ಲಂಡನ್: ವೆಸ್ಟ್‌ಇಂಡೀಸ್‌ನ ದೈತ್ಯ ಬ್ಯಾಟ್ಸ್‌ಮನ್ , ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಹೆಚ್ಚಿನ ಯಶಸ್ಸು ಗಳಿಸಿದ್ದಾರೆ. ಆದರೂ ತಮ್ಮ ಕೆರಿಯರ್ ಉದ್ದಕ್ಕೂ ಅನೇಕ ಏಳು-ಬೀಳುಗಳನ್ನು ಕಂಡಿದ್ದಾರೆ. ಈಗಲೂ ಒಂದೆರಡು ಪಂದ್ಯಗಳಲ್ಲಿ ಉತ್ತಮ ನಿರ್ವಹಣೆ ನೀಡದಿದ್ದಲ್ಲಿ ತಂಡದ ಪಾಲಿಗೆ ತಾವೊಬ್ಬ ಹೊರೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. "ನಾನು ಯಾವುದೇ ನಿರ್ದಿಷ್ಟ ತಂಡದ ಬಗ್ಗೆ ಮಾತನಾಡುತ್ತಿಲ್ಲ. ಕಳೆದ ಕೆಲವು ವರ್ಷಗಳಿಂದ ಫ್ರಾಂಚೈಸಿ ಕ್ರಿಕೆಟ್‌ನಲ್ಲಿ ಇದನ್ನು ಮನಗಂಡಿದ್ದೇನೆ. ಎರಡು, ಮೂರು ಅಥವಾ ನಾಲ್ಕು ಬಾರಿ ರನ್ ಗಳಿಸದಿದ್ದರೆ ತಂಡದ ಪಾಲಿಗೆ ಹೊರೆಯಾಗುತ್ತೇನೆ" ಎಂದು ಕ್ರಿಸ್ ಗೇಲ್ ಮನದಾಳದ ಮಾತನ್ನು ಆಡಿದ್ದಾರೆ. "ಓರ್ವ ನಿರ್ದಿಷ್ಟ ಆಟಗಾರ ಮಾತ್ರ ತಂಡಕ್ಕೆ ಹೊರೆಯಾಗುತ್ತಾನೆ. ತದಾ ಬಳಿಕ ಕಲಹ ಉಂಟಾಗುತ್ತದೆ. ನನಗೆ ಯಾವುದೇ ಗೌರವ ಸಿಗುವುದಿಲ್ಲ. ಆ ತಂಡಕ್ಕಾಗಿ ನೀಡಿದ ಕೊಡುಗೆಯನ್ನು ಜನರು ಮರೆತು ಬಿಡುತ್ತಾರೆ. ನನಗೆ ಗೌರವ ಸಿಗುವುದಿಲ್ಲ" ಎಂದು ಕೊರಗಿದರು. ಜಾನ್ಸಿ ಸೂಪರ್ ಲೀಗ್ ಟೂರ್ನಿಯಲ್ಲಿ ಜೊಝಿ ಸ್ಟಾರ್ಸ್ ತಂಡವನ್ನು ಪ್ರತಿನಿಧಿಸಿದ ಕ್ರಿಸ್ ಗೇಲ್ ಸತತ ವೈಫಲ್ಯವನ್ನು ಅನುಭವಿಸಿದ್ದರು. ಪರಿಣಾಮ ಜೊಝಿ ತಂಡವು ತಾವಾಡಿದ ಎಲ್ಲ ಆರು ಪಂದ್ಯಗಳಲ್ಲೂ ಸೋಲನ್ನು ಅನುಭವಿಸಿತ್ತು. "ಫಾರ್ಮ್ ಕೆಟ್ಟರೆ ತಮಗೆ ಯಾವುದೇ ರೀತಿಯ ಗೌರವ ಸಿಗುವುದಿಲ್ಲ. ತಂಡದ ಪಾಲಿಗೆ ಅತ್ಯಂತ ಕೆಟ್ಟ ಆಟಗಾರನಾಗಿ ಪರಿಣಮಿಸುತ್ತೇನೆ" ಎಂದು ಗೇಲ್ ಬೇಸರ ತೋಡಿಕೊಂಡರು. "ಈ ಫ್ರಾಂಚೈಸಿ ಬಗ್ಗೆ ಮಾತನಾಡುತ್ತಿಲ್ಲ. ಸಾಮಾನ್ಯವಾಗಿ ಹೇಳುತ್ತಿದ್ದೇನೆ. ಆಟಗಾರರಿಂದಲೂ ಗೌರವ ಸಿಗುತ್ತಿಲ್ಲ. ಆಟಗಾರರು, ಮ್ಯಾನೇಜ್‌ಮೆಂಟ್, ಮಂಡಳಿ ಸದಸ್ಯರೇ ಆಗಿರಲಿ ಯಾರಿಂದಲೂ ಗೌರವ ಸಿಗುವುದಿಲ್ಲ. ಒಮ್ಮೆ ಗೇಲ್ ಫಾರ್ಮ್ ಕೆಟ್ಟರೆ ಅಲ್ಲಿಗೆ ಕೆರಿಯರ್ ಮುಗಿಯಿತು. ಎಲ್ಲರ ಪಾಲಿಗೆ ಅತ್ಯಂತ ಕೆಟ್ಟ ಆಟಗಾರನಾಗಿ ಬಿಡುತ್ತಾರೆ. ಆದರೆ ಈ ಎಲ್ಲ ವಿಚಾರಗಳಿಂದ ಹೊರಬಂದಿದ್ದೇನೆ. ಇಂತಹ ವಿಚಾರಗಳನ್ನು ನಾನು ನಿರೀಕ್ಷೆ ಮಾಡುತ್ತೇನೆ. ಈ ಸಂಗತಿಗಳೊಂದಿಗೆ ಬದುಕಿದ್ದೇನೆ" ಎಂದು ಸೇರಿಸಿದರು. ಅದೇ ಹೊತ್ತಿಗೆ ಇಂದೊಂದು ಚಾಂಪಿಯನ್ ತಂಡವಲ್ಲ (ಜೊಝಿ) ಎಂದು ಗೇಲ್ ಹೇಳಿದರು. ಆದರೆ ಎಲ್ಲೋ ಒಂದು ಕಡೆ ತಪ್ಪು ಸಂಭವಿಸಿದೆ. ಇದನ್ನು ಪತ್ತೆ ಹಚ್ಚಿ ಉತ್ತಮ ಪ್ರದರ್ಶನ ನೀಡುವುದರತ್ತ ಗಮನ ಹರಿಸಬೇಕಿದೆ ಎಂದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2DeSF9J
