ಕೋಲ್ಕತಾ: ಟಿ20 ಮತ್ತು ಸರಣಿ ಸಲುವಾಗಿ ಭಾರತ ಪ್ರವಾಸ ಕೈಗೊಂಡಿದ್ದ ತಂಡದಲ್ಲಿ ಹೆಚ್ಚುವರಿ ಆರಂಭಿಕ ಬ್ಯಾಟ್ಸ್‌ಮನ್‌ ಆಗಿ ಸ್ಥಾನ ಪಡೆದಿದ್ದ ಯುವ ಆಟಗಾರ , ಇದೀಗ ಭಾರತದಲ್ಲಿ ಬುಧವಾರ 21,600 ರೂ. ದಂಡ ತೆತ್ತಿದ್ದಾರೆ. ಇಂದೋರ್‌ನಲ್ಲಿ ನಡೆದ ಮೊದಲ ಟೆಸ್ಟ್‌ ಪಂದ್ಯದ ವೇಳೆ ಬದಲಿ ಆಟಗಾರನಾಗಿ ಫೀಲ್ಡಿಂಗ್‌ ಮಾಡುವಾಗ ಕೈಬೆರಳಿನ ಮೂಳೆ ಮುರಿತ ಸಮಸ್ಯೆಗೆ ತುತ್ತಾಗಿ ಕೋಲ್ಕತಾದ ಈಡನ್‌ ಗಾರ್ಡನ್ಸ್‌ನಲ್ಲಿ ನಡೆದ ಟೆಸ್ಟ್‌ ಪಂದ್ಯಕ್ಕೆ ಅಲಭ್ಯರಾದ ಸೈಫ್‌ ಹಸನ್‌, ಬಾಂಗ್ಲಾದೇಶಕ್ಕೆ ತಡವಾಗಿ ಹಿಂದಿರುಗಿದ ಹಿನ್ನೆಲೆಯಲ್ಲಿ ಕೋಲ್ಕತಾದ ವಿಮಾನ ನಿಲ್ದಾಣದಲ್ಲೇ ಉಳಿದು ಅವಧಿ ಮುಗಿದಿದ್ದ ಕಾರಣಕ್ಕೆ ದಂಡ ತೆತ್ತಿದ್ದಾರೆ. ಐಸಿಸಿ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಭಾಗವಾಗಿ ನಡೆದ 2 ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ ಭಾರತ ವೈಟ್‌ವಾಷ್‌ ಗೆಲುವು ದಾಖಲಿಸಿತ್ತು. ಈ ಸಂದರ್ಭದಲ್ಲಿ ತಮಗೆ ನೀಡಲಾಗಿದ್ದ 6 ತಿಂಗಳ ವಿಸಾದ ಅವಧಿ ಮುಗಿದಿರುವುದನ್ನು ಗಮನಿಸದೇ ಹೋದ ಸೈಫ್‌ ಹಸನ್‌ ಕೋಲ್ಕತಾ ವಿಮಾನನಿಲ್ದಾಣದಲ್ಲಿ ದಂಡ ಕಟ್ಟಿದ್ದಾರೆ. "ಅವರ ವೀಸಾ 2 ದಿನಗಳ ಹಿಂದೆ ಮುಗಿದಿದೆ. ಏರ್‌ಪೋರ್ಟ್‌ಗೆ ಬಂದ ಬಳಿಕ ಇದರ ಅರಿವು ಅವರಿಗಾಗಿದೆ. ಹೀಗಾಗಿ ಈಗಾಗಲೇ ಟಿಕೆಟ್‌ ಕಾಯ್ದಿರಿಸಿದ್ದ ವಿಮಾನದಲ್ಲಿ ಅವರು ತಾಯ್ನಾಡಿಗೆ ಹಿಂದಿರುಗಲು ಸಾಧ್ಯವಾಗಲಿಲ್ಲ. ವೀಸಾ ಅವಧಿಗಿಂತಲೂ ಹೆಚ್ಚು ದಿನ ಉಳಿದುಕೊಂಡಿರುವ ಕಾರಣ ನೂತನ ನಿಯಮಾನುಸಾರ ಅವರು ತಂಡ ತೆರಲೇಬೇಕಾಯಿತು," ಎಂದು ಬಾಂಗ್ಲಾದೇಶದ ಡೆಪ್ಯೂಟಿ ಹೈ ಕಮಿಷನರ್‌ ತೌಫೀಕ್‌ ಹಸನ್‌ ಹೇಳಿದ್ದಾರೆ. "ಈ ವಿಚಾರದಲ್ಲಿ ಭಾರತೀಯ ಹೈ ಕಮಿಷನ್‌ಗೆ ಧನ್ಯವಾದ ತಿಳಿಸಬೇಕು. ಶೀಘ್ರವೇ ಈ ಸಮಸ್ಯೆಯನ್ನು ಬಗೆಹರಿಸಿ ಹಸನ್‌ ಅವರನ್ನು ತಾಯ್ನಾಡಿಗೆ ಹಿಂದಿರುಗಲು ನೆರವಾಗಿದ್ದಾರೆ," ಎಂದು ತಿಳಿಸಿದ್ದಾರೆ. ಕಳೆದ ಭಾನುವಾರ ಡೇ-ನೈಟ್‌ ಟೆಸ್ಟ್‌ ಪಂದ್ಯ ಮೂರೇ ದಿನಕ್ಕೆ ಅಂತ್ಯಗೊಂಡಿತ್ತು. ಪಂದ್ಯದಲ್ಲಿ ಭಾರತ ಇನಿಂಗ್ಸ್‌ ಮತ್ತು 26 ರನ್‌ಗಳ ಭರ್ಜರಿ ಜಯ ದಾಖಲಿಸಿತ್ತು. ಬಳಿಕ ಲಭ್ಯವಿದ್ದ ಕೆಲವೇ ಕೆಲ ವಿಮಾನಗಳಲ್ಲಿ ಬಾಂಗ್ಲಾ ತಂಡದ ಆಟಗಾರರು ವಿವಿಧ ಭಾಗಗಳಾಗಿ ತಾಯ್ನಾಡಿಗೆ ಹಿಂದಿರುಗಿದ್ದರು. ಸೈಫ್‌ ಹಸನ್‌ ಮತ್ತು ಉಳಿದ ಆಟಗಾರರು ಸೋಮವಾರ ಹಿಂದಿರುಗಬೇಕಿತ್ತು. ಈ ಸಂದರ್ಭದಲ್ಲಿ ಭಾರತದಲ್ಲಿ ಹೆಚ್ಚುವರಿ ಅವಧಿ ಉಳಿದುಕೊಂಡ ಕಾರಣಕ್ಕೆ ಬಾಂಗ್ಲಾ ಕ್ರಿಕೆಟಿಗನನ್ನು ಡಮ್‌ ಡಮ್‌ ವಿಮಾನ ನಿಲ್ದಾಣದಲ್ಲಿ ತಡೆದು ನಿಲ್ಲಿಸಲಾಗಿತ್ತು. ಆದರೆ ವೀಸಾ ಅವಧಿ ಅಂತ್ಯಗೊಂಡಿರುವ ಕಡೆಗೆ ಬಾಂಗ್ಲಾ ಕ್ರಿಕೆಟ್ ಮಂಡಳಿಯಾಗಲಿ ಹಾಗೂ ಹಸನ್‌ ಆಗಲಿ ಗಮನ ನೀಡದೇ ಇದ್ದ ಕಾರಣಕ್ಕೆ ಇಂಥದ್ದೊಂದು ಘಟನೆ ನಡೆದಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2L3bsJH
