ಸೂರತ್: ದೇಶೀಯ ಚುಟುಕು ಕ್ರಿಕೆಟಿನ ರಾಜ ‘ಸೈಯದ್ ಮುಷ್ತಾಕ್ ಅಲಿ ಟ್ರೋಫಿ’ ಟ್ವೆಂಟಿ20 ಟೂರ್ನಿ ಇದೀಗ ನಾಕೌಟ್‌ ಹಂತ ಪ್ರವೇಶಿಸಿದ್ದು, ಶುಕ್ರವಾರ ಎರಡು ಸೆಮಿಫೈನಲ್ ಪಂದ್ಯಗಳಿಗೆ ಇಲ್ಲಿನ ಲಾಲಾಭಾಯ್‌ ಕಂಟ್ರ್ಯಾಕ್ಟರ್‌ ಸ್ಟೇಡಿಯಂ ವೇದಿಕೆ ಒದಗಿಸುತ್ತಿದೆ. ಮೊದಲ ಸೆಮಿಫೈನಲ್‌ನಲ್ಲಿ ಕರ್ನಾಟಕ ತಂಡ ಹರಿಯಾಣ ಬಳಗದ ಸವಾಲು ಎದುರಿಸಲಿದ್ದರೆ, ಎರಡನೇ ಸೆಮಿಫೈನಲ್‌ನಲ್ಲಿ ತಮಿಳುನಾಡು ತಂಡಕ್ಕೆ ರಾಜಸ್ಥಾನ ಪಾಳಯದಿಂದ ಕಠಿಣ ಸ್ಪರ್ಧೆ ಎದುರಾಗಲಿದೆ. ಸತತ 15 ಪಂದ್ಯ ಗೆದ್ದು ದಾಖಲೆ ಬರೆದಿದ್ದ ಕರ್ನಾಟಕ ತಂಡ, ಲೀಗ್‌ ಹಂತದಲ್ಲಿ ಬರೋಡಾ ವಿರುದ್ಧ ಸೋಲುವುದರೊಂದಿಗೆ ಗೆಲುವಿನ ಸರಪಳಿ ಕಡಿದುಕೊಂಡಿತ್ತು. ಆದರೂ, ಗ್ರೂಪ್‌ ಹಂತದಲ್ಲಿ ಆಡಿದ ಆರು ಪಂದ್ಯಗಳಲ್ಲಿ 5-1ರ ಜಯಾಪಜಯ ಹಾಗೂ ನೆಟ್‌ ರನ್‌ರೇಟ್‌ ಆಧಾರದ ಮೇಲೆ ಮನೀಶ್ ಪಾಂಡೆ ಬಳಗ ಬರೋಡಾ ನಂತರ ದ್ವಿತೀಯ ಸ್ಥಾನಿಯಾಗಿ ಸೂಪರ್‌ ಲೀಗ್‌ಗೆ ತೇರ್ಗಡೆಗೊಂಡಿತ್ತು. ಬಳಿಕ ಸೂಪರ್‌ ಲೀಗ್‌ನಲ್ಲೂ ಮಿಂಚಿದ ಕಳೆದ ಬಾರಿಯ ಚಾಂಪಿಯನ್‌ ತಂಡ, ಮೂರು ಪಂದ್ಯಗಳಲ್ಲಿ ಜಯಿಸಿತು. ಆದರೆ, ಕೊನೆಯ ಪಂದ್ಯದಲ್ಲಿ ಮುಂಬಯಿಗೆ ಶರಣಾಯಿತು. ಹೀಗಾಗಿ ಸೆಮಿಫೈನಲ್ಸ್‌ ಪ್ರವೇಶಕ್ಕಾಗಿ ಮುಂಬಯಿ ಮತ್ತು ಪಂಜಾಬ್‌ ನಡುವಣ ಸೂಪರ್‌ ಲೀಗ್‌ನ ಕೊನೆಯ ಪಂದ್ಯದ ಫಲಿತಾಂಶವ ನ್ನು ಅವಲಂಬಿಸುವಂತಾಯಿತು. ಆ ಪಂದ್ಯದಲ್ಲಿ ಮುಂಬಯಿ ತಂಡ 243 ರನ್‌ಗಳ ಶಿಖರವನ್ನೇ ನಿರ್ಮಿಸಿತು. ಆದರೆ, ಸೆಮಿಫೈನಲ್ಸ್‌ ಪ್ರವೇಶಿಸಬೇಕಿದ್ದರೆ ಸೂರ್ಯಕುಮಾರ್‌ ಯಾದವ್‌ ಬಳಗ ಪಂಜಾಬ್‌ ತಂಡವನ್ನು 150 ರನ್‌ಗಳೊಳಗೆ ಕಟ್ಟಿಹಾಕಲೇಬೇಕಿತ್ತು. ಗುರಿ ಬೆನ್ನಟ್ಟಿದ ಪಂಜಾಬ್‌ ತಂಡ 221 ರನ್‌ ಕಲೆಹಾಕಿ ಮುಂಬಯಿ ದಾರಿಗೆ ಮುಳ್ಳಾಯಿತು. ವಿಜೇತ ಮುಂಬಯಿ ತಂಡ 12 ಅಂಕ ಕಲೆಹಾಕಿತು. ಇದೇ ವೇಳೆ ಕರ್ನಾಟಕ ಮತ್ತು ತಮಿಳುನಾಡು ತಂಡಗಳೂ ತಲಾ 12 ಅಂಕ ಕಲೆಹಾಕಿದ್ದರಿಂದ ಉಪಾಂತ್ಯ ಪ್ರವೇಶಕ್ಕೆ ನೆಟ್‌ ರನ್‌ರೇಟ್‌ ಮಾನದಂಡವಾಯಿತು. ಈ ಸ್ಪರ್ಧೆಯಲ್ಲಿ ಕರ್ನಾಟಕ ತಂಡ (+0.762) ಮುಂಬಯಿಗಿಂತ (- 0.194) ಮೇಲುಗೈ ಸಾಧಿಸಿ ಬಿ ಗುಂಪಿನಿಂದ 2ನೇ ಸ್ಥಾನಿಯಾಗಿ ಅಂತಿಮ 4ರ ಘಟ್ಟ ಪ್ರವೇಶಿಸಿದೆ. ಐಪಿಎಲ್ ಮೇಲೆ ಆಟಗಾರರ ಕಣ್ಣು: ಐಪಿಎಲ್ 13ನೇ ಆವೃತ್ತಿಯ ಆಟಗಾರರ ಹರಾಜು ಪ್ರಕ್ರಿಯೆ ಇನ್ನು ಕೆಲವೇ ದಿನಗಳಲ್ಲಿ ನಡೆಯಲಿರುವ ಹಿನ್ನೆಲೆಯಲ್ಲಿ ಉತ್ತಮ ಪ್ರದರ್ಶನ ನೀಡಲು ಆಟಗಾರರು ತುದಿಗಾಲಲ್ಲಿ ನಿಂತಿದ್ದಾರೆ. ಕರ್ನಾಟಕ ತಂಡದ ಯುವ ಆಟಗಾರ ದೇವದತ್‌ ಪಡಿಕ್ಕಲ್‌ ಹಾಗೂ ಹರಿಯಾಣದ ಹರ್ಷಲ್‌ ಪಟೇಲ್‌ ಮೇಲೆ ಐಪಿಎಲ್ ಫ್ರಾಂಚೈಸಿಗಳ ಕಣ್ಣು ನೆಟ್ಟಿದೆ. ಪಡಿಕ್ಕಲ್‌ 10 ಇನಿಂಗ್ಸ್‌ಗಳಿಂದ 461 ರನ್‌ ಪೇರಿಸಿದ್ದರೆ, ಹರ್ಷಲ್‌ 11 ಇನಿಂಗ್ಸ್‌ಗಳಿಂದ 340 ರನ್‌ಗಳ ಜತೆಗೆ 18 ವಿಕೆಟ್‌ ಸಹ ಕಬಳಿಸಿದ್ದಾರೆ. 16 ವಿಕೆಟ್‌ ಪಡೆದಿರುವ ಶ್ರೇಯಸ್‌ ಗೋಪಾಲ್‌ ಕರ್ನಾಟಕದ ಪರ ಗರಿಷ್ಠ ವಿಕೆಟ್‌ಗಳ ಸರದಾರನೆನಿಸಿದ್ದಾರೆ. ಕರ್ನಾಟಕಕ್ಕೆ ಮಯಾಂಕ್ ಬಲ: ಇಲ್ಲಿಯ ತನಕ ರಾಷ್ಟ್ರೀಯ ಸೇವೆಯಲ್ಲಿದ್ದ ಆರಂಭಿಕ ಬ್ಯಾಟ್ಸ್‌ಮನ್‌ ಮಯಾಂಕ್ ಅಗರ್ವಾಲ್‌ ಈಗ ಕರ್ನಾಟಕ ತಂಡದ ಸೇವೆಗೆ ಲಭ್ಯವಾಗಿರುವುದರಿಂದ ಬ್ಯಾಟಿಂಗ್‌ ಬಲ ಇಮ್ಮಡಿಗೊಂಡಿದೆ. ಏತನ್ಮಧ್ಯೆ, ಕೆಪಿಎಲ್‌ ಬೆಟ್ಟಿಂಗ್‌ ಹಗರಣಕ್ಕೆ ಸಂಬಂಧಿಸಿದಂತೆ ಆಟಗಾರರಿಗೆ ಬೆಂಗಳೂರು ಕ್ರೈಮ್‌ ಬ್ರಾಂಚ್‌ ಪೊಲೀಸರು ನೋಟಿಸ್‌ ನೀಡಿದ್ದಾರೆ. ಇದು ತಂಡದ ಮೇಲೆ ಯಾವ ಪರಿಣಾಮ ಬೀರಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2q5YDqM
