ಬ್ರಿಸ್ಬೇನ್: ಪ್ರಸಕ್ತ ಆಸ್ಟ್ರೇಲಿಯಾ ಪ್ರವಾಸದಲ್ಲಿರುವ ಕ್ರಿಕೆಟ್ ತಂಡವು ಎರಡು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಭಾಗವಹಿಸುತ್ತಿದೆ. ಆದರೆ ಮೊದಲ ಪಂದ್ಯದಲ್ಲಿ ಇನ್ನಿಂಗ್ಸ್ ಹಾಗೂ ಐದು ರನ್ ಅಂತರದ ಸೋಲನುಭವಿಸುವ ಮೂಲಕ ಹಿನ್ನಡೆಗೊಳಗಾಗಿದೆ. ಈ ನಡುವೆ ಆಸಕ್ತಿದಾಯಕ ಸುದ್ದಿಯೊಂದು ಹೊರಬಂದಿದ್ದು, ಕಾರು ಬಾಡಿಗೆ ಪಡೆಯಲು ನಿರಾಕರಿಸಿದ ಭಾರತೀಯ ಕ್ಯಾಬ್ ಚಾಲಕನಿಗೆ ಡಿನ್ನರ್ ಪಾರ್ಟಿ ಒದಗಿಸುವ ಮೂಲಕ ಪಾಕ್ ಆಟಗಾರರು ಗಮನ ಸೆಳೆದಿದ್ದಾರೆ. ಭಾರತೀಯ ರೆಸ್ಟೋರೆಂಟ್ಗೆ ಕರೆದುಕೊಂಡು ಹೋಗಲು ಪಾಕ್ ಆಟಗಾರರು ಬಯಸಿದ್ದರು. ಇದರಂತೆ ಭಾರತೀಯ ಐವರು ಪಾಕ್ ಆಟಗಾರರನ್ನು ರೆಸ್ಟೋರೆಂಟ್ಗೆ ಕರೆದುಕೊಂಡು ಹೋಗಿದ್ದರು. ಆದರೆ ಹೃದಯವಂತಿಕೆ ಮೆರೆದ ಭಾರತೀಯ ಕ್ಯಾಬ್ ಚಾಲಕ ಕಾರು ಬಾಡಿಗೆ ಸ್ವೀಕರಿಸಲು ನಿರಾಕರಿಸಿದ್ದರು. ಇದಕ್ಕೆ ಪ್ರತಿಯಾಗಿ ಭಾರತೀಯ ಚಾಲಕನಿಗೆ ಡಿನ್ನರ್ ಪಾರ್ಟಿ ನೀಡುವ ಮೂಲಕ ಪಾಕ್ ಆಟಗಾರರು ಗಮನ ಸೆಳೆದಿದ್ದಾರೆ. ಪಾಕಿಸ್ತಾನ ಕ್ರಿಕೆಟಿಗರಾದ ಶಾಹೀನ್ ಶಾ ಆಫ್ರಿದಿ, ಯಾಸೀರ್ ಶಾ ಹಾಗೂ ನಸೀಮ್ ಶಾ ಭಾರತೀಯ ಕ್ಯಾಬ್ ಚಾಲಕನ ಜತೆ ಭೋಜನ ಕೂಟದಲ್ಲಿ ಭಾಗಿಯಾದರು. ಪಾಕಿಸ್ತಾನ ಹಾಗೂ ಆಸ್ಟ್ರೇಲಿಯಾ ನಡುವೆ ಬ್ರಿಸ್ಬೇನ್ನ ಗಬ್ಬಾ ಮೈದಾನದಲ್ಲಿ ಪಂದ್ಯ ನಡೆಯುತ್ತಿದ್ದ ವೇಳೆಯಲ್ಲಿ ಈ ವಿವರವನ್ನು ಎಬಿಸಿ ರೆಡಿಯೋ ನಿರ್ವಾಹಕಿ ಅಲಿಸನ್ ಮಿಚೆಲ್ ಬಹಿರಂಗಪಡಿಸಿದ್ದಾರೆ. ಆಸ್ಟ್ರೇಲಿಯಾದ ಮಾಜಿ ವೇಗಿ ಮಿಚೆಲ್ ಜಾನ್ಸನ್ ಜತೆಗಿನ ವೀಕ್ಷಣಾ ವಿವರಣೆ ಸಂದರ್ಭದಲ್ಲಿ ಈ ವಿಚಾರವನ್ನು ಬಹಿರಂಗಪಡಿಸಿದ್ದಾರೆ. ಇಲ್ಲಿ ಗಮನಾರ್ಹ ಸಂಗಿತಿ ಏನೆಂದರೆ ಇದೇ ಭಾರತೀಯ ಮೂಲದ ವ್ಯಕ್ತಿಯ ಕ್ಯಾಬ್ನಲ್ಲಿ ಮಿಚೆಲ್, ಆಸ್ಟ್ರೇಲಿಯಾ ಹಾಗೂ ಪಾಕಿಸ್ತಾನ ನಡುವಣ ಮೊದಲ ಟೆಸ್ಟ್ ಪಂದ್ಯವನ್ನು ವೀಕ್ಷಿಸಲು ಸ್ಟೇಡಿಯಂ ತಲುಪಿದ್ದರು. ಈ ಸಂದರ್ಭದಲ್ಲಿ ಹೆಸರು ಹೇಳಲಿಚ್ಛಿಸದ ಭಾರತೀಯ ಕ್ಯಾಬ್ ಡ್ರೈವರ್ ವಿವರವನ್ನು ಬಹಿರಂಗಪಡಿಸಿದರು. ಗಡಿಯಾಚೆಗಿನ ಭಯೋತ್ಪಾದನೆಯಿಂದಾಗಿ ಹಾಗೂ ಪಾಕಿಸ್ತಾನ ನಡುವಣ ಸಂಬಂಧ ಹದೆಗೆಟ್ಟಿದೆ. ಕಾಶ್ಮೀರಕ್ಕೆ ನೀಡಲಾಗಿರುವ ಸಂವಿಧಾನದ ಪ್ರತ್ಯೇಕ 370ನೇ ವಿಧಿಯನ್ನು ತೆಗೆದು ಹಾಕಿರುವ ಹಿನ್ನಲೆಯಲ್ಲಿ ಭಾರತ ಜತೆಗಿನ ಎಲ್ಲ ದ್ವಿಪಕ್ಷೀಯ ಬಾಂಧವ್ಯಕ್ಕೆ ಪಾಕಿಸ್ತಾನ ಬಹಿಷ್ಕಾರ ಹಾಕಿದೆ. ಈ ಎಲ್ಲದರ ನಡುವೆ ಆಸ್ಟ್ರೇಲಿಯಾದಲ್ಲಿ ಭಾರತೀಯ ಮೂಲದ ಕ್ಯಾಬ್ ಡ್ರೈವರ್ ಹಾಗೂ ಪಾಕಿಸ್ತಾನ ಆಟಗಾರರು ಉತ್ತಮ ಬಾಂಧವ್ಯ ಮೆರೆದಿರುವುದು ಎಲ್ಲರ ಮೆಚ್ಚುಗೆಗೆ ಕಾರಣವಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2DaKjA2
