- ಕೆಂಚೇಗೌಡ ಬೆಂಗಳೂರುಶಿವಾಜಿನಗರ: ಮುಸ್ಲಿಮರೇ ಬಹುಸಂಖ್ಯಾತರಾಗಿರುವ ಶಿವಾಜಿನಗರದಲ್ಲಿ19 ಅಭ್ಯರ್ಥಿಗಳು ಕಣದಲ್ಲಿದ್ದರೂ ಅಂತಿಮ ಹಣಾಹಣಿ ಕಾಂಗ್ರೆಸ್‌ನ ರಿಜ್ವಾನ್‌ ಅರ್ಷದ್‌ ಮತ್ತು ಬಿಜೆಪಿಯ ಎಂ. ಶರವಣ ಮಧ್ಯೆ ಕೇಂದ್ರೀಕೃತವಾಗುವ ಸಾಧ್ಯತೆ ಇದೆ. ಮುಸ್ಲಿಂ ಮತ ವಿಭಜನೆಯ ಲಾಭ ಪಡೆದು ಬಿಜೆಪಿಯ ಕಟ್ಟಾ ಸುಬ್ರಮಣ್ಯ ನಾಯ್ಡು 1999 ಮತ್ತು 2004ರಲ್ಲಿಗೆದ್ದಿದ್ದರು. ನಂತರ 2008, 2013 ಹಾಗೂ 2018ರಲ್ಲಿಕಾಂಗ್ರೆಸ್‌ನಿಂದ ಆರ್‌. ರೋಷನ್‌ ಬೇಗ್‌ ಸತತವಾಗಿ ಆರಿಸಿಬಂದಿದ್ದರು. ಶಾಸಕತ್ವಕ್ಕೆ ರಾಜೀನಾಮೆ ಕೊಟ್ಟ ಬೇಗ್‌ಗೆ ತಾತ್ವಿಕ ಸಂಘರ್ಷ ಮತ್ತಿತರ ಕಾರಣಕ್ಕೆ ‘ಕಮಲ’ ಪಾಳಯದೊಳಗೆ ಪ್ರವೇಶ ಸಿಗಲಿಲ್ಲ. ಅತಂತ್ರರಾದ ಬೇಗ್‌ ಪಕ್ಷೇತರರಾಗಿ ಸ್ಪರ್ಧಿಸಲು ಬಯಸಿದ್ದರೂ ಕೊನೇ ಕ್ಷಣದಲ್ಲಿಹಿಂದೆ ಸರಿದರು. ಬಿಜೆಪಿ ಕಳೆದೆರಡು ಚುನಾವಣೆಗಳಲ್ಲಿ ಅಭ್ಯರ್ಥಿಗಳಾಗಿದ್ದ ನಿರ್ಮಲ್‌ ಕುಮಾರ್‌ ಸುರಾನ ಹಾಗೂ ಕಟ್ಟಾ ಸುಬ್ರಮಣ್ಯ ನಾಯ್ಡು ಅವರನ್ನು ಬದಿಗೆ ಸರಿಸಿ ಬಿಬಿಎಂಪಿ ಮಾಜಿ ಸದಸ್ಯ ಎಂ. ಶರವಣ ಅವರಿಗೆ ಟಿಕೆಟ್‌ ನೀಡಿದೆ. ಕಾಂಗ್ರೆಸ್‌ನ ಹಿರಿತಲೆಗಳ ವಿರೋಧದ ನಡುವೆಯೇ ಸಿದ್ದರಾಮಯ್ಯ ಅವರು ರಿಜ್ವಾನ್‌ ಅರ್ಷದ್‌ಗೆ ಟಿಕೆಟ್‌ ತೆಗೆಸಿಕೊಟ್ಟಿದ್ದಾರೆ. ಜೆಡಿಎಸ್‌ನಿಂದ ತನ್ವೀರ್‌ ಅಹ್ಮದ್‌ ಮತ್ತು ಇತರ ಐವರು ಮುಸ್ಲಿಮರು ಪಕ್ಷೇತರರಾಗಿ ಕಣದಲ್ಲಿದ್ದಾರೆ. ಇಲ್ಲಿನ ಮುಸ್ಲಿಂ ಮತದಾರರ ಸಂಖ್ಯೆ 45 ಸಾವಿರ, 2ನೇ ಸ್ಥಾನದಲ್ಲಿರುವ ತಮಿಳು ಭಾಷಿಕರು 34,000. 30 ಸಾವಿರ ದಲಿತರು, 23 ಸಾವಿರ ಕ್ರೈಸ್ತರು, 9 ಸಾವಿರ ಜೈನ, 8 ಸಾವಿರ ಬಲಿಜರಿದ್ದಾರೆ. ನಾನಾ ಧರ್ಮದವರು ಇಲ್ಲಿರುವುದು ವಿಶೇಷ. ತಮಿಳು ಭಾಷಿಕರ ಮತ ಬ್ಯಾಂಕ್‌ ತಮ್ಮದೆಂದು ಬಿಜೆಪಿ ಬೀಗುತ್ತಾ ಗೆಲ್ಲುವ ಉತ್ಸಾಹದಲ್ಲಿದೆ. ಮುಸ್ಲಿಮರ ಜತೆ ಕ್ರೈಸ್ತರು, ದಲಿತರು, ಹಿಂದುಳಿದ ವರ್ಗಗಳ ಮತಗಳ ನಿರೀಕ್ಷೆಯಲ್ಲಿದೆ ಕಾಂಗ್ರೆಸ್‌. ಎಸ್‌ಡಿಪಿಐ ಹಾಗೂ ಜೆಡಿಎಸ್‌ ಸ್ಪರ್ಧಿಗಳು ಕಸಿಯುವ ಮತ ಯಾರದು ಎನ್ನುವುದರ ಆಧಾರದಲ್ಲಿಕಾಂಗ್ರೆಸ್‌ ಮತ್ತು ಬಿಜೆಪಿ ಅಭ್ಯರ್ಥಿಗಳ ಹಣೆಬರಹ ನಿರ್ಧಾರವಾಗಲಿದೆ. ರೋಷನ್‌ ಬೇಗ್‌ ಅವರು ಬಿಜೆಪಿ ಟಿಕೆಟ್‌ ವಂಚಿತರಾದರೂ ಕಮಲ ಪಕ್ಷದ ಬೆಂಬಲಕ್ಕೆ ನಿಂತಿದ್ದಾರೆ. ತಮ್ಮ ಹಿಂದೂ ಬೆಂಬಲಿಗರ ಮತಗಳನ್ನು ಬಿಜೆಪಿಗೆ ಹಾಗೂ ಮುಸ್ಲಿಂ ಮತಗಳನ್ನು ಎಸ್‌ಡಿಪಿಐ ಇಲ್ಲವೇ ಜೆಡಿಎಸ್‌ಗೆ ವರ್ಗಾಯಿಸುವ ತಂತ್ರಗಾರಿಕೆ ಪ್ರಯೋಗಿಸಿದ್ದಾರೆ ಎನ್ನಲಾಗಿದೆ. ಬೇಗ್‌ ಒತ್ತಾಸೆಯಂತೆ ಬೆಂಬಲಿಗ ಕಾರ್ಪೊರೇಟರ್‌ಗಳಾದ ಗುಣಶೇಖರ್‌ ಹಾಗೂ ನೇತ್ರಾವತಿ ಅವರನ್ನು ಬಿಜೆಪಿಗೆ ಸೇರಿಸಿದ್ದಾರೆ. ಬೇಗ್‌ ಅವರ ತಂತ್ರಗಾರಿಕೆ ಫಲಿತಾಂಶದ ದಿಕ್ಕು ನಿರ್ಧರಿಸಲಿದೆ. ಬಿಜೆಪಿಗೆ ಸಾಂಪ್ರದಾಯಿಕ ಮತಗಳ ಜತೆಗೆ ತಮಿಳು ಹಾಗೂ ದಲಿತ ಕ್ರೈಸ್ತರ ಮತಗಳು ಸಿಗುವ ಲೆಕ್ಕಾಚಾರವಿದೆ. ಆದರೆ ಅನಿರೀಕ್ಷಿತ ಅಭ್ಯರ್ಥಿಯಾಗಿರುವ ಶರವಣ ಗೆಲುವಿಗೆ ಬಿಜೆಪಿಯ ಎಲ್ಲರೂ ಪ್ರಾಮಾಣಿಕ ಶ್ರಮ ಹಾಕುತ್ತಿರುವ ಬಗ್ಗೆ ಅನುಮಾನವಿದೆ. ಬೇಗ್‌ ಅತಂತ್ರರಾದರೂ, ಬಿಜೆಪಿ ಬೆಂಬಲಕ್ಕೆ ನಿಂತಿರುವ ಬಗ್ಗೆ ಮುಸ್ಲಿಂ ಸಮುದಾಯದಲ್ಲಿಸಿಟ್ಟಿದೆ. ಅದೇ ರೀತಿ ಕಾಂಗ್ರೆಸ್‌ನ ರಿಜ್ವಾನ್‌ ಅರ್ಷದ್‌ಗೆ ಸ್ವಪಕ್ಷೀಯರು ಮತ್ತು ಸ್ವಧರ್ಮೀಯರೇ ತೊಡಕಾಗಿದ್ದಾರೆ. ರಿಜ್ವಾನ್‌ಗೆ ಟಿಕೆಟ್‌ ನೀಡಿಕೆ ವಿರೋಧಿಸಿದ್ದ ಬಹಳಷ್ಟು ಹಿರಿಯ ಕಾಂಗ್ರೆಸ್ಸಿಗರು ಪ್ರಚಾರಕ್ಕೆ ಬಂದಿಲ್ಲ. ತೆರೆಮರೆಯ ಈ ಲೆಕ್ಕಾಚಾರ ಹಾಗೂ ತಂತ್ರಗಾರಿಕೆಗಳು ಫಲಿತಾಂಶದ ಮೇಲೆ ಯಾವ ರೀತಿಯ ಪರಿಣಾಮ ಬೀರಲಿದೆ ಎಂಬುದು ಕುತೂಹಲ ಕೆರಳಿಸಿದೆ.
from India & World News in Kannada | VK Polls https://ift.tt/34vDCV7
