ಬೆಂಗಳೂರು: ಸಿಲಿಕಾನ್‌ ಸಿಟಿ ಬೆಂಗಳೂರು ನಗರ ವ್ಯಾಪ್ತಿಯಲ್ಲಿ ಹೆಚ್ಚುತ್ತಿರುವ ಸೈಬರ್‌ ಅಪರಾಧಗಳ ದಾಖಲು ಮತ್ತು ತನಿಖೆಯ ಉದ್ದೇಶದಿಂದ ಸ್ಥಾಪಿಸಲಾಗಿದ್ದ ಏಕೈಕ ಸೈಬರ್‌ ಕ್ರೈಂ ಪೊಲೀಸ್‌ ಠಾಣೆ ದೂರುಗಳ ಪ್ರವಾಹದಿಂದ ತತ್ತರಿಸಿದ್ದು, ಬಾಗಿಲು ಹಾಕಲಾಗಿದೆ. ಇನ್ನು ಮುಂದೆ ನಗರ ವ್ಯಾಪ್ತಿಯ ಸೈಬರ್‌, ಆನ್‌ಲೈನ್‌ ದೂರುಗಳನ್ನು ಸಮೀಪದ ಪೊಲೀಸ್‌ ಠಾಣೆಗಳಲ್ಲಿ ದಾಖಲಿಸಬೇಕು. ಇಲ್ಲವೇ, ಗೆ ಭೇಟಿ ನೀಡಿ ದಾಖಲಿಸಬಹುದು. ಕಳೆದ ಕೆಲ ದಿನಗಳಿಂದ ದೂರು ನೀಡಲು ಇನ್‌ಫೆಂಟ್ರಿ ರಸ್ತೆಯಲ್ಲಿರುವ ಪೊಲೀಸ್‌ ಆಯುಕ್ತರ ಕಚೇರಿ ಆವರಣದಲ್ಲಿನ ಸೈಬರ್‌ ಠಾಣೆಗೆ ಬರುತ್ತಿರುವ ದೂರುದಾರರಿಗೆ ಠಾಣೆಗೆ ಬಾಗಿಲು ಹಾಕಿರುವ ಫಲಕ ಕಾಣಿಸಿದೆ. ರಾಜ್ಯದ ಎಲ್ಲ ಠಾಣೆಗಳ ಅಪರಾಧ ಪ್ರಕರಣಗಳು (ಎಫ್‌ಐಆರ್‌) ಪೊಲೀಸ್‌ ಇಲಾಖೆಯ ಐಟಿ ಸೆಲ್‌ನ ವೆಬ್‌ಸೈಟ್‌ ಮೂಲಕ ಅಪ್‌ಲೋಡ್‌ ಮಾಡಲಾಗುತ್ತದೆ. ಪ್ರತಿ ಠಾಣೆಯ ಎಫ್‌ಐಆರ್‌ಗಳ ಸಾಮರ್ಥ್ಯ 9,999 ಮಾತ್ರ ಇದೆ. 10,000 ಮೇಲ್ಪಟ್ಟು ಅಂಕಿಗಳನ್ನು ಐಟಿ ಸೆಲ್‌ ವೆಬ್‌ಸೈಟ್‌ನಲ್ಲಿ ಸ್ವೀಕರಿಸುವಂತಹ ವ್ಯವಸ್ಥೆ ಇಲ್ಲ. ಇತ್ತೀಚೆಗೆ 10 ಸಾವಿರ ಗಡಿಯನ್ನು ನಗರದ ಸೈಬರ್‌ ಕ್ರೈಂ ತಲುಪಿದೆ. ಹೀಗಾಗಿ, ಮತ್ತಷ್ಟು ದೂರುಗಳನ್ನು ಸ್ವೀಕರಿಸಿ ಐಟಿ ಸೆಲ್‌ ವೆಬ್‌ಸೈಟ್‌ಗೆ ಅಪ್‌ಲೋಡ್‌ ಮಾಡಲು ಆಗುತ್ತಿಲ್ಲ. ಈ ಕಾರಣದಿಂದ ಸಮೀಪದ ಠಾಣೆಗೆ ದೂರು ನೀಡಿ ಅಥವಾ ವೆಬ್‌ಸೈಟ್‌ನಲ್ಲಿ ದೂರು ದಾಖಲಿಸಿ ಎಂದು ಫಲಕಗಳನ್ನು ಅಂಟಿಸಲಾಗಿದೆ. ಹೀಗಾಗಿ, ಸಾರ್ವಜನಿಕರು ಸೈಬರ್‌ ಕ್ರೈಂ ಠಾಣೆಗೆ ಬಂದು, ವಾಪಸ್‌ ಹೋಗುತ್ತಿದ್ದಾರೆ. ಸಿಬ್ಬಂದಿ ಮತ್ತು ಮೂಲ ಸೌಕರ್ಯಗಳ ಕೊರತೆ: ಸೈಬರ್‌ ಕ್ರೈಂಗಳ ಕುರಿತು ತರಬೇತಿ ಹೊಂದಿದ ಸಿಬ್ಬಂಧಿಯನ್ನು ಒಳಗೊಂಡಂತೆ 2017ರ ಮಾರ್ಚ್‌ ತಿಂಗಳಲ್ಲಿ ಪೊಲೀಸ್‌ ಆಯುಕ್ತರ ಕಚೇರಿ ಆವರಣದಲ್ಲಿ ಠಾಣೆಯನ್ನು ಆರಂಭಿಸಲಾಗಿತ್ತು. ಸಿಲಿಕಾನ್‌ ಸಿಟಿಯಲ್ಲಿ ಆನ್‌ಲೈನ್‌ ವಹಿವಾಟುಗಳು ಗಗನಕ್ಕೇರಿರುವ ಜೊತೆಗೆ ಅಪರಾಧ ಪ್ರಕರಣಗಳ ಸಂಖ್ಯೆಯೂ ಗಗನಕ್ಕೇರಿ ಹತ್ತು ಸಾವಿರಕ್ಕೆ ತಲುಪಿದೆ. ಕಾಗದದಲ್ಲೇ ಉಳಿದ 7 ಸಿಇಎನ್‌ ಠಾಣೆಗಳು ಹಾಲಿ ಇರುವ ಒಂದು ಠಾಣೆಯ ಮೇಲಿನ ಒತ್ತಡ ಕಡಿಮೆ ಮಾಡಲು ಮತ್ತು ಪರಿಣಾಮಕಾರಿ ತನಿಖೆಯ ಉದ್ದೇಶದಿಂದ ನಗರದ 9 ಪೊಲೀಸ್‌ ವಿಭಾಗಗಳ ಪೈಕಿ 7 ಕಡೆ ತಲಾ ಒಂದರಂತೆ 'ಸೈಬರ್‌, ಎಕಾನಮಿಕ್‌ ಮತ್ತು ನಾರ್ಕೋಟಿಕ್ಸ್‌'(ಸಿಇಎನ್‌) ಠಾಣೆ ತೆರೆಯಲು ರಾಜ್ಯ ಸರಕಾರ ಘೋಷಣೆ ಮಾಡಿದೆ. ಠಾಣೆಗಳ ಆರಂಭಕ್ಕೆ ಸಂಬಂಧಿಸಿ ಕಳೆದ ನಾಲ್ಕೈದು ವರ್ಷಗಳಿಂದ ಸರಕಾರಗಳು ಭರವಸೆ ನೀಡುತ್ತಲೇ ಇವೆ. ಆದರೆ, ಅಗತ್ಯ ಹಣ, ಸಿಬ್ಬಂದಿ, ಮೂಲಸೌಕರ್ಯ ಹಾಗೂ ಠಾಣೆಗೆ ಜಾಗವನ್ನು ಸರಕಾರ ಒದಗಿಸದ ಕಾರಣ ಸಿಇಎನ್‌ ಠಾಣೆಗಳು ಇಂದಿಗೂ ಕಾಗದದಲ್ಲೇ ಉಳಿದುಕೊಂಡಿವೆ. ತಾಂತ್ರಿಕ ಕಾರಣದಿಂದ ದೂರುಗಳನ್ನು ಸ್ವೀಕರಿಸುತ್ತಿಲ್ಲ. ದೂರುದಾರರು ಸಮೀಪದ ಠಾಣೆಗಳಿಗೆ ತೆರಳಿ ದೂರು ಸಲ್ಲಿಸಬಹುದು. - ಸಂದೀಪ್‌ ಪಾಟೀಲ್‌, ಜಂಟಿ ಆಯುಕ್ತ, ಅಪರಾಧ ವಿಭಾಗ.
from India & World News in Kannada | VK Polls https://ift.tt/2QWafr9
