ಹೊಸದಿಲ್ಲಿ: ಗಂಗೂಲಿ ನೇತೃತ್ವದ ಆಡಳಿತ ಮಂಡಳಿಯ ಮೊದಲ ವಾರ್ಷಿಕ ಮಹಾಸಭೆ ಡಿ.1ರಂದು ನಡೆಯಲಿದ್ದು, ನೂತನ ಸಂವಿಧಾನಲ್ಲಿರುವ 'ಕೂಲಿಂಗ್ ಆಫ್, (ವಿಶ್ರಾಂತಿ ಅವಧಿ) ನಿಯಮಕ್ಕೆ ತಿದ್ದು ಪಡಿಗೆ ಸಿದ್ಧತೆಗಳನ್ನು ನಡೆಸಿಕೊಳ್ಳಲಾಗಿದೆ. ವಾರ್ಷಿಕ ಮಹಾಸಭೆಯ ಕಾರ್ಯಸೂಚಿಯನ್ನು ಆಡಳಿತ ಮಂಡಳಿ ಬಿಡುಗಡೆ ಮಾಡಿದ್ದು, ಲೋಧಾ ಸಮಿತಿ ಶಿಫಾರಸಿನಂತೆ ರಚಿಸಿರುವ ಸಂವಿಧಾನದ ಕೆಲವು ನಿಯಮಗಳಿಗೆ ಕತ್ತರಿ ಪ್ರಯೋಗ ಮಾಡುವ ಸಾಧ್ಯತೆಗಳಿವೆ. ಅದರಲ್ಲೂ ಪ್ರಮುಖವಾಗಿ 3 ವರ್ಷಗಳ ಅವಧಿಯ 'ಕೂಲಿಂಗ್ ಆಫ್ ಪೀರಿಯೆಡ್‌' ನಿಯಮಕ್ಕೆ ತಿದ್ದುಪಡಿ ತರುವ ಮೂಲಕ, ಹಾಲಿ ಅಧ್ಯಕ್ಷ ಸೌರವ್ ಗಂಗೂಲಿ ಅವರ ಕ್ರಿಕೆಟ್ ಅನುಭವವನ್ನು ಇನ್ನಷ್ಟು ವರ್ಷ ಸದ್ವಿನಿಯೋಗ ಮಾಡುವ ಬಗ್ಗೆ ಹೆಚ್ಚಿನ ಚಿಂತನೆ ನಡೆಯಲಿದೆ. ಬಿಸಿಸಿಐ ಖಜಾಂಚಿ ಅರುಣ್‌ ಧುಮಾಲ್‌ ಹೊಸ ಕಾರ್ಯತಂತ್ರದ ಕುರಿತು ಸ್ಪಷ್ಟನೆ ನೀಡಿದ್ದು, ಸಂವಿಧಾನದ ಕೆಲವು ಕಠಿಣ ನಿಯಮಗಳನ್ನು ಸಡಿಲಗೊಳಿಸಲು ಮಂಡಳಿಯ ಸದಸ್ಯರು ಮುಂದಾಗಿದ್ದಾರೆ. ಆದರೆ, ಗರಿಷ್ಠ 70 ವರ್ಷ ವಯೋಮಿತಿಯ ನಿಯಮಕ್ಕೆ ಧಕ್ಕೆ ತರುವುದಿಲ್ಲ,'' ಎಂದು ಹೇಳಿದ್ದಾರೆ. ಹೊಸ ಸಂವಿಧಾನದ ಪ್ರಕಾರ ಬಿಸಿಸಿಐ ಅಥವಾ ರಾಜ್ಯ ಸಮಿತಿಯಲ್ಲಿ ಕಾರ್ಯನಿರ್ವಹಿಸಿರುವ ವ್ಯಕ್ತಿಯೊಬ್ಬರು ಗರಿಷ್ಠ ಆರು ವರ್ಷ ಕಾಲ ಹುದ್ದೆಯಲ್ಲಿರಬಹುದು. ಇನ್ನೊಂದು ಅವಧಿಗೆ ಅವರು ಸ್ಪರ್ಧಿಸ ಬೇಕಾದರೆ 3 ವರ್ಷಗಳ ಕೂಲಿಂಗ್ ಆಫ್ ಪೀರಿಯೆಡ್‌ ದಾಟಬೇಕು ಎನ್ನುವ ನಿಯಮವಿದೆ. ಇದರ ಅನ್ವಯ ಹಾಲಿ ಅಧ್ಯಕ್ಷ ಗಂಗೂಲಿಯ ಆಡಳಿತಾವಧಿ 9 ತಿಂಗಳು ಮಾತ್ರ. ಹೀಗಾಗಿ ನಿಯಮವನ್ನೇ ಸಡಿಲಿಕೆ ಮಾಡಲು ಆರಂಭದಿಂದಲೇ ಚಿಂತನೆ ನಡೆಸಲಾಗಿತ್ತು. ಅದನ್ನೀಗ ಜಾರಿಗೆ ತರಲು ಮುಂದಾಗಿದ್ದಾರೆ. ''ಲೋಧಾ ಶಿಫಾರಸಿನ ಪ್ರಕಾರ ರಚಿಸಿರುವ ಕೆಲವು ನಿಯಮಗಳನ್ನು ಬದಲಾಯಿಸಲು ಸವೋಚ್ಚ ನ್ಯಾಯಾಲಯವೇ ಸಮ್ಮತಿಸಿದೆ. ಹೀಗಾಗಿ ಹಿರಿಯ ಆಡಳಿತಗಾರರ ಅನುಭವನ್ನು ಇನ್ನಷ್ಟು ವರ್ಷ ಬಳಸಿಕೊಳ್ಳುವುದಕ್ಕೆ ಕೆಲವು ನಿಯಮಗಳ ಬದಲಾವಣೆ ಅನಿವಾರ್ಯ,'' ಎಂದು ಧುಮಾಲ್‌ ಹೇಳಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/37zZiS6
