ಅಡಿಲೇಡ್‌: ಭರ್ಜರಿ ಲಯದಲ್ಲಿರುವ ತಂಡದ ಆರಂಭಿಕ ಬ್ಯಾಟ್ಸ್‌ಮನ್‌ (166*) ಮತ್ತು ಅಗ್ರ ಕ್ರಮಾಂಕದ ಬ್ಯಾಟರ್‌ ಮಾರ್ನಸ್‌ ಲಾಬುಶೇನ್‌ (126*) ಇಲ್ಲಿ ನಡೆಯುತ್ತಿರುವ ಪ್ರವಾಸಿ ಪಾಕಿಸ್ತಾನ ವಿರುದ್ಧ ಪಂದ್ಯದಲ್ಲಿ ಶತಕ ಬಾರಿಸುವ ಮೂಲಕ, ಸರಣಿಯಲ್ಲಿ ಬ್ಯಾಕ್‌ ಟು ಬ್ಯಾಕ್‌ ಸೆಂಚುರಿ ಸಿಡಿಸಿದ್ದಾರೆ. ಅಡಿಲೇಡ್‌ ಓವಲ್‌ ಕ್ರೀಡಾಂಗಣದಲ್ಲಿ ಶುಕ್ರವಾರ ಆರಂಭವಾದ ಮೂರು ಪಂದ್ಯಗಳ ಸರಣಿಯ ಎರಡನೇ ಟೆಸ್ಟ್‌ ಪಂದ್ಯದಲ್ಲಿ ಟಾಸ್‌ ಗೆದ್ದು ಬ್ಯಾಟಿಂಗ್‌ ಆಯ್ಕೆ ಮಾಡಿಕೊಂಡ ಆಸ್ಟ್ರೇಲಿಯಾ ತಂಡ ಮೊದಲ ದಿನದಾಟದ ಅಂತ್ಯಕ್ಕೆ 73 ಓವರ್‌ಗಳಲ್ಲಿ 1 ವಿಕೆಟ್‌ ನಷ್ಟಕ್ಕೆ 302 ರನ್‌ಗಳನ್ನು ದಾಖಲಿಸಿ ಬೃಹತ್‌ ಮೊತ್ತದ ಕಡೆಗೆ ಮುಖಮಾಡಿದೆ. ಟೆಸ್ಟ್‌ ಪಂದ್ಯದಲ್ಲಿ ಪಾಕ್‌ ಬೌಲರ್‌ಗಳನ್ನು ಅಟ್ಟಾಡಿಸಿದ ವಾರ್ನರ್‌ ಮತ್ತು ಮಾರ್ನಸ್‌, 2ನೇ ವಿಕೆಟ್‌ಗೆ ಮುರಿಯದ 294 ರನ್‌ಗಳ ಭರ್ಜರಿ ಜೊತೆಯಾಟವಾಡಿದ್ದಾರೆ. ದಿನದಾಟದ ಅಂತ್ಯಕ್ಕೆ ಇನ್ನೂ 17 ಓವರ್‌ಗಳು ಬಾಕಿ ಇತ್ತಾದರೂ ಮಳೆ ಸುರಿದ ಕಾರಣ ಕೊಂಚ ಬೇಗನೇ ದಿನದಾಟವನ್ನು ಅಂತ್ಯಗೊಳಿಸಲಾಯಿತು. ಪಾಕ್‌ ಬೌಲರ್‌ಗಳ ಕಳಪೆ ಬೌಲಿಂಗ್‌ನ ಸಂಪೂರ್ಣ ಲಾಭ ಪಡೆದ ವಾರ್ನರ್‌, 72.81ರ ಸ್ಟ್ರೈಕ್‌ರೇಟ್‌ನಲ್ಲಿ ಬ್ಯಾಟ್‌ ಬೀಸುವ ಮೂಲಕ 228 ಎಸೆತಗಳಲ್ಲಿ 19 ಫೋರ್‌ಗಳನ್ನು ಒಳಗೊಂಡ 166 ರನ್‌ಗಳನ್ನು ದಾಖಲಿಸಿ ದ್ವಿಶತಕದ ಕಡೆಗೆ ಮುನ್ನುಗ್ಗಿದ್ದಾರೆ. ಮತ್ತೊಂದೆಡೆ ಅಷ್ಟೇ ವೈಭವದ ಬ್ಯಾಟಿಂಗ್‌ ನಡೆಸಿದ ಲಾಬುಶೇನ್‌ ಕೂಡ 61.46ರ ಸ್ಟ್ರೈಕ್‌ರೇಟ್‌ನಲ್ಲಿ 205 ಎಸೆತಗಳಲ್ಲಿ 126* ರನ್‌ಗಳನ್ನು ದಾಖಲಿಸಿ ದೊಡ್ಡ ಇನಿಂಗ್ಸ್‌ ಆಡುವುದನ್ನು ಎದುರು ನೋಡುತ್ತಿದ್ದಾರೆ. ದಿನದಾಟದಲ್ಲಿ ಪಾಕಿಸ್ತಾನಕ್ಕೆ ಯುವ ವೇಗದ ಬೌಲರ್‌ ಶಹೀನ್‌ ಶಾ ಅಫ್ರಿದಿ ಏಕಮಾತ್ರ ಯಶಸ್ಸು ತಂದುಕೊಟ್ಟರು. ಆಸೀಸ್‌ನ ಆರಂಭಿಕ ಬ್ಯಾಟ್ಸ್‌ಮನ್‌ ಜೋ ಬರ್ನ್ಸ್‌ (4) ಅವರನ್ನು ಆರಂಭದಲ್ಲೇ ಔಟ್‌ ಮಾಡುವಲ್ಲಿ ಶಹೀನ್‌ ಶಾ ಅಫ್ರಿದಿ ಯಶಸ್ವಿಯಾದರು. ಸಂಕ್ಷಿಪ್ತ ಸ್ಕೋರ್‌ ಆಸ್ಟ್ರೇಲಿಯಾ: 73 ಓವರ್‌ಗಳಲ್ಲಿ 1 ವಿಕೆಟ್‌ ನಷ್ಟಕ್ಕೆ 302 (ಡೇವಿಡ್‌ ವಾರ್ನರ್‌ ಔಟಾಗದೆ 166, ಜೋ ಬರ್ನ್ಸ್‌ 4, ಮಾರ್ನಸ್‌ ಲಾಬುಶೇನ್‌ ಔಟಾಗದೆ 126; ಶಹೀನ್‌ ಶಾ ಅಫ್ರಿದಿ 48ಕ್ಕೆ 1).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/35JG4Yp
