ಹೊಸದಿಲ್ಲಿ: ರಾಷ್ಟ್ರಪಿತ ಕೊಲೆಗಾರ ನಥುರಾಮ್‌ ಗೋಡ್ಸೆ ಬಗ್ಗೆ ನಾನು ನೀಡಿದ್ದ ಹೇಳಿಕೆಯನ್ನು ತಿರುಚಲಾಗಿದೆ ಎಂದು ಬಿಜೆಪಿ ಸಂಸದೆ ಶುಕ್ರವಾರ ವಾದಿಸಿದ್ದಾರೆ. ಅಷ್ಟೇ ಅಲ್ಲದೆ ತಮ್ಮನ್ನು ಭಯೋತ್ಪಾದಕಿ ಎಂದು ಕರೆದ ಸದನದ ಸದಸ್ಯರ ಹೇಳಿಕೆಗೆ ಆಕ್ಷೇಪವನ್ನೂ ವ್ಯಕ್ತಪಡಿಸಿದ್ದಾರೆ. ಬುಧವಾರದ ಸದನದಲ್ಲಿ ನಡೆಯುತ್ತಿದ್ದ ಚರ್ಚೆ ವೇಳೆ ಗೋಡ್ಸೆಯನ್ನು ಪ್ರಗ್ಯಾ ಸಿಂಗ್‌ ಠಾಕೂರ್‌ ದೇಶಭಕ್ತ ಎಂದು ಕರೆದಿದ್ದರು. ಈ ಸಂಬಂಧ ಸ್ಪಷ್ಟನೆ ನೀಡಿದ ಅವರು, “ಸಂಸತ್‌ನಲ್ಲಿ ನಾನು ನೀಡಿದ್ದ ಹೇಳಿಕೆಯನ್ನು ತಿರುಚಲಾಗಿದೆ. ದೇಶಕ್ಕೆ ಮಹಾತ್ಮಾ ಗಾಂಧಿ ನೀಡಿದ ಕೊಡುಗೆಯನ್ನು ನಾನು ಗೌರವಿಸುತ್ತೇನೆ,” ಎಂದಿದ್ದಾರೆ. ನಂತರ ತಮ್ಮ ಹೇಳಿಕೆಗೆ ಕ್ಷಮೆ ಕೋರಿರುವ ಅವರು, “ನನ್ನ ಹೇಳಿಕೆಯಿಂದ ನಾನು ಯಾರಿಗಾದರೂ ನೋವುಂಟು ಮಾಡಿದ್ದರೆ ನಾನು ವಿಷಾದಿಸುತ್ತೇನೆ ಮತ್ತು ಕ್ಷಮೆ ಕೋರುತ್ತೇನೆ,” ಎಂಬುದಾಗಿ ಗೋಡ್ಸೆ ಹೆಸರು ಹೇಳದೆಯೇ ಪ್ರತಿಕ್ರಿಯಿಸಿದರು. ಆಕೆ ಈ ಹೇಳಿಕೆ ನೀಡುತ್ತಿದ್ದಂತೆ ವಿರೋಧ ಪಕ್ಷಗಳು 'ಡೌನ್‌ ಡೌನ್‌ ಗೋಡ್ಸೆ' ಎಂದು ಘೋಷಣೆ ಕೂಗಿ ಗದ್ದಲ ಎಬ್ಬಿಸಿದ್ದಲ್ಲದೆ ಸಂಸತ್‌ನಿಂದ ಪ್ರಗ್ಯಾ ಠಾಕೂರ್‌ನ್ನು ಉಚ್ಛಾಟಿಸಬೇಕು ಎಂದು ಒತ್ತಾಯಿಸಿದವು.
ಕ್ಷಮೆ ಕೇಳುವ ವೇಳೆ ತಮ್ಮನ್ನು ಭಯೋತ್ಪಾದಕಿ ಎಂದು ಕರೆದ ‘ಸದನದ ಸದಸ್ಯರೊಬ್ಬರ’ ಮೇಲೆ ಕಿಡಿಕಾರಿದ ಪ್ರಗ್ಯಾ ಸಿಂಗ್‌ ಠಾಕೂರ್‌, “ಸದನದ ಸದಸ್ಯರೊಬ್ಬರು ನನ್ನನ್ನು ಭಯೋತ್ಪಾದಕಿ ಎಂದು ಉಲ್ಲೇಖಿಸಿದ್ದಾರೆ. ಇದು ನನ್ನ ಘನೆತಯ ಮೇಲಿನ ಆಕ್ರಮಣ. ನನ್ನ ಮೇಲಿನ ಯಾವುದೇ ಆರೋಪಗಳು ನ್ಯಾಯಾಲಯದಲ್ಲಿ ಸಾಬೀತಾಗಿಲ್ಲ,” ಎಂದರು. ಗುರುವಾರ ತಮ್ಮ ಟ್ಟೀಟ್‌ನಲ್ಲಿ ರಾಹುಲ್‌ ಗಾಂಧಿ ಪ್ರಗ್ಯಾ ಠಾಕೂರ್‌ರನ್ನು ಭಯೋತ್ಪಾದಕಿ ಎಂದು ಕರೆದಿದ್ದರು. "ಭಯೋತ್ಪಾದಕ ಗೋಡ್ಸೆಯನ್ನು ಭಯೋತ್ಪಾದಕಿ ಪ್ರಗ್ಯಾ ಠಾಕೂರ್‌ ದೇಶಭಕ್ತ ಎಂದು ಕರೆದಿದ್ದಾರೆ. ಭಾರತದ ಸಂಸತ್‌ ಇತಿಹಾಸದಲ್ಲಿ ಅತ್ಯಂತ ದುಃಖದ ದಿನ,” ಎಂಬುದಾಗಿ ಅವರು ಟ್ಟೀಟ್‌ ಮಾಡಿದ್ದರು. ಈ ಟ್ಟೀಟ್‌ಗೆ ಪ್ರಗ್ಯಾ ಸಿಂಗ್‌ ಠಾಕೂರ್‌ ಈ ಪ್ರತಿಕ್ರಿಯೆ ನೀಡಿದ್ದಾರೆ.
from India & World News in Kannada | VK Polls https://ift.tt/2pXwlOW
