ಹೊಸದಿಲ್ಲಿ: ಸತತ ವೈಫಲ್ಯಗಳಿಂದ ಕಂಗಾಲಾಗಿರುವ ಯುವ ವಿಕೆಟ್‌ಕೀಪರ್‌ ಬ್ಯಾಟ್ಸ್‌ಮನ್‌ , ಮ್ಯಾನೇಜ್ಮೆಂಟ್‌ ತಮ್ಮ ಮೇಲೆ ಇರಿಸಿರುವ ಭರವಸೆಗೆ ತಕ್ಕ ಆಟವಾಡಬೇಕು. ಇದು ಸಾಧ್ಯವಾಗದೇ ಇದ್ದಲ್ಲಿ ಸಂಜು ಸ್ಯಾಮ್ಸನ್‌ಗೆ ಅವಕಾಶ ಮಾಡಿಕೊಡಬೇಕು ಎಂದು ಮಾಜಿ ಕ್ರಿಕೆಟಿಗ ಯುವ ಆಟಗಾರನ ಕಿವಿ ಹಿಂಡಿದ್ದಾರೆ. ಭಾರತ ತಂಡ ಡಿಸೆಂಬರ್‌ನಲ್ಲಿ ಪ್ರವಾಸಿ ವಿರುದ್ಧ ಮೊದಲು 3 ಪಂದ್ಯಗಳ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ ಪಂದ್ಯವನ್ನಾಡಲಿದೆ. ಈ ಸರಣಿ ಪಂತ್‌ ಪಾಲಿಗೆ ಮಾಡು ಇಲ್ಲವೆ ಮಡಿ ಮಹತ್ವ ಪಡೆದುಕೊಂಡಿದ್ದು, ಇಲ್ಲಿ ಲಯ ಕಂಡುಕೊಳ್ಳದೇ ಇದ್ದರೆ ತಂಡದಿಂದ ಸ್ಥಾನ ಕಳೆದುಕೊಳ್ಳುವುದು ನಿಶ್ಚಿತ ಎಂದು ಲಕ್ಷ್ಮಣ್‌ ಭವಿಷ್ಯ ನುಡಿದಿದ್ದಾರೆ. " ತಮ್ಮ ಕಾಯ್ದಿರಿಸಲ್ಪಟ್ಟ ವಿಕೆಟ್‌ಕೀಪಿಂಗ್‌ ಬ್ಯಾಟ್ಸ್‌ಮನ್‌ ಎಂದು ಟೀಮ್‌ ಇಂಡಿಯಾ ಮ್ಯಾನೇಜ್ಮೆಂಟ್‌ ಈಗಾಗಲೇ ತನ್ನ ನಿಲುವು ಪ್ರಕಟಿಸಿಯಾಗಿದೆ. ಪಂತ್‌ಗೆ ಹಲವು ಅವಕಾಶಗಳನ್ನು ನೀಡಿಯಾಗಿದೆ. ಈ ಬಗ್ಗೆ ಅವರೊಟ್ಟಿಗೆ ಚರ್ಚಿಸಿದ್ದಾರೆ ಎಂದು ನಂಬಿದ್ದೇನೆ," ಎಂದು ಸ್ಟಾರ್‌ ಸ್ಪೋರ್ಟ್ಸ್‌ ಕಾರ್ಯಕ್ರಮದಲ್ಲಿ ವಿವಿಎಸ್‌ ಹೇಳಿದ್ದಾರೆ. "ಒಬ್ಬ ಆಟಗಾರ ತಂಡದ ಮ್ಯಾನೇಜ್ಮೆಂಟ್‌ ಮತ್ತು ಆಯ್ಕೆ ಸಮಿತಿ ತನ್ನ ಮೇಲಿಟ್ಟಿರುವ ಭರವಸೆಯನ್ನು ಕಾಯ್ದುಕೊಳ್ಳಬೇಕಾಗುತ್ತದೆ. ದುರದೃಷ್ಟವಶಾತ್‌ ಪಂತ್‌ ಅವರಿಂದ ಈ ನಿರೀಕ್ಷೆಯನ್ನು ಮೆಟ್ಟಿನಿಲ್ಲಲು ಸಾಧ್ಯವಾಗಿಲ್ಲ. ಆದರೂ ಅವರೊಬ್ಬ ಅಪ್ರತಿಮ ಆಟಗಾರ ಎಂಬುದರಲ್ಲಿ ಸಂಶಯವಿಲ್ಲ. ಅವರೊಬ್ಬ ವಿಶೇಷ ಪ್ರತಿಭೆಯುಳ್ಳ ಬ್ಯಾಟ್ಸ್‌ಮನ್‌ ಎಂದು ಈಗಲೂ ನಂಬುತ್ತೇನೆ. ತಮ್ಮ ಸ್ಫೋಟಕ ಬ್ಯಾಟಿಂಗ್‌ ಮೂಲಕ ಪಂದ್ಯದ ದಿಕ್ಕನ್ನೇ ಬದಲಾಯಿಸುವ ಸಾಮರ್ಥ್ಯ ಅವರಲ್ಲಿದೆ," ಎಂದು ಲಕ್ಷ್ಮಣ್‌ ವಿವರಿಸಿದ್ದಾರೆ. ಧೋನಿ ಬಳಿಕ ಎಲ್ಲಾ ಮಾದರಿಯ ಕ್ರಿಕೆಟ್‌ನಲ್ಲಿ ಭಾರತ ತಂಡದ ಮೊದಲ ಆಯ್ಕೆಯ ವಿಕೆಟ್‌ಕೀಪರ್‌ ಆಗಿ ಹೊರಹೊಮ್ಮಿದ್ದ ರಿಷಭ್‌ ಪಂತ್‌, ಮೊದಲಿಗೆ ಉತ್ತಮ ಪ್ರದರ್ಶನವನ್ನೇ ನೀಡಿದ್ದರು. ಆದರೆ, ಇದೇ ವರ್ಷ ನಡೆದ ವಿಶ್ವಕಪ್‌ ಟೂರ್ನಿ ಬಳಿಕ ಪಂತ್‌ ಪ್ರದರ್ಶನ ಕುಸಿದಿದ್ದು, ಅವರ ವಿರುದ್ಧ ಕಳಪೆ ಬ್ಯಾಟಿಂಗ್‌ ಮತ್ತು ವಿಕೆಟ್‌ಕೀಪಿಂಗ್‌ ಕುರಿತಾಗಿ ಸಾಕಷ್ಟು ಟೀಕೆಗಳು ಹರಿದಾಡುತ್ತಿವೆ. ಹೀಗಾಗಿ ಟೆಸ್ಟ್‌ ತಂಡದಲ್ಲಿ ಈಗಾಗಲೇ ತಮ್ಮ ಸ್ಥಾನವನ್ನು ಅನುಭವಿ ವಿಕೆಟ್‌ಕೀಪರ್‌ ವೃದ್ಧಿಮಾನ್‌ ಸಹಾ ಅವರಿಗೆ ಬಿಟ್ಟುಕೊಡುವಂತಾಗಿದೆ. ಸೀಮಿತ ಓವರ್‌ಗಳಲ್ಲಿ ತಂಡದಲ್ಲಿ ಮುಂದುವರಿದಿದ್ದಾರಾದರೂ, ಉತ್ತಮ ಪ್ರದರ್ಶನ ನೀಡಲೇಬೇಕೆಂಬ ಒತ್ತಡ ಅವರನ್ನು ಆವರಿಸಿದೆ. "ಪಂತ್‌ ಅದ್ಭುತ ಆಟಗಾರ. ಆದರೆ, ತಂಡದ ಆಡುವ 11ರ ಬಳಗದಲ್ಲಿ ತಮ್ಮ ಸ್ಥಾನ ಕಾಯ್ದುಕೊಳ್ಳುವ ಒತ್ತಡ ಅವರನ್ನು ಆವರಿಸಿದ್ದು, ಇದರಿಂದಾಗಿ ಅವರಿಂದ ನಿರೀಕ್ಷಿತ ಪ್ರದರ್ಶನ ಮೂಡಿಬರುತ್ತಿಲ್ಲ," ಎಂದು ಪಂತ್‌ ವೈಫಲ್ಯಕ್ಕೆ ವಿವಿಎಸ್‌ ಕಾರಣ ಕೊಟ್ಟಿದ್ದಾರೆ. ಐಪಿಎಲ್‌ ಬಳಿಕ ಧೋನಿ ವೃತ್ತಿ ಬದುಕು ನಿರ್ಧಾರ ಇನ್ನು ಟೀಮ್‌ ಇಂಡಿಯಾ ಸೇವೆಯಿಂದ ದೂರ ಉಳಿದಿರುವ ಅನುಭವಿ ಆಟಗಾರ ಎಂಎಸ್‌ ಧೋನಿ ಮುಂದಿನ ವರ್ಷ ಐಪಿಎಲ್‌ ವರೆಗೂ ಯುವ ಆಟಗಾರರಾದ ಸಂಜು ಸ್ಯಾಮ್ಸನ್‌ ಮತ್ತು ರಿಷಭ್‌ ಪಂತ್‌ ಅವರ ಪ್ರದರ್ಶನವನ್ನು ಗಮನಿಸಲಿದ್ದಾರೆ ಎಂದು ಲಕ್ಷ್ಮಣ್‌ ಹೇಳಿದ್ದಾರೆ. "ಪಂತ್‌ ಮತ್ತು ಸ್ಯಾಮ್ಸನ್‌ ಅವರ ಪ್ರದರ್ಶನವನ್ನು ತಾಳ್ಮೆಯಿಂದ ಧೋನಿ ವೀಕ್ಷಿಸಲಿದ್ದು, ಮುಂದಿನ ವರ್ಷ ಐಪಿಎಲ್‌ನಲ್ಲಿ ನೀಡುವ ಪ್ರದರ್ಶನದ ಬಳಿಕ ತಮ್ಮ ಮುಂದಿನ ನಿರ್ಧಾರ ಕೈಗೊಳ್ಳಲಿದ್ದಾರೆ. ಧೋನಿ ಐಪಿಎಲ್‌ ಸಲುವಾಗಿ ತಯಾರಿ ನಡೆಸುತ್ತಿದ್ದಾರೆ. ಈ ಹಿಂದಿನ ಆವೃತ್ತಿಗಳಂತೆ ಈಬಾರಿಯೂ ಸಿಎಸ್‌ಕೆ ಪರ ಅವರು ಮಿಂಚುತ್ತಾರೆಂಬ ವಿಶ್ವಾಸವಿದೆ. ಈ ಯುವ ಆಟಗಾರರು ತಮಗೆ ಸಿಗುವ ಅವಕಾಶ ಬಳಸಿಕೊಳ್ಳದೇ ಇದ್ದರೆ, ಐಪಿಎಲ್‌ ಬಳಿಕ ಟಿ20 ವಿಶ್ವಕಪ್‌ ತಂಡಕ್ಕೆ ಧೋನಿ ತಂಡ ಸೇರಲಿದ್ದಾರೆ," ಎಂದು ಲಕ್ಷ್ಮಣ್‌ ಹೇಳಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2L1hjza
