ಹೊಸದಿಲ್ಲಿ: ಭಾರತೀಯ ಕ್ರಿಕೆಟ್ ಕಂಡ ಅತ್ಯಂತ ಶ್ರೇಷ್ಠ ನಾಯಕರ ಪಟ್ಟಿಯಲ್ಲಿ ಮಹೇಂದ್ರ ಸಿಂಗ್‌ ಧೋನಿ ಮುಂಚೂಣಿಯಲ್ಲಿ ನಿಲ್ಲುತ್ತಾರೆ. ಅವರ ನಾಯಕತ್ವದಲ್ಲಿ ಭಾರತ ತಂಡ, ಟಿ20 ವಿಶ್ವಕಪ್‌ (2007), ಏಕದಿನ ವಿಶ್ವಕಪ್‌ (2011) ಹಾಗೂ ಐಸಿಸಿ ಚಾಂಪಿಯನ್ಸ್ ಟ್ರೋಫಿ (2013) ಮುಡಿಗೇರಿಸಿಕೊಂಡಿದೆ. ನಾಯಕನಾಗಿ ಅಲ್ಲದೆ, ಮ್ಯಾಚ್ ಫಿನಿಷರ್‌ ಆಗಿಯೂ ಧೋನಿ ಸಾಕಷ್ಟು ಪಂದ್ಯಗಳನ್ನು ಗೆದ್ದು ಕೊಟ್ಟಿದ್ದಾರೆ. ಭಾರತ ತಂಡದಲ್ಲಿ ಅಗ್ರ ಕ್ರಮಾಂಕದಲ್ಲಿ ಆಡುವ ಮೂಲಕ ಅಂತಾರಾಷ್ಟ್ರೀಯ ಕ್ರಿಕೆಟ್ ವೃತ್ತಿ ಜೀವನ ಆರಂಭಿಸಿದ್ದರು. ಆದರೆ, ತಂಡದ ಯೋಜನೆಗೆ ತಕ್ಕಂತೆ ಅಗ್ರ ಕ್ರಮಾಂಕವನ್ನು ಯುವ ಆಟಗಾರರಿಗೆ ನೀಡಿ, ತಾನು 5 ಅಥವಾ 6ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ ಮಾಡುತ್ತಿದ್ದರು. ಆದರೂ, ಒಮ್ಮೆ ಸಂದರ್ಶನದಲ್ಲಿ ಎಂಎಸ್ ಧೋನಿ ನಾಲ್ಕನೇ ಕ್ರಮಾಂಕದಲ್ಲಿ ಆಡಬೇಕೆಂಬ ಇಂಗಿತ ವ್ಯಕ್ತಪಡಿಸಿದ್ದರು. ಆದರೆ, ಇದಕ್ಕೆ ಟೀಮ್‌ ಮ್ಯಾನೇಜ್‌ಮೆಂಟ್‌ ಒಪ್ಪಿರಲಿಲ್ಲವೆಂದು ಭಾರತದ ಮಾಜಿ ಮಧ್ಯಮ ವೇಗಿ ಬಹಿರಂಗಪಡಿಸಿದ್ದಾರೆ. "ನಾನು ಹೇಳುತ್ತಿರುವುದು ಸುಳ್ಳಲ್ಲ, ಎಂಎಸ್ ಧೋನಿಯೇ ಒಮ್ಮೆ ಸಂದರ್ಶನದಲ್ಲಿ ನಾಲ್ಕನೇ ಕ್ರಮಾಂಕದಲ್ಲಿ ಆಡಬೇಕೆಂದು ಹೇಳಿದ್ದರು. ಆದರೆ, ತಂಡ ಇದಕ್ಕೆ ಒಮ್ಮತ ಸೂಚಿಸಲಿಲ್ಲ ಎಂದು ಭಾವಿಸುತ್ತೇನೆ. ಏಕೆಂದರೆ ಕೆಳ ಕ್ರಮಾಂಕದಲ್ಲಿ ಒತ್ತಡವನ್ನು ಮೀರಿ ಬ್ಯಾಟಿಂಗ್‌ ಮಾಡುವ ಆಟಗಾರ ಯಾರೂ ಇಲ್ಲದ ಕಾರಣ ಎಂಎಸ್ ಧೋನಿಗೆ ನಾಲ್ಕನೇ ಕ್ರಮಾಂಕ ನಿರಾಕರಿಸಲಾಗಿತ್ತು," ಎಂದು ಆರ್‌ಪಿ ಸಿಂಗ್‌ ಕ್ರಿಕೆಟ್.ಕಾಮ್‌ಗೆ ತಿಳಿಸಿದರು. "ಕ್ರಿಕೆಟ್ ಇತಿಹಾಸದ ಬಗ್ಗೆ ನೀವು ಮಾತನಾಡುವುದಾದರೆ, ಎಂಎಸ್ ಧೋನಿ ರೀತಿ ಆಟಗಾರ ನೀವೆಂದೂ ಕಂಡಿರಲು ಸಾಧ್ಯವೇ ಇಲ್ಲ. ಅವರು ಕೆಳ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ ಮಾಡಿ ಸಾಕಷ್ಟು ಪಂದ್ಯಗಳನ್ನು ಭಾರತಕ್ಕೆ ಗೆದ್ದು ಕೊಟ್ಟಿದ್ದಾರೆ. ಬೆವನ್‌ ಅಥವಾ ಬೇರೆ ದಿಗ್ಗಜರ ಬಗ್ಗೆ ಮಾತನಾಡಬಹುದು ಆದರೆ ಎಂಎಸ್ ಧೋನಿ ಇವರೆಲ್ಲರಿಗೂ ಸಂಪೂರ್ಣ ವಿಭಿನ್ನರಾಗಿದ್ದಾರೆ," ಎಂದರು. "ಎಂಎಸ್ ಧೋನಿ ಯಾವಾಗಲೂ ಎಲ್ಲರಿಗೂ ಸುಲಭವಾಗಿ ದೊರೆಯುವ ಸಂಯೋಜಿತ ವ್ಯಕ್ತಿ. ಅವರು ನಮ್ಮ ಕರೆಯನ್ನು ಯಾವಾಗಲೂ ಸ್ವೀಕರಿಸುವುದಿಲ್ಲ ಎಂದು ನಾವು ದೂರು ನೀಡಿದ್ದೆವು. ಆದರೆ, ತಾನು ನಿವೃತ್ತಿ ನೀಡಿದ ಬಳಿಕ ರಿಂಗ್‌ ಆಗಿ ಕೇವಲ ಅರ್ಧ ಸೆಕೆಂಡ್‌ಗೆ ನಿಮ್ಮ ಕರೆಯನ್ನು ಸ್ವೀಕರಿಸುತ್ತೇನೆಂದು ಮುನಾಫ್‌ ಹಾಗೂ ನನಗೆ ಧೋನಿ ತಿಳಿಸಿದ್ದರು. ಈಗ ಅವರು ನಿಜವಾಗಿಯೂ ನಿವೃತ್ತಿ ಹೊಂದಿದ್ದಾರೆಯೇ ಎಂಬಂತೆ ಪರಿಶೀಲನೆ ನಡೆಸಬೇಕು," ಎಂದು ಆರ್‌ಪಿ ಸಿಂಗ್‌ ನಗುತ್ತೂ ಹೇಳಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2YV4e1p
