ಹೈದರಾಬಾದ್: ಕೆಲಸ ಮುಗಿಸಿ ತನ್ನ ಫ್ಲಾಟ್‌ಗೆ ಮರಳುತ್ತಿದ್ದ 27 ವರ್ಷದ ಸರಕಾರಿ ಪಶು ವೈದ್ಯೆಯ ಮೇಲೆ ಅತ್ಯಾಚಾರವೆಸಗಿ ಕೊಲೆ ಮಾಡಿರುವ ಘಟನೆ ಇಲ್ಲಿನ ಗಛಿಬೌಲಿಯ ಶಂಶಾಬಾದ್‌ನಲ್ಲಿ ನಡೆದಿದೆ. ವೈದ್ಯೆಯನ್ನು ಕೊಲೆ ಮಾಡಿರುವ ದುಷ್ಕರ್ಮಿಗಳು ಶದ್ನಗರದ ಛಟನ್‌ಪಲ್ಲಿ ಅಂಡರ್‌ಪಾಸ್‌ನಲ್ಲಿ ಆಕೆಯ ದೇಹಕ್ಕೆ ಸೀಮೆ ಎಣ್ಣೆ ಸುರಿದು ಬೆಂಕಿ ಹಚ್ಚಿದ್ದಾರೆ. ಗುರುವಾರ ಬೆಳಿಗ್ಗೆ ಈ ಘಟನೆ ನಡೆದಿದ್ದು ದೇಶವನ್ನೇ ಬೆಚ್ಚಿ ಬೀಳಿಸಿದೆ. ಘಟನೆಗೆ ಸಂಬಂಧಿಸಿದಂತೆ ಪೊಲೀಸರು ಇಬ್ಬರು ಶಂಕಿತ ಆರೋಪಿಗಳನ್ನು ಬಂಧಿಸಿದ್ದಾರೆ. ಗುರುವಾರ ಮುಂಜಾನೆ 6 ಗಂಟೆ ಸುಮಾರಿಗೆ ಹಾಲಿನ ವ್ಯಾಪಾರಿ ಎಸ್‌ ಸತ್ಯಂ ರಾಷ್ಟ್ರೀಯ ಹೆದ್ದಾರಿ 44ರ ಅಂಡರ್‌ ಪಾಸ್‌ನಲ್ಲಿ ಸುಟ್ಟ ದೇಹವನ್ನು ನೋಡಿ ಗ್ರಾಮಸ್ಥರಿಗೆ ಮಾಹಿತಿ ನೀಡಿದ್ದರು. ನಂತರ ಗ್ರಾಮಸ್ಥರೆಲ್ಲಾ ಸೇರಿ ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಇದೊಂದು ಕೊಲೆ ಎಂಬುದನ್ನು ಖಚಿತಪಡಿಸಿಕೊಂಡ ಪೊಲೀಸರು ಸಹಜವಾಗಿ ನಾಪತ್ತೆಯಾದವರತ್ತ ಕಣ್ಣು ಹಾಯಿಸಿದ್ದರು. ಇದಕ್ಕೆ ಮೊದಲು ಗುರುವಾರ ರಾತ್ರಿ ಸರಕಾರಿ ಕಾಣೆಯಾಗಿರುವ ಬಗ್ಗೆ ಶಂಶಬಾದ್‌ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿತ್ತು. ಆಕೆಯ ಕುಟುಂಬಸ್ಥರು ಸ್ಥಳಕ್ಕೆ ಬಂದಾಗ ಮೃತ ದೇಹ ಗುರುತು ಹಿಡಿಯದಷ್ಟು ಸುಟ್ಟು ಕರಕಲಾಗಿತ್ತು. ಕೊನೆಗೆ ಆಕೆಯ ಶಾಲು ಮತ್ತು ಕುತ್ತಿಗೆಯಲ್ಲಿದ್ದ ಗಣಪತಿ ಲಾಕೆಟ್‌ನಿಂದ ಕುಟುಂಬಸ್ಥರು ಗುರುತು ಪತ್ತೆ ಹಚ್ಚಿದ್ದರು. ಸಂತ್ರಸ್ತೆಯ ಬೈಕ್‌ ಕೊತ್ತೂರ್‌ನಲ್ಲಿ ಪತ್ತೆಯಾಗಿದ್ದರೆ, ಫೋನ್‌ ಮತ್ತು ಪರ್ಸ್‌ ಇನ್ನೂ ನಾಪತ್ತೆಯಾಗಿದೆ. ಆಕೆಯ ಬೈಕ್‌ನ ನಂಬರ್‌ ಪ್ಲೇಟ್‌ ಕಾಣೆಯಾಗಿದ್ದು ಅತ್ಯಾಚಾರ ಎಸಗಿ ಕೊಲೆ ಮಾಡಿರುವ ಆರೋಪಿಗಳು ಬೈಕ್‌ನ್ನು ಬೇರೆಡೆ ಕೊಂಡೊಯ್ದು ಬಿಟ್ಟಿದ್ದಾರೆ. ಘಟನೆ ವಿವರ ಸಂತ್ರಸ್ತೆ ಗುರುವಾರ ಕೆಲಸಕ್ಕೆ ತೆರಳಿ ಮಧ್ಯಾಹ್ನ ಕಚೇರಿಯಿಂದ ವಾಪಸ್‌ ಬಂದಿದ್ದರು. ನಂತರ ಸಂಜೆ 5.30ರವೇಳೆಗೆ ತನ್ನ ಬೈಕ್‌ ಏರಿ ಗಛಿಬೌಲಿಯಲ್ಲಿರುವ ಆಸ್ಪತ್ರೆಯತ್ತ ಹೊರಟಿದ್ದರು. ಚರ್ಮದ ಸಮಸ್ಯೆ ಸಂಬಂಧ ಆಕೆ ವೈದ್ಯರನ್ನು ಭೇಟಿಯಾಗಬೇಕಿತ್ತು. ನಂತರ ಆಕೆ ಟೊಂಡುಪಲ್ಲಿ ಟೋಲ್‌ ಪ್ಲಾಜಾದಲ್ಲಿ ಬೈಕ್‌ ನಿಲ್ಲಿಸಿ ಶೇರ್‌ಡ್‌ ಕ್ಯಾಬ್‌ನಲ್ಲಿ ವೈದ್ಯರ ಬಳಿ ತೆರಳಿದ್ದರು. ಆಸ್ಪತ್ರೆಯಿಂದ ವಾಪಸ್‌ ಬರುವ ವೇಳೆ ಬೈಕ್‌ ಹತ್ತಿರ ಬಂದಾಗ ಇಬ್ಬರು ಆಗಂತುಕರು ಬಂದು ಬೈಕ್‌ ಟೈರ್‌ ಫ್ಲಾಟ್‌ ಆಗಿದೆ. ರಿಪೇರಿ ಮಾಡಿಕೊಡುವುದಾಗಿ ಹೇಳಿದ್ದರು. ಇವೆಲ್ಲಾ ಸಿಸಿಟಿವಿಯಲ್ಲಿ ದಾಖಲಾಗಿವೆ. ಬೈಕ್‌ನ್ನುತೆಗೆದುಕೊಂಡ ಹೋದ ಆ ಇಬ್ಬರು ವ್ಯಕ್ತಿಗಳು ಸ್ವಲ್ಪ ಸಮಯದ ಬಳಿಕ ವಾಪಸ್‌ ಬಂದು ಹತ್ತಿರದ ರಿಪೇರಿ ಅಂಗಡಿ ಮುಚ್ಚಲಾಗಿದ್ದು, ಇನ್ನೊಂದು ಅಂಗಡಿಗೆ ಒಯ್ದು ರಿಪೇರಿ ಮಾಡಿಸಿಕೊಡುವುದಾಗಿ ಹೇಳಿದ್ದರು. ನಂತರ ಆಕೆ ಅಲ್ಲಿಂದ ಸ್ವಲ್ಪ ದೂರ ನಡೆದು ಆ ಇಬ್ಬರಿಗಾಗಿ ಕಾಯುತ್ತಾ ನಿಂತಿದ್ದರು. ಈ ಸಂದರ್ಭದಲ್ಲಿ ಆಕೆಯ ತಂಗಿಗೆ ಕರೆ ಮಾಡಿ ತಾನು ಭಯ ಪಟ್ಟಿರುವುದಾಗಿ, ಇಲ್ಲಿ ಲಾರಿಗಳೆಲ್ಲಾ ನಿಂತಿದೆ ಎಂದು ಹೇಳಿದ್ದರು. ಇದಕ್ಕೆ ತಂಗಿ ಟೋಲ್‌ ಫ್ಲಾಜಾ ಬಳಿ ಹೋಗಿ ರಕ್ಷಣೆ ಪಡೆಯುವಂತೆ ಸೂಚಿಸಿದ್ದರು. ನಂತರ ಆಕೆ ಪುನಃ ಕರೆ ಮಾಡಿದಾಗ 9.44 ಸುಮಾರಿಗೆ ಫೋನ್‌ ಸ್ವಿಚ್‌ ಆಫ್‌ ಆಗಿತ್ತು. ಕೊನೆಗೆ ಕುಟುಂಬಸ್ಥರು ಹೋಗಿ ಗಾಬರಿಯಲ್ಲಿ ಪೊಲೀಸ್‌ ಠಾಣೆಯಲ್ಲಿ ನಾಪತ್ತೆ ದೂರು ದಾಖಲಿಸಿತ್ತು. ಆಕೆಯ ಮೃತ ದೇಹ ಮರು ದಿನ ಸಿಕ್ಕ ಬಳಿಕ ಶದ್ನಗರ್‌ ಪೊಲೀಸರು ಕೊಲೆ ಪ್ರಕರಣ ದಾಖಲಿಸಿಕೊಂಡಿದ್ದರು. 9 ಗಂಟೆ ಸುಮಾರಿಗೆ ಯುವತಿ ಟೋಲ್‌ ಪ್ಲಾಜಾದಲ್ಲಿ ನಡೆದಾಡುತ್ತಿರುವ ದೃಶ್ಯಗಳು ಸೆರಯಾಗಿದ್ದು ಆಕೆ ಕೊಲೆಯಾಗಿದ್ದು ಹೇಗೆ ಎಂಬುದು ಮಾತ್ರ ಇನ್ನೂ ತಿಳಿದು ಬಂದಿಲ್ಲ. ಈ ಬಗ್ಗೆ ಇನ್ನೂ ತನಿಖೆ ನಡೆಯುತ್ತಿದ್ದು, ಕೊಲೆಗಾರರಿಗಾಗಿ 10 ಪೊಲೀಸ್‌ ತಂಡಗಳು ಬಲೆ ಬೀಸಿವೆ. ಅಗತ್ಯ ಬಿದ್ದರೆ ಕೇಂದ್ರವೂ ನೆರವು ನೀಡಲಿದೆ ಎಂಬುದಾಗಿ ಗೃಹ ಖಾತೆ ರಾಜ್ಯ ಸಚಿವ ಕಿಶನ್‌ ರೆಡ್ಡಿ ಸಂಸತ್‌ ಭವನದ ಹೊರಗೆ ಪ್ರತಿಕ್ರಿಯಿಸಿದ್ದಾರೆ.
from India & World News in Kannada | VK Polls https://ift.tt/2Oyblb7
