ಹೊಸದಿಲ್ಲಿ: ಎಲ್ಲರೂ ನೋ ಶೇವ್‌ ಇನ್‌ ನವೆಂಬರ್‌ ಎಂದೆಲ್ಲಾ ಜೋರಾಗಿ ಗಡ್ಡ ಬಿಟ್ಟು ಮೀಸೆ ತಿರುವುತ್ತಿದ್ದರೆ, ದಕ್ಷಿಣ ಆಫ್ರಿಕಾದ ಮಾಜಿ ದಿಗ್ಗಜ ಕ್ರಿಕೆಟಿಗ ಮಾತ್ರ ಮೀಸೆ ಮತ್ತು ಗಡ್ಡವನ್ನು ಅರ್ಧ ಬೋಳಿಸಿಕೊಂಡ ಫೋಟೊಗಳನ್ನು ತಮ್ಮ ಸೋಷಿಯಲ್‌ ಮೀಡಿಯಾ ಖಾತೆಗಳಲ್ಲಿ ಹಂಚಿಕೊಳ್ಳುವ ಮೂಲಕ ಆಶ್ಚರ್ಯ ಸೃಷ್ಠಿಸಿದ್ದಾರೆ. ಬುಧವಾರ ಇದ್ದಕ್ಕಿದ್ದಂಗೆ ತಮ್ಮ ಸೋಷಿಯಲ್‌ ಮೀಡಿಯಾ ಖಾತೆ ಮೂಲಕ ಜಾಕ್‌ ಕಾಲಿಸ್‌ ಅಭಿಮಾನಿಗಳಿಗೊಂದು ಅಚ್ಚರಿ ನೀಡಿದ್ದರು. ಅರ್ಧ ಗಡ್ಡ ಮೀಸೆ ಬೋಳಿಸಿಕೊಂಡ ತಮ್ಮ ಹೊಸ ಅವತಾರ ಪ್ರದರ್ಶಿಸಿದ್ದಾರೆ. "ಮುಂದಿನ ಕೆಲ ದಿನಗಳು ಬಹಳ ಕುತೂಹಲಕಾರಿಯಾಗಿರಲಿದೆ. ಎಲ್ಲವೂ ಒಂದು ಒಳ್ಳೆಯ ಉದ್ದೇಶ ಸಲುವಾಗಿ. ಮತ್ತು ಗಾಲ್ಫ್‌ ಅಭಿವೃದ್ಧಿಗಾಗಿ," ಎಂದು ಬರೆದುಕೊಂಡಿದ್ದಾರೆ. ದಕ್ಷಿಣ ಆಫ್ರಿಕಾದಲ್ಲಿ ಗೇಂಡಾಮೃಗಗಳನ್ನು ಉಳಿಸುವ ಸಲುವಾಗಿ 'ಸೇವ್‌ ದಿ ರೈನೊ' ಅಭಿಯಾನ ನಡೆಯುತ್ತಿದ್ದು, ಇದಕ್ಕೆ ಬೆಂಬಲಿಸಲು ಅರ್ಧ ಗಡ್ಡ ಮೀಸೆ ಬೋಳಿಸಿಕೊಳ್ಳಬೇಕು. ಈ ಮೂಲಕ ದೇಶದಲ್ಲಿ ಗೇಂಡಾಮೃಗಗಳ ಸಂಖ್ಯೆ ಹೆಚ್ಚಿಸಲು ಜಾಗೃತ್ತಿ ಮತ್ತು ದೇಣಿಗೆಯನ್ನೂ ಸಂಗ್ರಹ ಮಾಡಲಾಗುತ್ತಿದೆ. 'ಸೇವ್‌ ದಿ ರೈನೊ' ಯಾವುದೇ ಲಾಭಾಪೇಕ್ಷೆ ಇಲ್ಲ ಎನ್‌ಜಿಒ ಆಗಿದ್ದು, ಅಳಿವಿನಂಚಿನಲ್ಲಿರುವ ಪ್ರಾಣಿಯ ಉಳಿವಿಗಾಗಿ ಹೋರಾಟ ನಡೆಸುತ್ತಿದೆ. ಕ್ರಿಕೆಟ್ ಇತಿಹಾಸದಲ್ಲಿ ಸಾರ್ವಕಾಲಿಕ ಶ್ರೇಷ್ಠ ಆಲ್‌ರೌಂಡರ್‌ಗಳ ಸಾಲಿನಲ್ಲಿ ಅಗ್ರ ಸಾಲಿನಲ್ಲಿ ಗುರುತಿಸಿಕೊಳ್ಳುವ ದಕ್ಷಿಣ ಆಫ್ರಿಕಾದ ಸ್ಟಾರ್‌ ಜಾಕ್‌ ಕಾಲಿಸ್‌, ಹರಿಣ ಪಡೆಯ ಪರ 166 ಟೆಸ್ಟ್‌, 328 ಏಕದಿನ ಮತ್ತು 25 ಅಂತಾರಾಷ್ಟ್ರೀಯ ಟಿ20 ಪಂದ್ಯಗಳನ್ನು ಆಡಿದ್ದಾರೆ. ಟೆಸ್ಟ್‌ ಮತ್ತು ಏಕದಿನ ಎರಡರಲ್ಲೂ 10 ಸಾವಿರಕ್ಕೂ ಅಧಿಕ ರನ್‌ ಮತ್ತು 250 ಕ್ಕೂ ಹೆಚ್ಚು ವಿಕೆಟ್‌ಗಳನ್ನು ಪಡೆದ ವಿಶ್ವದ ಮೊತ್ತ ಮೊದಲ ಹಾಗೂ ಏಕೈಕ ಕ್ರಿಕೆಟಿಗ ಎಂಬ ವಿಶ್ವ ದಾಖಲೆ ಅವರ ಹೆಸರಿನಲ್ಲಿದೆ. ಕ್ರಿಕೆಟ್‌ನ ಮೂರೂ ವಿಭಾಗಗಳಲ್ಲಿ ಕಾಲಿಸ್‌ ಕ್ರಮವಾಗಿ 13,289, 11,579 ಹಾಗೂ 666 ರನ್‌ಗಳನ್ನು ಗಳಿಸಿದ್ದಾರೆ. ಜೊತೆಗೆ 292, 273 ಹಾಗೂ 12 ವಿಕೆಟ್‌ಗಳನ್ನು ಪಡೆದ ಸಾಧನೆಯನ್ನೂ ಮಾಡಿದ್ದಾರೆ. ಇನ್ನು ನಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದವರ ಪೈಕಿ ಕಾಲಿಸ್‌, 45 ಶತಕಗಳೊಂದಿಗೆ ದ್ವಿತೀಯ ಸ್ಥಾನದಲ್ಲಿದ್ದಾರೆ. 51 ಶತಕಗಳನ್ನು ದಾಖಲಿಸಿರುವ ಭಾರತದ ಬ್ಯಾಟಿಂಗ್‌ ಮಾಂತ್ರಿಕ ಸಚಿನ್‌ ತೆಂಡೂಲ್ಕರ್‌ ಈ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2L4Q8Ue
