- ರಾಜೇಂದ್ರ, ಕೃಷ್ಣರಾಜನಗರ ಭತ್ತದ ಕಣಜ ಖ್ಯಾತಿಯ ಕೃಷ್ಣರಾಜನಗರ ತಾಲೂಕಿನಲ್ಲಿ ಈ ಬಾರಿ ಸಮೃದ್ಧ ಮಳೆಯಿಂದ ಉತ್ತಮ ಫಸಲು ಬಂದಿದ್ದು, ಕೊಯ್ಲು ಆರಂಭವಾದರೂ ಖರೀದಿ ಕೇಂದ್ರ ತೆರೆಯದೆ ದಲ್ಲಾಳಿಗಳ ಹಾವಳಿಯಿಂದ ಬೆಲೆ ನಷ್ಟ ಅನುಭವಿಸುವ ಆತಂಕ ಎದುರಾಗಿದೆ. ಹಲವು ವರ್ಷಗಳಿಗೆ ಹೋಲಿಸಿದರೆ ಈ ಬಾರಿ ಉತ್ತಮ ಬೆಳೆ ಬಂದಿದ್ದು, ರೈತರಲ್ಲಿ ಮಂದಹಾಸ ಮೂಡಿಸಿದೆ. ಹಾಗಾಗಿ ರೈತರು ಯಾವುದೇ ರಾಜಕೀಯ, ಇತರ ಕೆಲಸ ಬದಿಗಿಟ್ಟು ಭತ್ತದ ಗದ್ದೆಗಳತ್ತ ಮುಖ ಮಾಡಿದ್ದಾರೆ. ತಾಲೂಕಿನ ಒಟ್ಟು ಕೃಷಿ ಪ್ರದೇಶದಲ್ಲಿಶೇ.50ಕ್ಕೂ ಹೆಚ್ಚು ಭಾಗ ಬೆಳೆಯುವ ತಾಲೂಕಿನಲ್ಲಿ ಎಲ್ಲೆಡೆ ಭತ್ತದ ಕೊಯ್ಲು ಪ್ರಾರಂಭವಾಗಿದೆ. ಈಗಾಗಲೆ ಕೆಲವರು ಭತ್ತ ಬಡಿದು ಮನೆಗೆ ಸಾಗಿಸಿದ್ದಾರೆ. ರೈತರು ಕಷ್ಟಪಟ್ಟು ಬೆಳೆದ ಬೆಳೆಗೆ ನ್ಯಾಯಯುತವಾದ ಬೆಲೆಯಿಲ್ಲದೆ ಪರದಾಡುವಂತಾಗಿದ್ದು, ಭತ್ತದ ಕೊಯ್ಲು ಪ್ರಾರಂಭವಾದರೂ ಒಂದು ಮಾರಾಟ ಕೇಂದ್ರವೂ ಇಲ್ಲದೆ ಪರದಾಡುವಂತಾಗಿದೆ. ರೈತರು ಪ್ರತಿ ಬಾರಿ ದಲ್ಲಾಳಿಗಳ ಹಾವಳಿಗೆ ಒಳಗಾಗಿ ಬೆಳೆದ ಬೆಳೆಯಿಂದ ಯಾವುದೇ ಲಾಭ ಸಿಗದೆ ಪರದಾಡುವ ಸ್ಥಿತಿ ನಿರ್ಮಾಣವಾಗಿದೆ. ಮಧ್ಯವರ್ತಿಗಳ ಹಾವಳಿ: ತಾಲೂಕು ಕೇಂದ್ರದಲ್ಲಿ ತೆರೆಯಬೇಕೆಂದು ಮಾಡುತ್ತಿರುವ ಒತ್ತಾಯದ ಕಾರಣ ತಾತ್ಕಾಲಿಕ ಖರೀದಿ ಕೇಂದ್ರ ತೆರೆಯಲಾಗುತ್ತಿದ್ದರೂ ಕಾಯಂ ಖರೀದಿ ಕೇಂದ್ರ ಇಲ್ಲ. ಹಾಗಾಗಿ ಸಕಾಲಕ್ಕೆ ಹಣ ದೊರೆಯದ ಕಾರಣ ಕಷ್ಟಪಟ್ಟು ಬೆಳೆದ ರೈತರು ಮಧ್ಯವರ್ತಿಗಳ ಹಾವಳಿಯಿಂದ ಬೆಳೆದ ಬೆಳೆಗೆ ತಕ್ಕ ಬೆಲೆ ಇಲ್ಲದೆ ನಷ್ಟ ಅನುಭವಿಸುವಂತಾಗಿದೆ. ಸರಕಾರವಾಗಲಿ, ಅಧಿಕಾರಿಗಳಾಲಿ, ಜನಪ್ರತಿನಿಧಿಗಳಾಗಲಿ ರೈತರ ಕೂಗಿಗೆ ಧ್ವನಿಗೂಡಿಸದ ಕಾರಣ ಈ ಬೇಡಿಕೆ ಈಡೇರಿಲ್ಲ. ಬೆಳೆಗೆ ಮುಂಚೆ ರೈತರು ಗದ್ದೆ ಕೆಲಸಕ್ಕಾಗಿ ಹಣಕ್ಕಾಗಿ ಪರದಾಡುವ ಸಮಯದ ಲಾಭ ಪಡೆಯುವ ಮಧ್ಯವರ್ತಿಗಳ ಹಾವಳಿಗೆ ತುತ್ತಾಗುವಂತಾಗಿದೆ. ತಾಲೂಕಿನಲ್ಲಿ 1 ಲಕ್ಷ 30 ಸಾವಿರ ಟನ್‌ ಭತ್ತದ ಉತ್ಪಾದನೆ ಬರುವ ನಿರೀಕ್ಷಿಸಲಾಗಿದೆ. ಈ ಬಾರಿ ಹೆಚ್ಚಾಗಿ ಹೈಬ್ರೀಡ್‌ ಭತ್ತಗಳಾದ ವಿಎನ್‌ಆರ್‌, ಜ್ಯೋತಿ, ಎಂಟಿಯು 1010, ಎಂಟಿಯು 1001 ಬೆಳೆಯಲಾಗಿದೆ. ಇದರೊಂದಿಗೆ ಇತರ ತಳಿಗಳನ್ನು ರೈತರು ಬೆಳೆದಿದ್ದಾರೆ. ಅಲ್ಲದೆ ಭತ್ತ ಖರೀದಿ ಕೇಂದ್ರ ತೆರೆಯುವ ಬಗ್ಗೆ ಈಗಾಗಲೆ ಜಿಲ್ಲಾಧಿಕಾರಿಗಳ ಗಮನಕ್ಕೆ ತರಲಾಗಿದೆ. - ಶಶಿಧರ್‌, ಕೃಷಿ ಸಹಾಯಕ ನಿರ್ದೇಶಕರು, ಕೃಷ್ಣರಾಜನಗರ. ಭತ್ತದ ಖರೀದಿ ಕೇಂದ್ರ ತೆರೆಯುವ ಬಗ್ಗೆ ಸರಕಾರದಿಂದ ಅಧಿಸೂಚನೆಗೆ ಕಾಯುತ್ತಿದ್ದೇವೆ. ನ.30ರಂದು ರೈತರ ಸಭೆ ಕರೆಯಲಾಗುತ್ತಿದ್ದು, ಭತ್ತ ಕಟಾವು ಯಂತ್ರೋಪಕರಣ ಬಾಡಿಗೆ ನಿಗದಿ ಹಾಗೂ ಭತ್ತ ಖರೀದಿ ಕೇಂದ್ರ ತೆರೆಯುವ ಬಗ್ಗೆ ರೈತ ಮುಖಂಡರು ಹಾಗೂ ಮಿಲ್‌ ಮಾಲೀಕರೊಂದಿಗೆ ಚರ್ಚಿಸಲಾಗುವುದು. - ಅಭಿರಾಂ ಜಿ.ಶಂಕರ್‌, ಜಿಲ್ಲಾಧಿಕಾರಿ, ಮೈಸೂರು
from India & World News in Kannada | VK Polls https://ift.tt/2srx389
