- ಎಂ.ನಂಜುಂಡಸ್ವಾಮಿ, ಮೈಸೂರು ಕರುನಾಡಿನಲ್ಲಿ ಕನ್ನಡ ಮಾತನಾಡುವವರ ಸಂಖ್ಯೆ ಕ್ಷೀಣಿಸುತ್ತಿದೆ ಎಂಬ ಕೂಗಿನ ನಡುವೆಯೇ ದೂರದ ದಿಲ್ಲಿ, ತಮಿಳುನಾಡು ಮತ್ತು ಆಂಧ್ರ ಪ್ರದೇಶದ ಮೂವರು ಕನ್ನಡ ಕಲಿತು ನಾಟಕದಲ್ಲಿ ಅಭಿನಯಿಸಲು ಸಜ್ಜಾಗಿದ್ದಾರೆ. ಕನ್ನಡ ಭಾಷೆ ಮತ್ತು ರಂಗಭೂಮಿಗೆ ಅನ್ಯ ಭಾಷಿಕರ ಕೊಡುಗೆ ಬಹಳಷ್ಟಿದೆ. ಅದು ನಿರಂತರವಾಗಿ ಮುಂದುವರಿಯುತ್ತಿದೆ ಎಂಬುದಕ್ಕೆ ಸಾಕ್ಷಿ '' ನಾಟಕದಲ್ಲಿ ಅಭಿನಯಿಸುತ್ತಿರುವ ದೆಹಲಿ ಮೂಲದ ಗೋಲ್ಸನ್‌, ತಮಿಳುನಾಡಿನ ಮೀನಾಕ್ಷಿ ಮತ್ತು ಆಂಧ್ರಪ್ರದೇಶದ ಪವನ್‌ ಮಿಟ್ಟಿ. ತಮ್ಮ ಮಾತೃಭಾಷೆ ಬೇರೆಯಾದರೂ ಕನ್ನಡದ ಮೇಲಿನ ಪ್ರೀತಿ ಮತ್ತು ಒಲವು ಮತ್ತು ರಂಗಭೂಮಿಯ ಪ್ರೋತ್ಸಾಹಕ್ಕೆ ಮನಸೋತಿದ್ದಾರೆ. ನಾಟಕದ ಕ್ಲಿಷ್ಟಕರ ಸಂಭಾಷಣೆಗಳನ್ನು ಸುಲಲಿತವಾಗಿ ಹೇಳುತ್ತಾರೆ. ಗಾಂಧೀಜಿ ಅವರ 150ನೇ ಜಯಂತ್ಯುತ್ಸವ ಪ್ರಯುಕ್ತ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ವಾರ್ತಾ ಇಲಾಖೆ, ಸಾರ್ವಜನಿಕ ಶಿಕ್ಷಣ ಇಲಾಖೆ ಸಹಯೋಗದಲ್ಲಿ ರಂಗಾಯಣದ ನೇತೃತ್ವದಲ್ಲಿ ನಡೆಯುತ್ತಿರುವ 'ಪಾಪು ಗಾಂಧಿ ಬಾಪು ಗಾಂಧಿ ಆದ ಕಥೆ' ನಾಟಕ ರಂಗಯಾತ್ರೆಯಲ್ಲಿ ಈ ಮೂವರು ಪ್ರಮುಖ ಆಕರ್ಷಣೆಯಾಗಿದ್ದು, ನಾಟಕದ ಪ್ರಮುಖ ಪಾತ್ರವನ್ನು ನಿರ್ವಹಿಸಲಿದ್ದಾರೆ. ಬಿಎ, ಬಿಕಾಂ ಮತ್ತು ಎಂಜಿನಿಯರಿಂಗ್‌ ಪದವಿ ಪಡೆದಿರುವ ಇವರು ರಂಗಭೂಮಿ ಒಲವಿನಿಂದ ರಂಗ ತರಬೇತಿ ಸಂಸ್ಥೆಯಲ್ಲಿ ಒಂದು ವರ್ಷ ಅವಧಿಯ ರಂಗ ತರಬೇತಿ ಪಡೆದುಕೊಂಡಿದ್ದು, ರಂಗಭೂಮಿಯನ್ನು ವೃತ್ತಿಯಾಗಿ ಪರಿಗಣಿಸಿದ್ದಾರೆ. ಗೋಲ್ಸನ್‌ನ ಗುಲ್ಕನ್‌ನಂತ ಕನ್ನಡ: ಗೋಲ್ಸನ್‌ ದೆಹಲಿ ವಿಶ್ವವಿದ್ಯಾಲಯದಲ್ಲಿ ಎಂಜಿನಿಯರ್‌ ಪದವಿ ಪಡೆದು, ಜೆಎನ್‌ಯು ವಿಶ್ವವಿದ್ಯಾಲಯದಲ್ಲಿ ರಂಗತರಬೇತಿ ಪಡೆದಿದ್ದಾರೆ. ಕಳೆದ ವರ್ಷದ ಪಾಪು ಗಾಂಧಿ ಬಾಪು ಗಾಂಧಿ ಆದ ಕಥೆ ನಾಟಕ ರಂಗಯಾತ್ರೆಯಲ್ಲಿ ಸೇರ್ಪಡೆಗೊಂಡರು. ಕೆಲ ತಿಂಗಳಲ್ಲೇ ಕನ್ನಡ ಕಲಿತು, ಅಭಿನಯಿಸಿ ಪ್ರೇಕ್ಷಕರಿಂದಲೂ ಮೆಚ್ಚುಗೆಗೆ ಪಾತ್ರವಾಗಿದ್ದರು. ಈಗ 2ನೇಯ ರಂಗಯಾತ್ರೆಯಲ್ಲಿ ಭಾಗವಹಿಸುತ್ತಿದ್ದಾರೆ. ನಮ್ಮ ಕಡೆ ರಂಗಭೂಮಿಗೆ ಅಷ್ಟಾಗಿ ಪ್ರೋತ್ಸಾಹವಿಲ್ಲ, ಹೀಗಾಗಿ ರಂಗಭೂಮಿಯಲ್ಲಿ ಬೆಳೆಯಬೇಕೆಂಬ ಉದ್ದೇಶದಿಂದ ಕರ್ನಾಟಕಕ್ಕೆ ಬಂದೆ. ಸ್ನೇಹಿತರ ಮೂಲಕ ವಿಷಯ ತಿಳಿದು ರಂಗಯಾತ್ರೆ ಸೇರ್ಪಡೆಯಾದೆ. ಸ್ನೇಹಿತರ ಸಹಾಯ ಹಾಗೂ ರಂಗಭೂಮಿಯ ಶಕ್ತಿಯಿಂದ ವರ್ಷದ ಅವಧಿ ಒಳಗೆ ಕನ್ನಡ ಕಲಿತೆ ಎಂದು ಅವರು ನಾಟಕ ಸಂಭಾಷಣೆ ಹೇಳಿದರು. ಮೀನಾಕ್ಷಿ: ಮೀನಾಕ್ಷಿ ಅವರು ಮೂಲತಃ ತಮಿಳುನಾಡಿನವರು ಆದರೂ ವ್ಯಾಸಂಗ ಮಾಡಿದ್ದೆಲ್ಲಬೆಂಗಳೂರಿನಲ್ಲೇ. ಬಿಎ ನಂತರ ರಂಗಭೂಮಿಯಲ್ಲಿ ತೊಡಗಿಸಿಕೊಂಡಿರುವ ಅವರು ಬೆಂಗಳೂರಿನ ಹಲವಾರು ತಂಡಗಳಲ್ಲಿ20ಕ್ಕೂ ಹೆಚ್ಚು ಕನ್ನಡ ನಾಟಕದಲ್ಲಿ ಅಭಿಯಿಸಿದ್ದಾರೆ. ಈಗ ಮೊದಲ ಬಾರಿಗೆ 'ಪಾಪು ಗಾಂಧಿ ಬಾಪು ಗಾಂಧಿ ಆದ ಕಥೆ' ನಾಟಕ ರಂಗಯಾತ್ರೆಯಲ್ಲಿ ಭಾಗವಹಿಸುತ್ತಿದ್ದಾರೆ. ಕನ್ನಡ ರಂಗಭೂಮಿಯಲ್ಲಿ ಕಲಿಯುವುದು ಸಾಕಷ್ಟಿದೆ. ಈಗ ಆರಂಭ ಹಂತದಲ್ಲಿದ್ದೇನೆ ನಾಟಕಗಳಲ್ಲಿ ಅಭಿನಯಿಸಿದ ಬಳಿಕ ನಾನು ಕನ್ನಡತಿಯೇ ಆಗಿದ್ದೇನೆ ಎಂದು ಮೀನಾಕ್ಷಿ ಸಂತಸ ವ್ಯಕ್ತಪಡಿಸಿದರು. ಪವನ್‌ ಮಿಟ್ಟಿ: ನಾನು ಆಂಧ್ರಪ್ರವೇಶದ ಕರ್ನೂಲ್‌ನಲ್ಲಿ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಪಡೆದು, ಉನ್ನತ ವ್ಯಾಸಂಗಕ್ಕಾಗಿ ಬೆಂಗಳೂರಿಗೆ ಬಂದೆ. ಬಿಡುವಿನ ಸಮಯದಲ್ಲಿ ನಾನು ನೋಡಿದ ನಾಟಕಗಳು ರಂಗಭೂಮಿಗೆ ಬರಲು ಪ್ರೇರೇಪಿಸಿದವು. ಬಳಿಕ ರಂಗ ತರಬೇತಿ ಪಡೆದು ರಂಗಯಾತ್ರೆಗೆ ಆಯ್ಕೆಯಾಗಿ ಪಾಪು ಗಾಂಧಿ ನಾಟಕದ ಸಾವಿರ ಪ್ರದರ್ಶನ ನೀಡಿದ್ದು, ಗಾಂಧಿ ಕುರಿತಾಗಿ ನನಗಿದ್ದ ಅಜ್ಞಾನ ತೊಲಗಿತು. ಕನ್ನಡ ಸಿಹಿಯಾದ ಭಾಷೆ. ನನಗಿಷ್ಟ, ಹೀಗಾಗಿ ಕನ್ನಡ ರಂಗಭೂಮಿ ಕೆಲಸ ಮಾಡಲು ಸಹಕಾರಿಯಾಯಿತು ಎಂದು ಪವನ್‌ ಮಿಟ್ಟಿ ತಿಳಿಸಿದರು. ರಂಗಭೂಮಿಯ ಶಕ್ತಿಯೇ ಹಾಗೇ, ಪರಿಣಾಮಕಾರಿಯಾಗಿ ಕಡಿಮೆ ಸಮಯದಲ್ಲಿ ಕಲಿಸುತ್ತದೆ. ಇವರನ್ನು ತರಗತಿಯಲ್ಲಿ ಕೂರಿಸಿ ಕನ್ನಡ ಕಲಿಸಿದ್ದರೆ ಇಷ್ಟು ಬೇಗ ಕಲಿಯಲು ಸಾಧ್ಯವಾಗುತ್ತಿರಲಿಲ್ಲ. ರಂಗಭೂಮಿಯಲ್ಲಿ ಸಂತಸದ ಕಲಿಕೆ ಇರುತ್ತದೆ. ಹೀಗಾಗಿ ಇವರೆಲ್ಲ ಕಡಿಮೆ ಸಮಯದಲ್ಲಿ ಕನ್ನಡ ಕಲಿತು. ಪ್ರಮುಖ ಪಾತ್ರಗಳನ್ನೇ ನಿರ್ವಹಿಸುತ್ತಿದ್ದಾರೆ. ಅದರಲ್ಲೂ ದೆಹಲಿಯ ಗೋಲ್ಸನ್‌ ಕೆಲ ತಿಂಗಳಲ್ಲೇ ಕನ್ನಡ ಕಲಿತು ಈಗ ಹಳಗನ್ನಡ ಡೈಲಾಗ್‌ ಹೇಳಬೇಕೆಂದು ಹಠ ಹಿಡಿದಿದ್ದಾನೆ. - ಶ್ರೀಪಾದ ಭಟ್ಟ, ಪಾಪು ಗಾಂಧಿ ಬಾಪು ಗಾಂಧಿ ಆದ ಕಥೆ ನಾಟಕದ ನಿರ್ದೇಶಕ ಮತ್ತು ಸಂಚಾಲಕ.
from India & World News in Kannada | VK Polls https://ift.tt/2q1XxME
