- ಐತಿಚಂಡ ರಮೇಶ್‌ ಉತ್ತಪ್ಪ, ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರದ(ಮುಡಾ) ಬೃಹತ್‌ ಭೂ ಹಗರಣವೊಂದು ಬಯಲಿಗೆ ಬಂದಿದೆ. ಸಾವಿರಾರು ‘ಅನಾಥ ನಿವೇಶನ’ಗಳಿಗೆ ನಕಲಿ ದಾಖಲೆ ಸೃಷ್ಟಿಸಿ ಮಾರಾಟ ಮಾಡಿ ನೂರಾರು ಕೋಟಿ ರೂ. ಲಪಟಾಯಿಸಲಾಗಿದೆ! ಮಾಲೀಕರೇ ಇಲ್ಲದ 26,147 ಸೈಟ್‌ಗಳ ಪೈಕಿ 16,639ಕ್ಕೆ ದಾಖಲೆ ಸೃಷ್ಟಿಸಲಾಗಿದೆ. ಈ ಕುರಿತು ಉನ್ನತ ಮಟ್ಟದ ತನಿಖೆ ಕೋರಿ ನ್ಯಾಯಾಲಯದ ಮೊರೆ ಹೋಗಲು ಆರ್‌ಟಿಇ ಕಾರ್ಯಕರ್ತರೊಬ್ಬರು ನಿರ್ಧರಿಸಿದ್ದಾರೆ. ಈ ಹಿಂದೆ ಮುಡಾ ನಡೆಸಿದ ಕಾರ್ಯಾಚರಣೆಯಲ್ಲಿ, ಯಾರೂ ಹೊಂದಿಲ್ಲದ 26,147 ಸೈಟ್‌ಗಳು ಪತ್ತೆಯಾಗಿದ್ದವು. ಆದರೆ, ನಂತರ ಕೇವಲ 9508 ಸೈಟ್‌ ಗಳು ಮಾತ್ರ ಅನಾಥ ಎಂದು ಮುಡಾ ಹೇಳುತ್ತಿದೆ. ಅಂದರೆ, 16,639 ಸೈಟ್‌ಗಳು ಮಾಯವಾಗಿವೆ! ಆರ್‌ಟಿಐ ಕಾರ್ಯಕರ್ತ ಅದಿಶ್‌ ಸಾಗರ್‌ ಮಾಹಿತಿ ಹಕ್ಕು ಕಾಯಿದೆಯಡಿ ಮುಡಾದಿಂದಲೇ ಪಡೆದುಕೊಂಡಿರುವ ದಾಖಲೆಗಳು ಅನಾಥ ನಿವೇಶನಗಳ ಕರಾಳ ದಂಧೆಯನ್ನು ಬಯಲು ಮಾಡಿವೆ. ಬೆಳಕಿಗೆ ಬಂದಿದ್ದು ಹೇಗೆ?: ಈ ಹಿಂದೆ ಅನಾಥವಾಗಿದ್ದ ಕೆಲವು ನಿವೇಶನಗಳಲ್ಲಿ ಕಟ್ಟಡ ನಿರ್ಮಾಣವಾಗುತ್ತಿವೆ. ಅದರಲ್ಲಿ ವಿದ್ಯಾರಣ್ಯಪುರಂನ ನಿರ್ದಿಷ್ಟ ನಿವೇಶನವನ್ನು ಪ್ರಸ್ತಾಪಿಸಿ ಮುಡಾಕ್ಕೆ ಆರ್‌ಟಿಐ ಅರ್ಜಿ ಹಾಕಲಾಗಿದೆ. ಇದರೊಂದಿಗೆ 26,147 ಸೈಟ್‌ಗಳ ವಿವರವನ್ನೂ ಕೇಳಲಾಗಿತ್ತು. ಆದರೆ, ಒಂದೂವರೆ ವರ್ಷಗಳ ಕಾಲ ನೀಡಿರಲಿಲ್ಲ. ಇದೀಗ ವಿದ್ಯಾರಣ್ಯಪುರಂ ಸೈಟ್‌ನ ಮಾಹಿತಿ ಲಭ್ಯವಾಗಿದ್ದು, ಅದರಲ್ಲಿ ಅಕ್ರಮ ಆಗಿರುವುದು ಕಂಡುಬಂದಿದೆ ಎಂದು ಅದಿಶ್‌ ವಿಕಗೆ ಮಾಹಿತಿ ನೀಡಿದ್ದಾರೆ. ಮಾರಾಟ ಹೇಗೆ? ನಕಲಿ ದಾಖಲೆ ಇರುವ ಸೈಟ್‌ಗಳನ್ನು ವಂಚಕರು ಮೈಸೂರಿನವರಿಗೆ ಮಾರುವುದಿಲ್ಲ. ಬೆಂಗಳೂರು, ಮುಂಬಯಿ, ಹೈದರಾಬಾದ್‌, ಚೆನ್ನೈ ಮುಂತಾದ ನಗರಗಳ ಮಂದಿಗೆ ಇವುಗಳನ್ನು ಮಾರಾಟ ಮಾಡುತ್ತಾರೆ. ಥೇಟ್‌ ಮೂಲ ದಾಖಲೆಯಂತೆಯೇ ಇರುವುದರಿಂದ ಯಾರಿಗೂ ಅನುಮಾನ ಬರುವುದಿಲ್ಲ. ಈ ಸಂದರ್ಭ ಖರೀದಿ ಮಾಡುವವರಿಗೆ ಒಂದು ಷರತ್ತು ಹಾಕುತ್ತಾರೆ. ಮುಂದೆ ಮಾರಾಟ ಮಾಡಲು ಇಚ್ಛಿಸಿದರೆ ತಮ್ಮ ಮೂಲಕವೇ ವ್ಯವಹಾರ ನಡೆಸಬೇಕು, ಇಲ್ಲದಿದ್ದರೆ ನಾವೇ ಅಡ್ಡಗಾಲು ಹಾಕುತ್ತೇವೆ ಎಂಬ ಎಚ್ಚರಿಕೆಯನ್ನೂ ನೀಡುತ್ತಾರೆ. ಇದರಿಂದಾಗಿ ಎಲ್ಲಾ ಒಳ ವ್ಯವಹಾರ ಇವರ ನಡುವೆಯೇ ನಡೆಯುತ್ತದೆ. ಸರಕಾರಕ್ಕೆ ಕೋಟ್ಯಂತರ ರೂ. ನಷ್ಟ ಮೈಸೂರಿನಲ್ಲಿ ಅನಾಥ ನಿವೇಶನಗಳಿಗೆ ನಕಲಿ ದಾಖಲೆ ಸೃಷ್ಟಿಸಿ ಮಾರಾಟ ಮಾಡುತ್ತಿರುವ ಹಿನ್ನೆಲೆಯಲ್ಲಿ ಸರಕಾರದ ಬೊಕ್ಕಸಕ್ಕೆ ಕೋಟ್ಯಂತರ ರೂ. ನಷ್ಟವಾಗಿದೆ. ಅನಾಥ ನಿವೇಶನಗಳನ್ನು ಮಾರಾಟ ಮಾಡಿದ್ದಲ್ಲಿ ಕೋಟ್ಯಂತರ ರೂ.ಗಳ ಆದಾಯ ಬರುತ್ತಿತ್ತು. ಈ ಜಾಲದಲ್ಲಿ ರಿಯಲ್‌ ಎಸ್ಟೇಟ್‌, ಪ್ರಭಾವಿಗಳು, ಮುಡಾ ಅಧಿಕಾರಿಗಳು, ಉಪ ನೋಂದಣಿ ಇಲಾಖೆ ಅಧಿಕಾರಿಗಳು ಶಾಮೀಲಾಗಿದ್ದಾರೆ ಎನ್ನಲಾಗಿದೆ. ಯಾವುದು ಅನಾಥ ನಿವೇಶನ?30 ವರ್ಷಗಳ ಹಿಂದೆ ನಿವೇಶನ ಖರೀದಿಗೆ ಬೇಡಿಕೆ ಇರಲಿಲ್ಲ. ಆಗ ಮೈಸೂರು ನಗರದ ವಿವಿಧೆಡೆ ಮುಡಾ ಅಭಿವೃದ್ಧಿಪಡಿಸಿದ ಬಡಾವಣೆಗಳಲ್ಲೂ ನಿವೇಶನ ಖರೀದಿಸಲು ಯಾರೂ ಮುಂದೆ ಬರುತ್ತಿರಲಿಲ್ಲ. ಆಗ ಅರ್ಧಕ್ಕರ್ಧ ನಿವೇಶನಗಳು ಯಾರಿಗೂ ಮಂಜೂರಾಗದೆ ಖಾಲಿ ಉಳಿದಿದ್ದವು. ಅದನ್ನು ಮುಡಾ ಅನಾಥ ಸೈಟು ಎಂದು ಘೋಷಿಸಿದೆ. ದಾಖಲೆ ಸೃಷ್ಟಿ ಹೇಗೆ?ಅನಾಥ ನಿವೇಶನದ ಪಕ್ಕದ ಸೈಟ್‌ನ ದಾಖಲೆ ತೆಗೆಯಲಾಗುತ್ತದೆ. ಅದರಲ್ಲಿರುವ ಆಗಿನ ಮುಡಾ ಅಧಿಕಾರಿ ಹಾಗೂ ಸಬ್‌ ರಿಜಿಸ್ಟ್ರಾರ್‌ ಅಧಿಕಾರಿಗಳ ಸಹಿ, ಮುದ್ರೆ, ಹೆಸರನ್ನು ನಕಲಿ ಮಾಡುತ್ತಾರೆ. ಸತ್ತವರ ಹೆಸರಿಗೆ ಅದನ್ನು ಬದಲಾಯಿಸುತ್ತಾರೆ. ಸುಮಾರು 20 ವರ್ಷದ ಹಿಂದೆ ದಾಖಲೆಯಲ್ಲಿ ಮಾಲೀಕರ ಭಾವಚಿತ್ರ ಬರುತ್ತಿರಲಿಲ್ಲ. ಸತ್ತವರ ಡೆತ್‌ ಸರ್ಟಿಫಿಕೆಟ್‌ ನೀಡಿ ನಿವೇಶನವನ್ನು ಮಗನ ಹೆಸರಿಗೆ ಇಲ್ಲವೇ ಸಂಬಂಧಿಕರ ಹೆಸರಿಗೆ ಖಾತೆ ಮಾಡಿಕೊಡಲಾಗುತ್ತದೆ. 26,147 ಅನಾಥ ಸೈಟ್‌ಗಳೆಂದು ಗುರುತಿಸಲಾಗಿತ್ತು. ನಂತರ ದಾಖಲೆ ಪರಿಶೀಲಿಸಿದಾಗ 9,508 ಮಾತ್ರ ಯಾರಿಗೂ ಮಂಜೂರಾಗದವು, ಉಳಿದವುಗಳಿಗೆ ಮಾಲೀಕರಿದ್ದಾರೆ ಎಂದು ಕೈ ಬಿಡಲಾಗಿದೆ. ದಾಖಲೆಗಳ ಪರಿಶೀಲನೆ ನಡೆಯುತ್ತಿದೆ. - ಎಂ.ಕೆ. ಸವಿತಾ, ಮುಡಾ ಕಾರ್ಯದರ್ಶಿ
from India & World News in Kannada | VK Polls https://ift.tt/34u2NYa
