- ಹರೀಶ್‌ ಎಲ್‌. ತಲಕಾಡು ಮೈಸೂರು: ಜನರನ್ನು ವಂಚಿಸಲು ನಾನಾ ತಂತ್ರಗಳನ್ನು ಖದೀಮರು ನಡೆಸುವುದು ಸಾಮಾನ್ಯ. ಆದರೆ ಇಲ್ಲೊಬ್ಬ ವಂಚಕ ತಾನು ಹಾಸ್ಟೆಲ್‌ ವಾರ್ಡನ್‌ ಎಂದು ಹೇಳಿ ಕೊಂಡು ವಿದ್ಯಾರ್ಥಿಗಳಿಂದ ತನ್ನ ಖಾತೆಗೆ ಹಣ ಹಾಕುವಂತೆ ವ್ಯವಸ್ಥೆ ಮಾಡಿಕೊಂಡಿದ್ದ. ಅದಕ್ಕಾಗಿ ಗೂಗಲ್‌ ಮ್ಯಾಪ್‌ನಲ್ಲಿನ ವಿಳಾಸದಲ್ಲಿ ತಿದ್ದುಪಡಿ ಮಾಡಿದ್ದ. ಗೂಗಲ್‌ ಮ್ಯಾಪ್‌ನಲ್ಲಿದ್ದ ಸರಕಾರಿ ಹಾಸ್ಟೆಲ್‌ನ ವಿಳಾಸಕ್ಕೆ ತನ್ನ ಮೊಬೈಲ್‌ ನಂಬರ್‌ ಸೇರ್ಪಡೆಗೊಳಿಸಿ ಏಳೆಂಟು ಮಂದಿ ವಿದ್ಯಾರ್ಥಿಗಳಿಗೆ ವಂಚಿಸಿದ್ದಾನೆ. ಪ್ರತಿಯೊಬ್ಬ ವಿದ್ಯಾರ್ಥಿಯಿಂದ 2 ರಿಂದ ಮೂರು ಸಾವಿರ ರೂ. ವಸೂಲಿ ಮಾಡಿದ್ದಾನೆ. ಚಾಮರಾಜನಗರ ಜಿಲ್ಲೆ ಚಂಗವಾಡಿ ಗ್ರಾಮದ ನಿವಾಸಿ ಪಿ.ವಿಜಯ್‌(19) ಎಂಬಾತನೇ ಹಾಸ್ಟೆಲ್‌ನ ಗೂಗಲ್‌ ವಿಳಾಸವನ್ನೇ ತಿದ್ದುಪಡಿ ಮಾಡಿ ವಂಚಿಸಿದ ಭೂಪ. ನಗರದ ಆನಂದ ನಗರದಲ್ಲಿರುವ ಹಿಂದುಳಿದ ವರ್ಗಗಳ ಇಲಾಖೆಯ ಸ್ನಾತಕೋತ್ತರ ಬಾಲಕರ ವಿದ್ಯಾರ್ಥಿ ನಿಲಯದ ವಿಳಾಸ ಗೂಗಲ್‌ ಮ್ಯಾಪ್‌ನಲ್ಲಿ ಅಪ್‌ಲೋಡ್‌ ಆಗಿದ್ದು, ಹಾಸ್ಟೆಲ್‌ನ ದೂರವಾಣಿ ಸಂಖ್ಯೆ ನಮೂದಾಗದೆ ಖಾಲಿ ಇತ್ತು. ಇದನ್ನೇ ತನ್ನ ಅನುಕೂಲಕ್ಕೆ ಬಳಸಿಕೊಂಡ ವಿಜಯ್‌, ಗೂಗಲ್‌ನಲ್ಲಿ ಹಾಸ್ಟೆಲ್‌ನ ವಿಳಾಸವನ್ನು ತಿದ್ದುಪಡಿ ಮಾಡುವ ನೆಪದಲ್ಲಿ ತನ್ನ ಮೊಬೈಲ್‌ ಸಂಖ್ಯೆಯನ್ನು ಸೇರ್ಪಡೆಗೊಳಿಸಿದ್ದಾನೆ. ಮೈಸೂರಿನಲ್ಲಿ ಉನ್ನತ ವ್ಯಾಸಂಗಕ್ಕೆ ಬಂದ ಬೇರೆ ಜಿಲ್ಲೆಯ ವಿದ್ಯಾರ್ಥಿಗಳು, ಮೈಸೂರು ನಗರದಲ್ಲಿರುವ ಬಿಸಿಎಂ ಹಾಸ್ಟೆಲ್‌ಗಳ ವಿಳಾಸವನ್ನು ಗೂಗಲ್‌ ಮೂಲಕ ಪತ್ತೆ ಹಚ್ಚಿ, ವಿಳಾಸದ ಜತೆಗೆ ಇದ್ದ ಮೊಬೈಲ್‌ ನಂಬರ್‌ಗೆ ಕರೆ ಮಾಡಿದ್ದಾರೆ. ಆಗ ಕರೆ ಸ್ವೀಕರಿಸಿದ ವಿಜಯ್‌, ತಾನೇ ಹಾಸ್ಟೆಲ್‌ ವಾರ್ಡನ್‌ ಎಂದು ಹೇಳಿಕೊಂಡಿದ್ದು, ನಿಮಗೆ ಸೀಟ್‌ ಕೊಡುವುದಾಗಿ ಭರವಸೆ ನೀಡಿದ್ದಾನೆ. ಅದಕ್ಕೂ ಮುನ್ನ ಹಣ ನೀಡಬೇಕು ಎಂದು ಹೇಳಿ, ತಮ್ಮ ತಾಯಿಯ ಹೆಸರಿನಲ್ಲಿದ್ದ ಬ್ಯಾಂಕ್‌ ಖಾತೆಯ ಸಂಖ್ಯೆಯನ್ನು ನೀಡಿದ್ದಾನೆ. ಸೀಟಿಗಾಗಿ ಕಾಯುತ್ತಿದ್ದ ವಿದ್ಯಾರ್ಥಿಗಳು ಬ್ಯಾಂಕ್‌ ಖಾತೆಗೆ ಹಣ ಜಮಾ ಮಾಡುತ್ತಿದ್ದಂತೆ ಮೊಬೈಲ್‌ ಸ್ವೀಚ್‌ ಆಫ್‌ ಮಾಡಿಕೊಂಡಿದ್ದಾನೆ. ಹೀಗೆ ಏಳೆಂಟು ಮಂದಿ ವಿದ್ಯಾರ್ಥಿಗಳು ಕರೆ ಮಾಡಿದ್ದು, ವಿಜಯ್‌ ನೀಡಿದ ಬ್ಯಾಂಕ್‌ ಖಾತೆಗೆ 2ರಿಂದ 3 ಸಾವಿರ ರೂ. ಹಣ ಜಮಾ ಮಾಡಿದ್ದಾರೆ. ಸೀಟ್‌ ಸಿಗುವ ನಿರೀಕ್ಷೆಯಲ್ಲಿ ಹಾಸ್ಟೆಲ್‌ನ ಕಚೇರಿಗೆ ಬಂದ ವಿದ್ಯಾರ್ಥಿಗಳಿಗೆ ಶಾಕ್‌ ಕಾದಿತ್ತು. ಹಾಸ್ಟೆಲ್‌ನ ಮೇಲ್ವಿಚಾರಕರು ತಮಗೆ ಯಾರು ಕರೆ ಮಾಡಿಲ್ಲ. ಹಣ ಪಡೆದು ಸೀಟು ಕೊಡುವ ವ್ಯವಸ್ಥೆ ಇಲ್ಲ ಎಂದು ಹೇಳಿದ್ದಾರೆ. ಆಗ ವಿದ್ಯಾರ್ಥಿಗಳು, ತಾವು ಗೂಗಲ್‌ನಲ್ಲಿದ್ದ ಮೊಬೈಲ್‌ ನಂಬರ್‌ಗೆ ಕರೆ ಮಾಡಿರುವುದನ್ನು ಸಾಕ್ಷ್ಯಸಮೇತ ತೋರಿಸಿದ್ದಾರೆ. ಆಗ ಹಾಸ್ಟೆಲ್‌ನ ವಾರ್ಡನ್‌ ಎಲ್‌.ನಾಗೇಶ್‌ ಅವರಿಗೆ ತಮ್ಮ ಹೆಸರು ಹೇಳಿಕೊಂಡು, ಯಾರೋ ವಿದ್ಯಾರ್ಥಿಗಳಿಗೆ ವಂಚನೆ ಮಾಡಿರುವುದು ಗೊತ್ತಾಗಿದೆ. ತಕ್ಷಣ ಈ ಸಂಬಂಧ ಸೈಬರ್‌ ಕ್ರೈಂ ಠಾಣೆ ಪೊಲೀಸರಿಗೆ ದೂರು ನೀಡಿದ್ದಾರೆ. ವಿಳಾಸದಲ್ಲಿ ದಾಖಲಾಗಿದ್ದ ಮೊಬೈಲ್‌ ಸಂಖ್ಯೆಯ ಮೂಲಕ ವಿಳಾಸವನ್ನು ಪತ್ತೆ ಮಾಡಿದ ಪೊಲೀಸರು, ಆರೋಪಿಯನ್ನು ಬಂಸುವಲ್ಲಿಯಶಸ್ವಿಯಾಗಿದ್ದು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ. ವಿಚಾರಣೆ ವೇಳೆ ಬಂತ ವಿಜಯ್‌, ತಾನು ಹಾಸ್ಟೆಲ್‌ನ ವಿಳಾಸವನ್ನು ಅಪ್‌ಡೇಟ್‌ ಮಾಡುವ ನೆಪದಲ್ಲಿ ತನ್ನ ಮೊಬೈಲ್‌ ನಂಬರ್‌ ಸೇರ್ಪಡೆಗೊಳಿಸಿರುವುದಾಗಿ ಒಪ್ಪಿಕೊಂಡಿದ್ದಾನೆ. ಗೂಗಲ್‌ನಲ್ಲಿ ಇರುವ ವಿಳಾಸ ಮತ್ತು ದೂರವಾಣಿ ಸಂಖ್ಯೆಯನ್ನು ಸಂಬಂಧ ಪಟ್ಟ ಇಲಾಖೆಯ ಅಥವಾ ಸಂಸ್ಥೆಯ ಮುಖ್ಯಸ್ಥರು, ಆಗಾಗ್ಗೆ ಪರಿಶೀಲನೆ ಮಾಡಿಕೊಂಡರೆ ಇಂತಹ ವಂಚನೆಗಳನ್ನು ತಪ್ಪಿಸಬಹುದು. ಈ ಬಗ್ಗೆ ಎಚ್ಚರಿಕೆ ಅಗತ್ಯ ಎಂದು ಪೊಲೀಸರು ಮನವಿ ಮಾಡಿದ್ದಾರೆ. ಈಗಲೂ ಅದೇ ನಂಬರ್‌: ಹಾಸ್ಟೆಲ್‌ನ ವಿಳಾಸದೊಂದಿಗೆ ವಂಚಕ ಅಪ್‌ಡೇಟ್‌ ಮಾಡಿರುವ ಮೊಬೈಲ್‌ ಸಂಖ್ಯೆ ಈಗಲೂ ಇದ್ದು, ಸಂಬಂಧ ಪಟ್ಟ ಅಧಿಕಾರಿಗಳು ಕ್ರಮ ಕೈಗೊಳ್ಳದೇ ನಿರ್ಲಕ್ಷ್ಯವಹಿಸಿರುವುದು ಕಂಡು ಬಂದಿದೆ.
from India & World News in Kannada | VK Polls https://ift.tt/2L1GYrk
