ತಂದೆಯ ಅನಾರೋಗ್ಯ ವಿಷಯ ತಿಳಿಯುತ್ತಿದ್ದಂತೆ, ನನ್ನ ಮನಸಿಗೆ ತುಂಬಾ ನೋವಾಯಿತು ಹಾಗೂ ಒಂದು ವಾರ ನಿದ್ರೆಯೇ ಮಾಡಲಿಲ್ಲ,"ಎಂದು ಇಂಗ್ಲೆಂಡ್ ಉಪ ನಾಯಕ ತಮ್ಮ ಕೊನೆಯ ಟೆಸ್ಟ್ ಪಂದ್ಯದ ವೇಳೆ ಉಂಟಾದ ಭಾವನೆಗಳನ್ನು ವ್ಯಕ್ತಪಡಿಸಿದರು. "ಮನಸ್ಸು ಸರಿಯಿಲ್ಲದ ಕಾರಣ ತಂಡವನ್ನು ತೊರೆಯುವುದು ಸರಿಯಾದ ನಿರ್ಧಾರ ಎಂದು ಭಾವಿಸಿದೆ," ಎಂದು ಬೆನ್ ಸ್ಟೋಕ್ಸ್ ತಿಳಿಸಿದರು. ಪಾಕಿಸ್ತಾನ ವಿರುದ್ಧದ ಮೂರು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಇಂಗ್ಲೆಂಡ್ 1-0 ಅಂತರದಲ್ಲಿ ಜಯ ಸಾಧಿಸಿತ್ತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3lpWzBP
