ಹೊಸದಿಲ್ಲಿ: ಕ್ರಿಕೆಟ್ ಜಗತ್ತಿನಲ್ಲಿ ನಾವು ವಿಶಿಷ್ಟ ಬೌಲಿಂಗ್ ಶೈಲಿಯನ್ನು ನೋಡಿರುತ್ತೇವೆ. ಪ್ರಮುಖವಾಗಿಯೂ ಬ್ಯಾಟ್ಸ್ಮನ್ಗಳನ್ನು ಕಟ್ಟಿ ಹಾಕಲು ಬೌಲರ್ಗಳು ಅಸಾಂಪ್ರದಾಯಿಕ ಬೌಲಿಂಗ್ ಶೈಲಿಗೆ ಮೊರೆ ಹೋಗುತ್ತಾರೆ. ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಅಸಾಂಪ್ರದಾಯಿಕ ಬೌಲಿಂಗ್ ಶೈಲಿಯ ಮೂಲಕ ಅತಿ ಹೆಚ್ಚು ಯಶಸ್ಸು ಗಳಿಸಿದ ಬೌಲರ್ಗಳ ಪಟ್ಟಿಯಲ್ಲಿ ಶ್ರೀಲಂಕಾದ ಲಸಿತ್ ಮಾಲಿಂಗ ಮುಂಚೂಣಿಯಲ್ಲಿ ಗುರುತಿಸಿಕೊಳ್ಳುತ್ತಾರೆ. ಇದಕ್ಕೊಂದು ಸೇರ್ಪಡೆಯೆಂಬಂತೆ ಶ್ರೀಲಂಕಾದ ಯುವ ಸ್ಪಿನ್ನರ್ ವಿಚಿತ್ರ ಶೈಲಿಯ ಬೌಲಿಂಗ್ ಮಾಡುವ ಮೂಲಕ ಗಮನ ಸೆಳೆದಿದ್ದಾರೆ. 21ರ ಹರೆಯದ ಕೆವಿನ್ ಕೋತ್ತಿಗೋಡ ಎಂಬವರೇ ತಮ್ಮ ಬೌಲಿಂಗ್ ಆಕ್ಷನ್ನಿಂದ ಭಾರಿ ವೈರಲ್ ಆಗಿದ್ದಾರೆ. ಗ್ಯಾಲೆ ಮೂಲದವರಾದ ಕೆವಿನ್, ಅಬುದಾಬಿ ಟಿ10 ಲೀಗ್ನಲ್ಲಿ ಬಾಂಗ್ಲಾ ಟೈಗರ್ಸ್ ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ. ದಕ್ಷಿಣ ಆಫ್ರಿಕಾದ ಮಾಜಿ ಸ್ಪಿನ್ನರ್ ಪಾಲ್ ಆ್ಯಡಂ ಬೌಲಿಂಗ್ ಶೈಲಿಯನ್ನು ಕೆವಿನ್ ಹೋಲುತ್ತಿದ್ದಾರೆ. 1995-96ರ ಇಂಗ್ಲೆಂಡ್ ಸರಣಿಯಲ್ಲಿ ಪಾಲ್ ಆ್ಯಡಂ ವಿಚಿತ್ರ ಶೈಲಿಯ ಬೌಲಿಂಗ್ ಮೂಲಕ ವಿಶ್ವ ಕ್ರಿಕೆಟ್ನ್ನು ನಿಬ್ಬೆರಗೊಳಿಸಿದ್ದರು. ಇದೇ ಕಾರಣಕ್ಕಾಗಿ ಆ್ಯಡಂ ಅವರನ್ನು 'ಫ್ರಾಗ್ ಇನ್ ಎ ಬ್ಲೆಂಡರ್' ಎಂದೇ ಅಡ್ಡ ಹೆಸರನ್ನು ಪಡೆದಿದ್ದರು. ಅಲ್ಲದೆ 45 ಟೆಸ್ಟ್ ಪಂದ್ಯಗಳಲ್ಲಿ 134 ವಿಕೆಟ್ಗಳನ್ನು ಪಡೆದಿದ್ದರು. ಇದರಲ್ಲಿ ನಾಲ್ಕು ಬಾರಿ ಐದು ವಿಕೆಟ್ ಸಾಧನೆಯು ಸೇರಿದೆ. ಪಾಲ್ ಆ್ಯಡಂ ಜೀವನಶ್ರೇಷ್ಠ ಬೌಲಿಂಗ್ 128/7. ಆದರೆ ತಾವೆಂದು ಪಾಲ್ ಆ್ಯಡಂ ಬೌಲಿಂಗ್ ಅನುಕರಿಸಿಲ್ಲವೆಂದು ಶ್ರೀಲಂಕಾದ ಯುವ ಸ್ಪಿನ್ನರ್ ಕೆವಿನ್ ಕೋತ್ತಿಗೋಡ ತಿಳಿಸುತ್ತಾರೆ. ನನ್ನ ಬೌಲಿಂಗ್ ಹೆಚ್ಚು ಸುದ್ದಿಯಾದ ಬಳಿಕವಷ್ಟೇ ಪಾಲ್ ಆ್ಯಡಂ ಬಗ್ಗೆ ತಿಳಿದುಕೊಂಡಿದ್ದೇನೆ. ನಾನು ಚಿಕ್ಕವನಿಂದಲೇ ಅಂಡರ್ 13, ಅಂಡರ್ 15, ಅಂಡರ್ 17 ಹಾಗೂ ಅಂಡರ್ 19 ಕ್ರಿಕೆಟ್ನಲ್ಲಿ ಇದೇ ರೀತಿಯ ಬೌಲಿಂಗ್ ಮಾಡುತ್ತಿದ್ದೇನೆ ಎಂದಿದ್ದಾರೆ. ಆರಂಭದಲ್ಲಿ ಟೆನಿಸ್ ಬಾಲ್ನಲ್ಲಿ ಕ್ರಿಕೆಟ್ ಆಡುತ್ತಿದ್ದೆ. ಅಲ್ಲಿಂದ ಬಳಿಕ ಇದೇ ಬೌಲಿಂಗ್ ಶೈಲಿಯನ್ನು ಕರಗತ ಮಾಡಿಕೊಂಡಿದ್ದೇನೆ ಎಂದರು. ಇನ್ನು ಭಾರತೀಯರ ಪೈಕಿ ಜಸ್ಪ್ರೀತ್ ಬುಮ್ರಾ ಅಸಾಂಪ್ರದಾಯಿಕ ಬೌಲಿಂಗ್ ಶೈಲಿಯಿಂದಲೇ ವಿಶ್ವ ಕ್ರಿಕೆಟ್ನಲ್ಲಿ ಹೆಚ್ಚಿನ ಯಶಸ್ಸು ಗಳಿಸಿದ್ದಾರೆ. ಕೆಲವು ವರ್ಷಗಳ ಹಿಂದೆ ಇಂಡಿಯನ್ ಪ್ರೀಮಿಯರ್ ಲೀಗ್ 2016ನೇ ಸಾಲಿನಲ್ಲಿ ಶಿವಿಲ್ ಕೌಶಿಕ್ ಸಹ ಪಾಲ್ ಆ್ಯಡಂಗೆ ಹೋಲುವಂತಹ ಬೌಲಿಂಗ್ ಶೈಲಿಯೊಂದಿಗೆ ಗಮನ ಸೆಳೆದಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Om77C6
