ಮುಂಬಯಿ: ಮಹಾರಾಷ್ಟ್ರಕ್ಕೀಗ ಇಬ್ಬರು ಸಿಎಂ! ಗುರುವಾರ ಸಂಜೆ ಮಹಾರಾಷ್ಟ್ರದ ನೂತನ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಲಿದ್ದಾರೆ. ಆದ್ರೆ, ಆಗಿ ಉದ್ಧವ್ ಠಾಕ್ರೆ ಪುತ್ರ ಈಗಾಗಲೇ ಕೆಲಸ ಶುರು ಮಾಡಿಬಿಟ್ಟಿದ್ದಾರೆ! ಹಾಗೆ ನೋಡಿದ್ರೆ, ಠಾಕ್ರೆ ಕುಟುಂಬದ ಮೊದಲ ಹಾಗೂ ಏಕೈಕ ಚುನಾಯಿತ ಶಾಸಕ ಎಂಬ ಹೆಗ್ಗಳಿಕೆಯೂ ಆದಿತ್ಯ ಠಾಕ್ರೆಗೆ ಇದೆ. ಹೀಗಾಗಿ, ಸಿಎಂ ಉದ್ಧವ್ ಠಾಕ್ರೆ ಸಂಪುಟದಲ್ಲಿ ಕೇವಲ ಸಚಿವನಾಗಿರದೆ, ಸಚಿವ ಸಂಪುಟದ ಹೊರಗೆ ನಿಂತು ಸೂಪರ್ ಸಿಎಂ ಆಗಿ ಕೆಲಸ ಮಾಡಲಿದ್ದಾರೆ ಆದಿತ್ಯ ಠಾಕ್ರೆ! ಒಂದೇ ಕುಟುಂಬದ ಇಬ್ಬರು ವ್ಯಕ್ತಿಗಳು ಮಹಾರಾಷ್ಟ್ರದ ಸಚಿವ ಸಂಪುಟದಲ್ಲಿ ಕಾರ್ಯ ನಿರ್ವಹಿಸೋದು ಪಕ್ಷದ ಇಮೇಜ್‌ಗೂ ಧಕ್ಕೆ ಎಂಬ ಅಭಿಪ್ರಾಯವಿದೆ. ಹೀಗಾಗಿ, ಸಚಿವ ಸಂಪುಟದಿಂದ ದೂರ ಉಳಿಯಲಿರುವ ಆದಿತ್ಯ ಠಾಕ್ರೆ, ನೇರವಾಗಿ ಸರ್ಕಾರ ನಡೆಸುವ ಡ್ರೈವಿಂಗ್ ಸೀಟ್‌ನಲ್ಲೇ ಕೂರಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಪಕ್ಷ ಹಾಗೂ ಸರ್ಕಾರದ ನಡುವಣ ಸಮನ್ವಯತೆ, ರಾಜ್ಯಾದ್ಯಂತ ಪ್ರತಿ ಜಿಲ್ಲೆಗಳಲ್ಲೂ ಪಕ್ಷದ ಕಾರ್ಯಕರ್ತರ ಭೇಟಿ, ಬಿಜೆಪಿ ರೀತಿಯಲ್ಲೇ ಶಿವಸೇನೆಯಲ್ಲೂ ‘ಕೇಡರ್‌’ ಸಂಸ್ಕೃತಿಯನ್ನು ಸಮರ್ಪಕವಾಗಿ ಜಾರಿ ಮಾಡೋದು ಸೇರಿದಂತೆ ಪಕ್ಷ ಹಾಗೂ ಸರ್ಕಾರದ ನಡುವಣ ಏಕೈಕ ಸಂಪರ್ಕ ಸೇತುವಾಗಿ ಆದಿತ್ಯ ಠಾಕ್ರೆ ತಮ್ಮ ಇಮೇಜ್ ವೃದ್ಧಿಸಿಕೊಳ್ಳಲಿದ್ದಾರೆ. ವರ್ಲಿ ವಿಧಾನಸಭಾ ಕ್ಷೇತ್ರದ ಶಾಸಕರಾಗಿರುವ ಆದಿತ್ಯ ಠಾಕ್ರೆಗೆ ಕೇವಲ 29 ವರ್ಷ ವಯಸ್ಸು. ಹೀಗಾಗಿ, ಸಚಿವರ ರೇಸ್‌ನಲ್ಲಿ ಅವರ ಹೆಸರು ಇಲ್ಲ. ಏಕನಾಥ್ ಶಿಂಧೆ, ಸಂಜಯ್ ರಾಥೋಡ್, ಆಶೀಶ್ ಜೇಸ್ವಾಲ್‌ರಂಥಾ ನಾಯಕರ ಹೆಸರು ಶಿವಸೇನೆಯ ಸಂಭಾವ್ಯ ಸಚಿವರ ಪಟ್ಟಿಯಲ್ಲಿದೆ.
from India & World News in Kannada | VK Polls https://ift.tt/2QXq6G3
